1. Dedi bummonisina 1 Tesalonika 5:11, kisalu mbi kinkinza befu boso tufueti vanga?

 NGIE wumana buela mioko kisalu ki kuludika nzo yi Kintinu muingi kubue yikindisa? Boti ngete, buna ngie wuntebuka moyo mayangi kisalu akiokio ki kutuadisa kibila kiawu kizitisa Yave. Vayi vadi kisalu kilutidi kena kisalu ki kuludika nzo yi Kintinu—kukindisa batu bankuizanga mu bibuangu abiobio tumbuongiminanga Yave. Ayi ḿba mawu mayindu mvuala Polo kaba mu thangu katuba mambu madi mu 1 Tesalonika 5:11, matangu mabongulu dilongi adidi.—Tanga.

2. Buidi dilongi adidi dinkuinza tusadisila?

² Mvuala Polo wuba kifuani kimboti mu matedi kukindisa bankaka, kibila nandi waba kukitulanga va kibuangu kiawu. Buidi tulenda landikinina kifuani kiandi bubu? (1 Koli. 11:1) Dilongi adidi, dinkuiza tusadisa kumona buidi tulenda sadisila zikhomba (1) bakindama mu mambu maphasi, (2) baba batu bantuadisanga ndembama ayi (3) bakindisa kiminu kiawu mu Yave.

3. Buidi mvuala Polo kamonisina mayindu mafuana mu matedi kisalu?

³ Mvuala Polo waba zolanga beni zikhomba. Bo naveka kaviokila mu mambu maphasi, diawu kavisila ziphasi zikhomba baviokila. Mvandi waba kukitulanga va kibuangu kiawu. Dedi, nandi waba khambuanga zimbongo ayi vaba tombulu kuvanga kisalu muingi kudukisa zitsatu ziandi ayi kusadisa mvandi zikhomba.  (Mava. 20:34) Diawu kaba vangilanga kisalu ki kutunga zitenda. Dedi, bo kavitila ku Kolinto, kiawu kisalu kitheti kavanga va kimueka na Akila ayi Prisca. Vayi kheti bobo, “kadika kisabala” nandi waba longanga basi Yuda ayi basi Ngeleko. Mvandi bo Sila ayi Timoteo bavitila, “mvuala Polo wubuela kukivana muingi kusamuna Diambu di Nzambi.” (Mava. 18:2-5) Bukiedika, mvuala Polo wuba mutu wufuana muingi kukindisa zikhomba. Kibila kasa bika ko mambu mankaka mantula nkaku mu diambu dilutidi nkinza, kusadila Yave. Diawu nandi kalubudila zikhomba ti ba kutsikikila ngolo mayindu mu ziphasi zi luzingu ayi mu zitsatu zi dikanda, bawu balenda banda “mbusa mambu malutidi nkinza”—kisalu kiawu kuidi Yave.—Fili. 1:10.

4. Buidi mvuala Polo ayi Timoteo bakindisila zikhomba?

⁴ Bo bazibula kimvuka kimona ku divula di Tesalonika, zikhomba batona kuviokila mu zikhuamusu. Batu ku divula beni bakanga mvuala Polo, Sila ayi zikhomba zinkaka ayi ba banata kuidi zimfumu zi luyalu. Bawu babe tenduka: “Batu ababa bamengi kulandakana minsiku mi Cesali.” (Mava. 17:6, 7) Mabanza mbi zikhomba zinkaka mu kimvuka bayiza ba mu kibila ki mambu amomo? Ḿba bankaka baba boma ayi batona kudekula kifuza kiawu mu kusadila Yave. Vayi mvuala Polo kasa bika ko mambu amomo matatamana kumonika. Ayi kheti nandi ayi Sila babika divula beni, vayi bavanga dioso diambu muingi kukindisa zikhomba. Mvuala Polo wusonikina zikhomba beni: “Tuku mufila Timoteo khomb’itu . . . , muingi ka mukindisa ayi ka mubomba mu matedi kiminu kinu muingi ni wumueka mu benu kalebakana mu kibila ki ziphasi.” (1 Tesa. 3:2, 3) Timoteo wuba mutu wufuana, kibila naveka wuviokila mu zikhuamusu ku divula kabutukila, ku Listila. Ayi nandi wumona phila mvuala Polo kakindisila kuna zikhomba. Kumona phila Yave ka basadisila, mawu mavana Timoteo lufiatu muingi kukindisa zikhomba ti mamoso mankuiza vioka kuandi buboti.—Mava. 14:8, 19-22; Ebe. 12:2.

5. Ndandu mbi Bryant kabaka mu lusadusu nkulutu kimvuka kamvana?

⁵ Mu phila mbi yinkaka mvuala Polo kakindisila zikhomba? Bo bavutuka ku divula di Listila, Yikoni ayi Antiokia, nandi ayi Balinabasi basola bakulutu mu kadika kimvuka.” (Mava. 14:21-23) Ayi bawu, bayiza ba tho yi mbombolo kuidi zikhomba mu kimvuka dedi bo bakulutu bubu bambombilanga zikhomba. Mu matedi lusadusu bakulutu bamvananga, tala mambu Bryant katuba: “Bo yidukisa 15,” di mimvu, tat’ama wu tuyekula bosi mam’ami mvandi wuvaikusu mu kimvuka. Mu thangu beni, yiba buka muana tsiana ayi yiba beni mu kiunda. Vayi kukoluka na Tony nkulutu kimvuka mu zikhutukunu ayi thangu zinkaka, matsadisa beni muingi yitatamana kuba mu mayangi kheti mu ziphasi yaba viokila. Nandi mvandi wuthangila matangu ma Minkunga 27:10 ayi wutubila kifuani ki Ezekiasi, wutatamana wukuikama kheti tat’andi kasa ba ko ntungulu wumboti kuidi nandi. Bukiedika mambu amomo makhindisa beni ayi maphanga kubaka makani ma kukota mu kisalu ki thangu ka thangu.” Diawu, bakulutu ba kimvuka, banu bakotuka muingi kusadisa bo badi buka Bryant bantomba kukuwa diambu dimboti di kuba kindisa.—Zinga. 12:25.

6. Mbi mvuala Polo kavanga muingi kukindisila zikhomba?

⁶ Muingi kukindisa zikhomba, mvuala Polo mvandi wu batebula moyo phila Yave kakindisila “dituti dinneni di zimbangi” mu thangu yikhulu muingi bakindama mu mambu maphasi. (Ebe. 12:1) Mu kuvisa binongo bi luzingu bi bisadi bi Yave bikuikama mu thangu  yikhulu, nandi wusadila binongo abiobio muingi kukindisa ayi kusadisa zikhomba batatamana kutsikika thalu’awu mu “divula di Nzambi yi moyo.” (Ebe. 12:22) Mawu mvandi mammonikanga bubu. Befu boso tumbakanga kindusulu bo tuntanga binongo bi bisadi bi Yave mu thangu yikhulu dedi, Ngideoni, Balaki, Davidi, Samueli ayi tutanga tulembu. (Ebe. 11:32-35) Mvandi bo tuntambulanga minkanda mimfumina ku kikulutu kitu, tunkuwanga binongo bi zikhomba babaka khindusulu mu kutanga binongo bi zikhomba bankuikamanga bubu, kheti bo bamviokila mu mambu maphasi.

7. Mbi ngie belonguka mu dilongi di mvuala Polo didi mu Loma 14:19-21

⁷ Tulenda kindisa zikhomba zitu, bo tumvanga mangolo muingi kutuadisa ndembama mu kimvuka. Buidi tulenda vangila mawu? Mu kukhambu bika mayindu maviakana tuidi mu diambu ma tuvasa. Mvandi mu kukhambu kuika bankaka bavangila mambu mu phil’itu, boti bansinlevula ko nsiku wu Kibibila. Dedi, tala kifuani mu phila mawu mamonikina mu thangu yikhulu. Mu kimvuka kiba ku Loma, muba basi Yuda ayi baklisto bakhambu ba basi Yuda. Mu thangu beni, batu babasa bue landakananga ko nsiku wu Mose mu matedi biuma bi kudia. (Malako 7:19) Diawu bawombo mu basi Yuda baba solanga kudia bioso kua bidia. Vayi bankaka baba tatamana kulandakana mambu maba mu nsiku. Mu phila ayoyo, kimvuka kiyiza ba mayindu mavasuka. Vayi mvuala Polo mu kuvisa nkinza wu kutatamana kuba ndembama, diawu kaba sonikina: “Bulutidi mboti mu khambu dia mbizi, ni mu khambu nua vinu, voti mu khambu vanga dioso diambu dilenda vanga khomb’aku kusumuka.” (Tanga Loma 14:19-21.) Nandi wusadisa zikhomba kumona buidi kuba mayindu maviakana kulenda tuadisila luvasanu mu kimvuka. Diawu nandi kabela wukubama muingi kubika tula zitsatu ziandi va theti ayi kubika vanga mambu malenda vanga zikhomba ziandi kusumuka. (1 Koli. 9:19-22) Mbi tulenda longuka? Dedi mvuala Polo, tuala kindisa to zikhomba ayi kutuadisa ndembama, befu kutula zitsatu zitu va khonzo.

8. Mbi mvuala Polo kavanga muingi kusadisa bimvuka biba ndembama?

⁸ Mvuala Polo wu tubikila kifuani kimboti mu kutatamana kutuadisa ndembama, kheti mu thangu bankaka bankhambu kikinina mayindu mitu mu mambu ma nkinza. Dedi, mu bimvuka binkaka mu sekulu yitheti, baklisto baba kuika zikhomba zi babakala bakhambu ba basi Yuda bazengusu ziyintu ziawu, muingi basi Yuda bankaka babika ku batubila bubi. (Ngala. 6:12) Mvuala Polo kasa kikinina ko mu diyindu beni, mvandi kasa kuika ko bankaka matadila mawu mu phil’andi. Vayi wubika muingi bapostulu ayi bakulutu ku Yelusalemi batadila mambu beni. (Mava. 15:1, 2) Ndandu mbi mawu matuadisa? Mawu masadisa baklisto batatamana kuba mu mayangi ayi bimvuka bitatamana kuba ndembama.—Mava. 15:30, 31.

9. Dedi mvuala Polo, buidi tulenda tuadisila ndembama?

⁹ Bo diambu dilenda manisa ndembama dimmonika, buidi tulenda landikinina kifuani ki mvuala Polo? Tulenda vangila mawu, mu kutomba zithuadusulu kuidi batu bo Yave kasola muingi kukieba bimvuka. Mvandi tulenda baka zithuadusulu zibongulu mu Kibibila, mu bilongulu voti mu zithuadusulu tuntambulanga mu nzila kimvuka ki Yave. Bo tuntsikika mayindu mu kulandakana ziawu, kubika kuandi mu phila befu tuntombila, tuala buela  mioko muingi kutuadisa ndembama mu kimvuka.

10. Phila mbi yinkaka mvuala Polo katuadisila ndembama mu kimvuka?

¹⁰ Phila yinkaka mvuala Polo katuadisila ndembama yidi mu kutsikika mayindu mandi mu zikhadulu zimboti zi zikhomba kubika kuandi mu zinzimbala ziawu. Dedi, mu nkanda mvuala Polo kasonikina basi Loma, nandi wutanguna mazina ma zikhomba ayi wutubila kheti khadulu yimueka yimboti mu kadika mutu mu bawu. Buidi tulenda landikinina kifuani kiandi? Tulenda vangila mawu, mu kutubilanga zikhadulu zimboti zi zikhomba zitu. Ayi bo tumvanga mawu, tuidi mu kubuela bibila muingi zikhomba zitu babuela kutuadisa ndembama ayi kukindisa kimvuka mu luzolo.

11. Buidi tulenda landikinina kifuani ki Polo, Balinabasi ayi Malako?

¹¹ Bukiedika ti baklisto bayonzuka mu kiphevi khumbu zinkaka balenda bakasana mambu? Ngete. Mawu mamonikina mvuala Polo ayi nkundi’andi wufikama Balinabasi. Bo baba kubama muingi kukuenda mu kisalu ki misioni, bawu baba mayindu maviakana boti bafueti nata Malako voti ndamba. Mu kibila akiokio, bawu basombula voti bayambila beni diawu bavambisinina zinzila. (Mava. 15:37-39) kheti bobo mvuala Polo, Balinabasi ayi Malako basa tatamana ko kuba kimbeni, vayi bavutula ndemba baba. Kibila bazaba nkinza widi wu kuba ndembama ayi kithuadi mu kimvuka. Diawu buviokila thangu, mvuala Polo wutubila beni buboti Balinabasi ayi Malako. (1 Koli. 9:6; Kolo. 4:10) Buidi tulenda landikinina kifuani kiawu? Mu kufika dedikisanga dioso kua diambu tube bakasana na khomba ayi mu kutsikika mayindu mu zikhadulu ziawu zimboti. Mu phila ayoyo, tuala tatamana kutuadisa ndembama ayi kithuadi.—Efe. 4:3.

12. Mambu mbi maphasi zikhomba zitu badi mu kuviokila?

¹² Bubu baklisto boso bamviokilanga mu mambu manthotanga kiminu kiawu. Bawombo ba kuba tubilanga bubi kuidi basi dikanda, kuidi bansalanga yawu voti bankotanga yawu kikola. Zikhomba zinkaka badi mu kutovuka mu kibila ki kimbevu kingolo voti badi mu kunuana nzingu wu mayindu ma kiunda. Bankaka tona babotama bamvingilanga beni tsukulu yi nza ayiyi. Befu tulenda kindisa zikhomba aziozio mu kukindisa kiminu kiawu mu Yave. Zikhomba baba mu bimvuka mu sekulu yitheti mvawu baviokila mu mambu amomo. Buabu tuemona mbi mvuala Polo kavanga muingi kukindisa zikhomba beni.

13. Buidi mvuala Polo kasadisila zikhomba baba vuezanga?

¹³ Mvuala Polo wusadila Diambu di Nzambi muingi kukindisa zikhomba. Dedi, mu thangu beni baklisto bawombo baba kuba vuezanga kuidi basi dikanda mu kuba kambanga ti bikhulu bi basi Yuda, bilutidi kena kinganga ki baklisto. Ayi bawu babasa bakanga ko mvutu muingi ku bavana. Vayi nkanda mvuala Polo kasonikina basi Ebeleo wukindisa beni zikhomba aziozio. (Ebe. 1:5, 6; 2:2, 3; 9:24, 25) Mu nkanda beni muba mayindu mafuana balenda sadila muingi kuvana mvutu kuidi batu baba kuba vuezanga. Bubu tulenda sadisa zikhomba bamviokila mu mambu ma phila ayoyo, mu kusadila bilongulu bibongulu mu Kibibila bilenda ku basadisa kubaka mimvutu mifuana muingi kukakidila mambu bankikininanga. Ayi bo matoko ba bavueza mu kukikinina ti vadi Mvangi wu biuma bioso, befu tulenda ku basadisa kubakula mambu mankinza mu mua zibuku A Vida—Teve um Criador? Voti A origem da vida—Cinco perguntas  que merecem resposta, mua zibuku aziozio, zinkuiza basadisa kusudikisa kibila bankikininanga ti vadi Mvangi wu biuma bioso.

14. Kheti mvuala Polo wuba wufietakana mu kisalu, mbi nandi kavanga?

¹⁴ Mvuala Polo wukindisa zikhomba muingi bamonisa luzolo luawu mu “mavanga.” (Ebe. 10:24) Kheti wuba beni wufietakana mu kisalu ki kusamuna ayi kulonga, nandi wutomba ziphila zi kusadisila zikhomba mu zitsatu ziawu kubika to kutubila mawu va munu. (Mava. 11:27-30) Dedi, bo zikhomba ku Yuda baba viokila mu nzala, mvuala Polo wuba sadisa mu zitsatu ziawu. (Ngala. 2:10) Mu kuvanga mawu, nandi wusadisa zikhomba kuba lufiatu ti Yave wala tatamana kuba kieba. Buidi tulenda landikinina kifuani kiandi? Bubu tulenda kindisa kiminu ki zikhomba zitu bo tunsadila thangu’itu, mangolo ayi luzabu luitu muingi ku babuela mioko bo bammonikina bivuka. Mvandi mu kuvananga minkhailu muingi kusadisa kisalu ki kusamuna kimvangama mu nza yimvimba. Kuvanga mambu amomo ayi mankaka, tuala sadisa zikhomba zitu kuba lufiatu ti Yave kalasa bakuekula ko.

15-16. Buidi tulenda kindisila zikhomba badi bavonga mu kiphevi?

¹⁵ Mvuala Polo kasa vonga ko kukindisa zikhomba baba bavonga mu kiphevi. Nandi wuvangila mawu, mu kuba monisa kiadi ayi mu kukolukila yawu mu phila yi kuba kindisa. (Ebe. 6:9; 10:39) Dedi, mu nkanda kasonikina basi Ebeleo, khumbu ziwombo nandi wusadila kikuma “befu” muingi kumonisa ti vaba tombulu nandi mvandi kulandakana dilongi ka bavana. (Ebe. 2:1, 3) Dedi mvuala Polo, tulendi vonga ko kukindisa zikhomba badi bavonga mu kiphevi. Buidi tulenda vangila mawu? Mu kuyolukanga yawu mu phila yilenda kuba kindisa, mu kuba vuanga nkinza ayi mu kuba monisa luzolo.

 ¹⁶ Mvuala Polo mvandi wukindisa zikhomba mu kuba tebula moyo ti Yave wummonanga kisalu kiawu kikuikama. (Ebe. 10:32-34) Befu mvitu tulenda vanga mawu bo tunkindisa khomba widi wuvonga mu kiphevi. Buidi tulenda vangila mawu? Dedi tulenda kunkuvula buidi kazabila kiedika voti tulenda kuntebula moyo phila Yave kama kunsadisilanga. Mvandi tulenda kuntebula moyo ti Yave kasa zimbakana ko luzolo nandi kamonisa mu dizina diandi ayi kalasa kunkuekula ko. (Ebe. 6:10; 13:5, 6) Masolo ma phila ayoyo, malenda kindisa zikhomba zitu ayi malenda kuba sadisa batatamana kuvanga kisalu kiawu kuidi Yave.

17. Mambu mbi tufueti tatamana kuvanga muingi kukindisa zikhomba?

¹⁷ Dedi bo mutu wuntunganga zinzo kanluta pisukilanga bumviokila thangu, befu mvitu tulenda pisuka kukindisa zikhomba zitu. Buidi? Tulenda tubila bifuani bi batu bakindama mu mambu maphasi muingi kusadisa zikhomba zitu babaka mangolo ayi bakindama mu ziphasi. Ayi muingi kutuadisa ndembama tulenda, tubilanga zikhadulu zimboti tummona kuidi zikhomba zitu. Boti diambu tube bakasana na khomba, tufueti fika dedikisa diawu muingi kutatamana kutuadisa ayi kuvutula ndembama. Ayi tulenda tatamana kukindisa kiminu ki zikhomba mu kusadila Kibibila, kuba vana lusadusu bantomba ayi kukindisa bo badi bavonga mu kiphevi.

18. Mbi tufueti ba bakubama muingi kuvanga?

¹⁸ Zikhomba bambuelanga mioko mu kisalu ki kubue kindisa zinzo zi Kintinu, bambanga beni mu mayangi. Befu mvitu tulenda baka mayangi bo tunsadisa kukindisa kiminu ki zikhomba zitu mu kimvuka. Tuzebi ti kheti bakindisidi nzo yawu yala tuluka kioso kua kilumbu. Vayi kisalu ki kukindisa zikhomba zitu kiala tuadisa ndandu mvu ka mvu. Diawu bika makani mitu maba ma “kutatamana kubombasana ayi kukindasana befu na befu.”—1 Tesa. 5:11.