1. Makani mbi mankinza kadika mutu mu befu kafueti baka?

 BATU bubu bafueti baka makani mankinza, matedi kubuela mioko nsua Yave kadi wu kuyala nza yimvimba voti bankuiza buela mioko Satana mbeni’andi yilutidi. Balendi tuba ko ti basi ko ni khonzo yimueka. Vayi moso kuandi makani bambaka, mawu mankuiza monisa boti bankuiza baka luzingu lu mvu ka mvu voti ndamba. (Matai 25:31-33, 46) Mu thangu ziphasi zingolo muawu bala tambudila kidimbu ki lutululu voti ki kuzinga mvu ka mvu.—Nzai. 7:14; 14:9-11; Yehe. 9:4, 6.

2. (a) Mbi buku yi Ebeleo 10:35-39 yi tukindisa kuvanga? (b) Buidi buku yi Nzaikusu yilenda ku tusadisila?

² Tanga Ebeleo. 10:35-39. Boti ngie wusola kubuela mioko luyalu lu Yave, buna makani ma nduenga wubaka. Bubu ngie widi phuila yi kusadisa bankaka kubaka momawu makani wubaka. Diawu muingi wuba sadisa, sadila mambu buku yi Nzaikusu yitulonga. Buku ayoyo yimmonisa mambu mala monikina baboso bammanga kubuela mioko luyalu lu Yave. Vayi mvandi yintubila lusakumunu baboso bambuelanga mioko luyalu lu Yave bala tambula. Diawu nkinza beni kulonguka buku ayoyo. Befu kuvanga mawu, tunkuiza kindisa makani mitu ma kutatamana bakuikama mu Yave. Mvandi tunkuiza sadila mambu tunlonguka muingi kusadisa bankaka babaka makani manduenga.

3. Mbi tunkuiza longuka mu dilongi adidi?

³ Mu dilongi adidi, tunkuiza baka mimvutu mi biuvu abibi: Lusakumunu mbi baboso bambuelanga mioko luyalu lu Nzambi bala tambula? Ayi mbi biala monikina baboso  bambuelanga mioko kibulu ki nganzi ki benga bantubila mu buku yi Nzaikusu?

4. Dingumba mbi di batu mvuala Yoane kamona va khonzo Yesu ku diyilu?

⁴ Mu kimona meso, mvuala Yoane wumona mangumba muadi mambuelanga mioko luyalu lu Yave ayi bala tambula lusakumunu lu kuzinga mvu ka mvu. Mu dingumba ditheti muidi 144.000 di batu basolu. (Nzai. 7:4) Bawu basolu va ntoto muingi bayala na Yesu ku diyilu. (Nzai. 5:9, 10; 14:3, 4) Mvuala Yoane wuba mona mu kimona meso baba batelama va khonzo Yesu mu Mongo Sioni.—Nzai. 14:1.

5. Mambu mbi mambelama kumonikina ndambu yi batu basolu badi mu dingumba di 144.000?

⁵ Tona mu thangu yikhulu, bawombo badi mu kusolu muingi kuba mu dingumba di 144.000 bala yala na Yesu. (Luka 12:32; Loma 8:17) Mu kimona meso beni, mvuala Yoane bankamba ti mua batu to mu dingumba beni diala yala na Yesu ku diyilu bala ba va ntoto mu bilumbu bitsuka. Dingumba adiodio, bala tambula “kidimbu ki lunungu” lu Yave ava ziphasi zingolo zitona. (Nzai. 7:2, 3; 12:17) Mu thangu ziphasi zingolo, bala banata ku diyilu muingi kuba va kimueka na bankaka badi mu dingumba beni bafuila mu lukuikumunu. Bawu bala yala na Yesu mu Kintinu ki Nzambi.—Matai 24:31; Nzai. 5:9, 10.

6-7. (a) Dingumba mbi dinkaka Yoane kamona ayi banani badi mu dingumba beni? (b) Kibila mbi mangumba ma mamuadi bafueti vuila nkinza mambu madi mu buku yi Nzaikusu kapu 7”?

⁶ Mu kimona meso beni, mvuala Yoane wubue mona nkangu wunkaka wunneni wu batu wo tulendi nunga ko kutanga ayi wuba wuviakana na dingumba di 144.000. (Nzai. 7:9, 10) Banani badi mu dingumba beni? Yoane bankamba: “Ababa bawu babedi mu ziphasi zingolo, bawu basukula minledi miawu ayi bakitula miawu miphembi mu menga ma Muana Dimemi.” (Nzai. 7:14) Bo dingumba adiodio bala vuka mu ziphasi zingolo, bawu bala zinga va ntoto ayi bala tambula lusakumunu luwombo.—Minku. 37:9-11, 27-29; Zinga. 2:21, 22; Nzai. 7:16, 17.

⁷ Kheti tuidi basolu muingi kuzingila va ntoto, bukiedika ti tufueti vua nkinza mambu madi mu Nzaikusu kapu 7? Ngete. Kibila yawu yala ba thangu yi mayangi kuidi mangumba ma mamuadi ma bisadi bi Nzambi! Tuala ba beni mu mayangi kuzaba ti tubuela mioko luyalu lu Yave. Mambu mbi mankaka buku yi Nzaikusu yitulonga matedi ziphasi zingolo?—Matai 24:21.

8. Buidi ziphasi zingolo ziala tonina ayi buidi batu bala bela?

⁸ Dedi bo tumuenini mu dilongi dibedi, zimfumu zi luyalu bambelama kubunga Babiloni yi Yinneni, yinsundula binganga bioso bi luvunu. (Nzai. 17:16, 17) Diambu adiodio, diawu diala ba thonono yi ziphasi zingolo. Vayi bukiedika ti mawu mala vanga batu kusadila Yave? Ndamba. Kibila Nzaikusu kapu 6, yimmonisa ti baboso bankhambu sadilanga Yave, bala tombila lusadusu kuidi zimfumu zi luyalu ayi kuidi batu ba lungosu ba nza ayiyi bandedikisa banga miongo. Bo bawu bala manga buela mioko Kintinu ki Nzambi, Yave wala kuba tadila banga zimbeni.—Luka 11:23; Nzai. 6:15-17.

9. Buidi dikabu di Yave bala bela disuasana mu thangu ziphasi zingolo ayi mambu mbi mala monika?

 ⁹ Bukiedika, bisadi bikuikama bi Yave bala ba nsika ayi bala ba disuasana mu thangu yi ziphasi zingolo. Bisadi bi Yave, diawu to dingumba diala manga kubuela mioko “kibulu ki nganzi.” (Nzai. 13:14-17) Lukuikumunu luawu, luala vanga zimbeni zi Yave kudasuka. Mu kibila akiokio, Lubundunu lu zitsi bala nuanisa dikabu di Yave diala ba va ntoto. Diawu Kibibila kibikudila mawu ti widi mvita wu Ngongi ayi Mangongi.—Yehe. 38:14-16.

10. Dedi bummonisina Nzaikusu 19:19-21, mbi Yave kala vanga bo bala nuanisa dikabu diandi?

¹⁰ Mbi Yave kala vanga bo bala nuanisa dikabu diandi? Nandi wu tukamba: “Yala monisa nganzi’ama.” (Yehe. 38:18, 21-23) Nzaikusu kapu 19 yimmonisa mambu mbi mala monika kuntuala. Yave wala fila Muan’andi Yesu, muingi kunuanina dikabu diandi ayi kununga zimbeni ziandi. Ayi Yesu wala kutikisa nkangu’andi wu zimbasi”—va kimueka na nkangu wu 144.000 di baklisto basolu. (Nzai. 17:14; 19:11-15) Buidi buala bela tsukulu yi mvita beni? Wawu wala bunga batu boso ba matingu ayi mangumba moso mambalukilanga Yave!—Tanga Nzaikusu. 19:19-21.

11. Mambu mbi mala monika mu mbanunu buku yi Nzaikusu?

¹¹ Yindula buidi luzingu luala bela bo baboso bakuikama bala vuka mu thangu bala bunga zimbeni zi Nzambi! Bukiedika, yala ba thangu yi mayangi! Kheti ku diyilu kuala ba mayangi bo Babiloni Yinneni yala tuluka, vayi vala ba kibila kinkaka kiala luta tuadisa mayangi. (Nzai. 19:1-3) Bukiedika, yidi mbanusunu yimboti yi buku yi Nzaikusu—“dikuela di Muana Dimemi.”—Nzai. 19:6-9.

12. Dedi bummonisina Nzaikusu 21:1, 2, thangu mbi dikuela di muana Dimemi diala vangimina?

¹² Thangu mbi dikuela beni diala vangimina? Baboso badi mu dingumba di 144.000 bala ba ku diyilu ava mvita wu Alimangedoni wutona. Vayi bakana ko yawu yala ba thangu yi dikuela di Muana Dimemi. (Tanga Nzaikusu 21:1, 2.) Bo mvita wu Alimangedoni wala vioka ayi zimbeni zioso zi Nzambi zia kubungu, bosi dikuela di Muana Dimemi diala vangama.—Minku. 45:3, 4, 13-17.

13. Mbi dikuela di Muana Dimemi dinsundula kuidi bo bankuela?

¹³ Mbi dikuela di Muana Dimemi dinsundula kuidi bo bankuela? Dedi bo dikuela dimbundisilanga dibakala ayi nkieto, dikuela adiodio mvandi diala bundisa Yesu Klisto, Ntinu ayi 144.000 di baklisto basolu bamfuanikisa “nkieto wunkuela.” Mawu mansundula ti nkungi awowo wu nkinza, wala ba thonono yi luyalu lumona luala yala ntoto mu 1.000 ki mimvu.—Nzai. 20:6.

14-15. Buidi buku yi Nzaikusu kapu 21 yindedikisila 144.000 di baklisto basolu? (Tala foto yidi va thonono levista.)

¹⁴ Mu buku yi Nzaikusu kapu 21 bandedikisa 144.000 di baklisto basolu banga divula dimboti bantedila “Yelusalemi Yimona.” (Nzai. 21:2, 9) Divula adiodio, disikimina mu 12 di mamanya ma lusersu basonika “mazina ma 12 di bapostolo ba Muana Dimemi.” Kibila mbi mvuala Yoane kayitukila mu mawu? Kibila dizina diandi diba mu dimanya dimueka. Bukiedika, luidi luaku lumboti beni!—Nzai. 21:10-14; Efe. 2:20.

 ¹⁵ Vasi ko divula dinkaka didedakana na divula adiodio bamfuanikisa. Kibila didi nzila batungila mu wola, 12 di mielu bavangila mu mamanya ma thalu, bibaka bitungulu mu mamanya ma thalu ayi didi zindilu zisulama. (Nzai. 21:15-21) Vayi vaba khambu mua diambu! Tala mambu mankaka mvuala Yoane kasonika: “Yisa mona ko kuna tempelo, kibila Yave Nzambi, Nkua Ngolo Zioso ayi Muana Dimemi bawu badi tempelo beni.” (Nzai. 21:22, 23) Bo bala ba ku divula dimona ku Yelusalemi, badi luaku lu kumona Yave. (Ebe. 7:27; Nzai. 22:3, 4) Mawu mammonisa ti Yave ayi Yesu bawu Tempelo yi divula beni.

16. Mbi batu bantumukinanga Yave bala tambula mu luyalu lu kivevi ki mimvu?

¹⁶ Nkinza beni nkieto bakanikisa kukuela kuba ku divula beni. Vayi baklisto badi kivuvu ki kuzinga va ntoto, bafueti vua nkinza divula beni. Mu thangu luyalu lu kivevi ki mimvu mu Kintinu ki Nzambi, divula Dimona di Yelusalemi diala tuala lusakumunu luwombo kuidi batu bala ba va ntoto. Lusakumunu beni luidi buka “muila wu nlangu wu luzingu.” Ayi mu zikhonzo zia ziwadi zi muila muidi “minti mi luzingu” midi meza madi “bilongo kuidi mimvila.” (Nzai. 22:1, 2) Batu boso bala kala va ntoto, bala baka luaku lu kutambula lusakumunu alolo. Malembi malembi batu bantumukinanga Yave, bala ba bavedila. Kualasa bue ba ko bimbevu, khienzu, bidilu ayi kiunda.—Nzai. 21:3-5.

17. Dedi bummonisina Nzaikusu 20:11-13 banani bala baka ndandu mu luyalu lu kivevi ki mimvu?

¹⁷ Banani bala tambula lusakumunu alolo lumboti? Baboso bala vuka mu mvita wu Alimangedoni ayi bana bo bala buta ku nza yimona. Vayi mu buku yi Nzaikusu kapu 20 mvandi mu nkanikisa ti baboso bafua bala vulubuka. (Tanga Nzaikusu 20:11-13.) Basonga ayi bakhambulu basonga—bala vulubuka ayi bala baka luaku lu kulonguka matedi Yave—bo bala vutuka kuzinga va ntoto. (Mava. 24:15; Yoa. 5:28, 29) Vayi mawu mansundula ti, baboso bala vulubuka mu luyalu lu kivevi ki mimvu? Ndamba. Baboso bamanga kusadila Yave ava bafua, balasa vulubuka ko. Kibila baba luaku lu kulonguka matedi Yave ayi kubalula mavanga mawu, vayi basa vanga ko mawu. Diawu  balasa kota ko ku paladizu.—Matai 25:46; 2 Tesa. 1:9; Nzai. 17:8; 20:15.

18. Buidi batu bala bela va ntoto ku tsuka 1.000 ki mimvu?

¹⁸ Ku tsuka 1.000 ki mimvu, baboso bala zinga va ntoto bala ba bavedila. Balasa bue tuadusu ko mu disumu batambakana kuidi Adami. (Loma 5:12) Kibila disumu beni diala mana. Baboso bala ba bavedila ku tsuka 1.000 ki mimvu.—Nzai. 20:5.

19. Mbi baboso bala nunga thotolo yi tsuka bala tambula?

¹⁹ Tuzebi ti Yesu wununga zithotolo zi Satana zitula lukuikumunu luandi va kingela. Nandi wutatamana wukuikama mu thangu ziphasi. Vayi bukiedika ti batu boso bala tatamana bakuikama mu thotolo yi tsuka Satana kala kuba thota? Kadika mutu mu befu wala vutula mvutu wu kiuvu akiokio bo Satana bala kumbasisa mu buloku ku tsuka 1.000 ki mimvu. (Nzai. 20:7) Vayi baboso bala tatamana bakuikama mu thotolo ayoyo yi tsuka, bala tambula luzingu lu mvu ka mvu ayi bala baka kiphuanza kikiedika. (Loma 8:21) Baboso bala manga kutumukina Yave, bala batulula mvu ka mvu va kimueka na nkadi’ampemba ayi ziphevi zimbi.—Nzai. 20:8-10.

20. Buidi mamuena kulonguka zimbikudulu zi kukuitukila zidi mu buku yi Nzaikusu?

²⁰ Buidi mamuena kulonguka bimona meso bi buku yi Nzaikusu? Masi ko mambu ma mayangi kuyimona mu tsundukulu yi zimbikudulu aziozio? Ayi mawu masi kukindisa ko kutumisa bankaka muingi babuela mioko mbuongimini yi kiedika yi Yave? (Nzai. 22:17) Bo tuntsikika mayindu ayi ntim’itu mu mambu amomo mala monika kuntuala, befu tutidi kuba momawu mabanza mo mvuala Yoane kaba bo katuba: “Amém! Yiza, Mfumu Yesu.”—Nzai. 22:20.