DILONGI 23
Matata—Sadisanu Bana Binu Bazola Yave
“Zola Yave Nzambi’aku mu ntim’aku woso, mu muel’aku woso ayi mu mayindu maku moso.”—MATAI 22:37.
NKUNGA 134 Bana Badi Nkhayilu yi Nzambi
MAMBU TUANLONGUKA *
1-2. Sudikisa buidi minsua mi Kibibila milenda buelimina tsundu mu thangu mambu mambaluka mu luzingu.
MU KILUMBU ki dikuela diawu, dibakala ayi nkieto bankuela banlandakananga buboti dilongi di Kibibila bamvanganga ditedi dikuela. Minsua beni mi Kibibila bantubilanga mu dilongi adiodio, midi minsua mizabakana. Vayi tona mu kilumbu beni nati ku ntuala, minsua amiomio mimbuelamanga tsundu mu luzingu lu batu bankuela. Kibila mbi? Kibila bawu bankuiza zingila mambu beni va dikuela diawu.
2 Mawu mvandi mammonikanga mu thangu bakuela bankuiza banga matata. Mu mimvu miwombo bawu bankuwanga beni malongi mantubila matedi bu kukonzudila bana. Vayi bo bambuta bana, minsua beni minkuiza buelamanga tsundu yiwombo mu bawu, kibila beka bana muingi kukonzula. Bukiedika, akiokio kidi kiyeku kinneni! Ayi bo mambu mambaluka mu luzingu luitu, buawu mvandi minsua mi Kibibila mio tuzebi minluta belanga beni nkinza. Kiawu kibila tufueti tangilanga Kibibila ayi kulandakana mambu Yave kakamba mintinu mi Isaeli bavanganga, kutanga ayi kuyindula mambu mandi “bilumbu bioso ” mu luzingu luawu.—Deute. 17:19.
3. Mbi tunkuiza tubila mu dilongi adidi?
3 Matata, benu muidi kiyeku kinneni mu kuba baklisto. Kiawu kitedi kulonga bana binu matedi Yave. Vayi bakana ko to mawu mantombulu. Ngie fueti sadisa bana baku bakuna luzolo lungolo mu Yave. Mbi wulenda vanga muingi kukuna mu mintima mi bana baku luzolo mu Yave? Dilongi adidi, dinkuiza tubila minsua minna mi Kibibila milenda sadisa matata. (2 Timo. 3:16) Mvandi tunkuiza mona ndandu mbi matata badi baklisto babaka mu kusadila minsua amiomio mi Kibibila.
MINSUA MINNA MI KIBIBILA MILENDA SADISA MATATA
Ngie kutombanga thuadusulu yi Yave ayi kuba ntungulu wumboti, ndandu mbi mawu mala tuadisa kuidi bana baku? (Tala matangu 4, 8)
4. Nsua mbi wutheti wulenda sadisa matata kukuna luzolo lu Yave mu mintima mi bana bawu? (Yakobi 1:5)
4 Nsua 1: Tomba Thuadusulu yi Yave. Dinda Yave ka kuvana nduenga yintombulu muingi wubaka bu kusadisila bana baku kukuna luzolo mu nandi. (Tanga Yakobi 1:5.) Yave Nzambi, nandi mutu wulutidi muingi ku kuvana malongi. Vayi vadi bibila binkaka muingi kuvanga mawu. Tuentubila bibila biodi. Kitheti, Yave nandi Tata wulutidi nduenga mu matedi kukieba bana. (Minku. 36:9) Kimuadi, malongi ma nduenga kamvananga, mantuadisanga to ndandu.—Yesa. 48:17.
5. (a) Mbi kimvuka ki Yave kimvananga muingi kusadisa matata? (b) Dedi bummonisina video, mbi ngie belonguka mu phila khomba Amorim ayi nkazi’andi bayonzudila bana bawu?
5 Mu nzila Diambu diandi ayi kimvuka kiandi, Yave wutuvananga bidia biwombo bi kiphevi bilenda sadisa matata kukonzula bana bawu mu luzolo lu Yave. (Matai 24:45) Dedi, ngie wulenda mona malongi mamboti mu kikhuku ki malongi kiaba kuizanga mu levista Despertai! kiba ntu diambu mu kiphutu “Ajuda Para as Familias,” malongi beni, mu thangu ayiyi madi mu khond’itu jw.org. Muawu mvandi muidi zivideo ziwombo, masolo ma biuvu ayi mimvutu ayi mvandi zidrama zilenda sadisa matata kusadila malongi ma Yave, bo bankonzula bana bawu. *—Zinga. 2:4-6.
6. Mambu mbi yaya Joe ayi nkazi’andi batuba matedi zithuadusulu bantambulanga mu nzila kimvuka ki Yave?
6 Matata mawombo batubila ndandu bambakanga mu lusalusu bantambulanga mu nzila kimvuka ki Yave. Yaya Joe widi tata wukikinina mambu amama: “Kukonzula bana batatu mu kiedika disi ko diambu diluelu. Minu ayi nkazi’ama khumbu ziwombo tunsambilanga muingi Yave ka tusadisa. Ayi bo vamvioka to mua thangu, befu tumbakulanga dilongi mu kilongulu voti video yilenda kutusadisa mu mambu tuidi mu kuviokila. Kutombanga thuadusulu yi Yave, mawu ma tusadisanga kuzaba mambu tufueti vanga.” Joe ayi nkazi’andi babakula ti malongi amomo ayi zivideo beni, ziba sadisanga kulonga bana bawu muingi babuela fikama Yave.
7. Kibila mbi didi diambu di nkinza matata kuba kifuani kimboti kuidi bana? (Loma 2:21)
7 Nsua 2: Longila mu kifuani kiaku. Bana bansikikanga beni thalu mu mambu matata mawu bamvanganga ayi bawu banzolanga beni kulandudila mambu bammonanga mu bawu. Bukiedika ti vasi ko tata widi wuvedila. (Loma 3:23) Vayi kheti bobo, matata madi nduenga bamvanganga mangolo muingi kuba kifuani kimboti kuidi bana bawu. (Tanga Loma 2:21.) Mu kutubila matedi bana bandi, tata yimueka wutuba: “Bawu badi buka esponja yintitikanga nlangu.” Nandi wubue tuba: “Bana bitu ba tukambanga mvandi boti kifuani kitu kisi ko nguizani na mambu tuba longa.” Diawu boti tuntomba bana bitu bazola Yave, luzolo luitu mu nandi lufueti ba lu ngolo ayi tufueti monisa luawu mu mavanga.
8-9. Mbi ngie belonguka mu mambu Andrew ayi Emma batuba?
8 Vadi ziphila ziwombo matata balenda longila bana bawu muingi bazola Yave. Tala mambu Andrew widi 17 di mimvu katuba: “Matata mami bambonisa nkinza wu kusambila. Kadika kilumbu, tat’ami waba sambilanga yami, kheti minu yaba kunkambanga ti yima vanga nsambu’ami, vayi kheti bobo nandi waba vanganga nsambu wunkaka. Yawu yiba phila kaba kuthebudilanga moyo mambu amama: ‘Ngie wulenda sambila kuidi Yave yosokua thangu ayi zikhumbu zio wutidi.’ Phila bawu baba tadilanga minsambu, matsadisa kuba momawu mayindu mu matedi nsambu. Diawu yimonanga ko phasi kusambila kuidi Yave ayi kuntadila ti nandi widi Tata yi luzolo.” Matata, tebukanganu moyo ti luzolo luinu mu Yave, luala sadisa bana binu mvawu kukuna luzolo lungolo mu nandi.
9 Tala kifuani kinkaka ki Emma. Bo tat’awu kaba yekula, wubika pholo yi zimbongo zi batu kaba deva muingi mam’awu kafuta. Emma wutuba: “Vaba zikhumbu mam’ami kaba kuazukanga beni mu matedi zimbongo. Vayi nandi waba tutebulanga moyo phila Yave kankiebilanga zitsatu zi bisadi biandi. Minu yimona ti nandi wuba lufiatu mu mambu amomo kaba longanga, kibila nandi waba sadilanga mawu.” Mbi tulenda longuka? Matata, longilanu bana binu mu kifuani kinu kimboti kheti bo lumviokila mu mambu ma phasi.—Ngala. 6:9.
10. Luaku mbi matata ku Isaeli baba muingi kukoluka na bana bawu? (Deutelonomi 6:6, 7)
10 Nsua 3: Yolukanga na bana baku thangu ka thangu. Yave wuvana nsua kuidi basi Isaeli muingi balonganga bana bawu matedi nandi. (Tanga Deutelonomi 6:6, 7.) Matata amomo baba luaku luwombo mu kilumbu muingi kukoluka na bana bawu ayi kukuna luzolo lu Yave mu mintima miawu. Dedi, bana ba babakala baba viokisanga thangu yiwombo na matata mawu bo baba vatanga mu tsola ayi bo baba tualanga mimfuna. Bana ba bakieto baba viokisanga beni thangu mu kusadisa zingudi kutunga bikhutu, kuvanga minledi ayi bisalu binkaka bi nzo. Matata ayi bana baba salanga va kimueka ayi baba luaku lu kutubila mambu amomo mankinza. Dedi, bawu baba luaku lu kutubila zikhadulu zi Yave, mamboti mandi ayi phila Yave kaba sadisilanga dikanda diawu.
11. Luaku mbi matata badi baklisto badi muingi kukoluka na bana bawu?
11 Bubu mambu mamana baluka. Mu zitsi ziwombo, matata ayi bana basi ko luaku lu kuviokisa thangu yiwombo va kimueka mu kilumbu. Kibila matata khumbu ziwombo badi ku kisalu ayi bana badi ku kikola. Mawu mamvanganga matata babika baka thangu yi kukoluka na bana. (Efe. 5:15, 16; Fili. 1:10) Vayi mbuongimini yi dikanda yimvananga luaku alolo. Alexandre widi ditoko wutuba: “Tat’ami wumvanganga thuadusulu yimboti yi mbuongimini yi dikanda ayi nandi kabikanga ko ni kiuma kimvela kimvanga kabika kuba yitu va kimueka. Bo mbuongimin’itu yimmana, tunsolulanga.”
12. Mambu mbi mfumu yi dikanda kafueti tebukanga moyo mu thangu kamvanga mbuongimini yi dikanda?
12 Boti ngie widi mfumu dikanda, mbi wulenda vanga muingi bana baku baluta zola mbuongimini yi dikanda? Ḿba wulenda longuka yawu buku yimona Baka Mayangi ma Mvu ka Mvu! Kibila buku beni, yinkuiza muvana luaku luwombo muingi kusolula. Boti wuntomba bana baku ba kuzibudila mabanza mawu, buna bika kusadila thangu luidi mu mbuongimini yi dikanda muingi kuba wonina voti kuba semba. Mvandi bika fika dasukanga mu thangu muana kamvanga voti kantuba diambu dikhambulu nguizani na minsua mi Kibibila. Vayi wuba tonda bo ba kuzibudila mintima miawu ayi ba kukamba mabanza mawu. Mvandi wuba kindisa ba tatamana kuvanga mawu mu khambu mona boma. Ngie wulenda nunga to kusadisa bana baku ngie kuvisa mabanza mawu.
Buidi matata balenda sadila bivangu bi Yave muingi kulonga bana bawu matedi zikhadulu zi Yave? (Tala lutangu 13)
13. Luaku mbi lunkaka matata badi muingi kusadisa bana bawu kufikama Yave?
13 Matata, tombanganu luaku mu kilumbu muingi kusadisa bana binu bafikama Yave. Lubika vingila to mu thangu muntubila mambu ma Kibibila muingi kuba longa matedi Nzamb’itu yi luzolo. Tala mambu ngudi bantedilanga Lisa katuba: “Befu tunsadisanga bana bitu muingi bamona kithuadi kidi Yave ayi bivangu biandi. Dedi mu thangu mbua’itu yimvanga diambu dimvanga bana bitu kuseva, befu tunsadilanga luaku alolo muingi kuba monisa ti Yave widi Nzambi yi mayangi ayi nandi wunzolanga luzingu lu batu luba lu mayangi dedi bo befu mvitu tuntombilanga.”
Matata, benu luzebi bakundi ba bana binu? (Tala lutangu 14) *
14. Kibila mbi didi diambu dinkinza matata kusadisa bana bawu kusola bakundi mu nduenga? (Zingana 13:20)
14 Nsua 4: Sadisa bana baku babaka bakundi bamboti. Diambu di Nzambi dinsudikisa buboti ti bakundi balenda kutu vukumuna—kuba kuandi mu mambu mamboti voti mambi. (Tanga Zingana 13:20.) Matata, benu luzebi bakundi ba bana binu? Benu lumana kuba mona voti kuviokisa yawu thangu va kimueka? Mbi mulenda vanga muingi kusadisa bana binu kusola bakundi banzolanga Yave? (1 Koli. 15:33) Benu mulenda kuba sadisa kusola mu nduenga bakundi, mu kutumisa bakundi bawu badi buboti mu kiphevi muingi baviokisa yinu thangu mu mambu ma kiphevi.—Minku. 119:63.
15. Mbi matata balenda vanga muingi kusadisa bana bawu kubaka bakundi bamboti?
15 Tala kifuani ki tata bantedila Tony. Nandi wunsudikisa mbi nandi ayi nkazi’andi bamvanganga muingi kusadisa bana bawu kubaka bakundi bamboti: “Mu mimvu miwombo tuntumisanga ku nzo zikhomba badi ziphunga ayi bikhulu biviakana. Befu tundianga yawu va kimueka ayi tuba tumisanga mu mbuongimin’itu yi dikanda. Luawu lumbanga luaku lumboti muingi kuzaba bo banzolanga Yave ayi ba kunsadilanga mu mayangi. Tumbakanga mvandi lusakumunu mu kuyamba ku nzo’itu minkengididi mi bimvuka, zi missionário ayi zikhomba zinkaka. Ntungulu’awu, kifuza kiawu ayi phila ba kivaninanga mu kisalu ki Yave, kintuadisanga beni ndandu kuidi bana bitu ayi ma kuba sadisanga kufikama Yave.” Matata, bika makani minu maba, kusadisa bana binu baba nkangulu wumboti.
BIKA KUSAKULA DIANA!
16. Boti muana bebaka makani ma kubika sadila Yave, mbi matata bafueti tebuka moyo?
16 Buabu boti ngie mavanga mamoso muingi kusadisa bana baku, vayi kheti bobo bawu basintomba ko kusadila Yave. Buidi wufuei tadila mawu? Bika kuyindula ti ngie wisi ko tata yimboti. Kibila Yave wuvana befu boso—kubunda mvandi bana—luaku lu kusola, boti tunkuiza nsadila voti ndamba. Diawu boti muan’aku bebaka makani ma kubika sadila Yave, bika kusakula diana, kibila kioso kua kilumbu nandi kalenda vutuka. Tebuka moyo kinongo ki muana wuzimbala. (Luka 15:11-19, 22-24) Nandi wutatuka zinzila zisonga, vayi kutsuka, nandi wuvutuka. Ḿba wulenda tuba: “Akiokio kidi kinongo to Yesu kata,” bukiedika ti mawu malenda monika mu luzingu lu lumbu ka lumbu?” Ngete! Mawu mamonikina ditoko bantedilanga Elie.
17. Buidi kifuani ki Elie kibe kukindisila?
17 Elie wutuba mambu amama mu matedi matata mandi: “Bawu bavanga mamoso muingi kukuna mu ntim’ami luzolo mu Yave ayi mu Diambu diandi, Kibibila. Vayi mu butoko buama, minu yitona kubayisa mambu bandongisa.” Elie wutona kunata luzingu lukhambulu fuana ayi kuvanga mambu mambi. Bosi wubika kubue zingila ku nzo matata mandi. Vayi kheti bobo, khumbu zinkaka nandi waba longanga bakundi bandi mambu ma Kibibila. Elie wutuba: “Bo yaba longanga bakundi bama matedi Yave, buawu yaba luta yindudilanga matedi nandi. Malembe malembe, kiedika ki Kibibila matata bakuna mu ntim’ami bo yiba kilezi—kitona kubue konzuka.” Buviokila thangu, Elie wuvutuka mu kimvuka. * Wulenda yindula mayangi matata mandi bamona bo balonga muan’awu tona mu bumuana muingi kazola Yave!—2 Timo. 3:14, 15.
18. Mayindu mbi ngie widi mu matata mamvanganga mangolo muingi kulonga bana bawu bazola Yave?
18 Matata, benu kiyeku kinneni mutambula. Kiawu kitedi kukonzula bana, bo bankuiza vingana muingi kunata mbuongimini yi Yave kuntuala. (Minku. 78:4-6) Ayi tuzebi ti, kiawu kidi kiyeku ki phasi. Diawu tuku mutonda mu ntima woso mu mangolo mumvanganga muingi kusadisa bana binu! Benu kutatamana kuvanga mamoso munnunga muingi kusadisa bana binu bazola Yave ayi kuba longa mu tsembulu ayi mu malongi mandi, mulenda ba lufiatu ti Tat’itu yi luzolo widi ku diyilu wala musakumuna beni.—Efe. 6:4.
NKUNGA 135 “Ba Nduenga Muan’ami”
^ Matata badi baklisto, banzolanga beni bana bawu. Bawu bamvanganga mamoso muingi kukieba zitsatu zioso zi bana bawu. Vayi bulutidi bamvanganga mamoso muingi kukuna mu mintima mi bana bawu luzolo mu Yave. Mu dilongi adidi, tunkuiza tubila minsua minna mi Kibibila milenda sadisa matata kununga kiyeku akiokio.
^ Tala mu jw.org video yintuba Batulonga Kuidi Yave bu Kukiebila Dikanda Ditu.
^ Tala mvandi dilongi didi ntu diambu “A Biblia Muda a Vida das Pessoas” mu Kibanga ki Nsungi 1, Ngonda Yinna, 2012.
^ MAMBU MADI MU FOTO: Muingi kuzaba buboti muan’andi ayi bakundi ba muan’andi, tata wunta bola yi mioko na muana ayi bakundi ba muan’andi.
