DILONGI 22
Nduenga Yintuadisanga Luzingu Luitu
“Yave nandi wumvananga nduenga.”—ZINGA. 2:6
NKUNGA 89 Yuwa, Tumamana, ayi Baka Lusakumunu
MAMBU TUANLONGUKA *
1. Kibila mbi befu tuntombila nduenga yi Nzambi? (Zingana 4:7)
BOTI ngie wumana baka makani mankinza mu luzingu, buna ngie wusambila muingi kudinda nduenga—yi kubakila makani beni. (Yako. 1:5) Ntinu Salomo wusonika: “Nduenga kiawu kiuma kilutidi nkinza.” (Tanga Zingana 4:7.) Vayi Salomo kabasa tubila ko to yoso kuandi nduenga. Nandi waba tubila nduenga yimfuminanga kuidi Yave Nzambi. (Zinga. 2:6) Vayi bukiedika ti nduenga yi Nzambi yilenda ku tusadisa mu mambu maviakana tulenda viokila mu bilumbu bitu? Ngete, yilenda ku tusadisa dedi bo tunkuiza muena mu dilongi adidi.
2. Buidi tulenda bakila nduenga yikiedika?
2 Phila tulenda bakila nduenga yidi mu kulonguka ayi kusadila malongi ma batu buadi baba beni bazabakana ayi baba kuba kinzikanga mu kibila ki nduenga baba. Theti tunkuiza tubila kifuani ki Salomo. Kibibila kintuba ti “Nzambi wuvana Salomo nduenga ayi phisulu mu kitesu kiwombo.” (1 Minti. 4:29) Kimuadi tunkuiza tubila kifuani ki Yesu, mutu wulutidi nduenga mazinga va ntonto. (Matai 12:42) Tala mambu Kibibila kibikula mu matedi Yesu: “Ayi phevi yi Yave yala ba yandi, Phevi yi nduenga ayi yi phisulu.”—Yesa. 11:2.
3. Mbi tuentubila mu dilongi adidi?
3 Mu kusadila nduenga Nzambi kaba vana, Salomo ayi Yesu, bavana malongi ma nduenga mu mambu mawombo mankinza ma luzingu luitu. Mu dilongi adidi, tuentubila mambu matatu: Kuba mayindu mafuana mu matedi zimbongo, kisalu ayi mu befu veka.
MAYINDU MAFUANA MU MATEDI ZIMBONGO
4. Mu matedi busina, disuasana mbi Salomo ayi Yesu baba?
4 Salomo wuba busina buwombo ayi waba natanga luzingu lu kimvuama. (1 Minti. 10:7, 14, 15) Vayi mu matedi Yesu, nandi kasa ba ko kimvuama ayi kasa tungisa ko ni nzo. (Matai 8:20) Vayi kheti bobo, baba buadi baba mayindu mafuana mu matedi busina, kibila ndueng’awu yifumina kuidi mutu wumueka to—Yave Nzambi.
5. Mayindu mbi mafuana Salomo kaba mu matedi zimbongo?
5 Salomo wuzaba ti zimbongo zilenda vana “lukiebu.” (Mpovi 7:12) Kibila befu kuba zimbongo, tulenda dukisa zitsatu zitu ayi kusumba biuma tuntomba. Vayi kheti wuba busina buwombo, Salomo wuzaba ti vadi kiuma kinkaka kilutidi nkinza kena zimbongo. Dedi nandi wusonika: “Kuvanga dizina dimboti [voti kuba wuzabakana mu phila yimboti,” nota.] kulutidi kena kimvuama.” (Zinga. 22:1) Salomo mvandi wumona ti batu badi beni zimbongo, basi ko mayangi makiedika mu biuma bio badi. (Mpovi 5:10, 12) Ayi nandi wutuba tubika tula lufiatu luitu mu zimbongo, kibila ziawu zilenda zimbala mu thinu.—Zinga. 23:4, 5.
Bukiedika ti phila tuntadila biuma bi nza, ku tusadisanga kutula Kintinu ki Nzambi va theti mu luzingu luitu? (Tala matangu 6-7) *
6. Mayindu mbi mafuana Yesu kaba mu biuma bi kinsuni? (Matai 6:31-33)
6 Yesu wuba mayindu mafuana mu matedi biuma bi kinsuni. Nandi waba kuangalalanga mu kudia ayi mu kunua. (Luka 19:2, 6, 7) Dedi, mu mangitukulu matheti kavanga, nandi wuvanga nlangu wukituka vinu yimboti beni. (Yoa. 2:10, 11) Ayi mu kilumbu kafua, nandi wuvuata bikhutu bithalu. (Yoa. 19:23, 24) Vayi kheti bobo, Yesu kasa bika ko biuma abiobio biluta ba nkinza mu luzingu luandi. Nandi wukamba minlandikini miandi: “Kuisi ko mutu kalenda ba mvika wu zimfumu ziwadi mu khumbu yimueka. . . Lulendi sadila ko Nzambi ayi busina.” (Matai 6:24) Yesu wulonga ti befu kutula Kintinu ki Nzambi va theti mu luzingu luitu, Yave wala dukisa zitsatu zitu zinkaka.—Tanga Matai 6:31-33.
7. Buidi khomba mueka kabakila ndandu mu kuba mayindu mafuana mu matedi zimbongo?
7 Zikhomba zitu ziwombo babaka ndandu mu kusadila malongi ma nduenga mu matedi zimbongo. Dedi, tala kifuani ki yaya Daniel. Nandi wutuba: “Bo yiba muana ditoko, minu yibaka makani ma kutula mambu ma kiphevi va theti mu luzingu luama.” Mu kibila ki kulengisa nzingulu’andi, Daniel wubaka luaku lu kusadila buboti thangu’andi ayi kubuela mioko bisalu bi kiphevi. Nandi wubue tuba: “Minu yinyonganga ko mu makani yibaka. Bukiedika ti boti minu yitadila zimbongo banga kiuma kilutidi nkinza mu luzingu luama, khanu minu yibaka zimbongo ziwombo. Vayi bukiedika ti khanu ziphana bakudi bakiedika bo yidi bubu? Khanu yidi mayangi mu kuzaba ti yidi mu kutula Kintinu ki Nzambi va theti mu luzingu? Vasi ko thalu yi zimbongo yilenda dedakana na lusakumunu Yave ka kuphananga.” Bukiedika, tumbakanga beni ndandu mu kutula mambu ma kiphevi va theti mu luzingu, kubika kuandi zimbongo.
MAYINDU MAFUANA MU MATEDI KISALU
8. Buidi tuzabidi ti Salomo wuba mayindu mafuana mu matedi kisalu? (Mpovi 5:18, 19)
8 Salomo wutuba ti tulenda baka mayangi ayi ndandu mu kisalu kitu kingolo kibila “widi nkhayilu wu Nzambi.” (Tanga Mpovi 5:18, 19.) Nandi wusonika: “Vadi ndandu mu ntindu woso wu bisalu bingolo.” (Zinga. 14:23) Salomo wuzaba mambu kaba tuba. Kibila nandi wuba kisadi kimboti, dedi: wutunga zinzo, zipisina, mavula mawombo, wuvata zitsola ayi minlumba. (1 Minti. 9:19; Mpovi 2:4-6) Bukiedika, biba bisalu bingolo, vayi nandi wubaka ndandu mu biawu. Vayi kheti bobo, Salomo wuzaba ti bisalu abiobio bituadisanga ko mayangi makiedika. Diawu kakivanina mu mambu ma kiphevi. Dedi, nandi wutuadisa ayi wukivana muingi kutunga tempelo yi kubuongimina Yave. Ayi kisalu akiokio kivangimina mu sambuadi di mimvu! (1 Minti. 6:38; 9:1) Bo kavanga bisalu abiobio, kuba kuandi bi kiphevi voti bisalu binkaka, Salomo wuyiza visa ti bisalu bi kiphevi biawu bilutidi nkinza. Nandi wusonika: “Yiyiza visa mambu amama: Vumina Nzambi yikiedika ayi tumukina zithumu ziandi.”—Mpovi 12:13.
9. Buidi Yesu katatiminina kuba mayindu mafuana mu matedi kisalu?
9 Yesu wuba kisadi kimboti. Mu mimvu mitheti bo kaba va ntoto, nandi waba salanga kisalu ki karpintero. (Malako 6:3) Bukiedika, matata mandi baba zolanga beni lusadusu kaba ba vananga mu kukivana mu kisalu ayi kubuela mioko muingi kudukisa zitsatu zi dikanda. Mu kuba wuvedila, Yesu wuba karpintero wupisuka diawu bawombo baba tombanga beni muingi kaba vangila kisalu! Nandi waba zolanga beni kisalu kiandi. Vayi kheti bobo, Yesu waba botulanga thangu muingi kukivana mu bisalu bi kiphevi. (Yoa. 7:15) Ayi bo kayiza ba nsamuni, nandi wukamba minlonguki miandi: “Lubika sala mu kibila ki bidia bimbolanga, vayi lusala mu kibila ki bidia binzinganga mvu ka mvu.” (Yoa. 6:27) Mvandi mu dilongi Yesu kavanga va mbata mongo nandi wutuba: “Yidikanu kimvuama kinu ku diyilu.”—Matai 6:20.
Buidi tulenda bela mayindu mafuana mu matedi kisalu ayi bisalu bi kiphevi? (Tala matangu 10-11) *
10. Mambu mbi tulenda yindula mu matedi kisalu?
10 Nduenga yi Nzambi yi tusadisanga kuba mayindu mafuana mu matedi kisalu. Befu baklisto ba tulonganga ti, tufueti “kukivana mu kisalu . . . , ayi kuvanga buboti kisalu kitu.” (Efe. 4:28) Khumbu ziwombo, zimfumu zi bisalu banzolanga kumona lukuikumunu ayi nzaki tuidi mu kisalu. Ayi bamvuanga beni nkinza zikhadulu aziozio. Vayi ḿba tulenda yindula ti muingi kukuangidika mfumu ayi kuvana kimbangi muingi batubila buboti Zimbangi zi Yave, buna tufueti vanga bilokula biwombo ku kisalu. Vayi mu phila ayoyo, tulenda bika kiyeku kitu ki kukieba dikanda ayi bisalu binkaka bi kiphevi. Diawu tufueti vanga dioso kua diambu muingi kuba mayindu mafuana.
11. Mambu mbi yaya William kalonguka mu matedi kuba mayindu mafuana mu kisalu?
11 Yaya William wumona nkinza wu kutula kisalu va kibuangu kiandi. Tala mambu nandi katuba matedi nkulutu wu kimvuka wuba mfumu’andi yi kisalu. William wutuba: “[Khomba ayoyo] widi kifuani kimboti mu matedi kuba mayindu mafuana mu kisalu. Nandi wunsalanga beni ayi bawombo banzolanga kisalu kiandi kibila wumvanganga kisalu buboti. Vayi kutsuka kadika kilumbu bo kisalu kimmana, nandi wumbikanga biabioso bitedi kisalu muingi kutsikika mayindu mandi kuidi dikanda diandi ayi mu mbuongimini’andi kuidi Yave. Ayi ngie zebi? Nandi mutu lutidi mayangi minu yima zaba!” *
MAYINDU MAFUANA MU MATEDI BEFU VEKA
12. Buidi Salomo kamonisina va thonono ti wuba mayindu mafuana mu naveka, vayi buidi nandi kayiza balukila kuntuala?
12 Bo kaba kisadi kikuikama ki Yave, Salomo wuba mayindu mafuana mu naveka. Mu butoko buandi, nandi wuzaba ndilu’andi ayi mambu mo kalenda nunga. Diawu kadindila lusadusu ayi thuadusulu yi Yave. (1 Minti. 3:7-9) Va thonono luyalu luandi, Salomo wuzaba mambu mambi malenda kummonikina na kuba lungundayi. Nandi wusonika: “Ava mutu kubua, wumbanga beni lungundayi ayi wumbanga mayindu ma kukinangika ava kabunda thutu.” (Zinga. 16:18) Kiadi ayi kiunda kuzaba ti buviokila thangu, Salomo naveka kasa sadila ko dilongi beni. Buviokila thangu mu luyalu luandi, nandi wukuna lungundayi ayi wubika kubue landakananga zithuadusulu zi Nzambi. Dedi, mu minsiku Nzambi kavana kuidi basi Isaeli miaba tuba ti ntinu “kalendi tomba ko kukuela bakieto bawombo, muingi ntim’andi wubika vukumuka.” (Deute. 17:17) Vayi Salomo wubayisa nsiku awowo mu kukuela 700 di bakieto ayi kuba 300 di bimasi, bawombo mu bakieto beni babasa buongiminanga ko Yave! (1 Minti. 11:1-3) Salomo ḿba kaba muena ti wunkuiza nunga kukiyala.” Vayi buviokila thangu, nandi wutovuka beni mu makani kabaka ma kutatuka Yave.—1 Minti. 11:9-13.
13. Mbi tulenda longuka mu phila Yesu kaba kukikuludilanga?
13 Yesu waba kukikululanga ayi wutatamana kuba mayindu mafuana mu naveka. Ava kiza butuka va ntoto, Yesu wuvanga kisalu kimboti ki lukuikumunu na Tat’andi ku diyilu. Diawu Kibibila kintubila ti mu nzil’andi, “biuma bioso ku diyilu ayi va ntoto bivangulu.” (Kolo. 1:16) Mu thangu kabotama, Yesu wutebuka moyo mambu moso kavanga na Tat’andi ku diyilu. (Matai 3:16; Yoa. 17:5) Vayi kheti mu luzabu loso alolo kaba, nandi kabasa kukinangikanga ko ayi kabasa yindulanga ko ti nandi lutidi kena batu boso. Nandi wukamba minlandikini miandi ti kayizila va ntoto, “bakana ko muingi bansadila, vayi muingi kusadila bankaka ayi kuvana moyo’andi muingi kukula batu bawombo.” (Matai 20:28) Mvandi Yesu wukikinina ti kabasa vanganga ko ni diambu dimueka mu mayindu mandi veka. (Yoa. 5:19) Bukiedika, Yesu waba kukikululanga! Nandi wu tubikila ntungulu wumboti wo tufueti landakana.
14. Mbi Yesu katulonga mu matedi kuba mayindu mafuana mu befu veka?
14 Yesu wulonga minlandikini miandi baba mayindu mafuana mu bawu veka. Khumbu yinkaka Yesu wuba kindisa mu mambu amama: “Minlengi mioso midi mu mintu minu midi mitangu.” (Matai 10:30) Bukiedika, mambu amomo manluta ku tukindisanga mu thangu tuntona kuba mayindu makhambu fuana mu befu veka. Mawu mansundula ti Tat’itu yi diyilu wu tuvuanga nkinza—ayi luvalu luwombo tuidi va meso mandi. Diawu boti Yave wu tuvana luaku muingi kumbuongimina ayi wummona ti tuidi bafuana muingi kuzinga mvu ka mvu ku nza yimona, buisi ko buboti kuyindula ti tuisa fuana ko kutambula luaku alolo.
Mambu mbi malenda monika boti tuisi ko mayindu mafuana mu befu veka? (Tala lutangu 15) *
15. (a) Mayindu mbi mafuana Kibanga ki Nsungi ki tukindisa kukuna? (b) Dedi bummonisina foto yidi va tsielu 24, boti tuntsikikanga mayindu mu befu veka, lusakumunu mbi tulenda zimbisa?
15 Mu 15 di mimvu kumbusa, Kibanga ki Nsungi kitukindisa kuba mayindu mafuana mu befu veka. Kiawu kituba: “Bukiedika, tumengi kuyindudila ngolo mu matedi befu veka muingi tubika ba lungundayi. Mvandi busa fuana ko kuyindula ti tuisi ko luvalu. Vayi vantombulu kutsikika mayindu mu mambu tuididi tsuakulu, tuzebi kuvanga ayi kuzaba ndilu’itu. Khomba mueka wunkieto wutubila mawu mu phila ayiyi: ‘Minu yisi ko mutu wulutidi mavanga mambi, vayi mvandi yisi ko mutu wulutidi kena bankaka. Yizebi ti yidi zikhadulu zimboti ayi mvandi zimbi.’” * Ngie bemona ndandu yidi mu kuba mayindu mafuana mu befu veka?
16. Kibila mbi Yave ka tuvaninanga zithuadusulu zi nduenga?
16 Mu nzila Diambu diandi, Yave wu tuvananga zithuadusulu zi nduenga. Nandi wu tuzolanga ayi wuntomba muingi befu tubaka luzingu lu mayangi. (Yesa. 48:17, 18) Makani malutidi tulenda baka ayi malenda ku tutuadisa mayangi makiedika mu luzingu madi, kutatamana kuvanga mamoso tunnunga muingi kukuangidika Yave. Befu kuvanga mawu, tualasa viokila ko mu mambu mawombo mambi, dedi mo batu bakhambu ba mayindu mafuana mu zimbongo, mu kisalu ayi mu baveka bamviokilanga. Diawu bika kadika mutu kabaka makani ma kuba nduenga ayi kukuangidika ntima wu Yave!—Zinga. 23:15.
NKUNGA 94 Matondo mu Diambu Diaku
^ Salomo ayi Yesu baba nduenga yiwombo. Yave Nzambi nandi wuba tho yi nduenga beni. Mu dilongi adidi, tuemmona mbi tulenda longuka mu malongi Salomo ayi Yesu bavana mu matedi kuba mayindu mafuana mu zimbongo, mu kisalu ayi mu befu veka. Mvandi tuemmona bifuani bi zikhomba mu thangu’itu babaka ndandu mu kusadila malongi ma Kibibila mu mambu amomo tuma tubila.
^ Tala dilongi “Como Gostar do seu Trabalho” dibasika mu Kibanga ki Nsungi 1 Ngonda Yimuadi, 2015.
^ Tala dilongi “A Bíblia pode ajudá-lo a encontrar alegria” mu Kibanga ki Nsungi 1 Ngonda Yinana, 2005.
^ MAMBU MADI MU ZIFOTO: John ayi Tom badi matoko muadi badi mu kimvuka kimueka. John wunsadilanga beni thangu’andi muingi kukangala ayi kudiodisa dikalu diandi. Tom wunsadilanga dikalu diandi muingi kusadisa zikhomba mu kisalu ki kusamuna ayi kuba nata mu zikhutukunu.
^ MAMBU MADI MU ZIFOTO: John widi mu kusala bilokula biwombo. Nandi kasintomba ko kunyongisa ntima wu mfumu’andi. Diawu kadika khumbu mfumu’andi ka kundinda muingi kasala nati va masika ma builu, John wunkikininanga kuvanga mamoso mfumu ka kuntuma. Vayi va builu beni, Tom widi nsadisi wu bakulutu wunlandakana nkulutu wu kimvuka muingi bekindisa khomba. Tom kanungina mawu, kibila va thonono nandi wusudikisa kuidi mfumu’andi wu kisalu ti va masika ma builu mu kadika kilumbu, yidi thangu kamvangilanga mambu ma kiphevi ayi mbuongimi’andi kuidi Yave.
^ MAMBU MADI MU ZIFOTO: John wuntsikika mayindu mandi mu naveka. Vayi Tom, wubaka bakundi bamboti bo kaba buela mioko kisalu ki kubuongisa kibuangu ki lukutukunu lu mavula.
