1. Mambu mbi malenda monika mu kimvuka befu kukidedikisanga?

MU NZA bubu, batu badi beni buimi ayi bantombanga kukidedikisa mu mambu moso. Dedi mutu wumvanganga lungoso, kalenda vanga mambu makhambulu fuana muingi kaluta bankaka mu lungoso luandi. Bantanga ndimbu, balenda vanga bubi kuidi bankaka banta yawu muingi bawu babika nunga. Voti muana kikola wuntomba kuvioka mu kikola kinangama, kalenda vanga zikabula muingi kaba va kibuangu kitheti. Vayi befu Baklisto, tuzebi ti zikhadulu aziozi zidi zimbi, kibila zidi mu khati “mavanga ma kinsunyi.” (Ngala. 5:19-21) Vayi, bukiedika kuandi ti, kheti bisadi bi Yave balenda monisa zikhadulu aziozi mu kimvuka mu khambu zaba? Akioki kidi kiuvu kimboti muingi kuyindula, bila khadulu yi kukidedikisa yilenda tambakana kuidi bankaka mu kimvuka ayi kumanisa kithuadi tuidi na zikhomba mu kimvuka.

2. Mbi tunkuiza tubila mu dilongi adidi?

² Mu dilongi adidi, tunkuiza tubila zikhadulu zimbi zilenda tuvanga kukidedikisa na zikhomba zitu. Mvandi tunkuiza mona bifuani bi babakala ayi bakieto Kibibila kintubila bamanga kubua mu ntambu wu kukidedikisa. Vayi theti, tunkuiza mona buidi befu veka tulenda ku yifiongunina.

3. Biuvu mbi tufueti kuyikuvusanga?

³ Khumbu zinkaka, buboti beni kukifionguninanga. Ayi wulenda kuyikuvusa: ‘Muingi yimona luvalu kisalu kiama kidi, yintombanga kuyidedikisa na bankaka? Mu mamoso yimvanga yintombanga kukimonisa ti minu yilutidi ke na khomba kingandi? Voti minu yimvangilanga mamoso muingi kuzitisa Yave Nzambi?’  Kibila mbi tufueti ku yivanina biuvu abiobi? Tala mambu diambu di Nzambi dintuba.

4. Dedi bummonisina Ngalatia 6:3, 4, kibila mbi tufueti bikila kifu ki kuyidedikisanga na bankaka?

⁴ Kibibila ki tukindisa tubika kuyidedikisa na bankaka. (Tanga Ngalatia 6:3, 4.) Mu kibila mbi? Kibila befu kuyindula thangu zioso ti, befu tunluta vanga mambu maluti kena zikhomba zitu, tulenda tona kuba lungundayi. Vayi mvandi befu kukidedikisanga beni na bankaka, tulenda ba mu kiunda. Diawu buboti tuba mayindu mafuana mu befu veka. (Loma 12:3) Khomba mueka yi nkieto bantedilanga Katerina, * wunkalanga ku Grécia, wutuba: “Minu yiba kifu ki kuyidedikisanga mu kitoku kiawu, mu kuluta pisuka mu kisalu ki kusamuna ayi mvandi mu luaku lu fika vanganga bakundi. Mawu maphanga beni kuba mu kiunda.” Befu tufueti tebukanga monyo ti Yave Nzambi wu tutumisa kuidi Nandi kubika kuandi mu kitoko tuidi, mu phila yimboti tunkolukila voti mu kuba bazabakana. Vayi ka tutumisina, kibila befu tu kunzolanga ayi tutidi kukuwila Muan’andi.—Yoa. 6:44; 1 Koli. 1:26-31.

5. Mbi ngie belonguka mu kifuani ki khomba bantedilanga Hyun?

⁵ Tala biuvu binkaka tufueti kuyikuvusa. ‘Minu yidi wuzabakana buka mutu wuntuadisanga ndemba, voti yinkotanga mu mambu moso mammonikanga?’ Tala kifuani ki khomba Hyun, wukala ku Coreia do Sul. Vaba thangu nandi kaba tadilanga zikhomba baba biyeku buka zimbanda ziandi. Nandi wutuba: “Minu yiba kuba tubilanga beni bubi, ayi khumbu zinkaka yabasa kikininanga ko mambu baba tubanga.” Buidi mawu masundukila? “Kifu akioki kimbi yiba, kituadisa beni luvasanu kuidi zikhomba mu kimvuka.” Vayi bakundi bankaka ba Hyun bansadisa kumona khadulu ayoyi yimbi kaba. Nandi wuvanga mangolo muingi kubalula khadulu beni, ayi bubu nandi widi nkulutu wumboti wu kimvuka. Befu kumona ti tuma tona kukidedikisa na zikhomba zinkaka kubika kuandi mu kutuadisa ndembama, tufueti vanga mamoso tunnunga muingi kubotula khadulu ayoyi mu ntima.

6. Dedi bummonisina Ngalatia 5:26, zikhadulu mbi zikhambu fuana zi tuvanganga kukidedikisa na bankaka?

⁶ Tanga Ngalatia 5:26. Zikhadulu mbi zilenda kutuvanga kukidedikisa na bankaka? Khadulu yitheti kukimonisa. Mutu wu kimonisanga widi lungundayi ayi mvandi luzolo luwombo mu naveka. Khadulu yinkaka yimbi yidi nsoki. Mutu widi nsoki, kasi ko to nsoki mu bankaka, vayi mvandi katianga ko bankaka babaka biuna nandi kadi. Buiedika, nsoki disi ko diambu di kusakinina, kibila dintuadisanga kimbeni. Diawu buboti beni kutatuka zikhadulu zia ziwadi aziozio zimbi, zidi buka kivunga!

7. Buidi tulenda fuanikisila ziphasi zilenda tukuizila mu zikhadulu zimbi zi kukimonisa ayi nsoki?

⁷ Khadulu yi kukimonisa ayi nsoki, tulenda ku zifuanikisa na lupulanu babe tula mazuti make mavotakana ayi nlangu voti na biuma binkaka bimvindu. Bukiedika ti va thonono lupulanu beni lulenda dumuka, vayi mua thangu to yilenda vioka mu kibila ki mazuti mambi babe tula, yilenda bua ayi kuvonda batu. Bobuawu mvandi, mutu kalenda nunga mu mua thangu kusadila Yave, vayi kalasa tatamana ko na kukimonisa ayi kuba nsoki mu bankaka. (Zinga. 16:18) Nandi wala bika kusadila Yave ayi kuyituadisa ziphasi kuidi naveka ayi kuidi bankaka. Buabu, buidi tufueti kukikiebila mu zikhadulu zi kukimonisa ayi nsoki?

8. Buidi tulenda nungina khadulu yimbi yi kukimonisa?

⁸ Muingi tununga khadulu yimbi yi kukimonisa tufueti tatamana kuyindula dilongi di  mvuala Polo kuidi basi Filipi. Nandi wuba kamba: “Lubika vangila mambu mu ziphaka voti mu kutomba nkembo wuphamba; vayi mu kukikulula luyindula ti bankaka ba mulutidi.” (Fili. 2:3) Bo tuntadila bankaka ti bawu ba tulutidi, befu tuisinkuiza vanga ko mangolo muingi tutomba kukidedikisa mu mambu bawu bazebi kavanga. Vayi befu tunkuiza yangalala mu mawu. Ayi buluti boti zikhomba beni badi mu kusadila mambu bazebi kuvanga mu kisalu ki Yave, mankuiza tuyangidika kuzaba ti bamvangila mawu muingi kuzitisa Yave. Mvandi zikhomba beni, kuba kuandi zi babakala voti zi bakieto ba kulandakana dilongi mvuala Polo kavana, bawu mvawu bala sikika mayindu mawu mu zikhadulu zimboti befu tuidi ayi mvandi ku tutonda mu mawu. Mawu mala vanga befu boso kutuadisa ndembama ayi kituadi mu kimvuka.

9. Buidi tulenda nungina khadulu yimbi yi kumona nsoki bankaka?

⁹ Tulenda nunga khadulu yimbi yi kumona bankaka nsoki, mu kutebukanga monyo ti, befu tulendi nunga ko kuvanga mamoso befu veka. Befu kuzaba diambu adiodio, tualasa vanga ko mangolo muingi kumonisa bankaka ti befu tulutidi zaba kuvanga mambu moso kena bankaka. Vayi befu tuala tomba ziphila zinkaka muingi kulonguka mambu mo bankaka baluti pisuka mu kuvanga kena befu. Dedi yindulabu ti khomba mu kimvuka, widi wupisuka mu kuvanga malongi mamboti. Vayi ngie ndamba, wulenda kundinda muingi ka kusadisa mu phila nandi kankubikilanga malongi mandi. Voti yindulabu ti khomba yinkieto zebi lamba buboti, wulenda kundinda malongi muingi ngie mvaku wubaka bu kupisukila mu kulamba. Ove yindula khomba yiditoko wukhambulu beni tsuakulu yifika vanga bakundi, nandi kalenda dinda malongi kuidi khomba yinkaka widi beni luaku lu kuvanga bakundi bamona. Befu kuvanga mawu, tualasa bua ko mu ntambu wu kumona bankaka nsoki ayi ntuala buela pisuka mu mambu tukhambu zaba buboti.

10. Mambu mbi maphasi Ngidoni kaviokila?

¹⁰ Tala kifuani ki Ngidoni, wubutukila mu nkuna wu Manase, ayi babakala baba mu nkuna Efalaimi. Ngidoni ayi 300 di masodi mandi  banunga mvita mu lusalusu lu Yave. Bawu baba kibila muingi kukinyemisa, vayi bawu basa vanga ko mawu. Babakala ba basi Efalaimi bayiza dengana Ngidoni bakana ko muingi kuntonda, vayi bawu batona kunsombusa. Ḿba bawu baba monisina lungundayi alolo, kibila Ngidoni kasa batumisa ko tona vana thonono muingi baba buela mioko mu mvita bawu banuana na zimbeni zi Yave. Vayi bawu baba vangila mawu muingi kuvana nzitusu kuidi nkun’awu. Diawu Ngidoni mu diela, wuba sadisa muingi bavana nzitusu kuidi Yave ayi mvandi kukeba dikabu dioso.—Minkongu. 8:1.

11. Mvutu mbi Ngidoni kavana kuidi basi Efalaimi?

¹¹ Ngidoni mu kukikulula wukamba babakala ba basi Efalaimi: “Mbi minu yibe vanga mu kudedikisa mo malutidi benu lube vanga?” Bosi nandi wuba tonda mu phila Yave kaba sakumunina. Boka vanga mawu, bosi babakala beni “bavumbama.” (Minkongu. 8:2, 3) Ngidoni wutula lungundayi va khonzo muingi kutuadisa ndembama va khati dikabu di Nzambi.

12. Mbi tulenda longuka mu kinongu ki basi Efalaimi ayi Ngidoni?

¹² Mbi tulenda longuka mu kinongu akiki? Mu matedi basi Efalaimi, tulenda longuka ti, tulendi tomba ko kukieba kimutu kitu mu kuzimbakana kuzitisa Yave. Mu kuba zimfumu zi makanda voti bakulutu ba kimvuka, tulenda longuka mvandi mu kifuani ki Ngidoni. Tulenda longuka ti, boti mutu be tuvangila diambu di tutula fiti, tufueti meka kutadila mambu beni kubika to ku khonzu’itu, vayi mu kuyindula mvandi mutu beni. Tulenda kuntonda mu mambu mamboti nandi kabe vanga kheti kasa vangila ko momoso mu phila yisulama. Kibila kutuadisa ndembama, kuluti kena kutula va theti lungundayi voti kudiodisa kimutu kitu.

13. Ma mambu mbi maphasi Ana kaviokila ayi buidi nandi kanungina mawu?

¹³ Yindula mvandi, mu kifuani ki Ana. Nandi wuba wukuela na musi levi baba tedilanga Elekana, ayi nnuni’andi wuba kunzolanga beni. Vayi Elekana mvandi wuba nkazi wunkaka baba tedilanga Penina. Elekana waba luta zolanga Ana kuvioka Penina. Bo “Penina kaba bana, vayi Ana ndamba,” diawu kaba kunsakininanga beni. Penina kaba vangilanga mawu thangu zioso “muingi kubika Ana mu kiunda.” Buidi mambu amomo manyikunina mabanza ma Ana? Nandi wuba beni mu kiunda! “Waba dilanga ayi khumbu zinkaka kabasa dianga ko.” (1 Samu. 1:2, 6, 7) Vayi kheti bobo, ni vama mu Kibibila vammonisa ti, Ana wuvutudila mambi Penina kaba kumvangilanga. Vayi nandi wuzibudila ntim’andi kuidi Yave, bila wufiatila ti Yave wunkuiza ludika mambu moso. Vayi bukiedika ti Penina wubalula zikhadulu ziandi zimbi mu phila kaba tadilanga Ana? Kibibila kisinsudikisa ko mawu. Vayi befu tuzebi ti, Ana wubue baka zingolo ayi wutatamana kuba ndembama. “Kizizi kiandi kisa bueba ko mu kiunda.”—1 Samu. 1:10, 18.

14. Mbi tulenda longuka mu kifuani ki Ana?

 ¹⁴ Mbi tulenda longuka mu kifuani ki Ana? Boti mutu wuntomba kuyimonisa ti nandi lutidi kena ngieyu, tebuka monyo ti ngie wulenda kukiyala mu mambu amomo. Bika kubua mu ntambu wu kukimonisa buka nandi. Ayi bika kutomba kuvutudila mambi mu mambi, vayi tomba kuba ndembama na mutu beni. (Loma 12:17-21) Ayi kheti nandi kasinkikinina ko kuvanga mawu, ngie wala tatamana kuba ndembama mu ntima.

15. Mambu mbi madedakana Apolo ayi mvuala Polo baba?

¹⁵ Buabu, mbi tulenda longuka mu kifuani ki Apolo ayi mvuala Polo. Baba buadi baba luzabu luwombo mu matedi diambu di Nzambi. Mvandi baba minlongisi mimboti ayi basadisa batu bawombo kuba minlandikini mi Yesu. Vayi ni wumueka mu bawu kabasa tadilanga ko wunkaka buka mband’andi.

16. Mbi tulenda tuba mu matedi Apolo?

¹⁶ Apolo wuba muisi “ Alexandria,” diba divula dizabakana mu matedi luzabu lu bikola mu sekulu yitheti. Apolo wuba nlongisi wumboti ayi nandi “wuba luzabu luwombo mu Diambu di Nzambi.” (Mava. 18:24) Bo Apolo kayenda ku Kolinto bawombo mu kimvuka beni, baba luta zolanga kukuwa malongi mandi, kuvioka kuandi ma baklisto bankaka baba longinsanga kuna kubunda mvandi mvuala Polo. (1 Koli. 1:12, 13) Vayi bukiedika ti Apolo wuyangala mu mambu amomo? Ndamba. Kibila mua thangu to yivioka bo Apolo kabika divula di Kolinto, mvuala Polo wubue kundinda muingi kavutuka kuna. (1 Koli. 16:12) Boti Apolo wuyangalala mu phila zikhomba baba kuntadila ti nandi lutidi, khanu mvuala Polo kasa bue kundinda ko muingi kavutuka ku Kolinto. Bukiedika, Apolo wusadila mboti nkhayilu wu kulonga—zitsangu zimboti muingi kukindisa zikomba.  Mvandi tuidi lufiatu ti, Apolo wuba mutu waba kikululanga. Dedi, ni vama mu Kibibila vammonisa ti nandi wukinangika voti wumanga mu thangu Akila ayi Prisca “bansadisa muingi kaluta visa bumboti diambu di Nzambi.”—Mava. 18:24-28.

17. Buidi mvuala Polo katuadisila ndembama?

¹⁷ Mvuala Polo wuzaba kisalu kimboti Apolo kavanga. Vayi nandi kasa tadila ko kisalu beni buka phila Apolo kaba tomba kukimonisina ti nandi lutidi. Mvuala Polo wu kikulula ayi wumonisa ti kasa ba ko bu kuvangila mamoso naveka. Tuzabidi mawu mu kibila ki dilongi kavana kuidi zikhomba baba ku Kolinto. Nandi kasa kuangalala ko bo bawombo mu bawu baba tubanga ti “befu tuidi ku khonzo Polo,” vayi mu thangu beni, nandi wusemba zikhomba muingi babika kunyemisa vayi bazitisa Yave ayi Yesu Klisto.—1 Koli. 3:3-6.

18. Dedi bummonisina 1 Kolinto 4:6, 7, mbi tulenda longuka mu kifuani ki Apolo ayi mvuala Polo?

¹⁸ Mbi tulenda longuka mu kifuani ki Apolo ayi mvuala Polo? Befu tulenda vanga mawombo mu kisalu ki Yave ayi kusadisa bawombo kukivana kuidi Yave ayi kubotma. Vayi tufueti tebukanga moyo ti mamoso tunnunga kuvanga, tunnunginanga to mu lusakumunu lu Yave. Mu kifuani ki Apolo ayi mvuala Polo, tulenda longuka mvandi ti—boti kiyeku tuidi mu kimvuka, tuidi mvandi luaku lulutidi muingi kutuadisa ndembama va khati zikhomba. Tuidi beni mayangi kuzaba ti zikhomba bantuama ntuala mu kimvuka ki Yave, bamvanganga mangolo muingi kutuadisa ndembama ayi kithuadi. Bawu bamvangilanga mawu mu kuvana malongi mabongulu mu Diambu di Nzambi ayi mu sikika thalu kubika kuandi mu baveka vayi mu kulandakana kifuanui ki Yesu!—Tanga 1 Kolinto 4:6, 7.

19. Mbi kadika mutu mu befu kafueti vanga? (Tala mvandi quadro yintuba “ Bika Kukidedikisa na Bankaka.”)

¹⁹ Yave wuvana kadika mutu diela di kuvanga dioso kua diambu. Befu tulenda sadila mambu tuzebi kuvanga “muingi kuyisadisa befu na befu.” (1 Pete. 4:10) Vayi khumbu zinkaka tulenda mona ti mambu tuzebi kuvanga madi beni maluelu. Vayi tebuka monyo ti, mawu nkinza beni madi muingi tutamana kuba kithuadi. Tulenda fuanikisa mawu buka bitendi batu bantanga bikhutu banzenganga, biawu bilenda monikina biluelu, vayi ba kufubikisa biawu, binkuiza banga kikhutu kimboti. Diawu bika kadika mutu mu befu kavanga mangolo muingi kubika monisa zikhadulu zimbi tuma tubila mu dilongi adidi. Vayi tuba bakubama muingi kutuadisa ndembama ayi kithuadi mu kimvuka.—Efe. 4:3.