▪ Yave wuntomba beni batu buadi badi bakuela, babaka mayangi ayi bazingila mu kithuadi va dikuela. (Matai 19:4-6) Boti makani ma kukuela widi, buna buidi wulenda zabila mutu widi wufuana muingi ngie wukuela? Mu kuba Mvang’itu, Yave zebi mbi bilenda ku tusadisa muingi kuba ki makangu kimboti ayi mvandi dikuela di mayangi. Diawu, Nandi kavanina minsua miwombo mi Kibibila milenda ku tusadisa, muingi kubaka makani mamboti. Ku wanda tunkuiza tubila mua minsua beni.

Theti, buboti kuvisa mambu amama matedi ngie veka: “Ntima wulutidi bukhita kuvioka biuma bioso, ayi widi mu kiunda.” (Yele. 17:9) Mu thangu mutu kambaka makani ma kutomba makangu voti mutu kafueti kuela, mabanza amomo mafika konzukanga mu thinu ayi mamvanganga mutu kuvulakana ntu ayi kumanga baka makani ma nduenga. Ayi mu thangu bawu bambaka makani amomo ma kukuela mu kusikika to zitsatu ziawu, mawu malenda sukila bubi. (Zinga. 28:26) Diawu buisi ko buboti batu buadi ba kizolasananga kuzabikisa mabanza mawu va thonono, voti fika tona ki makangu ava bawu bazabasana buboti kimutu voti zikhadulu ziawu.

Zingana 22:3 luntuba: “Nkua diela wufika monanga diambu dimbi ayi wunsuamanga, vayi bo bakhambulu diela, bankuendanga kuntuala ayi bamonanga ziphasi.” Kibila mbi wulenda bela ntambu wunneni kusadila zinzila zi internet muingi kutombila mutu wu kukuela? Kiadi ayi kiunda kuzaba ti, bawombo balongukila mu phila yimbi bo babaka makani ma kutombila mutu batidi kukuela mu zinzila aziozio. Bila, batu bawombo bamana vanga zinzila zi internet muingi kuvunina batu ayi kuba kuiba zimbongo. Bawombo bamfondanga zinzila ziozi bansonikanga ti, bawu badi Zimbangi zi Yave muingi babaka bu kuvunina batu.

Vadi mvandi ntambu wunkaka wu kubela keba keba. Batu abobo bansadilanga bisadulu bi computador muingi kumona ti zikhadulu ziaku ayi zi mutu wunkaka zidi zidedakana ayi zifuana muingi beno mukuelana. Vayi bukiedika kuandi ti, bisadulu abiobi bi computador biawu bidi bifuana muingi kudedikisa diambu dinkinza dedi mutu widi wufuana muingi ngie wukuela? Voti bukiedika ti ziprograma zi computador mutu kavanga, zilutidi na minsua mi Kibibila Yave Nzambi ka tuvana mintuadisanga bu kusodila mutu wu kukuela?—Zinga. 1:7; 3:5-7.

 Nsua wunkaka widi mu Zingana 14:15 wuntuba: “Mutu wukhambulu nduenga wunkikininanga mu dioso kua diambu, vayi nkua nduenga wumfionguninanga buboti ndiatulu’andi.” Ava kusikika manyindu ti, mutu ngie mazaba widi wufuana muingi kukuela, buboti beni kutomba theti kunzaba buboti. Vayi kusolula yandi mu internet bukiedika ti malenda kusadisa kuvisa ti nandi widi wufuana? Kheti ngie wumviokisa yandi thangu mu kusolula mu internet voti kumfila zimesage, bukiedika kuandi ti yidi phila yimboti wunkuiza zabila kimutu kiandi kikiedika? Bawombo bameka kutombila mu phila ayoyo mutu wu kuba zolanga ayi bafueti kuela bayiza dila kuntuala mu thangu babakula kimutu kikiedika ki mutu kaba zolanga mu internet.

Nsoniki wu minkunga wutuba: “Yikalanga ko va kimueka ayi bankua luvunu. Yisi ko kinkundi na batu bansuekanga kimutu kiawu.” (Minku. 26:4) Bawombo bammonanga ti, disi ko diambu dimbi kuvuna mambu matedi kimutu kiawu muingi batu baluta kunzola. Bawu balenda sueka kimutu kiawu kikiedika voti kumanga tubila matedi zikhadulu ziawu zikiedika mu internet. Kheti bawombo mu bawu bantubanga mu internet ti badi Zimbangi zi Yave, vayi bukiedika ti bawu badi Baklisto babotama? Badi banyonzuka mu kiphevi? Bawu badi kikundi kifikama ayi Yave? Zikhomba zinkaka mu kimvuka “ba kuba fiatilanga voti badi nkangulu wumbi”? (1 Koli. 15:33; 2 Timo. 2:20, 21) Mvandi badi bafuana muingi kukuela? Ngie fueti tomba kuzaba mambu moso amomo, vayi vantombuluanga lusalusu lu batu bankaka bazebi mutu beni buboti, muingi ba kuzabikisa kimutu kiandi kikiedika. (Zinga. 15:22) Ayi kisadi kikiedika ki Yave, kalendi tia ko “kuba kithuadi”, voti kukuela na mutu wukhambu sadilanga Yave.—2 Koli. 6:14; 1 Koli. 7:39.

Mu kuyindula mintambu mioso amiomi tuma tubila, wulenda ba ntambu wunneni kutombila mutu wu kukuela mu internet. Vayi tutidi kuzabikisa ti vadi phila yilutidi yi kutombila mutu wufuana wulenda kuela muingi diba dikuela dinzitisa Yave. Kuidi wulenda zabila mutu widi wufuana muingi kukuela? Luaku lumboti widi, bo wunlandakana zikhutukunu kuba kuandi zi kimvuka voti zikhutukunu zinkaka zinneni tumbanga.

Mu thangu ayiyi, mu kibila ki kimbevu ki COVID-19, tuisi ko bu kukutikinina va kimueka mu Nzo yi Kintinu. Vayi kheti bobo, tuidi luaku lu kulandakana zikhutukunu zi kimvuka mu kusadila zitelefoni voti bisadulu binkaka bi tutulanga kithuadi na zikhomba. Kheti mu phila ayoyi, befu tuidi luaku lu kuzaba zikhomba zinkaka bakhambulu bakuela ayi kumona phila bawu bammonisina kiminu kiawu mu Nzambi. (1 Timo. 6:11, 12) Mvandi kutsuka lukutukunu, widi luaku lu kusolula na zikhomba zinkaka, voti bo mumviokisa thangu na Zimbangi zi Yave zinkaka mu kusadila telefoni voti bisadulu binkaka. Ngie wulenda baka luaku lu kumona zikhadulu mutu beni ngie wuntomba kukuela kadi. (1 Pete. 3:4) Bumviokila thangu, ngie wala luta zaba mutu beni buboti ayi mawu mala kusadisa kubaka makani boti zikhadulu ziandi zidi zifuana mu ngie mu kutadila ntindu mutu ngie wuntomba kukuela.

Mu thangu zikhomba kaba kuediziabu ko bantomba mutu muingi kukuela mu kulandakana minsua mi Kibibila, bawu bala mona bivisa mu kiedika kidi mu zingana kintuba: “Ngie kubaka nkazi wumboti, buna ngie mabaka kiuma ki luvalu, ayi Yave wala kuangalala mu mawu.”—Zinga. 18:22.