Mu mvu wulanda, bavana ndubu kuidi dikanda dioso di Beteli ti, vaba tombulu batu ba kukivana muigi kue sadila ku Beteli yi África do Sul, ko baba makani ma kutula bisadulu bimona bi kubasisila bilongulu. Minu yivana dizina diami, ayi yiba beni mu mayangi kuzaba ti batsola. Mvandi basola zikhomba zitatu zi Beteli yi Canadá. Mazina mawu maba—Dennis Leech, Bill McLellan, ayi Ken Nordin. Bosi ba tukamba ti, mu mimvu miwombo tukue sadila ku África do Sul!

Diawu yitela mama’mi ayi yinkamba: “Mama, zitsangu zimboti zidi yama. Minu yinkuiza yenda ku África do Sul muingi kuesadila kuna!” Mam’ami kabasa kolukanga ko beni, vayi nandi wuba nkieto wuyonzuka mu kiphevi. Nandi kasa tuba ko mambu mawombo, vayi minu yizaba ti nandi wunkuiza buela mioko makani mami. Ni mam’ami ni tat’ami, basa tula ko nkaku makani yibaka. Vayi bawu baba nkadu kiunda mu kuzaba ti yinkuiza ba nkadu kinanu na bawu.

Ava kukuenda ku África do Sul, befu tuba theti ku Beteli yi Brooklyn muingi ba tukubika mu ngonda zitatu, bu kusadila bisengu biaba basisanga minkanda. Bosi, bo kilumbu kifuana, tumaka mu dikumbi dinneni dinnatanga mimfuna diaba kuenda ku divula di Cabo, ku África do Sul. Mu thangu beni minu yiba 20 di mimvu. Bosi va builu tunanguka ku divula di Cabo mu comboio muingi kukuenda nati ku Joanesburgo. Kibuangu kitheti comboio beni kutedimina, vaba va divula dimueka diluelu bantedilanga Karoo, diba va thandu. Kibuangu beni, kiba mbungumbungu, muisi ayi mbazu. Befu banna tuyindimina mu zinela ayi tukiyuvusa: ‘Ntindu kibuangu mbi akiki?’ Buviokila thangu, befu tubue vutuka va kibuangu beni muingi ku kitala buboti. Vayi tuyangalala kumona ti batu baba zingilanga vana, babasa natanga ko luzingu lu kikhafi.

Kiyeku kiama mu mimvu mi landa kiba ki kusadila mu máquina yaba basisanga Kibanga ki Nsungi ayi Despertai! Beteli yi África do Sul yaba basisanga bilongulu kubika to bio baba sadilanga ku África do Sul vayi mvandi biaba kuendanga mu zitsi zinkaka zike ku norte yi África. Bukiedika, tuba beni mu mayangi kumona ti máquina ayoyi yi tuvanga kunanguka ku tsi yi kinanu, yaba sadulu mu phila yifuana!

 Bosi minu yitambula kiyeku ki kukieba mambu mawombo matedi kisalu ki kubasisa bilongulu, kufila biawu mu zitsi zinkaka ayi kisalu ki kusekula. Minu yiba kisalu kiwombo ki kuvanga, vayi yiba mayangi ayi luzingu luama luba tsundu yiwombo.

Mvu 1968, minu yikuela na khomba wuba ntuami ntuala bantedilanga, Laura Bowen, waba kalanga va ndeko Beteli. Nandi waba buelanga mioko Dingumba di Kusekula. Ayi mvandi waba sadisanga kusonika minkanda. Mu thangu beni, ku Beteli kuisa ba ko kibuangu muingi bakuela bamona kuzingila, diawu ba tuvanina kiyeku kimona, ki kuba ntuami ntuala wufilu. Minu yaba kuazuka beni kibila vavioka kumi di mimvu Beteli yaba kebanga zitsatu ziama zitedi kudia ayi kibuangu ki kukala. Diawu yaba ku yikuvusila, ‘buidi minu ayi nkazi tunkuiza zingila ngonda yimvimba mu kisalu ki ntuami ntuami ntuala wifilu mu 35 dolar?’ Ayi muingi kutambula ziawu, vaba tombuluanga kudedikisa bilokulu bikisalu ki kusamuna, kuvutukila batu ayi mvandi thalu yi bilongulu tunkabula. Kutala thalu beni yi zimbongo—befu tumona ti yawu yiba yiluelu muingi kufutila nzo, kutadila matedi bidia, kimbevu ayi mambu mankaka.

Ba tufila ku mua dingumba diba ku divula di Durban, didi ku khonzo Oceano Índico. Kuawu kuba batu bawombo basi India ayi bawombo mu bawu, baba bana ba bisadi bi basi India bayiza kuna muingi kusadila ku fábrica baba vangilanga suikili mu mvu 1800. Bawombo mu bawu, baba bisalu binkaka baba vanganga, vayi kikhulu kiawu mu phila yi kuvuatila, yi kulambila yitatamana. Mvandi baba kolukanga Kingelesu, amomo mawu ma tusadisa beni mu kisalu ki kulonga.

Mu thangu beni, mintuami ntuala mifilu baba kiyeku ki kuvanga 150 di bilokula mu kadika ngonda mu kisalu ki kusamuna. Diawu minu ayi Laura tuvangila programa muingi kuvanganga bilokula bisambanu mu kadika kilumbu. Disa ba ko diambu diluelu bila kuba beni muinya ayi tuisa ba ko minlonguki ayi batu ba kuvutukila—diawu tuaba samunina nzo ka nzo muingi kununga kuvanga bilokula bisambanu. Vayi bo tutona kusamuna tumuena ti tumavanga bilokula bawombo, vayi bo tutala thangu—40 di minutu to divioka! Diawu, tu kiyuvudila bukiedika kuandi ti tunkuiza nunga?

Bosi, tuvanga mangolo muingi ku kubamanga buboti. Kadika kilumbu tuaba kubikanga kiuma tunkuiza dia bo tunkuiza vunda. Tuaba tulanga biuma bioso mu dikalu ayi thangu yi kuvunda ya kufuana, tuaba tombanga vama vake mvevo. Bana ba basi India, baba tuzungidilanga ḿba mu kukuituka mua nkadu disuasana di nkanda nyitu tuba ayi bawu. Mua bilumbu to bivioka tutona kumona ti, va kuvioka bilokula biole voti bitatu bo tunsamuna, bilokula binkaka biaba viokanga mu thinu.

Luba luaku lunneni beni kunata kiedika ki Kibibila kuidi batu baba ku kizunga beni! Tumona ti bawu badi lukinzu, mayangi ayi mvandi boma bu Nzambi. Dedi basi Hindu bawombo ba tuyamba buboti ayi bavitika kulonguka kiedika. Bayangalala beni kulonguka matedi Yave, Yesu, Kibibila, nza yimona, ndembama ayi kivuvu ki luvulubukusu. Bo vavioka to mvu wumueka tuyiza ba 20 di minlonguki mi Kibibila. Tuaba kuangalala bilumbu bioso kudia va kimueka na makanda ma minlonguki mi Kibibila.

Vasa vioka ko thangu yiwombo, tutambula kiyeku kimona—kisalu ki kukengidila bimvuka biba ku kizunga kimueka kiba ku khonzo Oceano Índico. Kadika sabala baba tuyambanga, kuidi dikanda dimueka di kimvuka tuaba kengidila ayi tuba beni mu mayangi kusala va kimueka na minsamuni ayi kukindasana. Tuyiza ba buka dikanda na zikhomba ziaba tuyambanga, tuaba viokisanga thangu va kimueka na bana bawu. Vayi bo vavioka to mimvu miole, ba tutela ku Beteli ayi ba tukamba, “befu tuntomba muingi luvutuka ku Beteli.” Minu yiba kamba: “Benu muzebi, befu akuku tuidi beni mu mayangi.” Vayi, befu tuba bakubama muingi kue sadila koso kua ba tufila.

Bo tuvutuka ku Beteli, yitambula kiyeku ki kusadila mu Dingumba Dintadilanga Matedi Kisalu ki Kusamuna, ayi yiba luaku lu kusala va kimueka na zikhomba bapisuka ayi banyonzuka mu kiphevi.  Mu thangu beni, bo nkengididi wu bimvuka, kammanisa sabala yi kinzenza, dingumba ditedi kisalu ku Beteli diaba filanga nkanda kuidi kimvuka beni, muingi kuba kindisa ayi mvandi kuba vana zithuadusulu zinkinza bafueti landakana mu kimvuka. Mawu mansundula ti, vaba tombuluanga kusonika minkanda miwombo ayi kusekula miawu mu mbembo Xhosa, Zulu voti kusonika minkanda mi Kingelesu ayi kusekula miawu mu zimbembu zinkaka bankolukanga ku África do Sul. Yintonda beni kisalu kingolo minsekudi baba vanganga ayi mawu matsadisa kuzaba ziphasi zikhomba zi bafioti baba viokila.

Mu thangu beni, tsi África do Sul yiba luyalu luphasi beni, luaba tulanga luvasanu mindela ayi bafioti. Kadika dingumba baba khonzo’awu yi kuzingila ayi basa ba ko nsua wu kubundana na batu ba mimvila minkaka. Zikhomba zitu zi bafioti baba kutakananga mu bibuangu biawu ayi baba samuninanga mu zimbembu ziawu.

Minu yabasa zabanga ko zikhomba ziwombo zi bafioti, kibila biyeku bioso tutambula biba mu bimvuka bi kingelesu muba mindela. Vayi, yibaka luaku lu kulonguka matedi zikhomba zitu zi bafioti, kuzaba bikhulu biawu ayi mambu maphasi baba viokila mu matedi bikhulu babutukila. Bawombu mu bawu baba monisanga kibakala muingi kukindama mu zikhuamukusu zi basi dikanda ayi zimfumu zi mala mu thangu baba manga kotanga mu mambu ma bikhulu maba nguizani na ziphevi zimbi! Bawombo baba mu mala, basa nunga ko kukota kikola mu kibila ki buphumbulu, vayi baba kinzikanga Kibibila.

Minu yibaka luaku lu kusala na zikhomba zinkaka muingi kutadila mambu matedi kubaka kiphuanza ki kubuongimina Yave ayi mvandi kumanga kota mu mambu ma pulitika. Mvandi kiminu kiama kikindusu beni, kumona lukuikumunu ayi kibakala ki bana ba Zimbangi zi Yave bakukisa mu bikola, bo bamanga nsambu ayi kuyola luimbu lu tsi.

Zikhomba bankalanga ku tsi Suazilândia, mvawu baviokila mu mambu ma thota kiminu kiawu. Mu thangu Ntinu   tsi beni bantedilanga Sobhuza kafua, batu boso mu tsi baba kuika kulamdakana kikhulu. Badinda babakala boso muingi bavuka minlengi ayi bakieto muingi badekula minlengi miawu. Zikhomba zitu bo bamanga landakana mbuongimini ayoyi muingi kukinzika kikhulu beni, baviokila mu zikhuamukusu ziwombo. Lukuikumunu  luawu, kiminu ayi mvibudulu’awu mu Yave, bukiedika lukindisa ayi lunyikuna mintima mitu!

Mu mvu 1981, yivutuka mu kiyeku yiba vayi mu thangu beni, tuaba sadila zi computador muingi kubasisa bilongulu. Ayi phila yi kubasisila bilongulu yibaluka mu nza yimvimba. Yiba thangu yi mayangi! Batu baba sumbisa bisadulu bimona bi kubasisila bilongulu, bayiza ti ku Filiali ayi babika kisadulu kimueka kimona muingi tumeka theti ku kisadila mu khambu futa. Bo tumona ndandu kiawu kiaba tuadisa, bavingisa vua di bisadulu tuaba sadilanga mu thangu yikhulu, mu bisadulu bitanu bimona. Mu kusadila biawu, befu tuluta basisa thalu yiwombo yi bilongulu kuvioka thalu tuaba basisanga mu thangu yikhulu!

Kusadila zi computador, kuzibula nzila muingi kusadila programa yinsadisanga kubasisa bilongulu mu zimbembu ziwombo bantedilanga MEPS. Bukiedika, phila yi kuvangila kisalu akioki, yibaluka beni tona befu tunanguka ku Beteli yi Canadá ayi tuyiza ku África do Sul! (Yesa. 60:17) Befu banna, tukuela zikhomba zi bakieto baba kiphevi kimboti ayi baba mintuami ntuala. Bill ayi minu, tukhidi sadila ku Beteli. Vayi Ken ayi Dennis badi mu kukieba makanda ayi badi bafikama ayi Beteli.

Ku filiali bisalu biaba buelama beni. Bilongulu bi Kibibila biaba sekulu mu zimbembo ziwombo, biaba basusu ayi biaba filu mu zifiliali zinkaka. Diawu vaba tombulu Beteli yinneni yimona. Zikhomba batunga Beteli yimona, ku este Joanesburgo, ayi bayikundula mu mvu 1987. Luba luaku lunneni kumona ndionzukulu yi Beteli ayi kuba wumueka mu Dingumba di Filiali yi África do Sul mu mimvu miwombo.

Mu mvu 2001, yitambula kiyeku ki kuba wumueka mu Dingumba di Filiali ku Beteli yi Estados Unidos. Kheti tuba mu kiunda mu kubika kisalu ayi bakundi bitu ku África do Sul, vayi tuba mu mayangi mu kutona luzingu lumona ayi kuba mu khati dikanda di Beteli yi Estados Unidos.

Befu tuaba kuazuka beni kubika mama yi Laura wuba kinunu. Bukiedika ti tuisa ba ko mawombo ma kuvanga bo tuba kinanu ku Nova Iorque. Vayi zikhomba ziandi zitatu ba kivana muingi bansadisa mu zitsatu ziandi zioso. “Bawu batuba: “Befu tuisi ko bu kukotila mu kisalu ki thangu ka thangu, vayi tunkuiza kieba zitsatu zi mama. Mawu mankuiza mu sadisa beni mutatamana mu kiyeku kinu.” Befu tu kuba vutudilanga beni matondo mawombo.

Bobuawu mvandi khomb’ami ayi nkazi’andi bankalanga ku Toronto, tsi yi Canadá, ba kivana muingi kukieba mam’ami wuba mfuizi. Nandi wuzinga yawu kuvioka 20 di mimvu. Tumvutulanga beni matondo mu luzolo ayi lukiebu bamvana nati kayiza fua bo befu tuvitila ku Nova Iorque. Luidi lusakumunu lunneni kuba na batu va dikanda badi bakubama muingi kubalula nzingulu’awu ayi kukikinina kiyeku kiphasi muingi kukieba matata! 

Mu mimvu miwombo, kiyeku kiama ku Beteli yi Estados Unidos kiba ki kubasisa bilongolo. Vayi kisalu beni kisiala ko beni phasi dedi bo kibela mu thangu yikhulu mu kibila ki bisadulu bimona. Vayi mu mimvu milanda, yitona kusadila mu Dingumba Dintadilanga Matedi Kusumba biuma. Luidi luaku lunneni beni mu 20 di mimvu kuba mu khati dikanda di Beteli yi Estados Unidos didi kuvioka 5.000 bi zibetelita ayi mvandi 2.000 di zikhomba bankuiza buelanga mioko!

Mu makuma sambanu di mimvu ku mbusa, minu yabasa yindulanga ko kuba biyeku bioso abiobio. Nkazi’ama Laura wukivana mu ntima woso muingi kumbuela mioko mu mimvu mioso mima vioka. Bukiedika, luzingu lu mayangi yima viokisa mu kisalu ki Yave! Tunkuangalalanga beni mu zikhomba ziwomba bama sala yitu va kimueka ayi kubunda mvandi zikhomba ziwombo tuzaba bo tuaba kuendanga kue kindisa zikhomba badi mu Zifiliali zinkaka mu nza yimvimba. Buabu yeka kuvioka 80 di mumvu, bilokula biama bi kusala bima dekuka, vayi vake matoko bakhidi mangolo ma kukieba biyeku beni.

Nsoniki wu minkunga wutuba: “Mayangi kuidi dikabu di batu dio Nzambi kadi Yave.” (Minku. 33:12) Mambu amomo madi makiedika! Minu yinkuangalalanga beni mu kubaka luaku lu kusala va kimueka na dikanda di mayangi di Yave.