1. Mambu mbi mamboti Yave ka kuvangila?

BUIDI ngie wuyiza bela Mbangi Yave? Theti, ngie wuyuwa “zitsangu zimboti ”—ḿba mu nzila matata maku, kuidi mutu wunsalanga yaku voti wunkotanga yaku kikola, voti mu kisalu ki nzo ka nzo Zimbangi zi Yave bamvanganga. (Malako 13:10) Bosi, khomba wuviokisa yaku thangu yiwombo ayi wuvanga mangolo muingi kuiza kulonganga Kibibila. Mu ndongukulu beni, ngie wutona kuzola Yave ayi wulonguka ti Nandi wukuzolanga beni. Yave wu kutumisa mu kiedika ayi buabu ngie widi wumueka mu minlandikini mi Yesu klisto, widi luaku lu kuzinga mvu ka mvu. (Yoa. 6:44) Bukiedika ngie wuntondanga beni Yave bo kanyikuna ntima wu khomba waba kuiza kulongisanga kiedika ayi bo Yave kavitika ngie wuba wumueka mu bisadi biandi.

2. Mbi tunkuiza tubila mu dilongi adidi?

² Buabu mazaba kiedika, ngie widi luaku lu kusadisa bankaka muingi mvawu bakota ayi badiatila mu nzila yi luzingu. Ngie ḿba wunzolanga kuvanga kisalu ki kusamuna ki nzo ka nzo, vayi wummonanga phasi muingi kutuadisa ndongukulu yi Kibibila. Buawu ngie wummuenanga? Boti buawu, buna zithuadusulu zidi mu dilongi adidi zinkuiza kusadisa beni. Befu tunkuiza tubila mbi bi tuvananga phuila muingi kuvanga minlonguki. Mvandi tunkuiza tubila bikaku tulenda dengana bo tuntuadisa ndongukulu yi Kibibila. Vayi theti, tuentubila kibila mbi befu tukhambulu to minsamuni vayi mvandi minlongisi mi zitsangu zi mboti.

3. Kibila mbi tunsamuninanga?

³ Bo Yesu kaba va ntoto, nandi wuvana minlandikini miandi biyeku biole. Kitheti, nandi wuba kamba basamuna zi tsangu zimboti zi Kintinu, ayi wuba sudikisa buidi bafueti vangala kiawu. (Matai 10:7; Luka 8:1) Yesu mvandi wukubika minlandikini miandi mu phila bafueti tatiminina kusamuna, kheti batu ba kuba kikinina  voti ndamba. (Luka 9:2-5) Nandi mvandi wuzaba ti, kisalu ki kusamuna kiala tembakana diawu ka kambila minlandikini miandi ti: “Muala vana kimbangi batu ba zitsi zioso.” (Matai 24:14; Mava. 1:8) Boso kua bubela phila batu bala yambila zitsangu zi Kintinu, vayi minlandikini miandi bafueti tatamana kusamuna Kintinu ki Nzambi ayi mambu Kiawu kiala vanga.

4. Dedi bummonisana Matai 28:18-20, kiyeku mbi kimmuadi Yesu kutuma minlandikini miandi bavanga?

⁴ Kiyeku mbi kimmuadi Yesu kutuma minlandikini miandi bavanga? Nandi wuba tuma muingi balonga minlonguki miaba konzuka buboti, batumamana mambu nandi kaba longa. Vayi bukiedika kuandi ti kisalu akioki kisukila to, mu sekulu yitheti dedi bo bawombu bantubilanga? Ndamba, Yesu wumonisa ti kisalu akioki ki nkinza, kiala tatamana kuvangama “nati ku tsukulu yi nza ayiyi.” (Tanga Matai 28:18-20.) Bo buawu mvandi, bo Yesu kamonikina kuvioka 500 di minlandikini, nandi wubue kuba tebula moyo nsua awowo. (1 Koli. 15:6) Ayi mu buku Nzaikusu, mu thangu Yesu kamonikina mvuala Yoani nandi wutuba ti, minlandikini miandi bafueti sadisa bankaka kulonguka matedi Yave.—Nzai. 22:17.

5. Dedi bummonisina 1 Koli. 3:6-9, buidi mvuala Polo kafuanikisila kisalu ki kusamuna ayi ki kulonga?

⁵ Mvuala Polo wudedikisa kisalu ki kuvanga minlonguki na kisalu ki mvati. Mawu mammonisa ti, bo tumvanga kisalu ki kusamuna tubika to kumuanga mbongo dedi bo mvati kammuanginanga mbongo. Nandi wutebula moyo basi Kolinto bo kaba kamba: “Minu yivata, Apolo wulembila nlangu. . . Ayi beno luidi tsola yi Nzambi kavata.” (Tanga 1 Kolinto 3:6-9.) Bo tuidi bisadi mu tsola yi Nzambi, tubika to kumuanga mbongo, vayi mvandi tufueti lembilanga nlangu kadika thangu ayi kufiongunina ndionzukulu yi mbongo beni tuma muanga. (Yoa. 4:35) Bo buawu mvandi tufueti tebukanga moyo ti, Nzambi wumvanganga mbongo beni kukonzuka.

6. Mu thangu tunlonga batu mbi tufueti kuba sadisa bavanga?

⁶ Befu tuntombanga mu kisalu ki kusamuna “baboso badi mintima mi kubama mu kubaka luzingu luka lumani.” (Mava. 13:48) Muingi batu baba minlandikini mi Yesu, befu tufueti kuba sadisa (1) bavisa, (2) bakikinina, ayi (3) basadila mu luzingu luawu mambu badi mu kulonguka mu Kibibila. (Yoa. 17:3; Kolo. 2:6, 7; 1 Tesa. 2:13) Baboso mu kimvuka balenda sadisa minlonguki mi Kibibila muingi bayonzuka, mu kuba monisa luzolo ayi mvandi mu kuba yambanga buboti mu zi khutukunu. (Yoa. 13:35) Khomba wuntuadisanga ndongukulu yi Kibibila mvandi kafueti viokisanga beni thangu ayi kuvanga mangolo muingi kusadisa nlonguki katulula “mayindu ayi bifu bioso” bilenda kakidila kikundi kiandi na Yave Nzambi. (2 Koli. 10:4, 5) Valenda tombulu zingonda muingi kutuadisa nlonguki wu Kibibila nati kankuiza baka makani ma kubotama. Vayi mangolo moso amomo tumvanga masi ko maphamba.

7. Mbi bi tuvanganga kuvanga kisalu ki kusamuna ayi kuvanga minlonguki?

⁷ Kibila mbi tukivaninanga mu kisalu ki kusamuna ayi kuvanga minlonguki? Theti, mu kibila ki luzolo tuidi mu Yave. Mu thangu wumvanga mangolo muingi kutumamana lutumu lu kusamuna ayi kuvanga minlonguki, ngie widi mu kumonisa luzolo widi mu Nzambi. (1 Yoa. 5:3) Yindulabu mu mambu amama: Luzolo lu Yave luawu lu kuvanga kusamuna nzo ka nzo. Kuvanga mawu diba diambu diluelu kutumamana lutumu beni? Ḿba ndamba. Kibila khumbu zinka mu thangu waba fikamanga va muelo, ngie wabe banga dibamu. Vayi  ngie wuzaba ti kisalu akioki kiawu Yesu kantomba ngie wuvanga ayi wu tumamana nsua awowo katu vana! Ayi ḿba buviokila thangu, ngie wutona kumona ti, kisalu beni kisi ko phasi muingi kuvanga. Buabu mbi tulenda tuba mu matedi kutuadisa ndongukulu yi Kibibila? Muingi kuvanga mawu, ngie wumbanga dibamu? Ḿba. Vayi, ngie kudinda lusalusu kuidi Yave muingi kununga dibamu wumbanga ayi kuvanga mangolo muingi kutuadisa ndongukulu yi Kibibila, Yave kalenda kusadida muingi wuba mangolo ayi wuba mvandi phuila yi kuvanga minlonguki.

8. Dedi bummonisina Malako 6:34, mbi binkaka bi tuvanganga muingi kulonga bankaka?

⁸ Diambu dimmuadi, luzolo tuidi kuidi badi yitu luawu lu tuvanganga muingi tuba longa kiedika. Khumbu mueka, Yesu ayi minlandikini miandi baba beni bavonga mu kibila ki kisalu ki kusamuna kiwombo bavanga, bawu baba tomba kibuangu muingi bavunda. Vayi mu thangu beni, nkangu wunneni wu batu wuba bakula vo baba. Mu luzolo ayi kiadi, Yesu wutona kuba longa “mambu mawombo.” (Tanga Malako 6:34.) Yesu naveka wukivana mu thangu beni. Kibila mbi? Kibila Yesu wu kitula va kibuangu kiawu. Nandi wumona phila baba tovukila, phila baba zingila mu khambu ba kivuvu, ayi nandi waba tomba kuba sadisa. Bubu mvandi buawu batu badidi mu nza. Bika to kuba tadila va mbata mu phila bammonikina buka ti badi mu mayangi. Bawu badi buka mamemi, makhambulu nsungi muingi kuba tuadisa. Mvuala Polo wutuba ti batu beni badi buka ti, bazebi Nzambi vayi basi ko ni kivuvu kimueka. (Efe. 2:12) Bawu badi batu “bandiatila mu nzila yinnata ku mbungulu”! (Matai 7:13) Mu thangu befu tunyindula phila batu badi yitu va kizunga badidi ku kitombi ki kiphevi, luzolo ayi kiadi tuidi mu bawu, luawu lu tuvanganga muingi kuba sadisa. Ayi phila yilutidi muingi kuvangila mawu, yidi kukivana muingi kuba longa Kibibila.

9. Dedi bummonisina Filipi 2:13, buidi Yave kalenda kusadisila?

⁹ Ḿba ngie khumbu zinkaka wulenda ba divuda muingi kutona kulonga mutu Kibibila, kibila ngie zebi ti thangu yiwombo yinkuiza tombulu muingi kuvanga mawu. Vayi boti buawu, zabikisa mabanza amomo widi kuidi Yave. Ndinda muingi ka kusadisa kukuna phuila ayi wubaka nlonguki wu Kibibila. (Tanga Filipi 2:13.) Mvuala Yoane wutu kindisa ti, Nzambi wuntambudilanga minsambu mioso midi nguizani ayi luzolo luandi. (1 Yoa. 5:14, 15) Diawu ngie wulenda ba lufiatu ti, Yave Nzambi wala kusadisa muingi kukuna phuila yi kuvanga minlonguki.

10-11. Mbi bintulanga nkaku zikhomba zinkaka kutuadisa ndongukulu yi Kibibila?

¹⁰ Befu tunatinanga ko kisalu kitu ki kusamamuna mu kusakana ayi tubikanga ko bikaku tundengananga bi tuvutula mbusa, muingi kuvanga mamoso tulenda nunga mu kisalu ki kuvanga minlonguki. Diawu tunkuiza tubila mua bikaku tundengananga ayi mbi tulenda vanga muingi kununga biawu.

¹¹ Mambu maphasi tuidi mu kuviokila mu luzingu. Dedi, minsamuni miwombo beka bakhulutu ayi bankaka basi ko buvinya bumboti. Mawu ngie widi mu kuviokila? Boti buawu, buna mona malongi mamfunu tulenda longuka mu thangu ayiyi yi COVID-19. Kuba kuandi ti tuidi mu kutuadisa minlonguki mi Kibibila mu kusadila telefoni ayi bisadulu binkaka, ngie widi luaku lu kutona ndongukulu yi Kibibila kheti bo widi ku nzo’aku. Ayi mvandi vadi diambu dinkaka dimboti kuvanga mawu. Minlonguki miwombo banzolanga kulonguka Kibibila, vayi babakanga ko thangu, bo zikhomba bankuendanga muingi kue balonga Kibibila ku  nzo. Vayi balenda ba, bakubama muingi kulonguka mu telefoni va meni meni voti va builu bo bamvutuka mu zinzo. Ngie wulenda kukivana muingi kuvanga mawu? Yesu wulonga Nikodemi va builu, kibila yawu thangu yiba yifuana kuidi Nikodemi.—Yoa. 3:1, 2.

12. Mambu mbi matatu ma tubuela lufiatu ti tulenda ba minlongisi mimboti?

¹² Kukhambu ku lufiatu mu ngie veka mu matedi kutuadisa ndongukulu yi Kibibila. Khumbu zinkaka ngie wulenda kukimona buka ti, wisi ko luzabu ayi wisi ko nlongisi wumboti muingi kutuadisa ndongukulu yi Kibibila kuidi nlonguki. Boti mabanza amomo mawu madi yaku, buna tala mambu matatu malenda ku kusadisa kubuela lufiatu. Theti, Yave wu kutadilanga nlongisi wufuana muingi kulonga bankaka. (2 Koli. 3:5) Dimmuadi, Yesu widi lulendu tona kuandi ku diyilu ayi va ntoto mu kimvuka, wu kuvana nsua wu kulonga. (Matai 28:18) Ayi dintatu, ngie wulenda fiatila mu lusadusu lu bankaka. Yesu wufiatila ti Tat’andi wunkuiza nlonga kutuba ayi kukolukila mu phila yifuana ayi ngie wulenda ba lufiatu mu mawu. (Yoa. 8:28; 12:49) Mvandi ngie wulenda dinda nkulutu wuntuadisanga dingumba dinu di kubasika mu kisalu ki kusamuna, voti ntuami ntuala ove khomba yinkaka wupisuka. Zikhomba beni balenda kubuela lufiatu mu kulandakana phila bantuadisila ndongukulu yi Kibibila.

13. Kibila mbi tufueti vangila mangolo muingi kukolama?

¹³ Tulenda mona phasi kukolama phila yimona ayi bisadulu bimona bi kulongila. Phila tuaba tuadisilanga ndongukulu yi Kibibila yima baluka beni. Mua buku ayi buku Baka Mayangi ma Mvu ka Mvu! tunkuiza sadilanga muingi kulongila, yintombulu kukubama buboti muingi kutuadisa ndongukulu yi Kibibila mu phila yiviakana yo tube sadisilanga mu thangu yikhulu. Befu tuisinkuiza tanganga ko binduika voti matangu mawombo. Vayi tunkuiza luta sadilanga beni thangu, muingi kusolula na nlonguki. Bo tunlonga, tunkuiza luta sadilanga beni zivideo ayi mvandi kisadulu JW Library^®. Boti ngie wisi ko lufiatu mu phila yi kusadila bisadulu beni, yoluka na khomba muingi ka kusadisa. Befu batu tuidi bivangu bimmonanga phasi kubika kifu. Diawu khumbu zinkaka dilenda ba diambu diphasi muingi kukolama diambu dimona. Vayi mu lusalusu lu Yave ayi lu zikhomba zinkaka, ngie wulenda kolama ayi wulenda kuangalala mu kutuadisa ndongukulu yi Kibibila mu phila yimona. Dedi butubila ntuami ntuala wumueka, phila ayoyi yimona yi kulongisila batu yidi beni yimboti “kuba kuandi kuidi nlonguki ayi mvandi kuidi nlongisi.”

14. Mbi tufueti tebukanga moyo bo tunsadila va kizunga kidi phasi, ayi buidi matangu madi 1 Kolinto. 3:6, 7 ma tu kindisila?

¹⁴ Kukala va kizunga kio batu bankhambu fika kikininanga ndongukulu yi Kibibila. Batu khumbu zinkaka va kizunga kitu, balenda manga vua beni nkinza mambu tu kuba longa. Mbi bilenda kutu sadisa kutatamana kuba mayindu mafuana boti batu va kizunga kitu buabobo bakadila? Tufueti tebuka moyo ti, mambu ma luzingu mambalukanga mu thinu mu nza ayiyi. Batu khumbu zinkaka baba khambu vuanga nkinza mambu ma Kibibila, balenda mona phuila yi kiphevi ayi kubalula phil’awu yi kuyindudila. (Matai 5:3) Befu tummonanga ti bawombo mu thangu yikhulu baba manganga bilongulu bitu, vayi bubu bamana kikinina ndongukulu yi Kibibila. Mvandi tuzebi ti, Yave Nandi Mfumu yi tsola. (Matai 9:38) Nandi wuntomba tutatamana kumuanga mbongo ayi kulembila nlangu, vayi Naveka Nandi widi kiyeku ki kukonzula mbongu beni. (1 Koli. 3:6, 7) Ayi ma tukindisa beni bo ba tutebudi moyo ti, kheti befu mu thangu ayiyi tuisi ntuadisa ko ndongukulu yi Kibibila, vayi Yave bobuawu wala kutu sakumuna mu mangolo tuidi mu kuvanga muingi kutatamana kusamuna, vayi kubika  kuandi mu thalu yi batu tuma nunga kusadisa muingi babotama! *

15. Buidi Yave kammuenanga mu thangu mutu kankikinina kiedika ki Kibibila ayi kansadila mambu kadi mu kulonguka?

¹⁵ Yave wunkualanga beni mu thangu mutu kankikinina kiedika ki Kibibila ayi mvandi kanzabikisa kiedika beni kuidi bankaka. (Zinga. 23:15, 16) Bukiedika Yave widi beni mu mayangi mu kumona mambu madi mu kusalama bubu! Dedi, kheti mu kivunga ki COVID-19, mu mvu 2020 tunungizi kutuadisa 7.705.765 di minlonguki mi Kibibila ayi tusadisizi 241.994 mu bawu ba kiveni muingi kubotama. Minlonguki amiomi mi mona, mvawu bankuiza tuadisa minlonguki minkaka mi Kibibila ayi kuba sadisa kubotama. (Luka 6:40) Tuisi ko divuda ti, Yave Nzambi widi beni mu mayangi mu kisalu tuidi mu kuvanga, ki kuvanga minlonguki mi Kibibila.

16. Makani mbi tulenda baka?

¹⁶ Kisalu ki kuvanga minlonguki kidi kisalu kiphasi, vayi mu lusalusu lu Yave befu mvitu tulenda vanga mo tunnunga muingi kusadisa bamona bazola Yave Tat’itu yi diyilu. Diawu tulenda sikika makani muingi kadika mutu mu befu katuadisa kheti nlonguki wumueka wu Kibibila. Mawu mala tukuitula beni kumona, ndandu tuala baka mu kusadila luaku loso muingi kudinda mutu kalonguka yitu Kibibila. Wulenda ba lufiatu ti Yave wala sakumuma mangolo moso wala vanga.

17. Buidi tuala bela befu kubaka luaku lu kusadisa nlonguki ka kivana ayi kubotama?

¹⁷ Luaku lunneni beni tuidi lu kusamuna ayi kulonga bankaka kiedika! Kisalu akioki ki tuvananga mayangi makiedika. Mvuala Polo, mvandi wusadisa batu bawombo ku Tesalonika muingi baba minlandikini, wumonisa mayangi kaba bo katuba: ‘Banani kivuvu, mayangi ove lunungu luitu va ntuala mfumuitu Yesu Klisto? Luisi ko beno? Bukiedika beno luidi mayangi mitu ayi nkembu’itu.’ (1 Tesa. 2:19, 20; Mava. 17:1-4) Bawombu bubu bammonanga mayangi ma phila yoyo. Khomba yimueka bantedilanga Stéphanie ayi nnu’andi, basadisa bawombo kuzaba kiedika ayi kubotama wutuba: “Vasi ko mayangi malutidi ke na kusadisa batu ba kivana ayi kubotama.”