DILONGI 29
Buela Mioko Ntuadis’itu Yesu
“Minu bavana lulendo loso, tona ku diyilu nati va ntoto.” —MATAI 28:18.
NKUNGA 13 Klisto, Ntungulu’itu
MAMBU TUANLONGUKA *
1. Mbi Yave kantomba bubu?
BUBU Yave wuntomba zitsangu zimboti zi Kintinu zisamunu mu nza yimvimba. (Malako 13:10; 1 Timo. 2:3, 4) Akiokio kidi kisalu ki Yave ayi kiawu nkinza beni kidi, diawu katudila kiawu kutsi thuadusulu yi Muan’andi wu luzolo. Ayi tulenda ba lufiatu ti Yesu widi wufuana muingi kutuadisa kisalu akiokio mu phila Yave kantombila ava tsukulu yi nza.—Matai 24:14.
2. Mbi tunkuiza longuka mu dilongi adidi?
2 Mu dilongi adidi, tunkuiza mona buidi Yesu kadi mu kusadila “nnanga wukuikama” muingi ku tuvana bidia bi kiphevi ayi kutuadisa minlandikini miandi mu kisalu kilutidi ki kusamuna kidi mu kuvangama. (Matai 24:45) Mvandi tunkuiza mona buidi kadika mutu mu befu kalenda buedila mioko Yesu ayi nnanga wukuikama.
YESU NANDI NTUADISI WU KISALU KI KUSAMUNA
3. Lulendu mbi Yesu katambula?
3 Yesu nandi ntuadisi wu kisalu ki kusamuna. Buidi tulenda bela lufiatu mu mawu? Mua thangu ava kavutuka ku diyilu, Yesu wudengana na minlandikini miandi mikuikama ku mongo Ngalili. Nandi wuba kamba: “Minu bavana lulendu loso, tona ku diyilu nati va ntoto.” Bosi tala mambu nandi kabue tuba: “Yendanu, lukitula batu ba zitsi zioso minlonguki miami.” (Matai 28:18, 19) Mu mambu moso Yesu katambula lulendu muingi kutuadisa, kisalu ki kusamuna didi dimueka mu mawu.
4. Kibila mbi tulenda bela lufiatu ti Yesu wukhidi tuadisa kisalu ki kusamuna?
4 Yesu wutuba ti kisalu ki kusamuna ayi kuvanga minlonguki kiala vangimina “mu zitsi zioso” ayi nandi wala ba na minlandikini miandi “mu bilumbu bioso nati kutsukulu yi nza.” (Matai 28:20) Matangu amomo mammonisa ti kisalu ki kusamuna, kiala tatamana kutsi thuadusulu yi Yesu nati mu bilumbu bitu.
5. Buidi tunsadisilanga kudukisa mbikudulu yidi mu Minkunga 110:3?
5 Yesu kabasa kuazuka ko boti kunkuiza ba thalu yiluelu yi batu bankuiza vanga kisalu ki kusamuna mu bilumbu abibi bitsuka. Vayi nandi wuzaba ti mbikudulu yidi mu minkunga yala salama. Yawu yintuba: “Dikabu diaku bala kukivana mu kilumbu wala tuadisa masodi maku mu mvita.” (Minku. 110:3) Boti ngie widi mu kuvanga kisalu ki kusamuna, buna widi mu kubuela mioko Yesu, nnanga wukuikama ayi widi mu kusadisa kudukisa mbikudulu ayoyo. Kisalu akiokio kidi mu kuenda ntuala vayi vammonikanga mua bikaku.
6. Kikaku mbi minsamuni mi Kintinu bandengananga bubu?
6 Zinzomono zidi kimueka mu bikaku minsamuni bamviokilanga. Batu babalukila kimvuka, zimfumu zi binganga ayi basi pulitika, bantubanga luvunu luwombo matedi kisalu kitu. Basi dikanda, batu va nsengi ayi batu bansalanga yitu, bamvunukanga mu mambu amomo. Ayi ḿba balenda ku tukuika tubika sadila Yave ayi kusamuna. Mu zitsi zinkaka, zimbeni zitu bankananga kuvanga bubi zikhomba zitu, ba kuba bulanga ayi ba kuba tulanga mu buloku. Vayi tulendi kuituka ko mu mawu, kibila Yesu wubikula: “Batu ba makanda moso bela ku lulenda mu kibila ki dizina diama.” (Matai 24:9) Mambu amomo mammonikinanga zikhomba ayi ma tumonikinanga befu veka, madi bivisa ti tuidi lunungu va meso ma Yave. (Matai 5:11, 12) Nkadi’ampemba nandi wuntuadisanga zinzomono aziozio. Vayi Yesu lutidi lulendu kena Satana! Mu lusalusu lu Yesu, zitsangu zimboti zidi mu kuvitila kuidi batu ba zitsi ziozo. Tala bivisa mu mawu.
7. Bivisa mbi bimmonisa ti mambu madi mu Nzaikusu 14:6, 7 madi mu kusalama?
7 Mu kuba minsamuni mi Kintinu, mvandi tundengananga kikaku kinkaka mu matedi kusamuna kuidi batu bankolukanga zimbembo ziviakana. Vayi mu kimona meso Yesu kamonisa mvuala Yoani, nandi wutuba ti mu bilumbu bitu tuala nunga kikaku akiokio kitedi kusamuna mu zimbembo zinkaka. (Tanga Nzaikusu 14:6, 7.) Buidi? Befu, tuidi mu kuvana batu bawombo luaku lu kukuwa tsangu yi Kintinu. Bubu batu mu nza yimvimba balenda tanga Kibibila voti bilongulu bibongulu mu Kibibila mu khond’itu mayo jw.org muidi bilongulu bisekulu kuvioka 1.000 ki zimbembo! Nnanga wukuikama mvandi wuvana nsua wu kusekula buku Baka Mayangi ma Mvu ka Mvu! ayi bilongulu binkanka tunsadilanga muingi kulonga ayi kuvanga mi minlonguki kuvioka 700 di zimbembo! Bidia bi kiphevi mvandi bidi mu kusekulu mu zivideo ayi zi audio muingi kusadisa bafua matu ayi binkaka bidi mu kusekulu mu braile muingi kusadisa bafua meso. Bukiedika, tuidi mu kumona zimbikudulu zi Kibibila kusalama. Batu “ba zitsi ayi zimbembo ziozo” badi mu kulonguka kukoluka “mbembo yivedila” voti kiedika ki Kibibila. (Zaka. 8:23; Sefa. 3:9) Mambu moso amomo, madi mu kusalama mu thuadusulu yi ntuadis’itu Yesu Klisto.
8. Ndandu mbi kisalu kitu ki kusamuna kintuadisanga bubu?
8 Bubu, kuvioka 8.000.000 di batu mu 240 di zitsi badi mu kimvuka ki Yave ayi mu kadika mvu bawombo mu bawu bambotamanga! Ayi bakana ko thalu ayoyi yilutidi nkinza, vayi zikhadulu ziawu zi kiphevi ayi “kimutu kimona” bamvuatanga, kiawu ki bavanganga kuba minlandikini mi Yesu. (Kolo. 3:8-10) Bawombo mu bawu babika nzingulu yi kitsuza, makhema, kithatu ayi kukhambu ba luvasanu mu bankaka. Mbikudulu yidi mu Yesaya 2:4 yidi mu kusalama bubu, yawu yintuba: ‘Bawu balasa bue longuka ko mimvita.’ Bo tumvanga mangolo ma kukuna kimutu kimona, tunsadisanga batu bakota mu kimvuka ki Nzambi ayi mawu mammonisa ti tuidi mu kulandakana ntuadis’itu Yesu Klisto. (Yoa. 13:35; 1 Pete. 2:12) Bukiedika, mambu amomo, masimmonikina ko mu phamba. Vayi Yesu widi mu kutuvana lusalusu.
YESU WUSOLA NNANGA WUKUIKAMA
9. Dedi bummonisina Matai 24:45-47, mambu mbi Yesu kabikula matedi bilumbi bitsuka?
9 Tanga Matai 24:45-47. Yesu wubikula ti mu bilumbu bitsuka, nandi wala sola “nnanga wukuikama ayi wu nduenga” muingi ku tuvana bidia bi kiphevi. Ayi tuzebi ti nnanga wukuikama wunsalanga beni mu bilumbu bitu. Tummonanga bivisa mu mawu. Kibila ntuadis’itu widi mu kusadila mua dingumba di baklisto basolo, muingi kuvana dikabu di Nzambi ayi baboso batidi bidia bi kiphevi “mu thangu yifuana.” Zikhomba aziozio, ba kitadilanga ko banga zimfumu zi kiminu ki bankaka. (2 Koli. 1:24) Vayi bawu bankikininanga ti Yesu Klisto nandi “Mfumu ayi ntuadisi” wu dikabu di Nzambi.—Yesa. 55:4.
10. Mu bilongulu bidi mu foto, kilongulu mbi ki kusadisa kutona sadila Yave?
10 Tona mu mvu 1919, nnanga wukuikama wukubika bilongulu biviakana muingi kusadisa batu bamona mu kimvuka babimba bidia bi kiphevi. Mu mvu 1921, nnanga wukuikama wukubika buku A Harpa de Deus muingi kusadisa batu kuzaba malongi matheti ma Kibibila. Buviokila thangu wubue kubika bilongulu binkaka. Dedi mu ngiewu, kilongulu mbi ki kusadisa kuzaba ayi kuzola Tat’itu yi diyilu? Ḿba kilongulu “Seja Deus Verdadeiro,” A Verdade Que Conduz à Vida Eterna, Viva Para Sempre em Felicidade na Terra, Conhecimento Que Conduz à Vida Eterna, O Que a Bíblia Realmente Ensina, Mbi Kibibila Kilenda Kutulonga?, voti kilongulu kimona, Baka Mayangi ma Mvu ka Mvu! Bilongulu bioso abiobio, bikubukulu muingi kutusadisa kuvanga minlonguki ayi tulenda tuba ti biawu bivitila mu thangu yifuana.
11. Kibila mbi didi diambu dinkiza befu boso kudia bidia bi kiphevi?
11 Bo badi bamona mu kimvuka bakana ko to bawu bantomba bidia bingolo bi kiphevi. Vayi befu boso. Mvuala Polo wusonika: “Bidia bingolo bidi bi bakulutu.” Bosi nandi wubue tuba ti “biawu bi kuba sadisanga kusuasisa mambu mamboti ayi mambi.” (Ebe. 5:14) Mu thangu ayiyi yi phasi tuidi mu kuzingila, mayindu ma batu masiala bue suasisa ko mambu mamboti ayi mambi. Diawu dilenda ba diambu diphasi kuidi befu muingi kutatamana kutumukina zithumu zisonga zi Yave. Vayi Yesu wummonanga mawu diawu ka tusadisilanga kubaka bidia bi kiphevi bilenda ku tuvana mangolo tuntomba. Tho yi bidia beni bi kiphevi yidi Kibibila Diambu di Nzambi. Nnanga wukuikama wunkubikanga ayi wunkabulanga biawu mu thuadusulu yi Yesu.
12. Dedi Yesu, buidi befu tunzitisilanga dizina di Nzambi?
12 Dedi Yesu, befu tumvananga nzitusu dizina di Nzambi difueni kutambula. (Yoa. 17:6, 26) Dedi mu mvu 1931, befu tuyiza zabikinina mu dizina Zimbangi zi Yave dibongulu mu Kibibila. Ayi tuidi beni luzolo mu dizina beni, kibila mu phila ayoyi befu tunluta fikamanga Tat’itu yi diyilu. (Yesa. 43:10-12) Ayi tona mu ngonda Yikumi mu mvu beni, dizina di Nzambi dimmonikanga va thonono yi kadika levista. Mvandi, tsekudulu yi Kibibila Tradução do Novo Mundo yivutula dizina di Nzambi mu bibuangu bioso diawu diba. Vayi disuasana diwombo didi na binganga binkaka, kibila bawu babotula dizina di Yave mu zitsekudulu ziawu zi Kibibila!
YESU WUNKUBIKANGA MINLANDIKINI MIANDI
13. Mbi bi kuvana lufiatu ti Yesu widi mu kutuadisa “nnanga wukuikama” bubu? (Yoane 6:68)
13 Mu nzila “nnanga wukuikama ayi wunduenga,” Yesu wukubika dingumba mu nza yimvimba muingi kunatisa mbuongimini yikiedika. Buidi wummuena mu kuba wumueka mu dingumba adiodio? Ḿba mvutu’aku widi nkuizani na mambu mvuala Petelo kakamba Yesu bo katuba: “A Mfumu kuidi kunkaka tufueti kuenda? Kibila ngie to widi mambu mamvana luzingu lu mvu ka mvu.” (Yoa. 6:68) Dedi, boti tuisa zaba ko kimvuka ki Yave, khanu kuidi befu tuidi bubu? Bukiedika, Klisto wumvanganga mamoso muingi befu tudia buboti mu kiphevi. Nandi mvandi wu tukubikanga muingi tuvanga kisalu kitu ki kusamuna mu phila yimboti. Ayi mvandi wu tusadisanga kuvuata “kimutu kimona,” muingi tuyangidika Yave.—Efe. 4:24.
14. Ndandu mbi ngie wumbakanga mu kuba mu khati kimvuka ki Yave mu thangu kivunga ki COVID-19?
14 Yesu wu tuvananga zithuadusulu zi nduenga mu thangu yi ziphasi. Tulenda mona kivisa mu ndandu tumbakanga mu zithuadusulu beni mu thangu kivunga ki COVID-19. Mu thangu batu mu nza bakhambu zaba ma kuvanga, Yesu wu tuvana thuadusulu yisulama muingi befu tutatamana kuba nsika. Ba tukindisa tuvuatanga zi mascara bo tuidi va kibuangu kidi batu bawombo ayi mvandi kutatuka batu. Bakulutu ba kimvuka mvandi baba tebula moyo muingi kutelanga zikhomba zi kimvuka ayi kuba sadisa mu zitsatu ziawu zi kinsuni ayi zi kiphevi. (Yesa. 32:1, 2) Mvandi tuntambulanga zithuadusulu zinkaka zi tukindisanga mu zindubu zimfuminanga kuidi Dingumba Dintuadisi.
15. Zithuadusulu mbi tutambula matedi buidi bu kuvangila zikhutukunu ayi kisalu ki kusamuna mu thangu yi COVID-19 ayi ndandu mbi tubeki?
15 Mu thangu kivunga ki COVID-19, befu tutambula zithuadusulu mu phila tufueti vangila zikhutukunu zi kimvuka ayi kisalu kitu ki kusamuna. Mu thinu tutona kulandikininanga zikhutukunu zi kimvuka, zi divula ayi zi mavula mu nzila videoconferência ayi mu zitelefoni. Mvandi tutona kuvana kimbangi mu minkanda ayi mu zitelefoni. Yave wunsakumunanga mangolo moso tumvanganga. Zifiliali ziwombo bafila kipholo ti badi mu kumona ndionzukulu yiwombo mu matedi minsamuni. Bukiedika, zikhomba ziwombo bantubanga ti badi mu kubaka beni ndandu mu kisalu ki kusamuna mu thangu ayiyi.—Tala quadro yintuba “ Yave Wusakumuna Kisalu Kitu ki Kusamuna.”
16. Mambu mbi tulenda bela lufiatu?
16 Bowombo babe tubanga ti Zimbangi zi Yave badi mu kusabisa beni mu matedi kukikieba mu kivunga ki COVID-19. Vayi bumviokila thangu, befu tuidi mu kumona bivisa ti zithuadusulu tumbakanga zinkuizilanga mu thangu yifuana. (Matai 11:19) Ayi bo tunyindula phila Yesu kadi mu kutuadisila dikabu di Nzambi mu luzolo, lufiatu luitu lumbuelamanga ti moso kua mambu mankuiza kuntuala, Yave ayi Muan’andi wu luzolo bala tatamana kuba yitu.—Tanga Ebeleo 13:5, 6.
17. Buidi wummuenanga mu kuzaba ti widi mu kusala kutsi thuadusulu Yesu?
17 Lusakumunu lunneni tuidi lu kusala kutsi thuadusulu Yesu Klisto! Befu tuidi mu kimvuka kinunga kikaku mu kukhambu tadila batu mu matedi bikhulu biawu, tsi’awu voti mbembu’awu. Ba tudikilanga buboti mu kiphevi ayi ba tukubikanga muingi tuvanga kisalu kitu ki kusamuna. Mvandi kadika mutu mu befu, tumbakanga lusalusu muingi kuvuata kimutu kimona ayi tunlongukanga kuzolasana befu na befu. Bukiedika, tuidi bibila biwombo muingi kukuangalala mu ntuadis’itu, Yesu!
NKUNGA 16 Kembisa Yave mu Muan‘andi Wusolu
^ Mafunda ma babakala, bakieto ayi bana badi mu kusamuna mu kifuza zitsangu zimboti. Ngie mvaku widi wumueka mu bawu? Boti buawu, ngie widi mu kusala kutsi thuadusulu yi Mfumu’itu Yesu Klisto. Mu dilongi adidi, tunkuiza mona bivisa bimmonisa ti Yesu widi mu kutuadisa kisalu ki kusamuna bubu. Kuyindula mu mambu amomo, kunkuiza tusadisa kutatamana kusadila Yave kutsi thuadusulu yi Klisto.
