DILONGI 31
Monisa ti Wumvuanga Nkinza Luaku Widi lu Kusambila
“Bika nsambu’ama wuba banga malasi makubuku va ntual’aku.” —MINKU. 141:2.
NKUNGA 47 Sambila Yave Lumbu Bioso
MAMBU TUANLONGUKA *
1. Kibila mbi tuntadilanga nsambu banga nkhailu wu luvalu?
BEFU tuidi luaku lunneni—lu kufikama Yave Mvangi diyilu ayi ntoto mu nsambu. Yindula mua nkadu: Befu tulenda zibudila Yave ntim’itu mu yoso kua thangu ayi mu yoso kua mbembu mu khambu dinda theti nsua. Befu tulenda vanga nsambu bo tuidi va kika ki kimbevu voti mu buloku mu kuba lufiatu ti Tat’itu wunkuiza tuyuwa. Bukiedika, tumvutulanga beni matondo mu nkhailu awowo.
2. Buidi Ntinu Davidi kamonisina ti waba vuanga beni nkinza luaku lu kusambila?
2 Ntinu Davidi waba vuanga beni nkinza luaku kaba lu kusambila. Nandi wuyimbila kuidi Yave: “Bika nsambu’ami wuba banga malasi makubuku va ntual’aku.” (Minku. 141:1, 2) Mu bilumbu bi Ntinu Davidi, zinganga Nzambi baba banga keba keba muingi kukubika malasi baba sadilanga mu mbuongimini yikiedika. (Esodu 30:34, 35) Dedi bo zinganga Nzambi baba belanga keba keba muingi kukubika malasi, buawu mvandi Ntinu Davidi kaba belanga keba keba mu mambu kankuiza tuba mu nsambu kuidi Tat’andi yi diyilu. Befu mvitu tuidi phuila ayoyi, kibila tuntomba minsambu mitu miyangidika Yave.
3. Khadulu mbi tufueti monisa bo tumfikama Yave mu nsambu ayi kibila mbi?
3 Mu thangu tunsambila, tufueti monisa lukinzu lungolo kuidi Yave. Yindula mu bimona meso mbikudi Yesaya, Yehezekeli, Danieli ayi Yoane bamona. Kheti bimona meso beni biba disuasana, vayi diambu dimueka didi nguizani. Baboso batuba ti Yave widi Ntinu wulutidi Zangama ayi wu kukuitukila. Dedi, ḿbikudi Yesaya ‘wumona Yave wukala va kikundu kiandi kizangama.’ (Yesa. 6:1-3) Ḿbikudi Yehezekeli wumona Yave wukala va dikalu diandi di kiphevi didi dizungalala “na nkiama . . . wunlezama beni.” (Yehe. 1:26-28) Mbikudi Danieli wumona “Nkulutu wu bilumbu” wuvuata bikhutu biphembi binlezama ayi mbazu yaba basika va kikundu kiandi. (Dani. 7:9, 10) Ayi mvuala Yoane wumona Yave wukala va kikundu kiandi kidi kizungalala mu nkiama waba lezama banga dimanha di luvalu. (Nzai. 4:2-4) Befu kuyindula kuzangama ayi nkembu wu Yave tukhambu nunga kudedikisa, mawu ma tutebula moyo luaku lunneni tuidi muingi kumfikama mu nsambu ayi kuvangila mawu mu lukinzu. Vayi buidi tufueti sambidila?
“TALA PHILA LUFUETI SAMBIDILANGA”
4. Mbi tulenda longuka mu mambu matheti Yesu kadinda mu nsambu widi mu Matai 6:9, 10?
4 Tanga Matai 6:9, 10. Mu disolo kavanga va mbata mongo, Yesu wulonga minlandikini miandi phila bafueti sambidila muingi kukuangidika Nzambi. Bo kamana kutuba tala phila “lufueti sambidila,” Yesu theti wutubila mambu mankinza madi kithuadi na lukanu lu Yave dedi: Kuzitisa dizina diandi, kudinda Kintinu kiandi kiza, kudinda muingi kutulula zimbeni zi Nzambi ayi kutuala lusakumunu kakanikisa va ntoto ayi kuidi batu. Bo tundinda mambu amomo mu minsambu mitu, befu tuidi mu kumonisa ti lukanu lu Nzambi nkinza beni luidi kuidi befu.
5. Bukiedika ti didi diambu dimbi kusambila mu matedi zitsatu zitu?
5 Mu kitini kimmuadi ki nsambu, Yesu wumonisa ti buisi ko bubi befu kudinda mu nsambu mambu matedi zitsatu zitu. Tulenda dinda kuidi Yave muingi katuvana bidia bi kilumbu, kulemvukila masumu mitu, kutukieba muingi tubika bua mu zithotolo ayi ka tuvukisa mu mioko mi nkua wambi. (Matai 6:11-13) Mu thangu tundinda Yave biuma abiobio, befu tuidi mu kikinina ti nandi to kalenda ku tusadisa ayi tuidi mu kumonisa phuila tuidi yi kubaka lunungu luandi.
Mambu mbi nnuni kalenda dinda bo kamvanga nsambu na nkazi’andi? (Tala lutangu 6) *
6. Bukiedika ti tufueti vutukila to mambu Yesu kadinda mu nsambu? Sudikisa.
6 Yesu kasa tuba ko ti tufueti vutukila bio biawu bikuma nandi kasadila mu nsambu. Kibila mu nsambu wunkaka kavanga, nandi wutubila mambu maba kunkuazula mu thangu beni. (Matai 26:39, 42; Yoa. 17:1-26) Bo buawu mvandi befu tulenda sambila mu moso kua mambu ma tuvanga kukuazuka. Dedi, boti makani tuntomba kubaka, tulenda sambila muingi Yave ka tuvana nduenga ayi phisulu. (Minku. 119:33, 34) Mvandi bo tuntona kuvanga kiyeku tummona phasi, tulenda sambila muingi Yave ka tusadisa kuvisa phila tufueti vangila kiawu. (Zinga. 2:6) Matata bafueti natanga bana bawu mu minsambu, bana mvawu bafueti natanga matata mawu mu minsambu miawu ayi befu boso tufueti natanga mu minsambu minlonguki mitu mi Kibibila ayi batu tunsamunanga. Vayi tulendi vanganga ko to minsambu muingi kudinda lusadusu.
Mambu mbi tulenda zitisila ayi kutonda Yave mu minsambu mitu? (Tala matangu 7-9) *
7. Kibila mbi tufueti zitisilanga Yave mu nsambu?
7 Mvandi tufueti tebukanga moyo kuzitisa Yave mu minsambu mitu. Kibila vasi ko mutu wunkaka fueti tambula nzitusu nandi kafueni tambula. Nandi widi “nkua mamboti ayi widi wukubama muingi kulemvukila.” Mvandi widi “nkua kiadi, nkua nlemvu, kafika dasukanga ko, widi wuwala mu luzolo lukuikama ayi wukuikama.” (Minku. 86:5, 15) Bukiedika, bibila biwombo tuidi muingi kuzitisa Yave mu ntindu mutu nandi kadi ayi mu mambu moso ka tuvangilanga.
8. Mambu mbi tulenda tondila Yave? (Minkunga 104:12-15, 24)
8 Kubika kuandi to kuzitisa Yave mu minsambu mitu, mvandi tufueti kuntondanga mu mamboti moso ka tuvangilanga. Dedi tulenda kuntonda mu zindimba ziviakana katula mu biteka, mu mintindu mi bidia ka tuvana ayi mvandi bakundi bamboti tuidi. Tat’itu yi luzolo ka tuvaninanga biuma bioso abiobio ayi binkaka bilutidi, muingi tubaka nzingulu yi mayangi. (Tanga Minkunga 104:12-15, 24.) Vayi dilutidi nkinza, tufueti tondanga Yave mu bidia biwombo bi kiphevi ka tuvananga ayi kivuvu kisikama tuidi mu bilumbu binkuiza.
9. Mbi bilenda ku tusadisa kutebukanga moyo kutonda Yave? (1 Tesalonika 5:17, 18)
9 Dilenda ba diambu diluelu kuzimbakana kutonda Yave mu mambu moso mamboti ka tuvangilanga. Buabu mbi bilenda tusadisa kutebuka moyo? Ngie wulenda sonika mua mambu wufueti kundinda mu nsambu ayi kumona buidi Yave kantambudila minsambu miaku. Bosi wulenda kuntonda mu lusalusu kabe kuvana. (Tanga 1 Tesalonika 5:17, 18.) Yindulabu diambu adidi: Ngie wubanga ko mu mayangi bo bankaka ba kutonda mu mambu be kuba vangila? Bobuawu mvandi, bo tuntebuka moyo kutonda Yave mu phila kabe tambudila minsambu mitu, mawu ma kunkuangidikanga. (Kolo. 3:15) Vadi kibila kinkaka kilutidi tufueti kuntondilanga?
TONDA YAVE MU KU TUVANA MUAN’ANDI WU LUZOLO
10. Dedi bummonisina 1 Petelo 2:21, kibila mbi tuidi muingi kutondanga Yave?
10 Tanga 1 Petelo 2:21. Befu tufueti tondanga beni Yave, mu ku tufila Muan’andi wu luzolo muingi ka tulonga. Tunlongukanga beni matedi Yave ayi buidi tulenda kunkuangidikila, mu kulonguka matedi luzingu lu Yesu. Befu kulekila kiminu mu khudulu yi Klisto, tulenda ba kikundi kifikama na Yave Nzambi ayi kuba yandi ndembama.—Loma 5:1.
11. Kibila mbi befu tunsambidilanga mu dizina di Yesu?
11 Befu tuntondanga Yave kibila tulenda kumfikama mu nsambu mu nzila Muan’andi. Yesu nandi nzila Yave kansadilanga muingi kutambudila minsambu mitu. Yave wunkuwanga ayi wuntambudilanga minsambu tumvangila mu dizina di Yesu. Yesu wutuba: “Mamoso lundindila mu dizina diami, minu yala vanga mawu muingi Tata kakembusu mu nzila Muana.”—Yoa. 14:13, 14.
12. Kibila mbi kinkaka tuidi muingi kutondila Yave mu Muan’andi ?
12 Yave wunlemvukilanga masumu mitu mu nzila khudulu yi Yesu. Kibibila kinsudikisa ti “Yesu widi [wukala] ku lubala lu kikundu ki Mfumu ku diyilu.” (Ebe. 8:1) Yesu widi “nsadis’itu kuidi Tata.” (1 Yoa. 2:1) Befu tuntondanga beni Yave mu ku tuvana Mfumu zinganga Nzambi wumvinsanga ziphasi zitu ayi “wu tudindilanga” va ntuala Nzambi! (Loma 8:34; Ebe. 4:15) Bo tuidi batu ba masumu ayi mu khambu ku lusalusu lu khudulu yi Yesu, khanu tuisi ko bu kufikimina Yave mu nsambu. Bukiedika, vasi ko ni kiuma tulenda vanga muingi kutonda Yave, kilenda dedakana na—nkhailu wu khudulu wu Muan’andi wu luzolo katuvana!
NATANGA ZIKHOMBA ZIAKU MU MINSAMBU
13. Va builu butsuka ava kafua, buidi Yesu kamonisina luzolo kadi mu minlandikini miandi?
13 Va builu butsuka ava kafua, Yesu wusambila beni mu matedi minlandikini miandi ayi wudinda kuidi Tat’andi ‘muingi kaba kengidila mu kibila ki nkua wambi.’ (Yoa. 17:15) Bukiedika, Yesu luzolo luwombo kadi! Kibila kheti mu ziphasi kaba belama kuviokila, nandi wutebuka moyo kunata mu nsambu bapostolo bandi.
Bo tunsambila matedi zikhomba zitu, mambu mbi tulenda dinda mu nsambu? (Tala matangu 14-16) *
14. Buidi tulenda monisina ti tunzolanga zikhomba zitu?
14 Mu kulandakana kifuani ki Yesu, busa fuana ko kusikikanga to mayindu mu zitsatu zitu. Vayi tufueti natanga zikhomba zitu mu minsambu. Befu kuvanga mawu, tuidi mu kutumukina lutumu lu Yesu lu kuzolasananga befu na befu ayi kumonisa kuidi Yave ti tukunzolanga ayi tunzolanga zikhomba zitu. (Yoa. 13:34) Kunata zikhomba zitu mu minsambu, yisi ko thangu tuidi mu kubungisa. Diambu di Nzambi di tukamba ti “nsambu wu mutu wusonga, widi mangolo mawombo.”—Yako. 5:16.
15. Kibila mbi zikhomba zitu bantombilanga minsambu mitu?
15 Zikhomba bantombanga minsambu mitu, kibila badi mu kuviokila mu mambu mawombo maphasi. Diawu tulenda dinda kuidi Yave muingi kaba sadisa kukindama mu bimbevu, mu bivuka, mu mimvita, mu zikhuamusu bamviokila voti mambu mankaka maphasi. Mvandi tulenda nata mu minsambu zikhomba ba kivananga muingi kusadisa zikhomba zinkaka badi mu tsatu. Ḿba ngie zebi mazina ma zikhomba bamviokila mu ziphasi. Kibila mbi wukhambu tangunina mazina mawu mu minsambu miaku? Befu tummonisanga luzolo lukiedika mu zikhomba zitu, bo tundinda kuidi Yave muingi kaba sadisa bakindama.
16. Kibila mbi tufueti natinanga mu minsambu zikhomba bantuama ntuala?
16 Zikhomba bantuama ntuala mu bimvuka, bankuangalalanga beni bo zikhomba zinkaka baba nata mu minsambu. Kibila bawu bambakanga ndandu mu minsambu beni. Mvuala Polo mvandi wumona bivisa mu mambu amomo. Diawu kasonikina: “Mu ndantanga mvandi mu minsambu muingi yibaka bu kutubila mambu makhindusulu bo yinzabikisa masuama manlongo madi mu zitsangu zimboti.” (Efe. 6:19) Bubu mvandi tuidi zikhomba ziwombo bantuama ntuala bakivananga mu kisalu. Befu tummonisanga luzolo tuidi mu bawu, mu kudinda Yave muingi kasakumuna kisalu kiawu.
THANGU BA TUSOLA MUINGI KUNATA BANKAKA MU NSAMBU
17-18. Thangu mbi balenda ku tudindila muingi tunata bankaka mu nsambu ayi mambu mbi tufueti tebukanga moyo?
17 Khumbu zinkaka balenda ku tudinda muingi kunata bankaka mu nsambu. Dedi, mu thangu khomba yinkieto kantuadisa ndongukulu yi Kibibila, busa fuana ko nandi kudinda khomba yinkieto be basika yandi kavanga nsambu wu thonono, kibila kasa zaba ko buboti nlonguki. Vayi bulutidi buboti kandinda kavanga nsambu wutsuka, kibila mu phila ayoyo nandi kalenda zaba zitsatu zi nlonguki.
18 Mvandi balenda dinda khomba wu dibakala widi wubotama muingi kavanga nsambu mu lukutukunu lu kubasika mu kisalu ki kusamuna voti lu kimvuka. Khomba babe vana kiyeku beni, kafueti zaba diambu dimfunu ditedi lukutukunu. Diawu buisi ko buboti bo kamvanga nsambu beni kuvana malongi, kuba buka nandi wunsemba zikhomba voti buka nandi wumvana ndubu. Diawu mu zikhutukunu zioso bamvaninanga to minutu mitanu muingi kukuimbila ayi kuvanga nsambu. Ayi khomba widi kiyeku ki kuvanga nsambu, bulutidi nsambu wuthonono, kalendi sadila ko “bikuma biwombo.”—Matai 6:7.
NSAMBU WUFUETI BA NKINZA MU LUZINGU LUAKU
19. Mbi biala tusadisa kuba bakubama mu kilumbu ki lufundusu lu Yave?
19 Mu kuzaba ti kilumbu ki lufundusu lu Yave kidi mu kufikama, diawu nsambu wufueti bela mu mambu malutidi nkinza mu luzingu luitu. Mu matedi diambu adiodio Yesu wutuba: “Banu bakotuka ayi tatamananu kuvanga minsambu, muingi mubaka bu kuvukila mu mambu moso mafueti salama.” (Luka 21:36) Bukiedika, kutatamana kuvanga minsambu kuala tusadisa kuba bakotuka mu kiphevi ayi kuba bakubama muingi kilumbu ki lufundusu lu Yave kibika kutukuizila mu kinzimbukulu.
20. Mbi tufueti vanga muingi misambu mitu miba banga mfuku yi malasi?
20 Mambu mbi tuma tubila mu dilongi adidi? Befu tuma mona nkinza ayi luaku tuidi lu kuvanga nsambu. Tuma mona ti mambu malutidi nkinza tufueti tuba mu nsambu mo madi nguizani na lukanu lu Yave. Mvandi tulenda tonda Nzambi mu kutuvana Muan’andi ayi Kintinu kiandi. Ayi tulenda nata zikhomba zitu mu minsambu. Mvandi tube mona ti tulenda sambila mu matedi zitsatu zitu zi kinsuni ayi zi kiphevi. Befu kuyindula buboti mambu tundinda mu minsambu mitu, tuala monisa ti tumvananga luvalu luaku alolo lunneni tuidi ayi bikuma bitu biala ba banga mfuku yi malasi va ntuala Yave—“muingi kunkuangidika.”—Zinga. 15:8.
NKUNGA 45 Mayindu ma Tsi Ntim’ami
^ Befu tumvuanga beni nkinza luaku tuidi lu kufikama Yave mu nsambu. Diawu tuntombilanga minsambu mitu miba banga mfuku yi malasi mamboti ma kunkuangidika. Mu dilongi adidi, tuemmona mambu mbi tulenda dinda mu minsambu mitu. Mvandi tunkuiza tubila mua mambu tufueti vanga bo ba tusola muingi kunata bankaka mu nsambu.
^ MAMBU MADI MU ZIFOTO: Nnuni widi mu kusambila na nkazi’andi muingi kudinda lukiebu lu muana widi ku kikola, matedi tata widi mu kubela ayi mvandi ndionzukulu yi nlonguki wu Kibibila.
^ MAMBU MADI MU ZIFOTO: Khomba yi ditoko wuntonda Yave mu khudulu yi Yesu, mu ntoto wumboti ayi mu ntindu wu bidia bimboti Yave katuvana.
^ MAMBU MADI MU ZIFOTO: Khomba yinkieto wunsambila muingi Yave kasakumuna Dingumba Dintuadisi mu phevi’andi ayi kasadisa zikhomba badi mu kuviokila mu bivuka ayi zikhuamusu.
