▪ Yesu waba samunanga tsangu yi ndembama. Vayi kilumbu kinkaka nandi wulonga bapostolo bandi ti: “Lubika yindula ti yima kuizila muingi kutuala ndembama va ntoto; Yisa kuizila ko muingi kutuala ndembama, vayi muingi kutuala mbedi.” (Matai 10:34, 35) Mbi Yesu kaba tomba kutuba mu mambu amomo?

Bukiedika, Yesu kabasa tomba ko kuvasa basi dikanda, vayi nandi wuzaba ti malongi mandi mala tuala luvasanu mu makanda mankaka. Diawu baboso batidi kuba minlandikini mi Klisto ayi kubotama, bafueti vingila kuviokila mu mambu maphasi mu makani amomo bambaka. Ayi ba kuviokila mu zikhuamusu zimfumina kuidi nnuni, nkazi voti kuidi bankaka va dikanda, dilenda ba diambu diphasi kuidi bawu kutatamana bakuikama mu malongi ma Klisto.

Kibibila kinkindisa baklisto “bazingila mu ndembama na batu boso.” (Loma 12:18) Vayi malongi ma Yesu malenda ba buka “mbedi” ayi kutuadisa luvasanu va dikanda. Mawu mammonikanga mu thangu wumueka va dikanda kankikinina malongi ma Klisto ayi bankaka bammanga mawu. Mu phila ayoyo, batu bammanga kukikinina malongi ma Klisto—va dikanda—bankuiza banga zimbeni zi mutu widi mu kulonguka kiedika.—Matai 10:36.

Minlandikini mi Klisto badi mu makanda madi mavasuka mu binganga, khumbu zinkaka bamviokilanga mu mambu manthotanga lukuikumunu luawu mu Yave ayi mu Yesu. Dedi basi dikanda balenda tomba kuba kuika kukemba minkungi mi binganga voti mikhambulu nguizani na minsua mi Kibibila. Vayi mu thangu kamviokila mu thotolo ayoyo, nani bawu bankuiza tomba kukuangidika? Yesu wutuba: “Woso mutu wunluta zola tat’andi voti mam’andi kena minu, kasi ko wufuana kuidi minu.” (Matai 10:37) Bukiedika, Yesu kabasa tomba ko kutuba ti muingi tuba bafuana kuidi nandi, buna luzolo luitu kuidi basi dikanda lufueti dekuka. Vayi nandi waba longa minlandikini miandi babaka makani malutidi nkinza mu luzingu luawu. Diawu, boti musi dikanda widi mu kutula nkaku mu mangolo tuidi mu kuvanga muingi kusadila Yave, befu tuntatamananga kunzola. Vayi luzolo luitu mu Yave luawu lufueti ba va theti.

Tuisi ko divuda ti zikhuamusu zinkuizilanga kuidi basi dikanda zi tutuadisanga beni ziphasi. Vayi minlandikini mi Yesu bantebukanga moyo mambu amama: “Ayi woso mutu wummanga kunata dikunzi diandi di ziphasi ayi wummanga kundandakana, kasi ko wufuana kuidi minu.” (Matai 10:38) Mu thubulu yinkaka, baklisto bantadilanga zikhuamusu zi basi dikanda, banga ziphasi minlandikini mi Klisto bafueti ba bakubama muingi kuviokila. Mvandi bambanga kivuvu ti ba kutatamana kumonisa mavanga mamboti, basi dikanda balenda balula phil’awu yi kuyindudila ayi kutomba kulonguka tsangu yi Kibibila.—1 Pete. 3:1, 2.