DILONGI 4
Kibila Mbi Tunlandikininanga Mbambukulu Moyo?
“Luvanganga mawu muingi mumbambukilanga moyo.” —LUKA 22:19.
NKUNGA 20 Wuvana Yesu Muan’aku Wumueka to
MAMBU TUANLONGUKA *
1-2. (a) Thangu mbi tunluta tebukilanga moyo batu tunzolanga bafua? (b) Lukutukunu mbi Yesu kasikika ava kafua?
KHETI batu tunzolanga bafua mu thama, vayi befu tuba zimbakananga ko ayi ḿba mu kilumbu bawu bafua tuntebukanga moyo mambu bavanga.
2 Bivevi na bivevi bi batu mu nza yimvimba bankutakananga kadika mvu muingi kutebukila moyo lufua lu mutu tunzolanga—Yesu Klisto. (1 Pete. 1:8) Befu tunkutakananga muingi kutebukila moyo mutu wuvana luzingu luandi muingi ku tukula mu masumu ayi lufua. (Matai 20:28) Yesu wukamba minlandikini miandi bavanganga mawu. Va builu ava kafua, nandi wusikika Lukutukunu lu Mfunu ayi wuba kamba: “Lutatamana kuvanga mawu muingi mumbambukilanga moyo.” *—Luka 22:19.
3. Mbi tuemmona mu dilongi adidi?
3 Mua dingunba to di batu banlandakananga Mambukulu Moyo lufua lu Yesu, badi kivuvu ki kuzinga ku diyilu. Vayi bivevi na bivevi banlandakananga luawu badi kivuvu ki kuzinga va ntoto. Mu dilongi adidi tuentubila bibila bimvanganga mangumba mama muadi kulandakana lukutukunu beni kadika mvu ayi ndandu tumbakanga. Tuemmona bibila baklisto basolo bandilanga dipha ayi bannuinaga vinu.
KIBILA MBI BAKLISTO BASOLO BANDILANGA DIPHA AYI BANNUINANGA VINU?
4. Kibila mbi baklisto basolo bandilanga dipha ayi bannuinaga vinu mu Mbambukulu Moyo?
4 Kadika mvu baklisto basolo bandianga dipha ayi bannuanga vinu mu Mbambukulu Moyo. Kibila mbi bamvangilanga mawu? Muingi tubaka mvutu tuemmona mbi bimonika va builu butsuka bu Yesu va ntoto. Bo bamana kudia Pasika, Yesu wusikika Bidia bi Mfumu va masika ma builu. Nandi wutambika dipha ayi vinu kuidi 11 di bapostolo bandi bakuikama ayi wuba kamba muingi badia ayi banua. Yesu wuyoluka yawu matedi luwawanu lumona—ayi luwawanu lu Kintinu. * (Luka 22:19, 20, 28-30) Ziawu zizibula nzila mungi bapostolo ayi baklisto bankaka basolo baba mintinu ayi zinganga Nzambi ku diyilu. (Nzai. 5:10; 14:1) Baklisto basolo, bawu to badi luaku lu kudia dipha ayi kunua vinu mu Mbambukulu Moyo.
5. Mbi Baklisto basolo bazebi mu matedi kivuvu baba vana?
5 Tala kibila kinkaka baklisto basolo bafueti belanga mu Mbambukulu Moyo: Kulandakana luawu luba vananga luaku lu kuyindula mu kivuvu kiawu. Yave wuba vana kivuvu kinkinza beni—ki kuzinga ku diyilu mu khambu kubue fua, kusala va kimueka na Yesu ayi 144.000 baklisto bankaka basolo ayi bulutidi kuba vantuala kikundu ki Yave Nzambi! (1 Koli. 15:51-53; 1 Yoa. 3:2) Baklisto basolo bazebi ti baba tumisa muingi babaka ndandu mu luaku lu kuzingila ku diyilu. Vayi muingi mawu mamonika, bawu bafueti tatamana bakuikama nati mu lufua luawu va ntoto. (2 Timo. 4:7, 8) Mayangi mawombo baklisto basolo bambanga, bo banyindula kivuvu kiawu ki kuzingila ku diyilu. (Tito 2:13) Mbi tulenda tuba matedi “mamemi mankaka”? (Yoa. 10:16) Bibila mbi badi muingi kuba mu Mbambukulu Moyo?
KIBILA MBI MAMEMI MANKAKA BANLANDIKININANGA MBAMBUKULU MOYO?
6. Kibila mbi mamemi mankaka banlandikininanga Mbambukulu Moyo kadika mvu?
6 Mamemi mankaka banlandikininanga luawu, bakana ko muingi kudia dipha ayi kunua vinu dedi baklisto basolo vayi muingi kulandakana nkungi beni. Mu mvu 1938, wawu batumisa bo badi kivuvu ki kuzinga va ntoto mu khumbu yitheti mungi balandakana Mbambukulu Moyo. Kibanga ki Nsungi ki 1 Ngonda Yintatu mvu 1938 kituba: “Buidi bufuana [mamemi mankaka] baba mu lukutukulu alolo ayi kumona buidi luawu lumvangiminanga . . . kinkuiza ba kibila ki mayangi kuidi bawu mvawu.” Dedi bo bantumisinanga batu bankaka mu nkungi dikuela, mamemi mankaka bambanga mu mayangi kuba va kimueka na baklisto basolo mu Mbambukulu Moyo.
7. Kibila mbi kitheti mamemi mankaka bantombilanga beni kulandakana dilongi di Mbambukulu Moyo?
7 Mamemi mankaka mvawu banyindulanga mu kivuvu kiawu. Bawu bamvingilanga mu mayangi kulandakana dilongi di Mbambukulu Moyo, kibila mu dilongi beni banluta tubilanga matedi Klisto ayi 144.000 bala yala yandi mu Kintinu ki Nzambi mu kivevi ki mimvu. Akiokio kiawu kibila kihteti bawu bamvangilanga mawu. Ayi mu thuadusulu Ntinu Yesu Klisto, luyalu alolo lu diyilu luala sadisa mamemi mankaka va ntoto kukitula ntoto paladizu ayi kusadisa batu bantumukinanga Nzambi kuba bavedila. Yala ba thangu yi mayangi kumona bivevi na bivevi bi batu banlandakananga Mbambukulu Moyo kumona tsundukulu yi zimbikudulu zi Kibibila zidi mu Yesaya 35:5, 6; 65:21-23; ayi mu Nzaikusu 21:3, 4. Bo ba kiyindulanga kuba va kimueka na batu banzolanga mu nza yimona, mawu mankindisanga kivuvu kiawu mu bilumbu binkuiza kuntuala ayi kutatamana bakuikama mu kusadila Yave.—Matai 24:13; Ngala. 6:9.
8. Kibila mbi kimuadi mamemi mankaka banlandikininanga Mbambukulu Moyo?
8 Tala kibila kimuadi mamemi mankaka banlandikininanga Mbambukulu Moyo. Kibila batidi kumonisa luzolo ayi kubuela mioko baklisto basolo. Diambu di Nzambi dibikula ti vala ba kithuadi kingolo baklisto basolo ayi baklisto badi kivuvu ki kuzingila va ntoto. Mu phila mbi? Mawu tunkuiza buela kuvisa.
9. Mambu mbi mbikudulu yi Zakalia 8:23 yibikula mu matedi kithuadi mamemi mankaka badi na baklisto basolo?
9 Tanga Zakalia 8:23. Mbikudulu ayoyo, yimfuanikisa buboti phila mamemi mankaka badidi kithuadi na baklisto basolo. Bikuma muisi “Yuda” ayi “benu” binsundula dio diawu dingumba di baklisto basolo—bakhidi va ntoto. (Loma 2:28, 29) Vayi “kumi di babakala ba zitsi ayi zimbembu zioso” bamfuanikisa mamemi mankaka. Bawu “babaka makani ma”—kulandakana baklisto basolo—muingi kubuongimina Yave Nzambi va kimueka. Diawu mamemi mankaka bammonisanga kithuadi badi na baklisto basolo mu kuba yawu va kimueka mu lukutukunu alolo.
10. Mbi Yave kavanga muingi kudukisa mbikudulu yidi mu Yehezekeli 37:15-19, 24, 25?
10 Tanga Yehezekeli 37:15-19, 24, 25. Muingi mbikudulu ayoyo yisalama, Yave wubundisa baklisto basolo ayi mamemi mankaka. Diawu mbikudulu beni yitubila ti vadi binti biodi. Bo badi kivuvu ki kuzingila ku diyilu bawu bamfuanikisa kinti kitheti “kinti ki Yuda” (kibila wawu nkuna baba sodilanga mintinu mioso mi Isaeli), ayi bo badi kivuvu ki kuzinga va ntoto bawu bamfuanikisa kinti kimuadi “kinti ki Efalaimi.” * Yave wufubikisa mangumba ma muadi ayi bayiza ba to “kinti kimueka.” Mawu mansundula ti bawu bansadila mu kithuadi mu thuadusulu yi Ntinu mueka to Yesu Klisto. Mu mimvu mioso, baklisto basolo ayi mamemi mankaka bambanga mu Mbambukulu Moyo. Bawu babanga ko mangumba muadi mavasuka vayi “nkangu wumueka to” widi mu thuadusulu “yi nsungi wumueka to Yesu.”—Yoa. 10:16.
11. Buidi “mamemi” bantubila mu Matai 25:31-36, 40 bammonisina ti bambuelanga mioko zikhomba zi Klisto?
11 Tanga Matai 25:31-36, 40. “Mamemi” bantubila mu nongu ayiyi mansundula bisadi bi Yave bikuikama, mu bilumbu bitsuka badi kivuvu ki kuzinga va ntoto, bantedila mvandi—mamemi mankaka. Mu lukuikumunu bawu bambuelanga mioko zikhomba zi Yesu, voti baklisto basolo mu kuba sadisa kuvanga kiyeku bawu batambula ki kusamuna mu nza yimvimba—ayi kuvanga minlonguki.—Matai 24:14; 28:19, 20.
12-13. Mu ziphila mbi mamemi mankaka bambuedilanga mioko zikhomba zi Klisto?
12 Mu kadika mvu mua zisabala ava Mbambukulu Moyo, mamemi mankaka bambuelanga mioko zikhomba zi Klisto bo ba kivananga muingi kutumisa batu mu nza yimvimba mu lukutukunu lu Mbambukulu Moyo. (Tala quadro yintuba “ Ngie Makubama Muingi Kubuela Kukivana mu Thangu yi Mbambukulu ”) Mvandi bawu bambuelanga mioko zikhomba zi Klisto, mu kukubika biabioso bintombulu muingi Mbambukulu Moyo yivangama mu bimvuka bioso bidi mu nza, kheti muisi ko mutu wunkuiza dia dipha ayi kunua vinu. Mamemi mankaka bankuangalalanga kubuela mioko zikhomba zi Klisto mu phila ayoyo. Ayi bawu bazebi ti Yesu wuntadilanga lusalusu alolo, banga kuidi naveka bamvangila mawu.— Moyo?Matai 25:37-40.
13 Kheti kivuvu kitu kidi ki kuzingila ku diyilu voti va ntoto, bibila mbi binkaka tuidi muingi kuba mu Mbambukulu Moyo?
KIBILA MBI TUNLANDIKININANGA MBAMBUKULU MOYO?
14. Buidi Yave ayi Yesu ba tumonisina luzolo?
14 Tumvutulanga beni matondo mu luzolo Yave ayi Yesu ba tumonisina. Kheti Yave wutu monisinanga luzolo mu ziphila ziwombo, vayi vadi phila yilutidi nandi kavangila mawu. Nzamb’itu wumonisa luzolo lulutidi, bo ka tufila Muan’andi wumueka to muingi katovuka ayi kafuila mu kibila kitu. (Yoa. 3:16) Yesu mvandi wutu monisa luzolo luwombo, bo kakikinina kuvana luzingu luandi mu kibila kitu. (Yoa. 15:13) Tuisi ko bu kuvutudila luzolo alolo Yave ayi Yesu ba tumonisina. Vayi tulenda monisa ti tuba tonda mu phila tunnatina luzingu luitu kadika kilumbu. (Kolo. 3:15) Ayi bo tunlandakana lukutukunu lu Mbambukulu Moyo, yidi phila tuntebukilanga moyo luzolo Yave ayi Yesu badi mu befu. Ayi mawu ma tukindisanga mvandi kuba monisa luzolo.
15. Kibila mbi baklisto basolo ayi mamemi mankaka bamvaninanga beni luvalu nkhayilu yi khudulu?
15 Tumvananga beni luvalu mu nkhayilu yi khudulu. (Matai 20:28) Baklisto basolo bamvananga beni luvalu nkhayilu yi khudulu, kibila mu nzila nkhayilu beni, muawu musikimina kivuvu kiawu. Ayi mu kibila ki kiminu badi mu nkhayilu wu Klisto, Yave wuba tedila banlongo ayi wuba kikinina baba bana bandi ba kiphevi. (Loma 5:1; 8:15-17, 23) Mamemi mankaka mvawu bamvutulanga matondo mu nkhayilu yi khudulu. Mu kibila ki kiminu badi mu menga ma Yesu matengulu, bawu badi badiodila va meso ma Nzambi, balenda kunsadila ayi badi kivuvu ki kuvuka “mu ziphasi zingolo.” (Nzai. 7:13-15) Phila yimueka baklisto basolo ayi mamemi mankaka bamvutudilanga matondo mu nkhayilu yi khudulu, yidi mu kuba mu Mbambukulu Moyo kadika mvu.
16. Kibila mbi kinkaka tunlandikininanga Mbambukulu Moyo?
16 Tunlandikininanga Mbambukulu Moyo, kibila tutidi kutumukina Yesu. Boso kua bubela kivuvu tuidi, tutidi kutumukina lutumu Yesu kavana va builu butsuka ava kafua, bo kasikika Mbambukulu Moyo. Nandi wutuba: “Lutatamana kuvanganga mawu muingi kumbambukila moyo.”—1 Koli. 11:23, 24.
TUMBAKANGA NDANDU MU KULANDAKANA NKUNGI AWOWO
17. Buidi Mbambukulu Moyo yi tusadisilanga kubuela fikama Yave?
17 Befu tunluta fikamanga Yave. (Yako. 4:8) Dedi bo tuma muena, Mbambukulu Moyo yi tuvananga luaku lu kuyindula mu kivuvu ayi luzolo Yave ka tumonisina. (Yele. 29:11; 1 Yoa. 4:8-10) Bo tunyindula mu kivuvu kinsika tuidi mu bilumbu binkuiza, mu luzolo luwombo Yave kadi mu befu, mawu mankindisanga luzolo ayi kikundi kitu mu nandi.—Loma 8:38, 39.
18. Bo tunyindula mu kifuani ki Yesu mbi mawu ma tukindisa kuvanga?
18 Lutukindisanga kulandakana kifuani ki Yesu. (1 Pete. 2:21) Mua bilumbu ava Mbambukulu Moyo, befu tunsikikanga mayindu mitu mu kuyindula binongu bi Kibibila bitedi sabala yitsuka yi Yesu va ntoto ava nandi kafua ayi kuvulubuka. Ayi mu builu bu Mbambukulu Moyo, dilongi bamvanganga di tutebulanga moyo luzolo Yesu kadi mu befu. (Efe. 5:2; 1 Yoa. 3:16) Kulonguka kifuani ki Yesu, mu phila kakivanina ayi kuyindula luzolo ka tumonisina, ma tukindisa mvitu kudiatila mu phila nandi kadiatila.”—1 Yoa. 2:6.
19. Budi tulenda tatiminina mu luzolo lu Nzambi?
19 Tunluta banga bakubama muingi kutatamana mu luzolo lu Nzambi. (Yuda 20, 21) Befu tuntatamananga mu luzolo lu Nzambi mu kuvanga mamoso tulenda nunga muingi kuntumukina, kuzitisa dizina diandi ayi kukuangidika ntim’andi. (Zinga. 27:11; Matai 6:9; 1 Yoa. 5:3) Bo tunlandakana Mbambukulu Moyo, befu tunluta banga bakindama muingi kuzinga kadika kilumbu mu phila Yave kantombila. Nandi wutuba: ‘Yitidi mu tatamana mu luzolo luama mvu ka mvu!’
20. Bibila mbi tuidi muingi kuba mu Mbambukulu Moyo mu mvu awuwu?
20 Kheti kivuvu kitu kidi ki kuzinga mvu ka mvu ku diyilu voti va ntoto, tuidi bibila biwombo muingi kulandakana Mbambukulu Moyo. Kadika mvu mu thangu tunkutakana mu nkungi beni, befu tuntebukanga moyo lufua lu mutu tunzolanga beni, Yesu Klisto. Vayi tunluta tebukanga moyo luzolo lulutidi—Yave ka tumonisina mu kuvana Muan’andi wumueka to banga khudulu. Mu mvu awuwu, Mbambukulu Moyo yala ba va builu bu Kintanu 15 Ngonda Yinna mvu 2022, befu tunzolanga Yave ayi Muan’andi. Diawu kuidi befu, kuba mu Mbambukulu Moyo yi lufua lu Yesu kiawu kiuma kilutidi nkinza mu biuma bioso.
NKUNGA 16 Kembisa Yave mu Muan’andi Wusolu
^ Kheti widi kivuvu ki kuzinga ku diyilu voti ku paladizu va ntoto, befu boso tumvingilanga kulandakana Mbambukulu Moyo kadika mvu. Mu dilongi adidi tuentubila bibila bi tuvanganga kulandakana lukutukunu beni ayi ndandu tumbakanga.
^ Bikuma Yesu katuba luvanganga mawu “muingi mu mbambukila moyo” (Bidi mu kibibila ki kingelezu mu bilumbu bitu) ayi luvanganga mawu “banga mbambukulu moyo kuidi minu” kidi mu (Bíblia de Jerusalém).
^ Muingi kuluta visa matedi luwawanu lumona ayi luwawanu lu Kintinu, tala dilongi “Beno Munkuiza ‘Ba Mintinu ayi Zinganga Nzambi’” mu Kibanga ki Nsungi kilumbu 15 Ngonda Yikumi mvu 2014, tsielu 15-17.
^ Mo wubuela zaba matedi mbikudulu yi binti biodi bidi mu Yehezekeli 37, tala buku A Adoração Pura de Jeová É—Restaurada! tsielu 130-135, matangu 3-17