DILONGI 3
Mbi Tulenda Longuka mu Matsuela Yesu Kadodisa?
“Yesu wudila.”—YOA. 11:35.
NKUNGA 17 ‘Yitidi’
MAMBU TUANLONGUKA *
1-3. Mambu mbi maphasi mamvanganga khumbu zinkaka dikabu di Yave kudodisa matsuela?
WUNTEBUKA moyo khumbu yitsuka wudodisidi matsuela? Vadi zikhumbu tundodisanga matsuela bo tuidi mu mayangi. Vayi khumbu zinkaka tumvangilanga mawu mu kibila ki ziphasi mu mambu tumviokila. Dedi, tulenda dila boti mutu tunzolanga befua. Lorilei, khomba yinkieto wunkalanga ku Estados Unidos, wutuba: “Bo muan’ama wunkieto kafua, vaba thangu yaba monanga ti vasi ko kiuma kilenda kumbomba. Ayi yaba kuyikuvusanga, boti yinkuiza nunga mabanza beni.” *
2 Tulenda dodisa matsuela mu bibila binkaka. Hiromi, widi ntuami ntuala ku Japão wutuba: “Khumbu zinkaka minu yimbanga mu kiunda ayi yindodisanga matsuela, kibila batu mu kisalu ki kusamuna basintomba ko kukuwa mambu tunlonga. Diawu minu yinsambilanga kuidi Yave, muingi katsadisa kudengana kheti mutu wumueka wuntomba kulonguka kiedika.”
3 Ngie mvaku mana viokila mu mambu amomo? Befu bawombo tumana viokila. (1 Pete. 5:9) Kheti tutidi “kusadila Yave mu mayangi vayi khumbu zinkaka tulenda ba mu kiunda,” mu kukuazuka mu mambu malenda thota lukuikumunu luitu. (Minku. 6:6; 100:2) Mbi bilenda tusadisa kununga mabanza amomo?
4. Mbi tuenlonguka mu dilongi adidi?
4 Mawombo tulenda longuka mu kifuani ki Yesu. Nandi mvandi wuviokila mu mambu maphasi mamvanga ‘kudodisa matsuela.’ (Yoa. 11:35; Luka 19:41; 22:44; Ebe. 5:7) Tuemmona mambu kaviokila. Ayi bo tumfiongunina mawu, tunkuiza mona malongi mbi tulenda longuka. Mvandi tuemmona mbi tulenda vanga muingi kukindama mu mambu ma tuvanga kudodisa matsuela.
YESU WUDODISA MATSUELA MU KIBILA KI BAKUNDI BANDI
Landakana kifuani ki Yesu mu kukindisa, bo badi mu kiunda (Tala lutangu 5-9) *
5. Mbi mambu madi mu Yoane 11:32-36 ma tulonga matedi Yesu?
5 Mu mvu 32 T.K., Lazalu nkundi Yesu wubakana kubela ayi wufua. (Yoa. 11:3, 14) Nandi wuba zikhomba ziwadi, Malia ayi Malata. Ayi Yesu mvandi wuba kikundi kimboti ayi bawu. Bo Lazalu kafua, zikhomba ziandi baba beni mu kiunda. Yesu wubotuka ku kibuangu kaba ayi wuyenda ku divula di Betani ko bawu baba kalanga. Bo Malata kazaba ti Yesu widi mu kukuiza, nandi wuyenda kuendengana. Yindula kiunda kaba bo katuba: ‘A Mfumu, boti ngie bedi vava, khanu khomb’ama kasa fua ko.’ (Yoa. 11:21) Mua thangu to yivioka, bo Yesu kamona Malia ayi bankaka baba dila, nandi mvandi “wudodisa matsuela.”—Tanga Yoane 11:32-36.
6. Kibila mbi Yesu kadidila bo Lazalu kafua?
6 Kibila mbi Yesu kadidila bo Lazalu kafua? Kibibila kintuba ti: “Lufua lu nkundi’andi Lazalu ayi kiadi kuidi zikhomba ziandi, mawu mavanga Yesu kuba mu ‘kiunda ayi kudila.’” * Ḿba Yesu wuyindula ziphasi Lazalu kamona ava kafua ayi kiunda kaba mu kuzaba ti moyo’andi waba mana. Yesu mvandi wudodisa matsuela mu kumona kiunda Malia ayi Malata baba mu lufua lu khomb’awu. Boti ngiewu wufuilu nkundi voti musi dikanda wunzolanga beni, buna mvanku wuviokila mu ntindu ziphasi aziozio. Tala malongi matatu tulenda longuka mu kinongu akiokio.
7. Mbi tulenda longuka matedi Yave mu matsuela Yesu kadodisa mu kibila ki bakundi bandi?
7 Yave wumvisanga mabanza maku. Ayi Yesu “widi kifuani kimboti” ki Tat’andi. (Ebe. 1:3) Bo Yesu kadila, nandi wumonisa momawu mabanza Tat’andi kadi. (Yoa. 14:9) Boti widi mu kiunda mu kibila ki lufua lu mutu wunzolanga, wulenda ba lufiatu ti Yave zebi mambu wumviokila ayi mvandi widi mu kiunda mu kibila kiaku. Mvandi tidi ku kubomba mu kiunda widi.—Minku. 34:18; 147:3.
8. Kibila mbi tulenda bela lufiatu ti Yesu wala vulubusa batu tunzolanga?
8 Yesu wuntomba kuvulubusa batu wunzolanga. Ava kavulubusa Lazalu, Yesu wukindisa Malata bo katuba: “Khomb’aku wala vulubuka.” Malata wuba lufiatu mu Yesu. (Yoa. 11:23-27) Mu kuba kisadi kikuikama ki Yave, Malata wuba lufiatu mu luvulubusu kibila wuzaba ti mimbikudi Elia ayi Elisa bavulubusa batu mu zisekulu zivioka. (1 Minti. 17:17-24; 2 Minti. 4:32-37) Ḿba mvandi wuyuwa ti Yesu wuvulubusa batu bankaka. (Luka 7:11-15; 8:41, 42, 49-56) Diawu, ngie mvanku wulenda ba lufiatu ti wunkuiza mona baboso wunzolanga bafua kuvulubuka. Matsuela Yesu kadodisa bo kaba bomba bakundi bandi, madi bivisa ti nandi widi phuila yiwombo yi kuba vulubusa!
9. Mu kulandakana kifuani ki Yesu, buidi tulenda sadisila bo badi mu kiunda? Vana kifuani.
9 Ngie wulenda kindisa bo badi mu kiunda. Yesu kasa dila ko to na Malata ayi Malia vayi mvadi wuba yuwa mu mvibudulu ayi wuba bomba. Mawu mvandi tulenda vanga kuidi bo badi mu kiunda. Dan widi nkulutu kimvuka ku Austrália wutuba: “Bo nkazi’ama kafua yaba tomba beni lusalusu. Bakuela bawombo bakivana builu yi muinya muingi kukhuwa. Bawu basa kumbika ko yitovuka minu veka ayi basa mona ko zitsonyi bo yaba dilanga. Bawu batsadisa mu mambu mawombo. Dedi, baba sukulanga dikalu, kusumba biuma, kulamba ayi bisalu binakaka bio yaba khambu nunganga kuvanga. Mvandi baba sambilanga yama khumbu ziwombo. Bawu bamonisa ti baba bakundi ayi zikhomba babutuka mu thangu yi ziphasi.’”—Zinga. 17:17.
YESU WUDILA MU KIBILA KI DIVULA
10. Sudikisa mambu bantubila mu Luka 19:36-40.
10 Yesu wutuka ku Yelusalemi mu kilumbu 9 ki Ngonda yi Nisa mvu 33 T.K. Bo kaba fikama ku divula, nkangu wu batu wuyala bikhutu mu kitrada muingi kavioka, kibila bankikinina banga Ntinu’anu. Yiba thangu yi mayangi beni. (Tanga Luka 19:36-40.) Ayi ḿba minlandikini miandi basa kikinina ko mu mambu mamonika. “[Yesu] wudila mu kibila ki divula beni,” mu kumona ziphasi ziabe belama kumonika kuidi batu babe kalanga ku Yelusalemi.—Luka 19:41-44.
11. Kibila mbi Yesu kadidila mu kibila ki basi Yelusalemi?
11 Yesu wuba mu kiunda kibila wuzaba ti kheti bawu bantambula buboti vayi bawombo mu bawu basinkuiza vitika ko zitsangu zi Kintinu. Ayi mu kibila akiokio, divula di Yelusalemi diala bungu, ayi bo bala vuka bala kuba nata ku buvika. (Luka 21:20-24) Kiadi ayi kiunda kibila dedi bo Yesu katubila mawu mamonika. Buidi batu va kizunga kiaku bammuenanga zitsangu zi Kintinu? Boti bawombo bavitikanga ko zitsangu zi Kintinu kheti mu mangolo moso tumvanganga, mbi tulenda longuka mu matsuela ma Yesu? Ndoko tumona malongi matatu.
12. Mbi matsuela ma Yesu matedi Yelusalemi ma tulonga matedi Yave?
12 Yave wumvuanga nkinza batu. Matsuela ma Yesu ma tutebula moyo buidi Yave kamvuilanga nkinza batu. “Nandi kansintomba ko ni mutu kabungu vayi wuntomba baboso ba balula mavanga.” (2 Pete. 3:9) Befu bubu tulenda monisa ti tunzolanga batu bankalanga va nseng’itu, mu kutatamana kuvanga mangolo muingi kuba longa zitsangu zimboti.—Matai 22:39. *
Landakana kifuani ki Yesu mu kubalula thangu yi kusamunina (Tala lutangu 13-14) *
13-14. Buidi Yesu kamonina kiadi kuidi batu ayi buidi befu tulenda kunina khadulu ayoyo?
13 Yesu wukivana mu kisalu ki kusamuna. Nandi wumonisa luzolo kuidi batu, mu kusadila luaku loso muingi kuba longa. (Luka 19:47, 48) Mbi binsadisa kuvanga mawu? Yesu wuba mona kiadi. Khumbu zinkaka batu babe tomba beni kukuwa molongi mandi ayi mu kibila akiokio Yesu ayi minlandikini miandi “basa nunga ko kudia.” (Malako 3:20) Mvandi wulonga Nikodemi va builu —kibila yawu yiba thangu yifuana kuidi nandi. (Yoa. 3:1, 2) Bawombo mu batu batheti bayuwa malongi ma Yesu, basa ba ko minlandikini miandi. Vayi baboso bayuwa batambula kimbangi. Befu mvitu tuntomba kuvana luaku kuidi batu muingi bayuwa zitsangu zimboti. (Mava. 10:42) Ayi muingi tununga, tufueti balula thangu ayi ziphila zi kusamunina.
14 Balula mua mambu ayi thangu yi kusamunina. Befu kukhambu balula thangu yi kusamunina, ḿba tuinsinkuiza nunga ko kukoluka na batu bantomba kukuwa zitsangu zimboti. Yaya Matilda widi ntuami ntuala wutuba: “Minu ayi nnuni’ama tumvanganga mangolo muingi kusamuna mu zithangu ziviakana. Va meni, tunsamunanga mu bibuangu bamvangilanga lungoso. Va khati kilumbu, tunsadilanga makalu ma bilongulu kibila yawu thangu batu bambansikanga beni. Ayi tunsamuninanga va masika kibila yawu thangu batu banluta banga mu zinzo.” Bika kuvanga thuadusulu yintuadisa ndandu kuidi ngie veka, vayi ba wukubama muingi kubalula mua mambu mo wuyoluka na batu bawombo. Befu kuvanga mawu Yave wunkuiza yangalala.
YESU WUDILA MU KIBILA KI DIZINA DI TAT’ANDI DIMVUEZUANGA
Landakana kifuani ki Yesu mu kuvanganga minsambu kuidi Yave bo wumviokila mu zithotolo (Tala lutangu 15-17) *
15. Dedi bummonisina Luka 22:39-44 mambu mbi mamonika mu builu butsuka ava Yesu kafua?
15 Va builu mu kilumbu 14, Ngonda Nisa mvu 33 T.K., Yesu wuyenda ku lumbu lu Ngetesemani. Nandi wuzibudila ntim’andi kuidi Yave mu nsambu. (Tanga Luka 22:39-44.) Ayi mu bilokula biwombo Yesu “wusambila . . . mu kudila wudodisa matsuela.” (Ebe. 5:7) Kibila mbi Yesu kasambidila mu builu butsuka ava kafua? Nandi wusambila muingi kudinda mangolo ayi katatamana wukuikama kuidi Yave mu kuvanga luzolo luandi. Yave Nzambi wuyuwa nsambu wu muan’andi wuba beni mu kiunda, diawu kafidila mbasi muingi kansadisa.
16. Kibila mbi Yesu kadidila bo kaba sambila ku lumbu lu Ngetesemani?
16 Bukiedika, Yesu wudila beni bo kaba sambila ku lumbu lu Ngetesemani, kibila nandi wuyindula phila lufua lu mvuezulu kaba belama kufua. Mvandi wuzaba kiyeku kinneni kaba ki—kudiodisa dizina di Tat’andi. Diawu, bo wumviokila mu mambu ma kubika mu kiunda ayi mantota lukuikumunu luaku kuidi Yave, mbi wulenda longuka mu matsuela Yesu kadodisa? Tala malongi matatu wulenda longuka.
17. Mbi tulenda longuka mu phila Yave katambudila minsambu mi Yesu?
17 Yave wunkuwanga minsambu miaku. Yave wuyuwa minsambu mi Yesu kibila nandi waba kuazuka mu matedi kutatamana wukuikama ayi kudiodisa dizina di Tat’andi dimvuezuanga. Boti tunkuazukanga muingi tutatamama bakuikama ayi kudiodisa dizina di Yave, tulenda ba lufiatu ti Yave wunkuiza tambudila minsambu mitu ayi ku tusadisa.—Minku. 145:18, 19.
18. Mu phila mbi Yesu kadidi nkundi wumboti mu ngiewu?
18 Yesu wumvisanga mabanza maku. Bo tunkuazuka tunkuangalalanga beni kutambula mbombolo yimfumina kuidi nkundi wumana viokila mu mambu tuidi mu kuviokila. Ayi Yesu, nandi ntindu nkundi awowo. Kibila nandi zebi mbi binsundula kuba wulebakana ayi kutomba lusalusu lu bankaka. Mvandi zebi mambu ma tuvanga kuba balebakana ayi wala tuvana lusadusu “mu thangu yifuana.” (Ebe. 4:15, 16) Dedi bo Yesu kakikinina lusadusu lu mbasi ku Ngetesemani, tufueti ba bakubama muingi kuvitika lusadusu Yave ka tuvana mu ziphila zioso, kuba kuandi mu bilongulu, zivideo, khindusulu yi nkulutu wu kimvuka voti nkundi wuyonzuka mu kiphevi.
19. Buidi wulenda bakila mangolo mu thangu wumviokila mu mambu manthota kiminu kiaku? Vani kifuani.
19 Yave wu tuvananga “Ndembama.” Buidi Yave ka tukindisilanga? Bo tunsambila, befu tuntambulanga “nduenga yi Nzambi yilutidi diela dioso.” (Fili. 4:6, 7) Ndembama Yave ka tuvananga yimvumbikanga ntim’itu ayi mabanza mitu. Tala mambu khomba yinkieto bantedilanga Luz katuba: “Yinnuananga nzingu mu mabanza ma kiunda kingolo. Ayi khumbu zinkaka, mabanza amomo ma kuphanganga kuyindula ti Yave kanzolanga ko. Vayi bo mawu mammonika, mu thinu yinkambanga Yave phila yidi mu kumuena. Ayi nsambu wu kutsadisanga kuyala mabanza beni.” Kifuani akiokio, kimmonisa ti tumbakanga ndembama bo tunsambila.
20. Malongi mbi tuma longuka mu matsuela Yesu kadodisa?
20 Bukiedika, khindusulu yiwombo tuma baka mu kulonguka matedi matsuela Yesu kadodisa. Kibila mabe tutebula moyo nkinza wu kubomba batu badi mu kiunda ki lufua, kuba lufiatu ti Yave ayi Yesu bankuiza basadisa. Mvandi babe tukindisa kusamuna ayi kulonga kibila Yave ayi Yesu bammonisanga khadulu yi kiadi. Ayi mabe tubomba beni kuzaba ti Yave ayi Muan’andi wu luzolo, bamvisanga mabanza mitu ayi bazebi mambu tuidi balebakana ayi ba tusadisanga tukindama. Diawu tutatamananu kusadila mambu tuma longuka nate kilumbu Yave kala dukisa lukanu lu ‘kufiona matsuela moso mu meso mitu’!—Nzai. 21:4.
NKUNGA 120 Landakana Mamboti ma Yesu
^ Khumbu zinkaka, Yesu wuviokila mu mambu mamvanga kudodisa matsuela. Mu dilongi adidi, tuemmona zikhumbu zitatu Yesu kadodisila matsuela ayi malongi tulenda longuka.
^ Bavingisa mazina mankaka.
^ Tala madi mu Estudo Perspicaz das Escrituras, Volume 2, tsielu 96.
^ Kikuma ki kingeleko “wadi yaku” bansadila mu Matai 22:39 kisinsundula ko to batu bankalanga va nseng’itu. Vayi mvandi woso kuandi mutu tundengana.
^ MAMBU MADI MU ZIFIKULA: Kiadi Yesu kaba kimvanga kubomba Malia ayi Malata. Befu mvitu tulenda vanga mawu bo wadi yitu kabe fuilu mutu kanzolanga.
^ MAMBU MADI MU ZIFIKULA: Yesu wu kivana muingi kulonga Nikodemi va builu. Befu mvitu tulenda ba bakubama muingi kulonga Kibibila kuidi batu mu thangu yidi yifuana mu bawu.
^ MAMBU MADI MU ZIFIKULA: Yesu wusambila muingi kakindama ayi kamonisa lukuikumunu mu Yave. Befu mvitu tufueti vanganga mawu bo tumviokila mu zithotolo.