DILONGI 39
Bo Wumueka va Dikanda Kamvayikusu mu Kimvuka
“Mu zikhumbu zikua . . . bawu banyongisina ntim’andi.” —MINKU. 78:40.
NKUNGA 102 “Sadisa bo Badi Bavonga”
MAMBU TUANLONGUKA *
1. Buidi basi dikanda bambelanga bo wumueka va dikanda kamvayikusu?
VA DIKANDA diaku, vadi mutu wuvayikusu mu kimvuka? Boti ngete, buna mawu ma kutuadisanga beni ziphasi! Tulenda mona kivisa mu mambu yaya Hilda wudukisa 41 di mimvu va dikuela katuba: “Bo nnuni’ama kafua minu yiba beni mu kiunda. * Vayi yiluta ba mu kiunda bo muan’ama, nkazi’andi ayi ntekulu’ama babika kusadila Yave.”
Yave wumvisanga ziphasi tummonanga bo wumueka va dikanda kambika kunsadila (Tala lutangu 2-3) *
2-3. Dedi bummonisina Minkunga 78:40, 41, buidi Yave kambelanga bo bisadi biandi bambika kunsadila?
2 Yindula buidi Yave kabela mu kiunda mu thangu basi dikanda diandi di kiphevi bambanda mbusa! (Yuda 6) Bue yindula mvandi, kiunda Yave kaba bo dikabu diandi basi Isaeli mu khumbu ziwombo bambayisa ayi bamanga kuntumukina. (Tanga Minkunga 78:40, 41.) Mambu amomo, matuvana lufiatu ti Yave wumvisanga ayi mvandi wumbanga beni mu kiunda bo musi dikanda wunzolanga kamvayikusu mu kimvuka. Nandi zebi buidi mambu amomo ma kutatisila. Diawu ba lufiatu ti nandi wala kubomba, wala kukindisa ayi kuvana lusalusu loso wuntomba muingi wukindama.
3 Dilongi adidi, dinkuiza tusadisa kumona buidi tulenda tambudila lusalusu lu Yave bo tumviokila mu mambu amomo. Mvandi tunkuiza mona, buidi tulenda sadisila zikhomba bamviokila mu mambu amomo maphasi. Vayi theti, tunkuiza mona phila yimbi yi kuyindudila tufueti bika.
BIKA KUKIVANA FOTU
4. Bo muana kamvayikusu buidi matata mankaka bambelanga?
4 Bo muana kamvayikusu mu kimvuka, matata bambanga beni mu kiunda. Ayi balenda kuyikuvusa: Mbi tukambu vanga? Tala mambu ya Luka katuba bo muan’andi kavayikusu mu kimvuka: “Minu yaba kuyivananga beni fotu. Ayi mu kibila ki kiunda kingolo yaba banga, minu yaba dilanga.” Khomba Elizabeth wuviokila mvandi mu mambu amomo wutuba: “Mbi zingudi zinkaka bamvanganga mo yikhambu vanga? Yimona buka ti yisa nunga ko kukuna kiedika mu ntima wu muan’ama.”
5. Bo muana kambika kusadila Yave nani widi fotu?
5 Tufueti tebukanga moyo ti Yave wuvana kadika mutu luaku lu kusola. Mawu mansundula ti tulenda sola kutumukina Yave voti ndamba. Diawu tummuenanga matoko mawombo ti kheti basa konzukila ko va dikanda di Zimbangi zi Yave, bawu bansadila Nzambi mu lukuikumunu. Mvandi bana mawombo bayonzukila mu makanda ma Zimbangi zi Yave vayi bo bayiza ba matoko, babaka makani ma kubanda mbusa minsua mi Yave. Buboti beni kuzaba ti kadika mutu kafueti baka makani mandi veka boti wunkuiza tatamana kusadila Yave voti ndamba. (Yosua 24:15) Diawu, matata boti muana bevayikusu mu kimvuka, bikanu kuyivana fotu.
6. Buidi bana balenda bela mu thangu tata kamvayikusu mu kimvuka?
6 Khumbu zinkaka, matata bambikanga kiedika ayi mvandi makanda mawu. (Minku. 27:10) Mambu ma phila ayoyo ma kumonika, bana bantovukanga beni kibila matata bawu ntungul’uawu. Dedi, tala mambu Ester katuba: “Yidila beni bo tat’ama kavayikusu mu kimvuka. Vayi yiluta ba mu kiunda mu kuzaba ti naveka wubaka makani ma kutatuka kimvuka ki Yave ayi dikanda ditu. Minu yinzolanga beni tat’ama, diawu khumbu ziwombo yaba kuazukanga beni muingi kuzaba buidi nandi kadidi. Ayi mvandi yaba banga mu kiunda kingolo mu kibila ki mambu amomo.”
7. Mabanza mbi Yave kadi mu bana badi matata bavayikusu mu kimvuka?
7 Bana, banu lufiatu ti mintima mitu mimbanga beni mu kiunda bo matata minu bamvayikusu mu kimvuka. Mulenda ba lufiatu ti Yave mvandi wumbanga beni mu kiunda ayi zebi mambu muidi mu kuviokila. Ayi tebukanu moyo ti nandi wumu zolanga ayi wunkuangalalanga mu lukuikumunu luinu. Befu mvitu mawu mabanza tuidi mu benu. Mvandi, tebukanu moyo ti benu muisi ko fotu mu makani matata minu babaka. Dedi bo tuma muena mu lutangu luma vioka, Yave Nzambi wuvana kadika mutu luaku lu kusola. Ayi kadika kisadi ki Yave wukivana ayi wubotama kafueti tebukanga moyo “kiyeku akiokio ki nkinza” kadi va meso ma Yave.—Ngala. 6:5, nota.
8. Mbi basi dikanda balenda vanga bo bamvingila musi dikanda kavutuka mu kimvuka? (Tala mvandi quadro yintuba “Vutuka Kuidi Yave.”)
8 Bo wumueka va dikanda kamvayikusu mu kimvuka, ngie fueti ba kivuvu ti nandi wunkuiza vutuka kubue sadila Yave. Vayi mbi wulenda vanga bo wumvingila mawu? Ngie wulenda tatamana kukieba kiphevi kiaku. Mu kuvanga mawu, ngie wunkuiza ba ntungulu wumboti kuidi bankaka va dikanda ayi mvandi kuidi mutu wuvayikusu. Mvandi mawu mala kusadisa kukindama bo mabanza ma kiunda ma kukuizila. Diawu, tuentubila mua mambu wulenda vanga muingi kukindama mu kiphevi.
MBI WULENDA VANGA BO WUMVINGILA MUSI DIKANDA KAVUTUKA MU KIMVUKA?
9. Buidi wulenda bakila mangolo mamfumina kuidi Yave? (Tala quadro yintuba “ Matangu Malenda Kubomba bo Mutu Wunzolanga Kambika Kusadila Yave.”)
9 Tsikika thuadusulu yimboti mu mambu ma kiphevi. Nkinza beni kutatamana kukindisa kiphevi kiaku ayi ki bankaka va dikanda. Vayi buidi wulenda vangila mawu? Muingi wubaka mangolo mamfumina kuidi Yave, fueti tanganga Kibibila, kuyindula mambu wuntanga ayi kulandakananga zikhutukunu zioso. Tala mambu Joana, widi tata ayi khomba yinkieto bavayikusu mu kimvuka katuba: “Ntim’ami wumbanga wuvumbama bo yintanga binongo bi Kibibila bitedi Abigaili, Esteli, Yobi, Yosua, ayi Yesu. Bifuani biawu binkindisanga ntim’ami ayi bindekulanga kiunda yimbanga. Mvandi minkunga mi broadcasting mi kukhindisanga.”
10. Buidi matangu ma Minkunga 32:6-8 malenda vumbikila mabanza ma kiunda?
10 Zabikisa mabanza maku kuidi Yave. Bo mayindu ma kiunda ma kukuyizila, tatamana kusambila. Dinda kuidi Nzambi yi luzolo, muingi ka kusadisa “kutadila mambu widi mu kuviokila mu phila yifuana.” Mvandi ndinda muingi ka kulonga phila wufueti diatila mu nzil’andi. (Tanga Minkuga 32:6-8.) Tuzebi ti khumbu zinkaka dilenda ba diambu diphasi kuzabikisa Yave mabanza maku ma tsi ntima. Vayi, ba lufiatu ti Yave zebi buboti buidi mambu amomo ma kutatisila. Mvandi, nandi wuku zolanga beni ayi wuntomba wunzibudila ntim’aku.—Esodu 34:6; Minku. 62:7, 8.
11. Dedi bummonisina Ebeleo 12:11, kibila mbi tufueti fiatila mu lufundusu lu Yave? (Tala quadro yintuba “ Kuvayikisa Mutu—Kidi Kivisa ki Luzolo lu Yave.”)
11 Buela mioko makani bakulutu ba kimvuka babe baka. Kuvayikusu mu kimvuka yidi thuadusulu naveka Yave katsikika. Mvandi, yidi mbonosono yi luzolo ayi phila yimboti yi kukiebila kimvuka kioso kubunda mvandi mutu beni bevayikusu. (Tanga Ebeleo 12:11.) Ḿba ngie wumana kuwa batu kutubila bubi bakulutu bo mutu kavayikusu mu kimvuka. Vayi bawu, batubilanga ko mambu mutu wuvayikusu kabe vanga. Tufueti ba keba keba mu mambu amomo, kibila tuisi ko bivisa bioso. Vayi, tufueti ba lufiatu ti bakulutu bafundisa khomba beni mu kulandakana minsua mi Kibibila voti “mu phila yi Yave kantombila.”—2 Lusa. 19:6.
12. Ndandu mbi bankaka babaka mu kulandakana zithuadusulu zi kimvuka ki Yave?
12 Ngie kubuela mioko makani bakulutu ba kimvuka babe baka, wunkuiza sadisa mutu bevayikusu kavutuka kuidi Yave. Elizabeti, tube tubila kumbusa wutuba: “Muan’itu wuba nkulutu, vayi kheti bobo diba diambu diphasi kubika kubue kolukanga yandi bo kavayikusu mu kimvuka.” Vayi, bo kavutuka “nandi wukikinina ti tsembolo katambula yiba yifuana ayi wulonguka mambu mawombo. Mawu matsadisa kumona ti tsembolo yi Yave, yawu yilutidi.” Mark nnuni Elizabeti, mvandi wutuba: “Bo muan’itu kavutuka, nandi wukhamba ti diambu dinsadisa kafika vutuka mu kimvuka, diba kumona phila tutatamana kulandakana zithuadusulu zi kimvuka ki Yave. Yimvutulanga matondo kuidi Yave mu kutu sadisa kulandakana zithuadusulu zioso.”
13. Mbi bilenda kusadisa kudekula kiunda?
13 Yoluka na bakundi bamvisa mabanza maku. Kuba bakundi bayonzuka mu kiphevi, mankuiza kusadisa kuba mayindu mafuana. (Zinga. 12:25; 17:17) Joana, tube tubila kumbusa wutuba: “Khumbu ziwombo yaba kukimonanga buka ti yidi va miveka. Vayi bo yaba kolukanga na bakundi bama, minu yaba banga buboti.” Vayi mbi wulenda vanga bo bankaka bantuba mambu ma kubika mu kiunda?
14. Kibila mbi tufueti “tatamana kukivibidila ayi kukilemvukila”?
14 Monisa mvibudulu mu zikhomba mu kimvuka. Fueti tebukanga moyo ti zikhomba balenda tuba mambu makhambu fuana. (Yako. 3:2) Mu kuba batu ba masumu, khumbu zinkaka zikhomba balenda tuba voti kuvanga mambu ma tunyongisa ntima. Diawu, tufueti tebukanga moyo dilongi di mvuala Polo dintuba: “Tufueti tatamana kukivibidila ayi kukilemvukilanga befu na befu kheti vadi mutu widi kibila ki kunyongina wunkaka.” (Kolo. 3:13) Khomba mueka widi musi dikanda wuvayikusu mu kimvuka wutuba: “Zikhomba ziwombo baba tomba kutsadisa ayi kheti basa vangila ko mawu mu phila yimboti, vayi Yave wutsadisa kuba lemvukila.” Vayi mbi baboso mu kimvuka balenda vanga muingi kusadisa dikanda di mutu bevayikusu mu kimvuka?
ZIKHOMBA ZIOSO MU KIMVUKA BALENDA SADISA
15. Mbi tulenda vanga muingi kusadisa basi dikanda di mutu bevayikusu mu kimvuka?
15 Ba bukundi na dikandi di mutu wuvayikusu. Yaya Mirian widi khomba wuvayikusu mu kimvuka wutuba: “Yaba kuazukanga beni ava kukuenda mu zikhutukunu mu kuyindula mbi bankaka bankuiza tuba. Vayi, zikhomba bakhindisa ayi batsadisa kununga mabanza ma kiunda yiba. Bawu basa tuba ko ni diambu dimbi matedi khomb’ama wuvayikusu, mawu matsadisa kumona ti yisi ko minu veka.” Khomba yinkaka yinkieto wutuba: “Bo muan’itu kavayikusu mu kimvuka, zikhomba bamonisa luzolo mu kutu bomba. Bawombo mu bawu bakhamba ti basa zaba ko ma kutuba mu thangu beni. Vayi bawu badila yama ayi bankaka ba tusonikina minkanda muingi kutu kindisa. Mambu bawu bavanga, makhindisa beni.”
Baboso mu kimvuka balenda monisa luzolo ayi kukindisa dikanda di mutu bevayikusu mu kimvuka (Tala lutangu 17) *
16. Buidi zikhomba balenda kindisila dikanda di mutu bevayikusu?
16 Nkinza beni kutatamana kukindisa ayi kumonisa luzolo kuidi basi dikanda di mutu bevayikusu mu kimvuka. (Ebe. 10:24, 25) Kiadi ayi kiunda kuzaba ti zikhomba zinkaka bambikanga kukoluka na basi dikanda di mutu bevayikusu. Mawu mamvanganga ba kimona buka ti bawu mvawu babe vayikusu mu kimvuka. Diawu, kawubika mambu amomo mamonika. Tufueti luta kindisanga ayi kutonda matoko badi matata bavayikusu mu kimvuka. Tala mambu Mirian, widi nnuni wuvayikusu mu kimvuka ayi wuyekula dikanda katuba: “Zikhomba bayiza kunzu’itu, ba tusadisa kulamba ayi kuvanga ndongukulu’itu yi dikanda. Bawu bamona buidi mawu matu tuadisila ziphasi ayi badila yitu. Ayi kheti bawombo batu tubila bubi bukundi bitu ba tukakidila. Bukiedika, mambu moso amomo matu kindisa beni.”—Loma 12:13, 15.
17. Mbi bakulutu ba kimvuka bafueti vanga muingi kukindisa dikanda di mutu bevayikusu?
17 Bakulutu ba kimvuka, sadilanu buboti luaku muidi muingi kukindisa kiminu ki dikanda di mutu bevayikusu. Benu muidi kiyeku kimfunu ki kubomba zikhomba badi va dikanda di mutu bebika kusadila Yave. (1 Tesa. 5:14) Diawu lukindisanu zikhomba beni ava lukutukunu lutona ayi kutsuka. Ayi buboti kuba bilanga kunzo’awu ayi kusambilanga yawu. Sala yawu mu kisalu ki kusamuna ayi wuba tumisa mu mbuongimin’inu yi dikanda. Minkengididi mi mamemi mu kiphevi, bafueti monisanga luzolo ayi kuvua nkinza mamemi ma Yave madi mu kutovuka.—1 Tesa. 2:7, 8.
TATAMANA KUBA KIVUVU AYI KUFIATILA MU YAVE
18. Dedi bummonisina 2 Petelo 3:9, mbi Nzambi kantomba kuidi batu bavayikusu?
18 Yave “kasintomba ko ni mutu kabungu vayi wuntomba baboso babalula mavanga.” (Tanga 2 Petelo 3:9.) Kheti mutu bevola disumu dingolo luzingu luandi luidi beni luvalu va meso ma Yave. Kibila Yave—wufuta thalu yinangama bo kavana luzingu lu muan’andi—muingi baboso babaka nlemvu wu masumu. Diawu, mu luzolo Yave wunsadisanga baboso bavayikusu ayi bantomba kubue kunsadila. Nandi wuntomba batu beni bakikinina lusalusu luandi ayi bavutuka kuidi nandi dedi mu kinongu Yesu kata ki muana wuzimbala. (Luka 15:11-32) Bawombo babika kiedika vayi buviokila thangu bavutuka mu mioko mi luzolo mi Tat’awu Yave. Ayi zikhomba mu kimvuka baba yamba buboti. Elizabeth tube tubila wuyangalala bo muan’andi kavutuka kubue sadila Yave. Ayi nandi wutuba, “Yidi beni mayangi ayi yimvutudila Yave matondo mu phila kasadila zikhomba muingi kukhindisa yitatamana kuba kivuvu.”
19. Kibila mbi tulenda tatimina kufiatila Yave?
19 Befu tulenda fiatila mu Yave. Kibila zithuadusulu zioso katuvananga nandi wumvangilanga mawu muingi kutu sadisa. Nandi widi Tata yimboti, wunkabanga ayi wunzolanga bana boso ba kuntumukinanga. Diawu wulenda ba loluawu lufiatu Mark kaba mu kutuba “Yave kalasa kukuekula ko bo wumviokila mu mambu maphasi ayi wala tatamana yaku thangu zioso.” (Ebe. 13:5, 6) Yave wala tatamana kuvana “mangolo maviokidi kitesu.” (2 Koli. 4:7) Diawu kheti mutu wunzolanga beni bebika kusadila Yave ayi bevayikusu mu kimvuka, ba lufiatu ti ngie wulenda tatamana kuba wukuikama kuidi Yave ayi kuba kivuvu.
NKUNGA 44 Nsambu wu Kisadi Kidi Kyunda Kingolo
^ Lut. 5 Tumbanga beni mu kiunda bo mutu va dikanda kambika kusadila Yave. Dilongi adidi, dinkuiza tusadisa kumona buidi Yave kambelanga bo mambu amomo mammonika. Ayi mvandi tunkuiza mona mambu basi dikanda badi bakuikama balenda vanga muingi kununga kiunda ayi kutatamana kuba bakindama mu kiphevi. Bosi kutsuka tunkuiza mona buidi baboso mu kimvuka balenda sadisila dikanda adiodio.
^ Lut. 1 Bavingisa mazina mu dilongi adidi.
