1. Buidi batu bakuikama balenda tedila Yave?

MU DIKANDA di Yave muidi mvandi Yesu, widi “wutheti mu bivangu bioso” ayi bivevi na biveve di zimbasi. (Kolo. 1:15; Minku. 103:20) Bo Yesu kaba va ntoto, nandi wumonisa ti batu bakuikama, balenda tadila Yave buka Tat’awu. Diawu bo kaba koluka ba bapostolo bandi, Yesu wuba kamba ti Yave widi “Tat’andi ayi Tat’awu.” (Yoa. 20:17) Mu thangu tukivana kuidi Yave ayi tubotama, befu tuyiza ba mu khati dikanda muidi zikhomba zi luzolo.—Malako 10:29, 30.

2. Mbi tunkuiza longuka mu dilongi adidi?

² Bawombo balenda mona phasi kutadila Yave banga Tat’awu yi luzolo. Bankaka balenda mona phasi kumonisa luzolo kuidi zikhomba ziawu. Mu dilongi adidi, tuemmona buidi Yesu ka tusadisila kutadila Yave banga Tat’itu yi luzolo, no befu tulenda fikama. Mvandi tunkuiza mona ziphila tulenda landikinina kifuani ki Yave mu phila tunzingila na zikhomba zitu.

3. Buidi nsambu Yesu kalonga wumbuela kutu fikika kuidi Yave?

³ Yave widi Tata yi luzolo. Yesu wutomba befu tutadila Yave mu phila nandi ka kuntadilanga, banga Tata wummonisanga luzolo telunda fikama—kubika kuandi banga mfumu yizangama. Befu tuzabidi mawu, mu phila Yesu kalongila minlandikini miandi bafueti sambidilanga. Mu nsambu beni kaba longa muba bikuma abibi: “Tat’itu.” (Matai 6:9) Yesu khanu wuba longa batedilanga Yave banga “Nkua Ngolo Zioso,” “Mvangi,” voti “Ntinu wu Thangu Zioso”—kibila zithangununu aziozio, zidi mu Kibibila ayi naveka to Yave vuidi ziawu.  (Ngene. 49:25; Yesa. 40:28; 1 Timo. 1:17) Vayi Yesu wusadila kikuma ki luzolo tufueti kuntedila, “Tata.”

4. Buidi tuzabidi ti Yave wuntomba muingi befu tumfikama?

⁴ Ngie wummonanga phasi kutadila Yave banga Tata yi luzolo? Zaba ti bawombo bammuenanga buawu. Kibila khumbu zinkaka, befu tunyindulanga phila yimbi ba tuyonzudila kuidi matata mitu. Vayi mbombolo yiwombo kuzaba ti Yave wumvisanga mabanza mitu. Ayi nandi wuntomba kutufikama. Buawu Diambu Diandi di tukindisila mu bikuma abibi: “Lufikama kuidi Nzambi, ayi nandi wala ku lufikama.” (Yako. 4:8) Yave wutu zolanga beni ayi nandi wukivananga muingi kuba Tata yilutidi kuidi befu.

5. Dedi bummonisina Luka 10:22, buidi Yesu ka tusadisila muingi tubuela fikama Yave?

⁵ Yesu kalenda kutu sadisa kufikama kuidi Yave. Nandi zebi buboti Yave ayi wulandakana zikhadulu ziandi buboti, diawu katubila: ‘Woso wu kumbona, mueni mvandi Tat’ami.’ (Yoa. 14:9) Mu kuba khomb’itu yinkulutu, Yesu wutu longanga buidi tulenda monisina lukinzu ayi kutumukina Tat’itu, buidi tufueti zingila muingi tubika nyongisa Tat’itu ayi buidi tulenda bakila lunungu va meso mandi. Diawu bo kaba va ntoto, Yesu wumonisa mamboti ayi luzolo Yave kadi. (Tanga Luka 10:22.) Tumona mua bifuani mu Mawu.

6. Vana bifuani mu phila Yave kayuwila minsambu mi Yesu.

⁶ Yave wunkuwanga bana bandi. Tala phila Yave kaba kuwilanga Muan’andi wutheti. Nandi wuyuwa minsambu miwombo mi Muan’andi bo kaba va ntoto. (Luka 5:16) Dedi, Yave wuyuwa mu thangu Yesu kasambila muingi kubaka makani maphasi ma kusola 12 di bapostolo. (Luka 6:12, 13) Yave wuyuwa mvandi Yesu bo kaba viokila mu ziphasi. Ava bamvakula Yesu wusambila beni kuidi Tat’andi mu matedi ziphasi kaba belama kuviokila. Yave kasa kuwa ko to nsambu beni, vayi mvandi wufila mbasi muingi kukindisa Muan’andi wu luzolo.—Luka 22:41-44.

7. Buidi tuzabidi ti Yave wunkuwanga minsambu mitu bubu?

 ⁷ Bubu, Yave wukuwanga minsambu mi bisadi biandi ayi wuntambudilanga miawu mu thangu ayi mu phila yifuana. (Minku. 116:1, 2) Tala kifuani ki khomba yinkieto wunkalanga ku India wumona kivisa mu mambu amomo. Bo kaba viokila mu ziphasi, nandi wusambila kuidi Yave mu matadi mambu beni. Tala mambu kasonika: “Video yi Broadcasting^® yi ngonda Yintanu, mvu 2019 yaba tubila matedi kununga boma ayi mambu ma tukuazula, wuba mvutu wu minsambu yivanga.”

8. Mu phila mbi Yave kamonisina luzolo kuidi Yesu?

⁸ Yave wutu zolanga ayi wutu kiebanga dedi bo kazodila ayi kakiebila Yesu bo kaba mu kiyeku kiandi va ntoto. (Yoa. 5:20) Nandi wukieba zitsatu zioso zi kiphevi ayi zi kinsuni zi Yesu. Yave kasa bika ko kumonisa ti Muan’andi wuba lunungu va meso mandi. (Matai 3:16, 17) Mu kuzaba ti Tat’andi ku diyilu kalendi kunkuekula ko, diawu Yesu kaba kumfiatilanga.—Yoa. 8:16.

9. Bivisa mbi tuidi ti Yave wutu zolanga?

⁹ Buka Yesu, befu boso tumana mona mu ziphila ziwombo luzolo lu Yave mu luzingu luitu. Dedi: Yave wutu tumisa mu dikanga diandi di kiphevi didi luzolo ayi kithuadi muingi kubuela mayangi mitu ayi kutusadisa kukieba zitsatu zitu. (Yoa. 6:44) Mvandi Yave wutu vananga bidia biwombo bi kiphevi ayi wutu sadisanga mu kukieba zitsatu zitu zi kusuni kadika kilumbu. (Matai 6:31, 32) Befu kuyindulanga luzolo luwombo Yave kadi mu befu, luzolo luitu mu nandi mvandi lumbuelamanga.

10. Buidi tulenda buedila luzolo tuidi mu dikanda ditu di kiphevi?

¹⁰ Yave wunzolanga beni zikhomba zitu. Vayi khumbu zinkaka tulenda mona phasi kumonisa luzolo kuidi basi dikanda ditu di kiphevi. Mawu mammonikanga kibila tufumina mu bikhulu ayi mimvila miviakana. Mvandi bo tuidi batu ba masumu, tulenda vanga diambu dilenda nyongisa bankaka. Vayi kheti bobo, tulenda buela luzolo tuidi mu dikanda ditu di kiphevi. Mu phila mbi? Mu kulandakana kifuani mu phila Tat’itu kammonisinanga luzolo kuidi zikhomba zitu zi kiphevi. (Efe. 5:1, 2; 1 Yoa. 4:19) Buabu tuemmona mbi tulenda longuka mu kifuani ki Yave.

11. Buidi Yesu kalandikinina kifuani ki Yave ki “kumonisa kiadi”?

¹¹ Yave wummonisanga “kiadi kuidi batu boso.” (Luka 1:78) Nkua kiadi wumvanganga diosokua diambu bo kanzaba ti mutu wunkaka widi mu kuviokila mu ziphasi. Nandi wuntombanga ziphila zioso muingi kunsadisa ayi kumbomba. Yesu Klisto wulandakana kifuani ki Yave ki kumonisa kiadi, mu phila kaba kiebilanga batu. (Yoa. 5:19) Dedi, bo kamona nkangu wu batu baba mu kiunda ayi bavonga, Yesu ‘wuba mona kiadi kibila baba banga mamemi makhambulu nsungi.’ (Matai 9:36) Kiadi Yesu kaba mu batu beni, kiawu kimvanga nandi kabelusa bo “baba babela ayi mvandi kukindisa bo baba bavonga.”—Matai 11:28-30; 14:14.

12. Vana kifuani mu phila tulenda monisina kiadi kuidi bankaka.

¹² Ava kumonisa kiadi kuidi zikhomba zitu, tufueti tomba theti kuzaba mambu maphasi bamviokila. Dedi yindulabu khomba widi mu kimbevu kingolo. Kheti kadindanga ko lusadusu, vayi ḿba nandi kalenda tonda befu kukivana muingi kunsadisa. Diawu tulenda ku yikuvusa: Buidi nandi kadi mu kukiebila zitsatu zi kinsuni zi dikanda diandi? Nandi kasinkuiza yangalala ko mutu na kukivana muingi kunsadisa kukubika bidia voti kudiodisa nzo?  Voti yindulabu mfumu dikanda bama botula mu kisalu. Kasinkuiza yangalala ko befu kutula mua lubongo mu mvelopi mu khambu sonika dizina ditu ayi kumvana? Bukiedika mawu malenda vumbika mabanza mandi mu thangu kantomba kisalu kinkaka.

13-14. Buidi tulenda monisina ti tuidi mu kulandakana kifuani ki Yave ki kukaba?

¹³ Yave widi nkua kukaba. (Matai 5:45) Tulendi vingila ko theti zikhomba zitu ba tudinda lusadusu bosi tuba kabila. Dedi Yave, tufueti tuama ntuala mu kuvanga mawu. Yindulabu, muinya wunsadisanga bivangu bioso kuzinga. Vayi kheti mu khambu kundinda, Yave wuntebulanga wawu kuidi batu boso. Wisimmona ko ti mu kudukisa zitsatu zitu, Yave wummonisanga luzolo luwombo kadi mu befu? Bukiedika befu tunzolanga beni Yave kibila nandi widi nkua mamboti ayi nkua kukaba!

¹⁴ Mu kulandakana kifuani ki Tat’itu yi diyilu, zikhomba ziwombo bantuamanga ntuala mu kumonisa khadulu ayoyi. Dedi mu mvu 2013 bo kivuka kingolo kimonika ku Filipina, zikhomba ziwombo zinzo ziawu zitulumuka ayi biuma bioso biba yawu bimana kuvavuka. Vayi dikanda ditu di kiphevi mu nza yimvimba, baba buela mioko. Zikhomba ziwombo babuela mioko mu kuvana zimbongo ayi bankaka bayenda kuna muingi kusadisa kubue tunga zinzo zitulumuka. Ayi mu mvu wumueka, zikhomba banunga kubue tunga 750 di zinzo! Mvandi mu thangu yi kivunga ki COVID-19, Zimbangi zi Yave basala beni muingi kusadisa zikhomba. Diawu befu kubanga nzaki mu kubuela mioko basi dikanda ditu di kiphevi, tuidi mu kumonisa ti tuba zolanga.

15-16. Dedi bummonisina Luka 6:36, buidi tulenda landikinina kifuani ki Tat’itu yi diyilu mu kumonisa nlemvu?

¹⁵ Yave widi nkua kiadi ayi nkua nlemvu. (Tanga Luka 6:36.) Kadika kilumbu befu tummonanga phila Tat’itu yi diyilu ka tumonisinanga kiadi. (Minku. 103:10-14) Minlandikini mi Yesu baba batu ba masumu; vayi kheti bobo, nandi wuba monisa kiadi ayi wuba lemvukila. Ayi dilutidi, Yesu wuvana luzingu luandi muingi befu tubaka nlemvu wu masumu. (1 Yoa. 2:1, 2) Mu kuyindula khadulu  ayoyo yi Yave ayi Yesu, mawu masi kuvanga ko kubuela kuba fikama?

¹⁶ Befu tumbuela kindisanga luzolo tuidi mu khati dikanda ditu di kiphevi, “bo tumlemvukila bankaka mu ntima woso.” (Efe. 4:32) Kulemvukila bankaka dilenda ba diambu diphasi, diawu vantombulu mangolo muingi kuvanga mawu. Khomba yimueka yinkieto wubaka lusalusu mu Kibanga ki Nsungi kiba ntu diambu “Lemvukilanga Zinzimbala zi Bankaka.” * Nandi wusonika: “Kulonguka dilongi adiodio, ditsadisa kubalula mayindu mami ayi kutadila zikhomba mu phila yifuana. Kulemvukila, kuisinsundula ko ti ngie wunkikinina voti wunkuangalala mu mambu mambi ba kuvangila. Vayi kunsundula kutula mambu beni va khonzo ayi kubika kanga nganzi muingi wutatamana kuba ndembama.” Diawu bo tunlemvukila mu ntima woso zikhomba zitu, tummonisanga ti tuba zolanga ayi tuidi mu kulandakana kifuani ki Tat’itu, Yave.

17. Dedi bummonisina Matai 5:16, buidi tulenda zitisila Tat’itu yi diyilu?

¹⁷ Luaku lunneni kuba mu khati dikanda di Yave mu nza yimvimba. Diawu tuvanganu mangolo muingi kubuongimina Nzamb’itu mu kithuadi. Ayi tufueti ba keba keba mo tubika vanga diosokua diambu dilenda bivisa dikabu di Yave ayi dizina di Tat’itu yi diyilu. Mvandi tufueti vanga mangolo muingi kuzingila mu phila yilenda sadisa bankaka kuvua nkinza zitsangu zimboti tunlonganga.—Tanga Matai 5:16.

18. Mbi bilenda kutusadisa kuvana kimbangi mu khambu mona boma?

¹⁸ Khumbu zinkaka batu balenda kutu lenza voti kutu kuamikisa bo tumvanga mangolo muingi kutumukina Tat’itu yi diyilu. Buabu mbi tulenda vanga boti boma tummona kukamba bankaka mambu tunkikininanga? Tulenda zabikisa mabanza beni kuidi Yave ayi Muan’andi muingi ba tusadisa. Yesu wukamba minlandikini miandi babika kuazuka mu mambu bafueti tuba. Mu kibila mbi? Kibila nandi  wuba kamba ti “bala tambula mambu bafueti tuba mu thangu beni.” Ayi wubue tuba: “Mambu beni, malasa ba ko minu vayi ma phevi yinlongo yi Tat’inu widi ku diyilu.”—Matai 10:19, 20.

19. Vana kifuani kimmonisa khomba wuvana kimbangi mu kibakala.

¹⁹ Tala kifuani ki Robert. Mua thangu kumbusa bo kaba nlonguki wu Kibibila, bantumisa ku nzo yi lufundusu yi masodi ku Africa do Sul. Mu kibakala, nandi wuba sudikisa ti mu kibila ki luzolo kadi mu zikhomba ziandi zi baklisto, diawu kakhambu kotilanga mu mambu ma politika. Mvandi wutuba ti waba kinzikanga beni kibuangu kinkinza kadi mu dikandi adiodio di kiphevi! Diawu mimfundisi banyuvudila: “Banani zikhomba ziaku?” Robert kasa ba ko wukubama mu kiuvu akiokio. Vayi mu thangu beni, lutangu lu Matai 12:50 luyiza va kilunzi kiandi. Luawu luntuba: “Woso wumvanga luzolo lu Tat’tami widi ku diyilu, awowo nandi khomb’ami ayi ngudi’ami.” Kheti Robert wuba nlonguki wumona wu Kibibila, phevi yinlongo yinsadisa kutambudila kiuvu akiokio ayi biuvu binkaka bamvana. Bukiedika, Yave wuyangala beni mu kimbangi kimboti Robert kavana! Mvandi Yave wunkuangalalanga beni bo tukumfiatila muingi kuvana kimbangi mu kibakala mu mambu mantota kiminu kitu.

20. Makani mbi kadika mutu mu befu kafueti baka? (Yoane 17:11, 15)

²⁰ Diawu tutatamananu kukinzika lusakumunu tuidi mu kuba mu khati dikanda ditu di kiphevi ayi di luzolo. Mu dikanda beni befu tuidi Tata yilutidi, mvandi tuidi zikhomba zi babakala ayi zi bakieto bakivana kuidi Nandi. Vayi befu manga kuba keba keba, tulenda zimbisa luaku alolo. Mu kibila mbi? Kibila Satana ayi batu badi ku khonzo’andi balenda kutu vanga kuba divuda mu luzolo Tat’itu kadi mu befu ayi mvandi kumanisa kithuadi kidi mu dikanda ditu di kiphevi. Diawu Yesu kasambila muingi Tat’itu yi diyilu katatamana kukieba kithuadi kidi mu dikanda ditu. (Tanga Yoane 17:11, 15.) Bukiedika, Yave wuntambudilanga nsambu beni. Dedi Yesu, tubika kubanga divuda mu luzolo ayi mvandi mu lusalusu Tat’itu yi diyilu katuvananga. Diawu bika makani ma kadika mutu maba, kubuela fikama dikanda ditu di kiphevi.