Politiki yilembo totula mambu mawombo ma matsita, diambu beni dilembo tatikisa batu bawombo mu nza.

•   Ku Mexique, 39 ki batu ba politiki bedi kaveni mazina mawu muingi ba bavoti mu zivoti bameni vonda, thalu yoyi yilutidi zia zioso zinkaka ziozi zivioka, ayi phe ntindu wunkaka wu matsita mu mambu ma politiki, wuvanga batu phasi ayi wutula ti batu babika bue kipa mboti zivoti ziozi zi salama mu tsungi yi 2023-2024.

•   Mu bilumbu bibedi, ku phutu, mambu mawombo ma matsita ma politiki masalimini kuna, mu kifuani mu lumbu ki 15 mai 2024, bedi kavondidi Premier ministre yi tsi yi Slovaquie.

•   Bedi kavondidi mu lumbu ki 13 Juillet 2024, prezida yithama yi États-Unis Donald Trump, diambu beni divengi basi medika bawombo phasi mu ntima.

 Bila mbi matsita madidi mawombo mu politiki? Mela mana lumbu kinkaka? Bibila mbi kintuba mu diambu beni?

 Bibila kibikula ti mu thangu eto yayi, yoyi kitedidi “bilumbu bitsuka,” batu bawombo bela ba bifu biobi biela tula ti matsita ayi kambu kuwizana biba biwombo.

•   ‘Zaba kuaku ti mu bilumbu bitsuka, muela ba zithangu ziphasi. Bila batu bela . . . ba zabanga ko vutula matondo, bela zabanga ko ba banlongo, . . . bela tianga ko tula nguizani, . . . bela ba batu batsita, . . . bela yekulanga badiawu, bela vika fuemanga, bela kukinangikanga mu luniemo.’—2 Timote 3:1-4.

 Bibila kibikula diaka ti mambu ma mubulu, banga monisa matingu kuidi bapfumu ayi mubulu mu mambu ma politiki biela luta monika mu thangu yayi. (Luka 21:9, noti kuwanda phapi) Vayi, matsita mu mambu ma politiki ayi khabuani, biela sie nzingila ko mvu ka mvu.

 Bibila kisudikisidi ti Nzambi wela vingisa ziguvernema zi batu mu guvernema yandi veka yi mazulu.

•   “Nzambi yi diyilu wela tula kipfumu kioki . . . kiela kosikisa ayi sukisa bipfumu biobi biabio, ayi kiela zinga mvu ka mvu.”—Danieli 2:44.

 Bukiedika Kipfumu ki Nzambi kiela kuiza fubikisa batu va kimosi ayi kiela kuiza tudi ndembama mu nza yimvimba.

•   Yesu Kristu, nioni widi Pfumu yi Kipfumu beni, bantedidi “Pfumu yi ndembama,” ayi wela tula ti ‘ndembama beni, yibika be suka.’—Yesaya 9:6, 7.

•   Buba lumbu kiaki, batu bobo Kipfumu beni kilembo tuadisa, balembo longuka phila yizingila mu ndembama. Diawu, Bibila kitubidi ti: “Bela kitula zi sabala ziawu zitsengo zi vatila ayi madionga mawu makuwa masodila biti. Kadi dikanda diela sie bue nanguna ko sabala mu nuanisa dikanda dinkaka, bela sie bue longuka ko bunuanina mvita.”—Yesaya 2:3, 4.

 Muingi wuzaba mambu mawombo, tanga disolo ditubidi ti “Bokonzi ya Nzambe ekosala nini?” ayi tala video yitubidi ti Bokonzi ya Nzambe ezali nini?