Mu mimvu 30 mio mime vioka, batu bawombo bamona ti nguizani yimboti yiba mu zitsi ziwombo ayi kuisi ba ko kadi diambu dio dibe kubamonisanga tsisi. Vayi, mambu mo malembo salama lumbu kiaki mu nza ma monisini bila kio tufueti muena tsisi.

•   “Mu thangu yo batu balembo moni tsisi mvita wu Gaza wutembakana mu zitsi zinkaka, tsi yi Iseli ayi Hezbollah batonini basasana mabuta ku ndilu yi tsi yi Liban.”—Reuters, 6 Janvier 2024.

•   “Tsi yi Iran, yo yilembo kubika binuanunu binneni bi nikleyere ayi buela mioko mu zitsi zinkaka mu diambu di mvita, yilembo monisa zitsi ziwombo zi phutu tsisi. Buabu khumbu yayi Chine ayi Russie kundambusu’andi badi.”—The New York Times, 7 Janvier 2024.

•   “Russie yilembo tatamana bunga Ukraine.”—UN News, 11 Janvier 2024.

•   “Mambu ma komelisi ayi binuanunu bi Chine bilembo tatamana ba ngolo, Taïwan yilembo tatamana nuanina luve luandi, Chine ayi États-Unis bakadi wizana, mambu moso momo malembo monisa ti diambu dinneni dieka nduka salama.”—The Japan Times, 9 Janvier 2024.

 Bibila mbi kintuba mu diambu di mambu momo malembo monisa tsisi, mo malembo salama mu nza yimvimba? Mawu mela totula mvita wu nza yimvimba?

 Bibila kisi bikula ko nduka nduka zitsi zio ziela ba mu mvita lumbu kiaki. Vayi kibikula phila mimvita miela kuiza bela miwombo mu thangu’eto ayi miawu miela tula ti ‘ndembama yi botuka va ntoto.’—Tsongolo 6:4.

 Nkanda wu Danieli wubikula ti “mu thangu yi tsuka”, zitsi zio zidi lulendo ziela ‘nuana’ ziawu na ziawu voti tomba yadila ndiandi. Zitsi beni ziela tomba phe monisa kuidi zitsi zinkaka binuanunu biawu bitsisi ayi totula “bimvuama,” voti mbongo ziwombo mu diambu di sumba mabuta.—Danieli 11:40, 42, 43.

 Bibila kitubidi ti tuamina nza yibonga mambu mela luta biva. Yesu wubikula ti ‘kuela ba ziphasi zinneni zio zibedi ko tona vana thonono nza natii buabu.’ (Matayi 24:21) “Ziphasi zinneni” beni ziela kuiza totula mvita wo batedidi Alimangedoni, wo widi “mvita yi lumbu kina kinneni ki Nzambi, Nkua Ngolo Yoso.”—Tsongolo 16:14, 16.

 Diambu dikhini didi, mvita wu Alimangedoni wela sie bunga ko kaka batu vayi phe kuba vukisa. Mu nzila mvita beni, Nzambi wela sukisa zimbiadulu zi batu, ziozi zime vondisa batu bawombo mu mimvita. Mu diambu di zaba bue Alimangedoni yela vanina batu ndembama yi mvu ka mvu, tanga masolo mama malandikini:

•   “Etumba ya Armagedone ezali nini?”

•   “Armagedone ezali mpenza nsango malamu!”