Nzambi katidi batu bayangalala mu luzingu lu mbote va ntoto. Wuvanga ntoto ayi bima bioso bidi va ntoto bila weta kutuzola. Fioti fisiedi, makavanga diambu dimosi mu diambu batu ba zitsi zioso baba mu luzingu lu mbote mu bilumbu binkuiza. Nzambi wela botula mambu moso momo metavanga batu phasi.​—Tanga Yelemia 29:11.

Kadi luyalu lumosi lumenunga manisa mubulu, bimbevo, voti lufua. Vayi kuidi ayi nsamu mosi wumbote. Fioti fisiedi, Nzambi wela botula ziguvernema zioso zi batu ayi wela vingisa ziawu mu yandi veka. Luyalu beni luela yadila batu bobo badi mu yenge ayi mavimpi ma mbote.​—Tanga Yesaya 25:8; 33:24; Danieli 2:44.

Ziphasi ziela mana mu thangu kaka Nzambi kela botula batu boso bambimbi va ntoto. (Sefania 2:3) Thangu mbi e? Phova Nzambi yisamuna tona thama mambu momo malembo vangi batu phasi bilumbu biabi. Mambu mambimbi momo malembo salama bilumbu biabi malembo monisa ti fioti fimesiala, Nzambi weka nduka sukisa ziphasi.​—Tanga 2 Timoteo 3:1-5.

Tufueti longuka mambu ma Nzambi mu nzila Bibila, Phova andi. Kidi dede nkanda wowubedi kudi disa di nzola. Kilembo tukambi phila yoyi tulenda bela mu luzingu lumbote bilumbu biabi, ayi phila yoyi tulenda bela mu luzingu lu mvu ka mvu mu bilumbu binkuiza. Makiedika ti batu bankaka balendi yangalala ko ti wulonguka Bibila. Vayi bo tuzebi ti Nzambi wutuveni tsila yi luzingu lu mbote mu bilumbu binkuiza, tulendi ko bikila batu nzila batukandika longuka Bibila.​—Tanga Zingana 29:25; Nzaikusu 14:6, 7.