Sambila ayi kubama bumboti. Sambila Nzambi kasadisa wutula mayindu maku mu mambu mo weka nlonga, vayi bika kuidi ngeyo veka. Sudika bumboti mayindu mamfunu mo tidi longa. Tuba mambu mu ziphova ziaku veka va buangu ki vutukilanga tanga mambu mo masonimini mu plan.

Ziphova ziaku zitotukila mu ntima. Wukiyuvula bila mbi batu badidi phuila yi wila mambu mo wukuiza tubi. Yindula batu beni. Enati wubutudidi, phil’aku yitelimina, zijeste ziaku, ayi zizi kiaku biela monisa ti wulembo tubi mambu mo mabedi mu ntim’aku.

Talanga batu bo balembo wa. Enati yisi’andi mbimbi ko ku buala bueno, talanga batu mu bizizi biawu. Mu thangu wulembo tudi diskur, talanga fioti kadika mutu ku zizi, va buangu kiviokisa meso va mbata mintu mi batu.