Yehova kasi ko Nzambi yi divunzi. (1 Kolinto 14:33) Diawu mambu ma bisadi biandi makala makubama. Phila mbi kimvuka kididi kikubama? Ayi bue wumosi mosi mu beto kalenda buedila mioko mu ndiatusulu yi kimvuka?

1. Nani mfumu yi kimvuka?

“Kristu niandi mfumu yi kimvuka.” (Efeso 5:23) Ku diyulu kalembu diatisila kisalu kibisadi bi Yehova mu nza yimvimba. Yesu wubieka “nnanga kuikama ayi wunduenga,” mua ndambu bakulutu badi diela bo beta tedolo diaka “Kimvuka kintuadisi.” (Tanga Matayi 24:45-47.) Banga kuandi phila bubela bapostolo ayi bakulutu ku Yelusalemi mu tandu kitheti, kimvuka kintuadisi kieta vana lutuadusu kuidi bimvuka binza yinvimba. (Mavanga 15:2) Vayi diawu ko din’zola sundula ti kimvuka kintuadisi badi bamfumu zieto. Beta landakana lutuadusu lu Yehova ayi Mbembo’andi, ayi beta tumukina kimfumu ki Yesu.

2. Bakulutu mu kimvuka kiyeku mbi badi?

Bakulutu badi bakristu bayonzuka mu kipheve ayi beta sadila Bibila mu diambu di longa, sadisa ayi kindisa batu mu kimvuka. Bakulutu beni bafutungu zimbongo ko. Badi bisadi mu kimvuka “mu ntima mboti va ntuala Nzambi; bika sia mu tomba ndandu, vayi mu lozolo luntima.” (1 Piela 5:1, 2) Beta sala mu kithuadi ayi bisadi bikisalu, bo beti kuiza ba bakulutu kuntuala. Bakulutu bankaka beta kuiza babieka minkengi mi zunga kuidi kimvuka kintuadisi. Minkengi beni mi zunga beta kubavana kiyeku kitala bimvuka biwombo, mu diambu di kubikindisa ayi kubivana lutuadusu. Mu landanaka mambu mo masonimini mu Bibila, beta bieka bakulutu ayi bisadi mu kisalu.—1 Timote 3:1-10, 12; Tito 1:5-9.

3. Kiyeku mbi kadika Mbangi kadi?

Batu boso mu khati kimvuka beta “kembisa dizina di Yehova” thangu beta vana mimvutu mu zikhutukunu ayi mu thangu beta samuna nsamu wumboti wu Kimfumu ki Nzambi.—Tanga Minkunga 148:12, 13.

 TUVISA MBOTI MBOTI

4. Yesu mfumu wumboti

Yesu lembu tutedisa kuidi niandi. Tanga Matayi 11:28-30 ayi vana mvutu mu kiuvu kiaki:

• Mamboti mbi tulenda baka, beto kikinina Yesu kaba mfumu’eto?

5. Bakulutu bafueti monisa fuani kimboti mu kimvuka

1. Bakulutu pfika pfika bakala ayi Yehova, beta sadisa basi dikanda diawu phe baba pfika pfika ayi Yehova

2. Bakulutu beta kibanzabanza mu diambu di kadika mutu mu kimvuka

3.   Bakulutu beta bima mu kisalu kitsamununu thangu ka thangu

4. Bakulutu bawu beta longa, vayi beta buela mioko phe mu bongisa zinzo zi kimfumu ayi mu bisalu binkaka

6. Bakulutu beta zola tusala yawu kithuadi

Bibila kisudikisidi bila mbi yididi mfunu mu landakana zinzengolo zi bakulutu. Tanga Ebelewo 13:17 ayi vana mimvutu mu biuvu biabi:

• Bibila ki kututomba tutumukinanga ayi tukikitisanga va ntuala batu bo balembu tutuadisa. Bue wummuena diyindu beni diodi, difuana kuandi didi? Bila mbi?

Tanga Luka 16:10 ayi vana mvutu mu kiuvu kiaki:

• Bila mbi yididi mfunu sala kithuadi ayi bakulutu buba mu mambu mafioti fioti?

 MU BUKHUFI

Yesu niandi mfumu yi kimvuka. Bakulutu beta tumukina kimfumu kiandi. Ayi tueta sala kithuadi ayi bawu bila beta tukindisa ayi beta tuvana kifuani kimboti.

Phutukulu

• Nani mfumu yi kimvuka?

• Kiyeku mbi bakulutu badi?

• Kadika sadi ki Yehova kiyeku mbi kadi?