“Bila mbi?” kidi kiuvu kio batu beta kiyuvula thangu bame builukulu ziphasi. Vayi diambu dikhini, Bibila kiveni mvutu mu kiuvu beni kioki.

1. Bue butonina mambu mambimbi?

Satana wutonisa kimbeni ayi Yehova. Bo katia yadila, wutuma bambuta zieto zitheti batombukila Yehova. Mosi kanunga kubutudila wuvuna Eva. (1 Mose 3:1-5) Wumvuna ti Yehova wuba kandika kima kimosi kimboti. Ayi wutula kakikinina ti batu balenda luta ba mu zikhini ti bakadi wilukila Nzambi. Bu kakamba Eva ti kedi fua ko, vana Satana katonina mayuya matheti. Diawu Bibila kieta tedila Satana “nkua luvunu ayi disa diluvunu.”—Yowani 8:44.

2. Tsobodolo mbi Adamu ayi Eva batula?

Yehova weba kabilanga Adamu ayi Eva bima biwombo. Wuba vana nzila yi dia makundi mamoso maba ku tsola yi Edeni, vayi dikundi dimosi kuandi kabakandika. (1 Mose 2:15-17) Vayi babaka kuawu nzengolo yimanga tumukina Yehova. Eva ‘wubonga dikundi beni dio ba bakandika ayi wudi dia.’ Kuntuala, bakala diandi phe Adamu ‘wuyiza dia.’ (1 Mose 3:6) Mu tala phila yo Adamu Ayi Eva babela baduka, nginu balendi ko vanga diambu dimbimbi. Vayi bu basobula kuawu manga tumukina Nzambi, bayiza sumuka ayi bamanga kuawu Nzambi kabayadila. Mu bila kitsobodolo beni yo babaka, bayiza mona ziphasi ziwombo.—1 Mose 3:16-19.

3. Nzengolo yo yibaka Adamu ayi Eva mambu mbi yinatina batu?

Bo bayiza sumuka, Adamu ayi Eva bayiza ba batu bakambu duka ayi bayiza tambikisa kambu kuawu ku duka kuidi batu boso. Mu bila ki Adamu, diawu Bibila kitubidi ti: “Mu mutu mosi mu yizila masumu mu nza yimvimba, ayi lufua luyizila mu masumu, diawu lufua lukotila mu batu boso.”—Loma 5:12.

Tueta mona ziphasi mu bila ki mambu mawombo. Thangu zinkaka tueta mona ziphasi mu zinzengolo zimbimbi zio tubeki, voti enati mutu wunkaka beki nzengolo yi mbimbi, buela diaka, tulenda ba va buangu kimbimbi voti mu thangu yimbimbi.—Tanga Mpovi 9:11.

 TUVISA MBOTI MBOTI

4. Mutu nioni wutonisa ziphasi zieto

Batu bawombo beta banzila ti Nzambi niandi wunyadila nza, bue wummuena madi makiedika? Tala VIDEO.

Tanga Zaki 1:13 ayi 1 Yowani 5:19 ayi vana mvutu mu kiuvu kiaki:

• Nzambi niandi wutonisa ziphasi zieto?

5. Mambu mambimbi mo mbiadulu yi Satana yime nata

1. Adamu ayi Eva baba baduka ayi beba zingilanga ku paladiso. Vayi bawila Satana ayi batombukila Yehova

2.   Ku manima matombuka kuawu, masumu, ziphasi ayi lufua bitembakana mu nza yimvimba

3. Fioti fisiedi Yehova maka botula masumu, ziphasi ayi lufua. Batu bela bo ba baduka ayi bela zinga ku paladiso

6. Thangu tueta mona ziphasi Yehova dieta kumvana kiadi

Nzambi ka kipanga ko ziphasi zieto? Tutala mambu momo Ntinu Davidi ayi thumu Piela basonika. Tanga Minkunga 31:7 ayi 1 Piela 5:7 ayi vana mvutu mu kiuvu kiaki:

• Bue weta muena, bu zebi ti Nzambi weta mona ziphasi zieto ayi weta tubanzila?

 MU BUKHUFI

Satana Diabulu ayi bambuta zieto batheti bawu mintukisi mitheti mi mambu mambimbi madi mu nza yayi. Yehova weta kibanza banza mu diambu di beto ayi fioti fisiedi weka nduka manisa ziphasi zioso.

Phutukulu

• Luvunu mbi Satana kakamba Eva?

• Mambu mbi kimbeni ki Adamu ayi Eva kime tunatina?

• Bue tuzabidi ti Yehova weta mona kiadi mu thangu tulembo moni ziphasi?