1. Bue batu bankaka beta muena diambu ditedi solula ayi batu bankaka mu kisalu ki tsamununu? (Tala phe foto.)

 BO TUIDI bisadi bi Yehova, tueta samuna bila tueta zola disa dieto di mazulu ayi tutidi sadisa batu bankaka ban’zaba. Minsamuni miwombo mieta yangalala mu bukiedika kisalu ki tsamununu. Vayi bankaka, phasi beta mona mu samuna. Bila mbi? Bankaka balenda ba tsoni tsoni, ayi balenda banzila ti basi ko minlongi mimboti. Bankaka tsisi beta mona mu kuenda mu zinzo zi batu, enati basi kubatedisa ko. Bankaka balenda mona tsisi yi kuku, bankaka tsisi beta mona fuemisa batu. Kadiambu ko beta zola buwombo Yehova, bakhomba beni ba babakala ayi babaketo, phasi beta mona samuna nsamu wumboti kuidi batu bo bakambulu zaba. Vayi, bazebi mfunu wu kisalu beni, ayi mfunu samuna thangu ka thangu. Yehova weta kubayangalala buwombo!

2. Enati phasi weta mona yangalala mu kisalu ki tsamununu, bila mbi ka wulendi vongila ko?

² Ngeyo phe phasi weta mona ba mu mayangi mu kisalu ki tsamununu mu bila ki mambu mo tume tubila? Enati buawu, kadi vonga. Kambu kuaku ku kukitudila ntima, kulenda monisa ti mu kukikulula koso mengi kuaku benda thalu yi batu kuidi ngeyo, ayi yawu yimmonisa ti mengi kuaku tula ziphaka ayi batu. Kuisi ko mutu weta zola ti bammanga, nduka nduka mu thangu katidi vangila batu mambu mamboti. Disa dieno di mazulu zebi bumboti mambu maphasi mo lulembo dengana, ayi tidi kuluvana lusadusu lolo luidi phuila (Yes. 41:13) Mu disolo  diadi, tueka ntadila mambu matanu, mo malenda kutusadisa tununga mayindu maphila yoyi, ayi tuyonzola zikhini mu kisalu ki tsamununu.

BIKA PHOVA YI NZAMBI YITUKINDISA

3. Mbi bisadisa m’bikudi Yelemia kasamunina batu bankaka?

³ Buba mu thangu thama, tsangu Nzambi yikindisa bisadi bio bi ba na biyeko biphasi bi dukisa. Tubonga kifuani ki m’bikudi Yelemia. Wumona tsisi mu thangu Yehova kamvana kiyeko ki samuna. Yelemia wutuba ti: “Ndisi zaba ko tuba, bila ndidi muana lezi.” (Yel. 1:6) Mbi binsadisa kabaka kibakala ki samunina? Wubaka lukindusu mu nzila yi Phova yi Nzambi. Wutuba ti: “Yawu yiba banga mbazu yinlema yo yiba mu khati mimvesi miama, ndisi koka ko kuyi kangila ntima.” (Yel. 20:8, 9) Kadiambu ko Yelemia wubaka terituare yo yiba phasi mu samuna, tsangu yo bamvanina kiyeko muingi kasamuna, yimvana zingolo zio kaba phuila muingi kasala kisalu.

4. Mbi bieta salama mu thangu tuntanga Phova yi Nzambi ayi kuyi yindudila mu buphinda? (Kolosayi 1:9, 10)

⁴ Bakristu beta baka ngolo mu tsangu yo yidi mu Phova Nzambi. Mu nkanda wo kasonikina kimvuka ki Kolosayi, thumu Polo wutuba ti baka nzayilu yikiedika, maku sadisa bakhomba ziandi Bakristu ‘badiatila mu phila yifuana mu Pfumu’ mu tatamana ‘buta mim’butu mu mavanga mamboti.’ (Tanga Kolosayi 1:9, 10.) Mavanga beni mamboti madi samuna nsamu mboti. Diawu mu thangu tulembo tangi Mbembo Nzambi, ayi tulembo yi yindudila mu buphinda, minu kieto mu Yehova kieta kinda, ayi mfunu wu zabikisa tsangu yi Kipfumu weta luta kuiza buelama mu beto.

5. Bue tulenda luta bakila mamboti mu lutangulu ayi mu ndongokolo’eto yi Bibila?

⁵ Muingi tuluta baka mamboti mu Mbembo Nzambi, tufueti keba mu kambu tanganga, longuka, ayi yindudila mu buphinda mu nsualu nsualu. Bakanga thangu yifuana yi kubutudila. Ngeyo buanakana verse yi Bibila yo yidi phasi mu kuyisudika, kadi kuyi labuka. Diawu sadila Index des Publications des Témoins de Jéhovah voti Buku ya bolukiluki mpo na batatoli ya Yehova muingi wusudika mambu mo bantubila mu verse beni. Ngeyo baka thangu yifuana mu diambu di longuka, mawu kindisa sikididi kiaku mu Mbembo Nzambi yo yidi yikiedika (1 Tes. 5:21) Bobuawu wunluta bela sikididi, buawu mawu luta yangalala samuna mambu mo wunlonguka kuidi batu bankaka.

 KUBAMANGA BUMBOTI MBOTI MU DIAMBU DI KISALU KI TSAMUNUNU

6. Bila mbi tufueti kubiminanga bumboti mboti mu diambu di kisalu ki tsamununu?

⁶ Ngeyo kubama bumboti mboti mu diambu di kisalu ki tsamununu, wukuiza moni ko tsisi mu thangu wunsolula ayi batu bankaka. Tuamina katuma balonguki bandi mu kisalu ki tsamununu, Yesu wubasadisa bakubama. (Luka 10:1-11) Mu thangu basadila mambu mo Yesu kabalonga, balonguki bayiza ba mu mayangi mawombo bo bayiza ba bafuana mu vanga mambu mangitukulu.​—Luka 10:17.

7. Bue tulenda kubimina mu diambu di kisalu ki tsamununu? (Tala phe foto.)

⁷ Bue tulenda kubimina mu diambu di kisalu ki tsamununu? Tufueti yindula phila yoyi tulenda tubila kiedika mu phila yimboti mu ziphova zieto veka. Yikala phe diambu dimfunu tukizabilanga mambu muadi voti ma matatu, momo batu bo bakala ku terituare yeto beta tuba mu thangu tukubasamunina. Ayi tufueti kibela mu mayindu, phila yo tukuiza bela mu thangu tunsolula ayi bawu, bawu tuba mambu beni. Kumanima, mu thangu tunsolula ayi batu, tulenda meka ba banianguka, seva ayi ba buphombo.

8. Mu mbi Bakristu badedikini banga zinzungu zituma zio zidi mu kifuani ki thumu Polo?

⁸ Thumu Polo wumonisa yeko kio tuidi mu kisalu ki tsamununu, mu thangu katuba: “Kiuka beni kioki tueti nata kidi mu zinzungu zituma.” (2 Ko. 4:7) Kiuka beni mu na mbi? Kidi kisalu kivukisa miela mi batu mu kubasamunina tsangu yi Kipfumu (2 Ko. 4:1) Zinzungu zituma mu na mbi? Zimmonisa bisadi bi Nzambi bio bieta samuna nsamu wumboti kuidi batu bankaka. Mu thangu Polo, mintekisi mieba sadilanga zinzungu zituma mu diambu di nata bima bi luvalu banga bidia, vinyu ayi zimbongo. Bobuawu phe Yehova wutuveni kiyeko kimfunu ki samuna nsamu wumboti. Mu lusadusu lu Yehova, tulenda baka zingolo zifuana muingi tusamuna mu bukuikama tsangu’eto.

SAMBILA MUINGI WUBAKA KIBAKALA

9. Bue tulenda nungina tsisi yi batu voti tsisi yi yindula ti batu balendi ko kutuwa? (Tala phe foto.)

⁹ Thangu zinkaka tulenda mona tsisi yi batu, voti tsisi yi yindula ti balendi ko kutuwa. Bue tulenda nungina diambu beni? Tadila lusambulu lolo bathumu batula mu thangu ba bakandika babika bue samuna. Va buangu kimona  tsisi, balomba Yehova kabasadisa “mu kubavana bukhafi bulongila mambu [mandi].” (Mav. 4:18, 29, 31) Yehova wufika vana mvutu mu zindombolo ziawu. Enati thangu zinkaka tueka mmona batu tsisi, tufueti lomba phe Yehova katusadisa. Lomba Yehova kasadisa wubika mona batu tsisi mu diambu di luzolo lo widi mu bawu.

10. Bue Yehova keta tusadisila tudukisa kiyeko kio tuidi kiba Bambangi ziandi? (Yesaya 43:10-12)

¹⁰ Yehova wutusobula muingi tuba Bambangi ziandi, ayi wutuveni tsila yi kutusadisa muingi tuba kibakala (Tanga Yesaya 43:10-12.) Tutadila ziphila ziya zio keta butudila. Phila yitheti, Yesu wukala ayi beto kadika thangu yo tunsamuna nsamu wumboti. (Mat. 28:18-20) Phila yimmuadi, Yehova wusobula banzelu muingi batusadisa. (Tso. 14:6) Phila yintatu, Yehova wutuvana pheve santu’andi muingi yi tusadisa tubambukanga moyo mambu momo tulonguka. (Yow. 14:25, 26) Phila yinya, Yehova wutuveni bakhomba muingi tusala yawu kithuadi. Mu lusadusu lu Yehova, ayi lu bakhomba zieto ba luzolo, tuidi na momo tuidi na mfunu muingi tuba kibakala ayi tutatamana samuna.

ZABA ZIPHUILA ZI BATU AYI BA MAYINDU MAMBOTI MU DIAMBU DI BAWU

11. Mu thangu widi mu kisalu ki tsamununu, bue wulenda luta bakila batu? (Tala phe foto.)

¹¹ Weta vonga nitu enati wukadi bata batu bawombo mu zinzo? Wukiyuvula kiuvu kiaki: ‘Kue ndilenda batila batu ba terituare yama mu thangu yayi?’ (Mav. 16:13) ‘Mu kisalu voti kuzandu badi?’ Enati bua buididi, wulenda baka batu mu ta kimbangi ki nzila nzila? Khomba mosi widi mu dizina di Joshua tubidi ti: “Ndibaka maluaku ma samunina mu kuendanga mu mazandu ayi mu bibuangu bio beta telimisina matoma.” Niandi ayi nketo’andi Bridget, babaka diaka batu mu zinzo, mu thangu beba telanga balonguki beni mu telefoni mu thonono yi masika ayi mu lumbu kilumingu kumbusa midi.​—Efe. 5:15, 16.

12. Bue tulenda zabila mambu mo batu beta wilukila voti mo malembo kubatatikisa?

¹² Enati batu bakadi thumu wilukila tsangu yo tulembo basamunina, tutomba zaba mambu mo beta wilukila voti mo meta kubatatikisa. Joshua ayi Bridget beta sadila kiuvu kio kikala vantuala trakiti mu thonono yi tsoludulu na batu. Mu kifuani mu thangu beta  sadila trakiti Bue weta muena Bibila? batubidi ti: “Batu bankaka beta tuba ti Bibila yidi buku yi Nzambi, vayi bankaka nana. Ngeyo bue buididi dibanza diaku?” Yawu yeta tula ti disolo ditatamana.

13. Bila mbi tulenda tadila kisalu ki tsamununu ti yidi ndungunu buba ti batu bakadi kutuwa? (Zingana 27:11)

¹³ Ndungunu’eto mu kisalu ki tsamununu yisi simbulu ko kaka mu mim’butu mio tum’baka. Bila mbi? Bila tuvengi mo Yehova ayi muan’andi batidi tuvanga, ta kimbangi. (Mav. 10:42) Buba ti tukadi baka batu ba samunina voti enati bakadi kutuwa, tulenda baka mayangi bila tuzebi ti tume yangidika Disa dieto di mazulu.​—Tanga Zingana 27:11.

14. Bila mbi tufueti bela mu mayangi mu thangu nsamuni mosi kabeki mutu nio wunlonguka yandi Bibila mu terituare?

¹⁴ Tulenda ba mu mayangi mu thangu nsamuni mosi kabeki mutu nio wunlonguka yandi mu terituare. Nkengidi wudedikisidi kisalu kieto banga thombolo yi muana zimbala. Bawombo badi mu thombolo yi muana beni, mu bibuangu bi phila mu phila. Mu thangu muana beni kamonikini​—yisi ko kaka ti nio wummueni niandi fueti ba mu mayangi—​vayi baboso. Bobuawu phe kisalu kitula batu minlonguki, kidi kisalu ki kithuadi. Batu boso, mfunu badi mu samuna mu terituare yoso. Ayi batu boso beta ba mu zikhini, bawu mona mutu wumona niandi tona kutakana mu zikhutukunu.

LUTA TUDI MAYINDU MAKU MU LUZOLO LUAKU MU DIAMBU DI YEHOVA AYI MU DIAMBU DI BAN’DIAKU

15. Bue sadila Matayi 22:37-39 yilenda kutusadisila tuluta yangalala buwombo kisalu ki tsamununu? (Tala phe foto.)

¹⁵ Tulenda luta yangalala mu kisalu kitsamununu beto tula mayindu meto mu luzolo mu diambu di Yehova ayi mu diambu di ban’dieto. (Tanga Matayi 22:37-39.) Yindula phila yo Yehova kakadila mu zikhini mu thangu keta kutumona tulembo samuna ayi phila yoyi batu bakadila mu zikhini, mu thangu beta tona longuka Bibila. Yindula phe phulusu yo yilembo vingila batu bo beta wa tsangu’eto yo tueta kubanatina.​—Yow. 6:40; 1 Tim. 4:16.

16. Bue tulenda bakila mayangi mu kisalu ki tsamununu mu thangu batukembi tubika bue bima mu zinzo zieto? Vana kifuani.

¹⁶ Widi wukangama ku nzo’aku mu bila ki diambu dimosi? Enati buawu buididi, tula mayindu maku mu mo wulenda vanga muingi wumonisa  luzolo mu diambu di Yehova ayi kuidi ban’diaku. Mu thangu yi vunga ki COVID-19 Samuel ayi Dania baba bakangama ku nzo’awu. Mu thangu beni yina yi phasi, beba samunanga thangu ka thangu mu nzila yi telefoni, sonika minkanda, ayi longuka ayi batu mu nzila yi Zoom. Samuel wusamunina batu bo kadengana ku nzo m’buku, bo kabe kue bukungu mu kimbevo ki cancer. Tubidi ti: “Zinzomono zieta tuvongisa mu mayindu, mu kinsuni, ayi mu kipheve. Tufueti ba mu mayangi mu kisalu kio tueta sadila Yehova.” Mu zinzomono beni ziozi, Dania wubua kibu ayi wuyiza ba kaka wuleka va mbuka mu ngondi zitatu. Ayi wuyiza sadila kundu ki ba makoka mu zingondi zi sambanu. Tubidi ti: “Nditomba vanga mambu mu tadila phila yo ndibela. Ndinunga samunina mfelimi nio wuyiza kuthala, ayi samunina batu bo babe kuiza kutubikilanga bima ku nzo. Ndisamunina phe, nketo mosi wuba pfumu yi bilu kimosi ki nzo m’buku mu telefoni.” Mambu mo Samuel ayi Dania badengana, matula ti babika bue samuna buwombo, vayi batula mo banunga tula muingi babaka mayangi ma samunina.

17. Bue wulenda luta bakila mamboti mu mambu mo tume longuka mu disolo diadi?

¹⁷ Mambu mo tume longuka mu disolo diadi mama luta kutusadisa beto mana kumasadila. Kadika diambu didi banga kima kioki beta buela mu bidia muingi biba lueki. Mu thangu batudidi bima bioso bio bifueni mu diambu di lamba bidia, biawu bieta kuiza ba lueki. Beto mana sadila mambu moso momo tume longuka matu ba bafuana mu nunga mayindu mambimbi ayi mu baka mayangi mu kisalu ki tsamununu.