Ba mu mayangi mu thangu wulembo vingila Yehova mu mvibudulu
WETA vingila mu phuila yoso thangu yo Yehova kela botula mambu moso mambimbi ayi bo kela kitula bima bioso bimona? (Tso. 21:1-5) Mu kondo finda phaka, buawu weta tudila! Vayi dikala ko thangu zioso diambu dikembolo phasi vingila Yehova mu mvibudulu nduka nduka mu thangu tudengini zithatukusu. Diambu dilembo vingilanga vingilanga dieta bedisa ntima.—Zin. 13:12.
Vayi, Yehova katidi tumonisa mvibudulu kavanga mambu mu thangu yo kakubika. Bila mbi katididi ti tubutudila? Mbi bilenda tusadisa tuba mu zikhini mu thangu tulembo vingila?
BILA MBI YEHOVA KA KUTUTOMBILA TUMONISA KADULU KIVINGILA?
Bibila kitubidi ti: “Yehova wulembo vingila mu mvibudulu woso mu diambu di kalumonisina nlemvo. Yehova widi Nzambi yisonga. Mayangi kuidi bobo bakumvingilanga.” (Yes. 30:18) Ziphova beni zi Yesaya zitubulu kuidi Bayuda bo baba ntu ngolo. (Yes. 30:1) Vayi mu dikanda di bayuda mu ba phe na minkuikisi, ayi ziphova beni zibavana vuvu. Ziphova beni phe zilembo bue vani vuvu kuidi bisadi bikuikama bi Yehova lumbu kiaki.
Diawu tufueti vingila mu mvibudulu woso, bila Yehova phe wulembo vingila mu mvibudulu woso. Wutula thangu yo kela manisa mambu ma thangu yayi, ayi wulembo vingila lumbu ayi thangu beni yo katula yiduka. (Mat. 24:36) Mu thangu beni yina, yela monika bumboti mboti ti zipfundulu zi Diabulu kuidi Yehova ayi kuidi batu bo beta Kunsadila ti zidi zimayuya. Wela vonda Satana ayi baboso bobo badi kundambusu’andi, vayi beto wela “kutumonisina ntima kiadi.”
Kadiambu ko Yehova kalendi mana botula ko zithatukusu zieto, vayi wutuveni sikididi ti tulenda ba mu mayangi mu thangu tulembo vingila. Banga phila butubidi Yesaya, tulenda ba mu mayangi mu thangu tuidi phuila ayi vuvu ti mambu mamboti maba. (Yes. 30:18) a Bue tulenda bakila mayangi beni? Mambu maya malenda kutusadisa.
BUE BUBELA MU MAYANGI MU THANGU TULEMBO VINGILA
Luta tudi mayindu maku mu mambu mamboti. Ntinu Davidi wumona mambu mawombo mambimbi mu luzingu luandi loso. (Nku. 37:35) Vayi, wusonika ti: “Ba dio sui va ntuala Yehova ayi wuntadidila mu mvibudulu. Kadi fuemina batu bo balembo moni mamboti mu nzil’andi.” (Nku. 37:7) Niandi veka Davidi wubongila ndongi beni mu mfunu wombo mu phila kaluta tudila thalu’andi mu vuvu kiandi kiphulusu. Ayi wuluta bue tula mayindu mandi mu mambu moso mamboti mo Yehova kamvangila. (Nku. 40:5) Beto phe beto tula mayindu meto mu mambu moso mamboti ma luzingu lueto, mu kambu viokisa thangu mu yindula mambu moso mambimbi mo matuzungididi, mayi luta ba kadi phasi mu vingila Yehova.
Luta kivani mu zitisa Yehova. Banga Davidi niandi wusonika Minkunga 71, tubidi kuidi Yehova ti: “Ndiela tatamana kaka vingila; ndiela buela kuzitisanga thangu zioso.” (Nku. 71:14) Bue keba zitisilanga Yehova? Weba tubilanga Yehova kuidi batu bankaka ayi weba kunyimbidilanga maluimbu mankembo. (Nku. 71:16, 23) Banga Davidi, tulenda tatamana ba mu mayangi mu thangu tulembo vingila Yehova. Tueta kun’zitisa mu kisalu ki tsamununu, mu ziphova zio tueta tuba lumbu ka lumbu, ayi mu maluimbu ma tsambudulu. Khumbu yinkuiza bo wela yimbila luimbu lu Kipfumu, bila mbi mu kambu tula thalu nduka nduka mu tsangu yi lukindusu yo yidi mu luimbu beni?
Baka lukindusu kuidi bakhomba ziaku ba babakala ayi ba baketo. Mu thangu Davidi kadengana mambu ma ziphasi, wutuba kuidi Yehova ti: “Mu dizina diaku ndiela tula diana bila didi dimboti, ndiela kuzitisa va meso ma banlongo.” (Nku. 52:9) Beto phe tulenda baka lukindusu kuidi bakhomba zieto bakuikama, bika kaka mu zikhutukunu zieto ayi mu kisalu ki tsamununu, vayi ayi mu maluaku mankaka mo tulenda bela va kimosi.—Loma 1:11, 12.
Kindisa vuvu kiaku. Minkunga 62:5 yitubidi ti: “Ndieta vingila Nzambi mu tsi’ama ntima, diana diama kuidi niandi dim’banga.” Vuvu kikinda kinsundula vingila mambu mu sikididi kioso—Yidi diambu dimfunu mu ba vuvu kikinda, nduka nduka tsuka bo kayi yizidi ko banga phila yoyi tunyindudila. Tufueti kikinina ti zitsila zi Yehova ziela lungana buba yoso kuandi thangu yo tufueti vingidila. Tulenda kindisa sikididi kieto mu longuka phova yi Nzambi—mu kifuani longuka zimbikudulu zi Bibila ayi phila yoyi zilunginina, mu phila yoyi minsoniki mi Bibila mididi nguizani ayi mambu mo Yehova kalembo tumonisa mu diambu di niandi veka. (Nku. 1:2, 3) Tufueti tatamana phe ‘sambila mu nguizani ayi pheve santu’ muingi tusimbidila nguizani ayi Yehova mu thangu tulembo vingila lungana ku tsila yi luzingu lu mvu ka mvu.—Yuda 20, 21.
Banga Ntinu Davidi, ba sikididi ti Yehova weta mona baboso bo balembo Mvingila ayi weta kubamonisina luzolo Luandi lukuikama. (Nku. 33:18, 22) Tatamana vingila Yehova mu mvibudulu woso mu luta tula mayindu maku mu mambu mamboti mu luzingu luaku, mu kun’zitisa ayi mu baka lukindusu kuidi bakhomba zieto Bambangi zi Yehova ayi mu luta simbidila vuvu kiaku ki luvalu kikinda.
a Phova yithonono babangudi mu “tatamana vingila” yilenda sundula “ba phuila voti ba vuvu ti diambu dimosi dilungana,” yawu yimmonisa ti yisi’andi mbimbi ko mu vingila phulusu’eto.
