Mu thangu wulembo tangi Bibila, wulenda tomba bima bimfunu bi kipheve enati tudidi thombolo mu mambu mo madi nguizani na Bibila. Vayi mu phila mbi wulenda luta bakila mamboti?

Visa mboti mboti masolo ma Bibila. Mu kifuani, bakula na wusonika masonoko beni, kuidi nani kamasonika, ayi thangu mbi kasonikina mawu. Mu diambu di mbi kasonikina mambu beni, mambu mbi matuama salama ayi mambu mbi mayiza salama kumanima?

Tomba malongi mo wulenda baka mu tula thombolo yi mimvutu mu biuvu banga: ‘Batu bo baba mu disolo beni, bue bakimuena? Bikadulu mbi bamonisa? Bila mbi ndifueti sokudila bikadulu beni voti manga kubiyonzula?’

Sadila malongi mo wulembo longuka, bulendakana mu kisalu kitsamununu voti mu nguizani yo widi na batu bankaka. Ngeyo kubutudila, buawu mawu monisina nduenga yi Nzambi, banga phila Bibila kitubidi ti: “Woso mutu widi nduenga bika kakeba mambu mama.”​—Nku. 107:43.

• Dilongi: Tala phila yoyi mambu mo makala mu tini ki lukutukunu ki khati tsika sabala Bima bimfunu bidi mu phova yi Nzambi meta tusadisila mu yindudila phila yoyi tulenda sadila mo tunlonguka. Khumbu ziwombo mu tini beni mu kala na biuvu bio tulenda kiyuvula, mambu mo tulenda yindudila mu mawu ayi zifoto zio tulenda tadila.