THANGU zinkaka, minsoniki mi Bibila mieba vutukilanga ziphova bobuawu buididi bikuma bi ziphova beni. Tutadila mambu matatu mo meba tulanga ti minsoniki ba butudila:

Tsungi yo ziphova beni zisonimina. Mu Iseli dithama, nduka nduka batu bawombo basi ba ko masonoko mawu veka ma minsiku. Mu thangu beba kutakananga mu kinlongo, buawu beba wilanga nsiku wo batengi. (5 Mose 31:10-12) Bulendakana, kuba na mambu mawombo mo meba kubavuvulanga mu thangu yo beba landikininanga lutangulu lu nsiku mu kimathelama, mu zithangu ziwombo ayi va ntuala nkangu wu batu bawombo. (Neh. 8:2, 3, 7) Mu maluaku ma phila yoyi, vutukila ziphova zimfunu kuawu nginu kubasadisa bafika bambukila masonoko moyo ayi kumasadila. Vutukila ziphova zinkaka, nginu kuawu kubasadisa nduka nduka babambukila moyo mu mambu mawombo mo ba basudikisa, banga minsiku mi Nzambi ayi zinzengolo zitsambusulu.​—3 Mose 18:4-22; 5 Mose 5:1.

Phila yitsonokono. Nduka nduka 10% yi Bibila yisonimina mu ziphova zi minkunga​—buba phe minkanda banga Minkunga, Nkung’a Solomo ayi Miamaniongo. Thangu zinkaka, minkunga beni miba na ziphova zio zieba vutukilanga (Refrain) zio zieba sangusungu na miziki ayi zieba sadisanga batu bo banwa balunda mu mintima miawu ziphova beni. Mu kifuani, tala ziphova zio zidi mu Minkunga 115:9-11: “A nzo yi Iseli, tula diana mu Yehova​—Niandi nsadisi’awu ayi nkaku’awu. A Nzo yi Aloni, tula diana mu Yehova​—Niandi nsadisi’awu ayi nkaku’awu. Beno lueti kunkinzika, lutula diana mu Yehova​—Niandi nsadisi’awu ayi nkaku’awu.” Vutukila ziphova beni ziozi nginu kuawu kusadisa minyimbidi balunda mayindu beni momo mamboti mu mintima miawu.

Mfunu wuluta tubila mambu mo malutidi mfunu. Thangu zinkaka minsoniki mi Bibila beba vutukilanga ziphova zimfunu wombo. Mu kifuani, mu thangu Yehova kavana lutumu kuidi bana ba Iseli babika dia menga, wukamba Mose kavutukila bila beni khumbu ziwombo. Nzambi wuzola sudikisa ti luzingu lu nsuni mu menga lukala, yin’zola tuba ti, menga mawu meta monikisa luzingu. (3 Mose 17:11, 14) Mimvu mio milandakana kuntuala, mu thangu mimvuala ayi bakulutu ku Yelusalemi batubila mambu mo kamayangidikanga ko Nzambi, baluta bue tubila mfunu wu manga sadila menga.​—Mav. 15:20, 29.

Kadiambu ko Bibila kieta vutukila ziphova, yawu ko yinsundula ti Yehova tidi ti beto phe tubanga kifu kikue vutukilanga kadika khumbu ziphova zi Bibila mu thangu tunsambila. Mu kifuani, Yesu wutuba ti: “Mu thangu lunsambila, lubika vutukilanga mambu.” (Mat. 6:7) Ayi kumanima, wutukamba mambu mafueni mo madi nguizani ayi lukanu lu Nzambi mo tufueti lombanga mu lusambulu. (Mat. 6:9-13) Kadiambu ko tuvutukilanga ko ziphova beni mu zindombolo zieto, vayi tuidi na kiphuanza kisadilanga ziphova beni kadika khumbu.​—Mat. 7:7-11.

Mu bila kimfunu, Mbembo Nzambi yo yisonimina mu lulendo luandi yeta vutukila bikuma ayi ziphova zinkaka. Yidi wumosi mu ziphila ziozi Nlongi’eto wunneni keta tulongila phila yi bakila mamboti mu nzila yi ziphova beni.​—Yes. 48:17, 18.