1. Bila mbi tuididi mfunu wu lutuadusu lu Yehova? Vana kifuani.

 YINDULA theti enati zimbidi mu disaka dimosi. Weka mu vonza ki bibulu bingazi, ki minti midi zitsendi, ki bipfuekini, zingungi ayi ntoto wo widi matadi. Mawu ba na phutudulu matondo mawombo enati ntuadisi nio zebi mboti disaka beni wuneti mu nzila yo yikembolo bivonza ayi yo mayi tula wuba mu lutanunu! Nza yayi tuidi, yidi banga disaka beni. Muidi na bivonza biwombo bio bilenda vonda nguizani’eto ayi Yehova. Vayi tuidi na Ntuadisi wulunga​—Yehova. Nio weta tutatula mo muidi bivonza ayi weta tutuadisa mu nzila yo yilembo tunati​—mu luzingu lu mvu ka mvu mu nza yimona.

2. Bue Yehova keta tutuadisila?

² Bue Yehova keta tutuadisila? Phila yitheti yidi, mu nzila Phov’andi, Bibila. Vayi, weta sadila phe batu mu kututuadisa. Mu kifuani, weta sadila ‘‘nnanga wukuikama ayi wunduenga’’ mu kutuvana bidia bi kipheve bio bieta tusadisa tubaka zinzengolo zinduenga. (Mat. 24:45) Yehova phe weta sadila babakala bankaka bo badi maluaku mu kututuadisa. Mu kifuani, minkengi mizunga ayi bakulutu ba kimvuka beta tuvana lukindusu ayi zithumunu zio zieta tusadisa mu thangu ziphasi. Tulembo vutudila Yehova matondo mawombo mu lutuadusu lumboti lo kalembo tuvani mu bilumbu biabi bitsuka ayi biphasi bio tulembo zingila! Diawu dilembo tusadisa tutanina kikundi kieto na Yehova ayi tutatamana diatila mu nzila yi luzingu.

3. Mambu mbi tueka ntadila mu disolo diadi?

³ Vayi thangu zinkaka tulenda mona phasi landakana lutuadusu  lu Yehova, nduka nduka mu thangu luvanunu kuidi batu bakambu lunga. Bila mbi? Bila thangu zinkaka lutuadusu beni lulenda ba diambu dimosi dio dikadi tuyangidika. Voti thangu zinkaka tulenda banzila ti lutuadusu lo batuveni luisi ko lunduenga ayi tulenda bue banzila ti luisi ba ko kuidi Yehova. Nduka nduka mu thangu beni tufueti ba sikididi ti Yehova niandi weta tuadisa batu bandi ayi landakana lutuadusu luandi yidi thangu zioso mu diambu di mamboti meto. Mu kutusadisa tukindisa sikididi kieto, mu disolo diadi matutadila 1) phila Yehova katuadisila batu bandi mu thangu thama, 2) phila kalembo tutuadisila lumbu kiaki, ayi 3) phila tueta bakila mamboti mu landakana lutuadusu luandi.

PHILA YEHOVA KATUADISILA DIKANDA DI ISELI

4-5. Bue Yehova kamonisina ti wube sadilanga Mose mu tuadisa bana ba Iseli? (Tala photo yidi va baba.)

⁴ Yehova wusobula Mose muingi kabimisa bana ba Iseli ku Ngipiti. Ayi wuvana bana ba Iseli dimbu kio kibasadisa bamona ti Niandi wube batuadisa mu nzila Mose. Mu kifuani, wubavana dikunzi di dituti muingi dibatuadisa mu nzila ayi dikunzi di mbazu muingi dibavana kiezila va builu. (2 Mose 13:21) Mose wube landakananga dikunzi beni dio dibe kubanata ku M’bu Mbuaki. Vayi basi Ngipiti batona kubalandakana kumanima muingi bababuila. Diawu bana ba Iseli bayiza tona mona tsisi yingolo, babanzila ti basi Ngipiti beka bavonda. Ayi batuba ti Mose nzimbala katula bo kabanata ku M’bu Mbuaki. Vayi yisi ba ko nzimbala. Yehova wusadila Mose muingi kanatina batu bandi mu nzila beni. (2 Mose 14:2) Nzambi wubavukisa mu phila mosi yingitukulu.​—2 Mose 14:26-28.

⁵ Buba kumanima ma 40 ki mimvu, Mose wutatamana landakana dikunzi di dituti mu tuadisa batu ba Nzambi ku dikanga. a Mu thangu mosi, Yehova wutula dikunzi beni va mbata nzo Mose, va buangu kio bana ba Iseli boso balenda dimuena. (2 Mose 33:7, 9, 10) Va dikunzi beni Yehova kabe soludilanga ayi Mose, ayi kumanima wube kambanga batu mambu momo Yehova kabe kunkambanga. (Nku. 99:7) Bana ba Iseli baba na bidimbu biwombo bio bibe kubavananga sikididi ti Yehova wube sadilanga Mose mu kubatuadisa.

6. Bue bana ba Iseli beba muenanga lutuadusu lu Yehova? (4 Mose 14:2, 10, 11)

⁶ Diambu dikiadi, bana ba Iseli bawombo bamanga kuawu kikinina bidimbu bio bibe monisanga ti Yehova niandi wube sadilanga Mose banga mmonisi’andi. (Tanga 4 Mose 14:2, 10, 11.) Mu khumbu ziwombo bamangina kikinina kiyeko ki Mose. Diambu dikiadi, bana ba Iseli boso bo baba mu tsungi beni yina basi vanu ko nzila yikota ku Tsi Tsila.​—4 Mose 14:30.

7. Vana Bifuani bi batu bobo balandakana lutuadusu lu Yehova. (4 Mose 14:24) (Tala phe foto.)

⁷ Vayi ndambu bana ba Iseli bankaka balandakana lutuadusu lu Yehova. Mu kifuani, Yehova wumona ti: ‘Kalebi . . . wutatamana kunlandakana mu ntim’andi woso wumvimba.’ (Tanga 4 Mose 14:24.) Nzambi wufuta Kalebi, ayi wum’bikila nzila kasobula niandi veka buangu kio katia zingila ku Tsi Tsila. (Yos. 14:12-14) Bana ba Iseli bo bavinginina bo baba ntu ngolo babika kifuani kimboti mu diambu ditedi landakana lutuadusu lu Yehova. Mu thangu Yosua kasobulu muingi kavinginina Mose mu tuadisa bana ba Iseli, babe “kun’zitisanga kuwombo mu bilumbu bioso bi luzingu luandi.” (Yos. 4:14) Ayi diambu di mayangi,  Yehova wubasakumuna mu phila kabanatina mu tsi yo kabavanina tsila.​—Yos. 21:43, 44.

8. Sudikisa phila yoyi Yehova katuadisila batu bandi mu thangu yi mintinu. (Tala phe foto.)

⁸ Mimvu miwombo mivioka kumanima, Yehova wutona sobula bazuzi muingi batuadisa batu bandi. Kumanima, mu thangu yi mintinu, Yehova wube sobulanga mim’bikudi mu tuadisa batu bandi. Mintinu mio miba mikuikama mibe landakananga zindongi zi mim’bikudi beni. Mu kifuani, Ntinu Davidi mu kukikulula koso wukikinina tsembolo yo kabaka kuidi m’bikudi Natani. (2 Sa. 12:7, 13; 1 Lus. 17:3, 4) Ntinu Yosafati wulandakana lutuadusu lo m’bikudi Yahazieli kamvana ayi wukindisa Bayuda “batula minu kiawu kuidi mim’bikudi mi [Nzambi].” (2 Lus. 20:14, 15, 20) Mu thangu ziphasi, Ntinu Hizikia wutomba lusadusu kuidi m’bikudi Yesaya. (Yes. 37:1-6) Kadika khumbu yo mintinu mibe landakananga lutuadusu lu Yehova, beba bakanga lusakumunu luandi ayi dikanda di Nzambi dieba banga kutsi lutanunu. (2 Lus. 20:29, 30; 32:22) Buawu batu boso babe muenanga ti wube sadilanga mim’bikudi miandi mu diambu di tuadisa batu bandi. Vayi diambu dikiadi, mintinu miwombo ayi batu bankaka bamanga kuawu landakana lutuadusu lu mim’bikudi mi Yehova.​—Yel. 35:12-15.

PHILA YEHOVA KATUADISILA BAKRISTU BATHETI

9. Banani Yehova kasadila mu tuadisa bakristu mu tandu kitheti? (Tala phe foto.)

⁹ Mu tandu kitheti ki thangu’eto, Yehova wuyiza kubika bimvuka bi bukristu. Bue Yehova kavanina bakristu beni lutuadusu? Wusobula Yesu kaba ntuadisi wu kimvuka. (Efe. 5:23) Vayi Yesu kabe tuadisanga ko niandi veka kadika nlonguki mu phil’andi. Wusobula zimvuala ayi bakulutu ku Yelusalemi muingi batuadisa. (Mav. 15:1, 2) Bakulutu phe babe biekungu mu tuadisa bimvuka.​—1 Tes. 5:12; Tito 1:5.

10. a) Bue bakristu bawombo batandu kitheti bamuena lutuadusu lolo babaka? (Mavanga 15:30, 31) b) Bila mbi batu bankaka mu thangu thama bamuena phasi mu kikinina batu bobo Yehova kasadila mu kubatuadisa? (Tala ankadre “ Bila kioki batu bankaka bamanga kikinina bidimbu bi lutuadusu lu Yehova.”)

¹⁰ Bue bakristu ba tandu kitheti babe muenanga lutuadusu beni? Bawombo mu bawu babe monanga khini landakana zithumunu zio babe bakanga. Bukiedika, “bamona khini mu lukindusu” lo babaka. (Tanga Mavanga  15:30, 31.) Buabu, bue Yehova kalembo tuadisila batu bandi mu lumbu kiaki?

PHILA YEHOVA KETA TUTUADISILA LUMBU KIAKI

11. Vana kifuani kimosi kimmonisa phila Yehova kalembo tuadisila batu bobo balembo tutuadisa lumbu kiaki.

¹¹ Yehova wulembo tatamana tuadisa batu bandi lumbu kiaki, mu nzila Phov’andi ayi mu nzila Muan’andi Yesu, Pfumu kimvuka. Tuidi na bidimbu bio bimonisini ti Nzambi wutatamana sadila phe batu ba bilumbu bieto mu tuadisa? Ninga. Mu kifuani, tutadila mambu mo mavioka mu mimvu 1870. Khomba Charles Taze Russell ayi bo babe salanga yandi bayiza tona bakula ti mu mvu 1914 muawu muela tona mambu momo mafueti monikisa ndizulu yi Kipfumu ki Nzambi. (Da. 4:25, 26) Muingi babakula diambu beni, zimbikudulu zi Bibila zi basadisa. Bukiedika ti Yehova niandi wubatuadisa? Buawu buididi. Mambu momo mavioka mu mvu 1914 mamonisa ti Kifpumu ki Nzambi kitona yala. Buna Mvita Wutheti wu Nza yimvimba wutona, maladi maphila mu phila mambimbi mayiza totuka, zindikukunu zi ntoto ayi zinzala ziyiza monika. (Luka 21:10, 11) Bukiedika, Yehova wusadila bakristu bakuikama muingi basadisa bisadi biandi.

12-13. Mambu mbi bakhomba bobo baba biyeko batula mu diambu di tombula kisalu ki tsamununu mu thangu Mvita wummuadi wu Nza yi mvimba?

¹² Buabu, Tutadila mambu momo mavioka mu thangu Mvita Wutheti wu Nza yimvimba. Kumanima ma longuka Tsongolo 17:8, bakhomba bobo baba biyeko ku bilu kinneni ki Bambangi zi Yehova bamona ti mvita beni wisi kuiza nati ko Alimangedoni, vayi ndembama yimosi yifueti keta ba muingi yizibula nzila mo batu bakivana diaka kuwombo mu kisalu ki tsamununu. Buba ti, diba diambu diphasi mu thangu beni, bayiza zibula nzo nkanda yi Gileadi muingi bavana batu formasio mu kisalu ki misionere. Batinda bamisionere beni buba ti yiba thangu mvita. Mu buela, nnanga wukuikama wuyiza bue totula nzo kanda mosi mu diambu di mutu woso nio wum’baka kiyeko kilonga mu kimvuka kabaka formasio muingi kaba nsamuni wumboti ayi nlongi wumboti. b Buawu bobo bakubikila bisadi bi Nzambi mu kisalu ki tsamununu kio kieba kubavingila kuntuala.

 ¹³ Beto tala kumanima, bukiedika tulenda tuba kueto ti Yehova kaka wube tuadisanga dikanda diandi mu tsungi beni yina yiphasi. Tona mu Mvita Wummuadi wu Nza yimvimba, bisadi bi Yehova bi zitsi ziwombo bayiza baka ndembama ayi kiphuanza ki samuninanga batu. Kisalu kiyiza tona kuenda kuntuala.

14. Bila mbi tulenda tudila lutuadusu lo lubedi mu khubukulu yi Yehova ntima ayi lo lubedi kuidi bakulutu bobo kasobudi? (Tsongolo 2:1) (Tala phe foto.)

¹⁴ Lumbu kiaki, kimvuka kintuadisi kilembo tatamana landakana lutuadusu lu Yesu. Beta tia ti zithumunu zio bamvana kuidi bakhomba ziawu ziba mu lutuadusu lu Nzambi. Minkengi mi zunga ayi bakulutu bawu baka zithumunu beni, bawu phe beta zivana kuidi bimvuka. c Bakulutu bobo batulu mafuta mu kipheve badi va ‘koko ku lubakala ku Kristu’. (Tanga Tsongolo 2:1.) Bukiedika, bakulutu beni badi kuawu batu bakambu lunga ayi beta vanga zinzimbala, banga kuandi phila Mose ayi Yosua babe vunukinanga thangu zinkaka, buba phe zimvuala. (4 Mose 20:12; Yos. 9:14, 15; Loma 3:23) Buba buawu buididi, Kristu wulembo tatamana kaka tuadisa nnanga wukuikama ayi bakulutu, ayi widi kaka yawu “bilumbu bioso na tii mu tsukusulu yi nza.” (Mat. 28:20) Diawu, beto phe tulenda kueto tudila zindongi ziawu ntima, zio zieta vanu mu nzila yi batu bobo basobulu mu kututuadisa.

LANDAKANA ZITHUMUNU ZI YEHOVA KUETA VANA MAMBOTI

15-16. Dilongi mbi tubeki mu masolo ma batu bobo balandakana lutuadusu lu Yehova?

¹⁵ Thangu tueta tatamana landakana zithumunu zi Yehova, tueta baka mamboti. Mu kifuani, Andy ayi Robyn balandakana lukindusu lukondo tomba mambu manneni. (Ebe. 13:5) Kumanina bayiza tomba vana mioko mu bisalu bithungulu zinzo zi Kifpumu. Robyn tubidi ti: “Tukala mu zinzo zifioti, zinkaka kadi kikuku kilambila mu khati. Ayi tutekisa bima binkaka banga bio ndieba sadilanga mu kanga zifoto, kisalu kio ndieba tianga kuwombo. Ndithumbu dila. Vayi banga Sala nketo Abalahami, ndibaka lukanu lutala kaka kuntuala bika kumanima.” (Ebe. 11:15) Mamboti mbi babaka? Robyn tubidi ti: “Khini ziwombo ndidi mu zaba ti tulembo vani Yehova maluaku meto moso. Thangu tueta kuenda mu misio mi kisalu ki Nzambi, mamboti momo tueta kue mona meta tumonisa mu mayindu phila luzingu luela bela ku Paladiso.” Andy phe wudikikinini ayi tubidi ti:  “Tuidi mu zikhini ziwombo bila tuveni luzingu lueto loso muingi tubuela Kipfumu ki Nzambi mioko.”

¹⁶ Mu mambu mbi diaka tulenda bakila mamboti ti tutatimini landakana zithumunu zi Yehova? Bo kathumbu manisa nzo nkanda, Marcia wubaka lukanu lu kukivana mu kisalu ki Yehova. (Mat. 6:33; Loma 12:11) Tubidi ti: “Bedi kakhamba ndienda ku longa ku iniversite mu mvu minya, ofele. Vayi minu, nditia landakana zikhanu zikipheve. Kumanima, ndiyiza sobula longuka kisalu ki mioko kioki kifueti kutsadisa ndisala mboti kisalu ki tsamununu. Bukiedika, luba lukanu lumboti. Lumbu kiaki, ndidi mu zikhini zisala kisalu ki n’zibudi nzila wu thangu ka thangu, ayi lukanu beni lume kuphana diluaku dibuela mioko ku beteli ayi maluaku mankaka nkaka mamboti.”

17. Mamboti mbi mankaka tueta baka thangu tueta tatamana landakana lutuadusu lu Yehova? (Yesaya 48:17, 18)

¹⁷ Thangu zinkaka, tueta baka zindongi zieta tutanina mu ntambu wu nzolo mbongo ayi mu mambu momo malenda tutula ti tuvuezila minsiku mi Nzambi. Ayi tueta baka lusakumunu bila tulembo landakana zindongi zio Yehova keta tuvana. Tueta tanina kansasa kivedila ayi kieta tuvengumuna mu mambu momo malenda tula ti tutatakana phamba phamba. (1 Tim. 6:9, 10) Mu mamoso momo, tulenda landakana mu ntima woso tsambudulu yi Yehova yoyi yeta kutuvana zikhini, ndembama ayi luvovomo lu ntima.​—Tanga Yesaya 48:17, 18.

18. Bila mbi bakidi nzengolo yi tatamana landakana lutuadusu lu Yehova?

¹⁸ Bukiedika, Yehova wela tatamana kaka sadila batu mu tuadisa batu bandi mu thangu ziphasi zinneni na tii ku mbiadulu yi mili ki mimvu. (Nku. 45:16) Tuela tatamana landakana lutuadusu beni buba ti ditombidi tuketa bika mambu mo tueta zola? Mvutu’eto mawu zabakana mu phila yo tulembo tumimina mu lumbu kiaki. Diawu, tutatamana landakana lutuadusu lu Yehova, ayi lolo katudidi mu nzila batu bobo kasobula muingi batutuadisa. (Yes. 32:1, 2; Ebe. 13:17) Ayi banga kuandi phila tueta tudila, bibila biwombo bidi yeto bitudila Yehova ntuadisi’eto ntima, nioni weta tutanina mu bivonza bi kipheve ayi tutuadisa muingi tubaka luzingu lu mvu ka mvu mu nza yimona.