Kuma kitheti kio batedidi “saleti” (char) mu Bibila ki Traduction du monde nouveau kilenda sundula woso kuandi ntindu wu ditoma. (Mav. 8:28, 29, 38) Vayi, yimonika ti ditoma di muisi Etiopi diluta tola viokila zisaleti zi bamasodi voti zio zi minnakuni. Tutadila bibila bio bilembo monisa diambu beni.

Muisi Etiopi beni wuba pfumu wunneni nio wutula vuayaje yinila. Wuba “muisi Etiopi nio weba lundanga zimbongo ayi kiuka kioso ki ntinu wunketo wu Etiopi.” (Mav. 8:27) Terituare yi Soudan ayi yi Sudi yi Egypte yi thangu yayi yiba mu khati Etiopi yithama. Yilenda ba ti muisi Etiopi beni kasi sadila ko ditoma dimosi mu vuayaje beni, vayi wuba ayi minfuna miandi. Mu tadila matoma mo babe sadilanga mu tandu kitheti ki T.E. kuba ayi matoma momo mafuku ku yilu mo maba na makalu maya. Noti yimosi yi nkanda wu Mavanga yitubidi ti: “Matoma ma phila yoyi malenda nata minfuna miwombo, malenda tula ti vuayaje yiba yimboti ayi malenda vana diaka diluaku ditula vuayaje yi nila,” butubidi buku yi Acts​—An Exegetical Commentary.

Muisi Etiopi beni tanga keba tanga mu thangu Filipi kafikama vo kaba. Bibila kitubidi ti: “Filipi wuzawula; wuwa [muisi Etiopi] wulembo tangi nkanda wu m’bikudi Yesaya.” (Mav. 8:30) Matoma ma zivuayaje beni basi mavanga ko mu diambu di matula zivuayaje nsualu nsualu. Phila yi ndiatulu beni yi malembi yisa vana ko kaka nzila ti muisi Etiopi katanga vayi yisadisa phe Filipi mu diambu di kabakidila ditoma beni mu malu.

Muisi Etiopi “wuleba Filipi kakuma mu saleti ayi wunleba kavuanda va ndambu’andi.” (Mav. 8:31) Mu khati saleti yi nsualu wu phila mosi, minnati babe telemanga. Mu ditoma di zivuayaje di muisi Etiopi, mu khati mu ba ayi bibuangu mu diambu di muisi Etiopi ayi Filipi bavuandila.

Diawu, mu nguizani ayi mambu mo batubidi mu nkanda wu Mavanga kapu 8 ayi bidimbu bi istuare biobi bidi yeto mu bilumbu biabi, mu minkanda mieto tueta monisa muisi Etiopi widi mu khati ditoma dio dilutidi tola viokila saleti yi bamasodi voti yo yi minnakuni.