1. Mu thangu tueta yindula Yehova mbi bieta tukuizila mu mayindu?

 WUME teka yindula bue Yehova kakadila? Mu thangu weta kunkamba mambu mu nzila yi lusambulu, mbi bieta kukuizila mu mayindu? Kadiambu ko Yehova kamonikanga ko, Bibila kieta kuntubila mu ziphila ziwombo. Yehova tedolo “thangu ayi nkaku” ayi “mbazu yo yeta zinisa.” (Nku. 84:11; Ebe. 12:29) Mbonokono’andi bayisudikisidi banga ditadi di safili, sengo kidi mbazu yingolo, ayi mbumba luangu yidi kiezila kingolo. (Yeh. 1:26-28) Mambu mankaka mo batubidi mu kutumonisa phila yo Yehova kadidi, malenda kutuyitukisa voti kutumonisa tsisi.

2. Mbi bilenda kakidila bankaka baba pfika pfika yi Yehova?

² Bo katumonanga ko Yehova, tulenda mona phasi mu kikinina ti weta tuzola. Bankaka beta banzila ti Yehova kalendi ko kubazola mu bila ki mambu mo badengana mu luzingu. Bulendakana basi teka baka ko disa dio dibazola kuwombo. Yehova weta sudika zingindu beni ziozi ayi phila yo zieta kututudila. Mu kutusadisa, wutumonisini bumutu buandi bumboti mu nzila yi Phov’andi Bibila.

3. Bila mbi tufueti tadila bumboti mboti luzolo lu Yehova?

³ Kuma kio kieta sundula Yehova bumboti mboti kidi luzolo. (1 Yow. 4:8) Luzolo luawu tsundu’andi. Lueta monika mu mambu moso mo keta vanga. Luzolo lu Nzambi lueta luta monika ayi ngolo lukala ayi weta kulumonisa buba kuidi batu bo ban’zolanga ko. (Mat. 5:44, 45) Mu disolo diadi, matuluta tubila Yehova ayi luzolo luandi. Bo buawu tukuiza luti longukila zaba Nzambi’eto, buawu matuluta kun’zodila.

 YEHOVA WETA TUZOLA KUWOMBO

4. Luzolo lu buphombo lu Yehova mbi lueta kutula? (Tala phe foto.)

⁴ ‘Yehova luzolo luwombo kadi luntima.’ (Zaki 5:11) Mu Bibila, Yehova wukidedikisidi banga ngudi didi luzolo luwombo. (Yes. 66:12, 13) Yindula theti ngudi nio weta kipa muan’andi mu luzolo luwombo. Weta kunnanguna mu buphombo boso, kunkambila mambu mu zanti ayi mu mbembo yi vumbama. Mu thangu kalembo didi voti bo kalembo moni phasi, ngudi weta tomba zaba mbi muana katidi. Mu thangu tulembo moni phasi, tulenda tula ntima mu luzolo lu Yehova. Nsoniki wu Minkunga wusonika ti: “Mu thangu mayindu maba mawombo mu minu, mbombolo’aku yinata khini mu muel’ama.”​—Nku. 94:19.

5. Luzolo lukuikama lu Yehova mbi lunsundula kuidi ngeyo?

⁵ Yehova widi na luzolo lukuikama. (Nku. 103:8) Katuyekulanga ko mu thangu tuvengi diambu dimosi dimbimbi. Dikanda di Iseli diniongisa Yehova mu zikhumbu ziwombo; vayi, wumonisa luzolo lukuikama kuidi dikanda diandi dio dibalula ntima mu kubakamba ziphova ziazi: “Widi wuthalu va meso mama, wuvanu luzitu, ayi ndizola.” (Yes. 43:4, 5) Luzolo lu Yehova luisi baluka ko. Tulenda kulutudila diana thangu ka thangu. Buba ti tuvengi masumu manneni, Yehova katuyekulanga ko. Mu thangu tubaludi ntima ayi tuvutukidi kuidi Yehova, tuela mona ti luzolo luandi mu diambu dieto luisi baluka ko. Wutuveni tsila ti ‘wela kutunlemvukila bukiedika.’ (Yes. 55:7) Bibila kisudikisidi ti nlemvo beni weta nata “zithangu zivundila. . . . zio zibedi kuidi niandi veka Yehova.”​—Mav. 3:19.

6. Mbi Zekalia 2:8 yilenda kutulonga mu diambu di Yehova?

⁶ Tanga Zekalia 2:8. Bo keta tuzola kuwombo, Yehova weta tula thalu mu ziphuila zieto ayi phuila yingolo kakala yi kututanina. Weta mona phasi mu thangu batuvangidi mambu mambimbi. Diawu, tulenda sambila ti: “Wukheba banga ngengele (prunelle) yi dieso diaku.” (Nku. 17:8) Dieso kidi tini ki nitu kimfunu kuwombo. Mu thangu Yehova keta kutudedikisa banga ngengele yi dieso diandi, yidi banga niandi wukutukamba ti, ‘woso mutu wukuluvangila mambu mambimbi, minu phe kavangidi mambu beni.’

7. Bila mbi tufueti yedisila sikididi kieto mu luzolo lu Yehova?

 ⁷ Yehova tidi tuba sikididi ti weta zola wumosi mosi mu beto. Vayi zebi ti mu bila ki mambu mo tudengana mu thama, tulenda kiyuvula keni kalenda tuzola. Voti tulenda dengana mambu mo malenda tula ti sikididi kieto mu luzolo lu Yehova kiba mu thotolo. Diambu mbi diela kindisa sikididi kieto? Tulonguka phila yoyi Yehova keta monisina luzolo kuidi Yesu, kuidi bakristu batulu mafuta, ayi kuidi beto boso.

BUE YEHOVA KETA MONISINA LUZOLO LUANDI

8. Bila mbi Yesu kabela sikididi mu luzolo lu Siandi?

⁸ Mu mimvu miwombo mio kamiedi tangu ko, Yehova ayi muan’andi bayedisa nguizani yi luzolo ayi yi kiedika. Nguizani yi Yehova ayi yi muan’andi yawu yitheti mu luyalanganu loso. Yehova wumonisa bumboti mboti luzolo luandi kuidi Yesu, banga phila tueta ditangila mu Matayi 17:5. Nginu Yehova wusukila kuandi mu tuba ti, ‘Niandi niani khikinini.’ Vayi kazola ti tuzaba bue keta zodila Yesu, diawu kantedila “niandi niani, Muan’ama wu luzolo.” Yehova weba monanga Yesu khini nduka nduka mu phila yo kamvanina luzingu luandi. (Efe. 1:7) Ayi Yesu kasi ba ko ziduti mu phila yoyi Siandi kabe kummuenanga. Luzolo lu Yehova luba lukiedika kuidi niandi ayi diawu dibetulanga kalumona kuwombo. Ayi wumonisa khumbu ziwombo ti sikididi kaba ti Siandi weta kun’zola.​—Yow. 3:35; 10:17; 17:24.

9. Thubulu mbi yisudikisidi luzolo lu Yehova kuidi bakristu bo batulu mafuta? Sudikisa. (Loma 5:5)

⁹ Yehova weta bue monisa diaka luzolo luandi kuidi bakristu bo batulu mafuta. (Tanga Loma 5:5.) Tala thubulu yo basadidi “wudukula.” Buku mosi yisudikisidi kuma beni kioki banga “nlangu badukudi mu beto.” Yo yidi mbonosono yingolo yo yilembo monisa luzolo luwombo lu Yehova kadi kuidi bakristu bo batulu mafuta mu kipheve! Bakristu bo batulu mafuta mu kipheve bazebi ti “Nzambi weta kubazola.” (Yuda 1) Thumu Polo wumonisa mabanza mandi mu thangu kasonika ti: “Lutala phila luzolo lutuzodila Tata, muingi tutedolo bana ba Nzambi!” (1 Yow. 3:1) Luzolo lu Yehova lusukidi kaka kuidi bakristu bo batulu mafuta? Nana, Yehova wumonisa luzolo luandi kuidi beto boso.

10. Diambu mbi dilutidi dimfunu mu kikinina luzolo lu Yehova kuidi ngeyo?

¹⁰ Diambu mbi dinneni dintula tukikinina ti Yehova weta kutuzola? Khudulu​—diambu dilutidi dingitukulu di luzolo mu luyalanganu! (Yow. 3:16; Loma 5:8) Yehova wuvana Muan’andi wu luzolo, ayi wukikinina kafua mu diambu di batu boso muingi babaka bulemvukulu masumu ayi babaka bubela bakundi bandi. (1 Yow. 4:10) Bo buawu bo tunluta yindudila mu phinda thalu yoyi Yehova ayi Yesu bafuta, buawu matuvisila bumboti mboti phila mbi keta tuzodila. (Nga. 2:20) Khudulu yisi futu ko mu diambu di futa pholo banga mu kontra. Didi dikaba di luzolo. Yehova wuvana nkayilu wo wuluta mfunu kuidi niandi: Yesu. Yehova wukikinina Muan’andi Yesu kamona phasi ayi kafua mu bila kieto.

11. Mbi Yelemia 31:3 yitulongidi?

¹¹ Banga kuandi phila tume muena, Yehova kasuekanga ko phila yo keta kimuena, vayi weta monisa luzolo luandi mu zanti yoso. (Tanga Yelemia 31:3.) Yehova wutubenda kuidi niandi bila weta kutuzola. (Dedikisa 5 Mose 7:7, 8.) Kuisi ko dio dilenda kutuvambisa mu luzolo beni. (Loma 8:38, 39) Luzolo beni mbi lueta kutula? Tanga Minkunga 23, ayi mona phila yo luzolo ayi zanti yi Yehova bimonikina kuidi Davidi ayi phila yo bilenda tudila kuidi beto.

LUZOLO LU YEHOVA MBI LUETA KUTULA?

12. Bue wulenda sudikisila mu bukhufi Minkunga 23?

¹² Tanga Minkunga 23:1-6. Minkunga 23 widi nkunga wowo weta monisa sikididi mu luzolo  ayi zanti yi Yehova. Davidi, nsoniki wu nkunga beni, wusudikisa nguizani yo yiba mu niandi ayi Mvungi’andi, Yehova. Bo kabika ti Yehova kantuadisa, Davidi wube kimonanga mu lutanunu ayi mu niandi kabe tulanga diana diandi dioso. Davidi wuzaba ti luzolo lu Yehova malutatamana ba mu niandi bilumbu bioso bi luzingu luandi. Mbi bitula ti kaba sikididi kiwombo?

13. Bila mbi Davidi kabela sikididi mu khipulu yi Yehova?

¹³ “Ndiela sie kambu kadi kiasa ko.” Davidi wumona ti wube kipungu mu phila yimboti kuidi Yehova bila niandi wube dukisanga ziphuila ziandi zioso. Davidi wu bue yangalala phe kikundi voti ayi phila yo Yehova kabe kumvangilanga mamboti. Diawu kabela sikididi ti moso kuandi mo kalenda dengana mu bilumbu binkuiza, Yehova wela tatamana kaka kunkipa ayi dukisa ziphuila ziandi. Sikididi ki Davidi mu luzolo lu Yehova kiba kingolo buba zithatukusu ziozi kabe dengananga, wuba mu zikhini ayi wube monisanga phutudulu matondo mu luzolo lu Yehova.​—Nku. 16:11.

14. Bue Yehova kalenda kutukipila mu luzolo loso?

¹⁴ Yehova weta kutukipa mu luzolo loso, nduka nduka mu thangu tudengini mambu maphasi mu luzingu lueto. Claire, a nio wusala ku Beteli viokila 20 ki mimvu, wukimona ti wulebakana mu thangu dikanda diandi didengana ziphasi ziwombo. Siandi wuyiza bela kimbevo ki tansio yo yeta buisa mutu va tsi, khomb’andi mosi wunketo wuyiza bimusu mu kimvuka, ayi mua kompani yi dikanda diawu yiyiza bua ayi bayiza zimbisa nzo’awu. Bue Yehova kabamonisina luzolo luandi? Claire tubidi ti: “Yehova wukenga  ti dikanda diama dibaka bubakila bibioso biobi badi phuila mu kadika lumbu. Khumbu ziwombo, Yehova weba kutuvangilanga mambu mo katuisi yindula ko! Ndieta yindula kuwombo thangu yoyi ndimona luzolo lu Yehova, ayi ndieta yiyangalala. Minu yindula mambu beni momo meta kutsadisa nditatamana ba wukuikama kadiambu ko zinzomono.”

15. Bila mbi Davidi kakitila ntima? (Tala phe foto.)

¹⁵ “Weta kuphundisa.”  Thangu zinkaka, Davidi weba kimonanga wulebakana mu bila ki mambu momo ayi zinzomono zioso zio kadengana. (Nku. 18:4-6) Vayi luzolo lukuikama ayi phila yoyi Yehova kabe kunkipilanga binkitisa ntima. Yehova wunata nkundi’andi nio wulebakana mu “bibuangu biobi biwedi biti bilangu” ayi “wunnata mu bibuangu bivundila bio bidi maza mawombo.” Diawu ditula ti Davidi kabue baka zingolo ziandi ayi katatamana.​—Nku. 18:28-32.

16. Bue luzolo lu Yehova lueta kukitisila ntima?

¹⁶ Bobuawu phe lumbu kiphila yayi, “mu bila ki luzolo lu Yehova lukuikama tukadi sukila” vantuala zinzomono ayi mambu maphasi ma luzingu. (Mia. 3:22; Kol. 1:11) Tutadila kifuani ki Rachel. Wuyiza mona phasi ziwombo mu thangu nnuni’andi kayiza kunlembo ayi kayiza lembo bue sadila Yehova mu thangu yi COVID-19. Mambu mbi Yehova kamvangila? Tubidi ti: “Yehova wutula ndimona ti weta kunzola. Wutula ti ndiba va khati tsika yi bakundi bo babe viokisanga thangu ayi minu, baba kundatinanga bidia, kuthindilanga zi mesaje ayi masonoko mo ndieba yindudilanga mu buphinda, seva yama, ayi kumbambula moyo thangu ka thangu ti Yehova maka dukisa ziphuila ziama. Ndieta luta vutudila Yehova matondo mu kuphana dikanda dinneni di luzolo.”

17. Bila mbi Davidi “kasi muena ko tsisi yi mambu”?

¹⁷ “Kadi diambu dimbimbi ndilenda muena tsisi, bila ngeyo widi yama.” Khumbu ziwombo luzingu lu Davidi luba mu vonza, bila wuba na bambeni bawombo bo baba ngolo. Vayi, luzolo lu Yehova lutula kakimona ti widi mu lutanunu. Davidi wumona ti Yehova wuba yandi mu mambu moso mo kadengana ayi diawu dikitisa ntim’andi. Diawu kayimbidila ti: “[Yehova] wukhula mu zitsisi ziama zioso.” (Nku. 34:4) Zitsisi zi Davidi ziba zikiedika; vayi luzolo lu Yehova luluta ngolo viokila zitsisi ziandi.

18. Mu phila mbi ba sikididi mu luzolo lu Yehova kueta tukindisila tubika mona tsisi?

¹⁸ Bue tudila luzolo lu Yehova ntima kueta tukindisila mu thangu tulembo dengana mambu matsisi? N’zibudi nzila mosi widi mu dizina di Susi sudikisidi phila yoyi niandi ayi  nnuni’andi bakimuena mu thangu muan’awu kakivonda: “Mambu ma phasi ma kinzimbukila, phasi ziwombo meta vanga ayi malenda tula ti mutu kakimona ti mu vonza kadi ayi kasi ko lusadusu. Vayi luzolo lungolo lu Yehova lutula tukimona mu lutanunu.” Rachel, nio tutekidi tubilanga, tubidi diaka ti: “Builu bumosi mu thangu ndibe mona phasi ziwombo mu ntima bo ndibe kitatikisa ayi ndibe mona tsisi, ndididila Yehova mu mbembo yingolo. Mu thangu beni yina wutula ti ntim’ama wukita, banga mama phila keta bombila muana, ayi ndiyiza baka tulu. Kadi khumbu ndiela zimbakana lumbu beni kina.” Nkulutu mosi widi mu dizina di Tasos wuviokisa mimvu miya kubuloko mu bila kamangina kotila mu kisalu ki soda. Bue kamuena luzolo lu Yehova ayi phila yo kamvangila mambu? Tubidi ti: “Yehova wukhipa ayi wudukisa ziphuila ziama mu phila mosi yifuana. Diawu dibuela sikididi kiama ti ndilenda kuntudila thangu zioso ntima. Mu buela, mu lusadusu lu pheve santu’andi, Yehova wuphana zikhini kadiambu ko ndiba mu buangu ki ziphasi. Diawu diphana sikididi ti bo ndilembo sadi kithuadi ayi niandi, mandi luta baka mamboti ma buphombo buandi. Buawu ndiyiza tonina sadila kisalu kin’zibudi nzila mu nloko.”

BA PFIKA PFIKA KUIDI NZAMBI’AKU YI BUPHOMBO

19. a) Bo tuzebi ti Yehova weta kutuzola, bue yeta tudila diambu mu mambu mo tueta tuba mu lusambulu lueto? b) Tsudukusulu mbi yi luzolo lu Yehova yisimbidi ntim’aku? (Tala ankadre “ Ziphova ziozi zieta tusadisa tumona luzolo lu nianguka lu Yehova.”)

¹⁹ Bifuani bioso bio tume tubila bilembo monisa ti Yehova, “Nzambi yi luzolo,” widi yeto! (2 Ko. 13:11) Weta yangalala wumosi mosi mu beto. Dituveni sikididi ti tuidi ‘bazungudulu mu luzolo luandi lukuikama.’ (Nku. 32:10) Bobuawu tunluta yindudila mu buphinda phila yo keta tumonisina luzolo luandi, buawu lueta kuiza monikina ayi tueta muena ti tuidi pfika pfika ayi niandi. Tulenda solula yandi mu kondo mona tsisi ayi kunkamba ti phuila yi luzolo luandi tuidi. Tunkamba mambu meto moso mo makututatikisa, tuba sikididi ti wulembo tusudika ayi phuila kadi yikutusadisa.​—Nku. 145:18, 19.

20. Bue luzolo lu Yehova lueta tufikikila kuidi niandi?

²⁰ Banga kuandi phila tueta tombila fikimina vama vo vadi mbazu mu lumbu kio kidi kiozi, buawu phe tueta fikimina mu luzolo lu nianguka lu Yehova. Kadiambu ko luzolu lu Yehova luidi ngolo, buphombo phe lukala. Diawu, kikinina luzolo lunianguka lu Yehova mu luzingu luaku. Ayi bika beto boso tukikinina luzolo luandi mu tuba ti: “Ndieta zola Yehova”!​—Nku. 116:1.