DISOLO DI NDONGOKOLO 3
NKUNGA 124 Tatamana monisa kuikama
Yehova wela kusadisa mu thangu ziphasi
“Vumi ki [Yehova] kiela kala muna.”—YES. 33:6.
MAMBU MO MADI MU KHATI DISOLO DIADI
Momo tufueti tula muingi Yehova katusadisa mu thangu ziphasi.
1-2. Mambu mbi maphasi bisadi bikuikama bi Yehova balenda dengana?
MAMBU ma ziphasi malenda balula luzingu lueto. Mu kifuani, khomba mosi batedidi Luis a nioni bayiza bakula kimbevo ki kancer, munganga wuyiza kunkamba ti: bilumbu bifioti kuandi bisiedi muingi mo wufua. Monika ayi nnuni’andi bakivana kuwombo mu mambu ma kipheve. Vayi, lumbu kimosi Monika wuyiza bakula ti mimvu miwombo mivioka, nnuni’andi nio wuba phe nkulutu mu kimvuka, kasie bue diatila kuandi ko mu nzingulu yi busonga. Olivia tubidi: khomba mosi wunketo wukambu kuela, wutina vuka kinneni thangu kawa ti kieka nduka fikama ko bakala. Mu thangu kavutuka, wuyiza bata nzo’andi yitiolumuka mu vuka beni. Mu mua thangu fifioti kuandi, luzingu lu batu beni bobo luyiza baluka. Wulenda kukitula va buangu kiawu? Wuteka dengana diambu dio ditumu balula mambu ma luzingu luaku?
2 Beto Bambangi zi Yehova bakuikama, tueta builukulu phe zinzomono, bimbevo ayi mambu mamoso momo meta builukulu batu bankaka. Yintomba kibakala mu diambu di tubaka bunungina khandukulu, voti zinzomono, ziozi zieta ba kuidi batu bobo kaba tianga ko bisadi bi Nzambi. Buba ti Yehova katutaninanga ko mu mambu ma phila yoyi momo meta kutubuilukila, wutuveni tsila ti lenda kutusadisa. (Yes. 41:10) Mu lusadusu luandi tulenda tanina zikhini zieto, baka zinzengolo zimboti ayi tatamana ba bakuikama mu mambu ma ziphasi mo tulenda dengana. Mu disolo diadi tueka ntadila mambu maya momo Yehova kalenda tusadisila bo tudengini ziphasi zingolo mu luzingu lueto. Matu tadila diaka mbi tulenda tula mosi tubaka mamboti mu lusadusu lolo kalembo tuvani.
YEHOVA MAKA LUTANINA
3. Beto dengana mambu maphasi diambu mbi tulenda mona phasi mu vanga?
3 Mambu maphasi. Mu thangu tudengini mambu maphasi, tulenda mona phasi mu yindula ayi baka zingengolo zimboti. Bila mbi? Ntim’eto wulenda wala mambu mawombo maphasi. Mayindu meto malenda mona ti ziphasi zieto zime viokakana tezo. Tulenda kimona ti banga beto tulembo diati kutombi mu kambu bue zaba nzila mbi yikuendila. Tutadila phila yo bakhomba buadi ba baketo bamuena mu thangu badengana zinzomono beni. Olivia tubidi ti: “Mu thangu ndimona ti vuka kibuisidi nzo’ama, ndikimona ti nzimbidi ayi tsukidi.” Monika tubidi mu mayuya momo mamonisa nnuni’andi ti: “Ndinionga kuwombo ayi ndimona phasi ziwombo mu ntima. Ndisi bue zaba ko phila yivangila mambu mu phila yimboti. Mambu mo ndimona ti malendi ko kumbuilukila mawu ndibuilukulu.” Tsila mbi Yehova kaveni mu kutusadisa?
4. Mu tadila Filipi 4:6, 7, tsila mbi Yehova katuveni?
4 Mambu mo Yehova kalembo vangi. Wutuveni tsila yi kutuvana diambu diodi Bibila kitedidi “ndembama yi Nzambi.” (Tanga Filipi 4:6, 7.) Ndembama beni yinsundula luvovomo lu ntima lolo lueta ba mu nguizani’eto ayi Yehova. “Ndembama beni yoyi yiviokidi diela dioso” yidi yimboti viokila phila yoyi tulenda yindudila. Dime teka kuyitukisa mu baka ndembama yi phila yina kumanima ma sambila Yehova? Mu tatamana koso, ngeyo kimona phila beni yoyi yawu yinsundula ti mebaka “ndembama yi Nzambi.”
5. Bue ndembama yi Nzambi yeta kebila mayindu meto ayi mintima mieto?
5 Kio kiawu kapu beni kitubidi ti ndembama yi Nzambi “yela keba” voti tanina “mintima mieno ayi mayindu meno.” Kuma “keba,” yiba thubulu yi bamasodi, yo yeba sadulungu mu diambu di tubila bamasodi bobo beba sunganga mbanza ayi kuyitanina mu diambu di zimbeni. Batu bobo baba mu mbanza yo yidi lutanunu beba lekanga mu ndembama bila bazaba ti bamasodi badi mu mielo. Phila mosi phe mu thangu ndembama yi Nzambi yeta tanina mintima ayi mayindu meto, tueta ba mu ndembama bila tuzebi ti tuisiko mu vonza. (Nku. 4:8) Banga mu diambu dio didengana Hana, buba ti mambu meto makadi baluka mu nsualu nsualu, tulenda kueto ba mu ndembama. (1 Sa. 1:16-18) Mu thangu tuidi mu ndembama, buawu tueta luta bakila tsuakula yi yindula mu phila yimboti ayi baka zinzengolo zinduenga.
Sambila tii wukuiza moni ndembama yi Nzambi yo yeta keba mayindu maku ayi ntim’aku (Tala paragrafe 4-6)
6. Mbi tulenda tula muingi tubaka mamboti ma ndembama yi Nzambi? (Tala phe foto.)
6 Mambu mo tufueti vanga. Mu thangu tulembo kitatikisa mu mayindu, tulomba Yehova katukeba. Mu phila mbi? Sambila tii wukuiza baki ndembama yi Nzambi. (Luka 11:9; 1 Tes. 5:17) Luis, nio tutubidingi, sudikisidi phila yoyi niandi ayi nketo’andi Ana baba bakubama mu monisa mvibudulu thangu bayiza zaba ti mua ndambu zingondi kuandi zisiedi yandi zi zingila. Wutuba ti: “Mu thangu dengini mambu ma phila yoyi, phasi yikala mu baka zinzengolo mu diambu ditedi kipa buvini bunitu ayi mu mambu mankaka. Lusambulu luba diambu dimosi dimfunu wombo ditunatina ndembama mu thangu beni yina.” Luis ayi nketo’andi batuba ti basambila buwombo mu lomba Yehova kabavana ndembama mu mayindu, luvovomo mu ntima ayi nduenga yibakila zinzengolo zimboti. Ayi bamona lusadusu lu Yehova. Enati mambu maphasi wulembo dengana, tatamana mu lusambulu ayi mawubaka ndembama yi Yehova yoyi mayi tanina ntim’aku ayi mabanza maku.—Loma 12:12.
YEHOVA WELA KUSIKIMISA
7. Bue tulenda kimuena mu thangu tulembo dengana mambu maphasi?
7 Mambu maphasi. Mu thangu tudengini mambu maphasi, mbueno’eto, mayindu meto ayi mambu momo tueta vanga, tubue mavangilanga ko mu bukhatikhati, banga phila tueta vangila mambu. Banga kuandi phila masuwa malenda natu mu muphepi, mabotukidi ko mabedi ayi medi kundambusu nkaka, beto phe tulenda natu mu mayindu meto mu mambu momo malenda kutubuilukulu. Banga kuandi phila tutubidi mu thonono paragrafi’eto, Ana nio tutubidi vatheti wutuba ti wuba na mayindu ma phila beni yina kumanima ma lufua lu bakala diandi. Wutuba: Mu thangu ndieba kimonanga minu veka, ndieba kimonanga kiadi ayi ndiyiza tona ba nganzi nganzi bo kayiza fua. Mu buela, Ana wuyiza tona kimona niandi veka ayi wuyiza tona fuema mu bila kio kayiza tona bakila zinzengolo niandi veka ziozi zieba bakanga nnuni’andi. Thangu zinkaka weba kimonanga banga niandi widi mu vuka ki mayo ma m’bu. Bue Yehova keta tusadisila mu thangu tudengini mambu ma phila yoyi?
8. Banga phila buididi mu Yesaya 33:6, diambu mbi Yehova katuvanini sikididi?
8 Mambu mo Yehova kalembo vangi. Yehova wutuveni sikididi ti wela tusikimisa. (Tanga Yesaya 33:6.) Mu thangu masuwa madengini vuka kingolo, malenda tona nikuka mu phila yimbimbi. Mu kakidila ndikukunu beni yoyi, masuwa mawombo meta sadila bima bio bieta sikimisa kadika ndambu yi masuwa muingi medi diama. Bima beni bio bieta sikimisa, bilenda tula ti masuwa mabika nikukina ngolo. Ayi bieta tula diaka ti vonza kinneni kibika ba ayi batu bo badi mu khati masuwa mintima miawu miba mikita. Diawu, bima beni bio bieta sikimisa masuwa bieta sala bumboti mu thangu masuwa malembo diati, bobuawu phe Yehova maka tusikimisa enati tulembo tatamana kuenda kuntuala mu kuikama koso kadiambu ko zinzomono.
Wukisikimisa mu bisadulu bieto bithombolo (Tala paragrafi 8-9)
9. Bue bisadulu bithombolo bilenda kutusadisila tutatamana simbidila bukhati khati bueto? (Tala phe foto.)
9 Mambu mo tufueti vanga. Mu thangu wulembo dengana vuka ki zithatukusu mu mayindu, tula mamoso mo wulenda tula muingi wutatamana vanga mambu ma kipheve. Diawu, bulendakana mambu momo wube vanganga mu thama, wulendi bue koka ko kumavanga mu thangu yayi, bambuka moyo ti Yehova kakala ko mambu mangolo. (Dedikisa Luka 21:1-4.) Mu diambu di mambu ma kipheve, kubikanga thangu yi ndongokolo yi ngeyo veka ayi yindudilanga mu buphinda mambu momo wunlonguka. Bila mbi? Mu nzila yi khubukulu’andi, Yehova wulembo tulongi mambu mo madi mu Bibila mo malenda tusadisa tutanina bukhati khati bueto. Muingi wubakula mambu mo wuntomba, wulenda sadila bisadulu bithombolo bio bidi mu mbembo’aku, banga mu aplikasio yi JW Library®, mu Index des publications des Témoins de Jéhovah, ayi mu Buku ya bolukiluki mpo na Batatoli ya Yehova. Monika, nio tutubidingi vatheti, wutuba ti weba sadilanga bisadulu bithombolo muingi kabaka zindongi mu thangu yo keba monanga ti vuka ki zithatukusu zi mayindu kilembo yizi. Mu kifuani, wusonika kuma ki “nganzi” mu bisadulu beni bithombolo. Mu zithangu zinkaka weba tombanga bikuma banga “mayuya” voti “kuikama.” Weba tanganga mambu momo keba bakulanga mu zithombolo ziandi tii makuiza ntudi kaba mu zikhini. Wutuba ti: “Mu thangu yo ndieba tonanga tula zithombolo ziama, ndieba kitatikisanga kuwombo. Vayi mu thangu ndieba tatamananga tula lutangulu, ndimona ti Yehova wundiamba. Ayi ndiyiza mona ti Yehova weba sudikanga phila yo ndieba kimuenanga ayi wutsadisa.” Lusadusu lu phila yoyi lu Yehova, lulenda diaka tusadisa mu simbidila bukhatikhati bueto tii tukuiza baki ndembama mu ntima.—Nku. 119:143, 144.
YEHOVA WELA KUSADISA
10. Bue tulenda kimuena kumanima madengana mambu maphasi?
10 Mambu maphasi. Kumanima ma dengana mambu maphasi, yilenda ba na bilumbu bio tulenda kimona ti tume lebakana nitu ayi mabanza. Tulenda kimona banga nnakuni wu zithinu nio weta nakuna nsualu vayi bo kaluedi weka nnakuna mu kue tiudikanga. Tulenda mona phasi mu bue vanga mambu momo tube vanganga mu kondo phasi, voti tulenda ba balebakana mu bue tona sala mambu mo tube zolanga sala. Banga Eliya, tulenda mona ti yidi phasi mu kotuka. Nduka nduka mu thangu yo tutidi leka. (1 Mtn. 19:5-7) Tsila mbi Yehova katuveni mu thangu keta tumona ti tume vonga?
11. Phila mbi yinkaka Yehova keta tusadisila? (Minkunga 94:18)
11 Mambu mo Yehova kalembo vangi. Wutuveni tsila yi kutusadisa. (Tanga Minkunga 94:18.) Banga kuandi nnakuni nioni luedi kakadila phuila yi lusadusu muingi kadiata, beto phe tulenda ba phuila yi lusadusu muingi tutatamana ba kipfuzi mu kisalu ki Yehova. Mu thangu beni, Yehova wutuveni sikididi ti: “Minu Yehova Nzambi’aku mandi simba mu koko kuaku ku lubakala, ayi mandi kamba ti: ‘kadi mona tsisi mandi sadisa.’” (Yes. 41:13) Ntinu Davidi wubaka lusadusu lu phila yoyi. Mu thangu kadengana mambu maphasi ayi bo kadengana bambeni bandi, wukamba Yehova ti: “Koko kuaku ku lubakala kukhindisa.” (Nku. 18:35) Vayi bue Yehova keta vanina lusadusu?
Kikinina lusadusu lu dikanda diaku, lu bakundi, ayi lu bakulutu (Tala paragrafi 11-13)
12. Banani Yehova kalenda sadila mu thangu tuvongidi?
12 Nduka nduka Yehova weta tubuela mioko mu sadila batu bankaka batusadisa. Mu kifuani, lumbu kimosi mu thangu Davidi keba kitatikisa, nkundi’andi Yonatani wuye kuntala muingi kamvana lusadusu mu ziphuila ziandi zi mayindu ayi kankamba ziphova zi lukindusu. (1 Sa. 23:16, 17) Bo buawu phe Yehova wusobula Elisa muingi kevani lusadusu lufuana kuidi Eliya. (1 Mtn. 19:16, 21; 2 Mtn. 2:2) Lumbu kiaki phe Yehova kalenda sadila bakhomba ba dikanda, bakundi, voti bakulutu muingi batusadisa. Diawu, mu thangu tulembo kitatikisa, tulenda tomba ba va beto veka. Tueta kuiza tomba kaka ti batubika. Woso kuandi mutu kalenda kuandi kimona phila yoyi. Mbi tulenda tula muingi tubaka lusadusu lu Yehova?
13. Mbi tufueti vanga mu diambu di tubaka mamboti ma lusadusu lu Yehova? (Tala phe foto.)
13 Mambu mo tufueti vanga. Nuanisa phuila yitomba ba ngeyo veka. Mu thangu tuidi va beto veka, tueta luta wa mayindu meto veka kaka, ayi tona yindula mambu ma beto veka ayi monanga kaka zinzomono zio tulembo dengana. Mayindu ma phila yoyi malenda vunzikisa zinzengolo zio tueta baka. (Zin. 18:1) Makiedika, beto boso thangu zinkaka tueta tia ba va beto veka, dieta luta ba mu thangu tudengini mambu maphasi. Diawu, beto kibika tuba va beto veka mu thangu yiwombo, tulenda zimbisa maluaku mo Yehova kalembo sadila mu kutusadisa. Bo buawu, buba ti mu thangu ziphasi widi, yangalala lusadusu lu dikanda diaku, lu bakundi baku ayi lu bakulutu. Wubamonanga ti bawu Yehova kalembo sadila muingi kasadisa.—Zin. 17:17; Yes. 32:1, 2.
YEHOVA WELA KUBOMBA
14. Mambu mbi matsisi tulenda dengana?
14 Mambu maphasi. Tulenda dengana mambu mo ma kutumonisa tsisi. Mu Bibila, bisadi bikuikama bi Nzambi bitubila zithangu ziozi babela mu kiadi ayi mu tsisi mu bila ki bambeni ziawu voti mu thangu badengana mambu maphasi. (Nku. 18:4; 55:1, 5) Bo buawu phe, tulenda dengana kimbeni mu nzo nkanda, mu kisalu, mu dikanda dieto, voti kuidi min’yadi. Tulenda mona tsisi ti tulenda fua mu thangu tulembo bedi, mu zithangu beni ziozi tulenda kondo ngolo banga muana lezi. Bue Yehova keta tusadisila mu zithangu ziphila yoyi?
15. Sikididi mbi Minkunga 94:19 yituveni?
15 Mambu mo Yehova kalembo vangi. Weta tubomba ayi weta tulembika. (Tanga Minkunga 94:19.) Nkunga beni wowo wulenda tutumi tuyindula muana ndumba wufioti nio wulembo moni tsisi voti kakadi koka leka mu thangu mvula wulembo noki wo widi na zinzazi zingolo. Tulenda yindula ti siandi kotidi, wum’bongidi ayi wunsimbidi mu mioko miandi tii kakuiza leki. Kadiambu ko mvula ayi zinzazi beni bilembo tatamana kaka, simba ku mbombolo koko siandi kansimbidi kulenda kuntula kakimona mu lutanunu. Mu thangu tulembo dengana mambu matsisi, tulenda ba phuila ti Dise dieto di mazulu katusimba mu mioko miandi mu phila yimbonosono tii tukuiza ba mu ndembama. Bue tulenda bakila mbombolo yi phila yoyi kuidi Yehova?
Bikila Dise diaku di mazulu nzila kabomba mu nzila yi masonoko (Tala paragrafi 15-16)
16. Mbi tulenda tula muingi tubaka mbombolo yi Yehova? (Tala phe foto.)
16 Mambu mo tufueti vanga. Viokisanga thangu yiwombo ayi Yehova—mu nzila yi lusambulu ayi tanga Phov’andi. (Nku. 77:1, 12-14) Beto kubutudila mu thangu tueka mu zithatukusu, nduka nduka mayindu meto mama ba ma tomba lusadusu kuidi Dise dieto di mazulu. Kamba Yehova tsisi’aku ayi mambu mo ma kutatikisa. Wum’bikila nzila kakamba ayi kabomba mu nzila yi masonoko. (Nku. 119:28) Bulendakana thangu zinkaka mawu mona ti bibuku binkaka bi Bibila bilenda ba mfunu kuidi ngeyo mu thangu yo wulembo moni tsisi. Mu kifuani, wulenda baka lukindusu mu nkanda wu Yobi, wu Minkunga, wu Zingana ayi mu ziphova zi Yesu zio zidi mu nkanda wu Matayi kapu 6. Ngeyo sambila Yehova ayi tanga Phov’andi mawu baka mbombolo’andi.
17. Sikididi mbi tulenda ba?
17 Tulenda ba sikididi ti Yehova wela ba wukubama mu kutusadisa mu thangu yi tombi yi luzingu lueto. Tuela sie ba ko beto veka. (Nku. 23:4; 94:14) Yehova wutuveni tsila yi kutukeba, kutusadisa, kutusikimisa ayi kutubomba. Mu mambu matedi Yehova, Yesaya 26:3 yitubidi ti: Bobo badi mayindu masikama wela kubatanina mu ndembama thangu zioso, bila balembo ntudila ntima.” Diawu tudila Yehova ntima ayi baka mamboti mu ziphila zio kalembo tusadisila. Ngeyo kubutudila, wela baka ngolo buba mu thangu ziphasi.
MVUTU MBI MAWU VANA?
-
Mu thangu mbi nduka nduka tulenda bela phuila yi lusadusu lu Yehova?
-
Mu ziphila mbi ziya zio Yehova keta tusadisila mu thangu ziphasi?
-
Mbi tulenda tula muingi tubaka mamboti ma lusadusu lu Yehova?
NKUNGA 12 Yevova, Nzambi nneni
a Mazina mankaka balulu mabalulu.