1. Mbi bieta tatamana sadisa bisadi bi Yehova batatamana kunsambila kadiambu ko mambu maphasi mo balembo dengana?

 BIBILA kitubidi ti​—bilumbu tulembo zingila “bidi bilumbu bithangu ziphasi.” (2 Tim. 3:1) Botula ziphasi zio batu boso mu nza yimvimba balembo dengana, bisadi bi Yehova phe, bafueti dengana zinzomono ayi zithatukusu. Mbi bilenda kutusadisa tutatamana sadila Yehova kadiambu ko mambu beni momo maphasi? Dimosi mu diambu dilutidi mfunu didi ti tuzebi ti Yehova niandi “Nzambi yimoyo.”​—Yel. 10:10; 2 Tim. 1:12.

2. Mu phila mbi Yehova kadidi Nzambi yimoyo?

² Yehova widi mutu wukiedika nio weta kutusadisa mu thangu tulembo dengana zinzomono ayi weta tomba maluaku makutusadisidila. (2 Lus. 16:9; Nku. 23:4) Beto kuntadila ti widi Nzambi yimoyo, yilenda tusadisa tununga zinzomono zioso ziozi tulenda dengana. Tutala phila yoyi Ntinu Davidi kamonisina diambu beni.

3. Mbi Davidi kazola tuba bo katuba ti “Yehova widi Nzambi yimoyo”?

³ Davidi wuzaba Yehova ayi wuntudila ntima. Mu thangu bambeni ziandi beba kumvangilanga mambu mambimbi, buba phe Ntinu Sauli, Davidi wusambila Yehova kansadisa. (Nku. 18:6) Kuntuala, Nzambi wuwa lusambulu luandi ayi wunsadisa, diawu Davidi katubila ti: “Yehova widi Nzambi yimoyo!” (Nku. 18:46) Mu ziphova ziandi, Davidi kasi sukila ko kaka mu zaba ti Nzambi widi. Buku yimosi yituba ti Davidi weba tudilanga Yehova ntima “banga Nzambi yimoyo nioni weta sala thangu zioso kuidi bisadi biandi.” Ninga Davidi wuzaba mu niandi veka ti Nzambi widi wumoyo ayi sikididi beni kina kibue yonzula nzengolo’andi yisadila ayi yikembisa Yehova.​—Nku. 18:28, 29, 49.

4. Mamboti mbi tulenda baka beto tadila Yehova ti widi Nzambi yimoyo?

 ⁴ Beto ba sikididi ti Yehova niandi Nzambi yimoyo, yawu yilenda tula tunsadila mu kipfuzi. Matu baka ngolo yimonisina mvibudulu mu zinzomono ayi matu baka ngolo yi tatamana monisa mvibudulu mu kisalu kiandi. Matu baka phe nzengolo yitatamana ba pfika pfika ayi Yehova.

NZAMBI YIMOYO MAKA KINDISA

5. Mbi bilenda kutuvana sikididi mu thangu tulembo dengana zinzomono? (Filipi 4:13)

⁵ Matu ba bafuana mu monisa mvibudulu mu zioso kuandi zinzomono, buba zinneni voti zifioti enati tutatimini bambuka moyo ti Yehova widi Nzambi yimoyo ayi widi mu diambu di katusadisa. Kutu mambu moso momo tulembo dengana masi ko mambu manneni va ntuala Nzambi’eto. Niandi Nzambi yi nkua ngolo yoso ayi kalenda kutuvana zingolo zivibidila. (Tanga Filipi 4:13.) Tuidi na bibila biwombo bio bikututula tuba sikididi mu nunga zinzomono. Phila yoyi Yehova katusadisila mu zinzomono zifioti, yawu yikutuvana sikididi ti wela kutusadisa phe mu zinzomono zinneni.

6. Mambu mbi Davidi kadengana mu buntueni buandi, momo matula ti kaba sikididi kuidi Yehova?

⁶ Tutadila mambu mmuadi momo Davidi kadengana mo matula ti kayedisa sikididi kiandi kuidi Yehova. Mu thangu Davidi kaba mvungi wu mamemi wuntueni, Ulusu ayi Khosi biyiza buila dimemi dimosi mu mamemi ma siandi. Mu maluaku beni ma mamuadi, mu kibakala kioso Davidi wuvonda bibulu beni ayi wuvukisa mamemi. Kadiambu ko buawu, kasi tuba ko ti mu ngolo ziandi veka kavondila bibulu beni. Wuzaba ti Yehova niandi wumvana zingolo beni. (1 Sa. 17:34-37) Davidi kasi zimbakana ko mambu momo kadengana. Mu thangu kayindudila mambu beni mu buphinda, yawu yinsadisa kaba sikididi ti Nzambi wela bue kumvana zingolo mu bilumbu binkuiza.

7. Ba mayindu mamboti, bue kusadisila Davidi kanunga Ngoliati?

⁷ Mu bilumbu bilandakana kuntuala, Davidi muna wukhidi ntueni, wuye tala kaa ki ba masodi ki bana ba Iseli. Wumona ba masodi baba na tsisi yiwombo mu bila ki muisi Filistea nio wuba wunila mu dizina di Ngoliati bo katotuka mu diambu di “soka ba masodi ba Iseli.” (1 Sa. 17:10, 11) Ba masodi baba na tsisi yingolo bila baluta tula mayindu mawu mu kula ku Ngoliati ayi mu mambu momo keba kubakamba. (1 Sa. 17:24, 25) Davidi niandi wutadila diambu beni mu phila yinkaka. Mu thangu Ngoliati keba sokanga ba masodi ba Iseli, Davidi wuzaba ti ‘nkangu wu masodi wu Nzambi yimoyo kalembo soki.’ (1 Sa. 17:26) Davidi wuluta tula Yehova mu mayindu mandi. Davidi wuba sikididi ti phila yoyi Nzambi kansadisila mu thangu kaba mvungi mamemi, buawu phe maka nsadisila mu diambu beni diodi. Bukiedika mu lusadusu lu Nzambi, Davidi wunuanisa Ngoliati, ayi wun’nunga!​—1 Sa. 17:45-51.

8. Bue tulenda luta tudila Yehova mu mayindu meto mu thangu tulembo dengana zinzomono? (Tala phe foto.)

⁸ Beto phe tulenda nunga zinzomono beto bambuka moyo ti Nzambi yimoyo widi wukubama mu kutusadisa. (Nku. 118:6) Tulenda yedisa sikididi kieto, beto yindudilanga mambu momo katuvangila mu bilumbu bivioka. Tanganga masolo ma Bibila momo ma kubambula moyo phila yoyi Yehova kavukisila bisadi biandi. (Yes. 37:17, 33-37) Yindudilanga phe mu masolo mo meta totuka mu siti yi jw.org momo meta monisa phila yoyi Yehova kasadisila bakhomba ba babakala ayi ba baketo mu bilumbu bieto biabi. Mu buela, yindudilanga phe zithangu ziozi Yehova kasadisila. Kadi kukitatikisa enati wunungini ko mambu manneni banga nuanisa Ulusu ayi Khosi. Bila mbi kawedi kukitatikisila ko? Mu tuba kiedika, Yehova mu mambu mawombo kame kusadisila mu luzingu luaku! Wufikika muingi wuba nguizani ayi  niandi. (Yow. 6:44) Buba phe lumbu kiaki, mu lusadusu luandi wulembo tatiminina bela mu kiedika. Lombanga Yehova kasadisa wubambukanga moyo phila yoyi kavanina mvutu mu minsambu miaku, phila yoyi kasadisila bo wuba phuila mu diambu dimosi, ayi mu phila yoyi kasadisila bo wudengana mambu maphasi. Ngeyo yindudilanga mu mambu beni momo, mawu yedisa sikididi kiaku ti Yehova wela tatamana kusadisa.

9. Bue tulenda tadilanga zinzomono zieto? (Zingana 27:11)

⁹ Beto monanga Yehova banga widi mutu wumoyo, yawu mayi tusadisa tutadila bumboti mboti zinzomono zieto. Mu phila mbi? Matu tona tadila zinzomono zieto banga diambu dinneni ditadidi Yehova ayi Satana. Satana weta tuba ti beto mona ziphasi buna matu sundula Yehova. (Yobi 1:10, 11; tanga Zingana 27:11.) Vayi mu thangu tueta nunga zinzomono zieto, buawu tueta monisina ti tueta zola Yehova ayi tueta monisa ti Diabulu widi nkua luvunu. Leta di tsi yoyi weta vuanda, wulembo tudi zikhandukulu kuidi bisadi bi Yehova, kambu ku zimbongo kulembo tatisa, mimvutu mimbimbi balembo vutudila mu kisalu kiaku ki tsamununu voti kuidi na zinzomono zinkaka zio wulembo dengana? Enati buawu buididi, bambuka moyo ti mambu momo wulembo dengana mama vana diluaku diyangidika Yehova. Bambuka diaka moyo ti kalendi ko kubika wudengana zinzomono zio ziviokikini tezo. (1 Ko. 10:13) Wela kuvana zingolo zimonisa mvibudulu.

NZAMBI YIMOYO WELA KUVANA NSENDO

10. Nzambi yimoyo, mbi kela tula kuidi bobo beta kunsambila?

¹⁰ Yehova weta vana nsendo kuidi bobo beta kunsambila. (Ebe. 11:6) Weta tuvana ndembama ayi weta tusadisa tuyangalala mu biobi bidi yeto mu bilumbu biabi ayi wela tuvana luzingu lu mvu ka mvu mu bilumbu binkuiza. Tulenda ba vuvu kuidi Yehova, ba sikididi ti widi na phuila ayi zingolo zikutuvanina nsendo. Ayi sikididi beni, kilembo tusadisa tuba na mambu mawombo mavanga mu tsambudulu’eto banga phila butudila bisadi bikuikama bi Nzambi mu  thangu thama. Buawu phe bubela kuidi Timote mu tandu kitheti.​—Ebe. 6:10-12.

11. Bila mbi Timote kasadila buwombo mu kimvuka? (1 Timote 4:10)

¹¹ Tanga 1 Timote 4:10. Timote wutula vuvu kiandi mu Nzambi yimoyo. Mu diawu, wuba na bibila bimboti bio bintuma kasala buwombo ayi kakivana buwombo. Mambu mbi kavanga? Thumu Polo wunkindisa kayonzula maluaku mandi malonga ayi matuba va nyalu nguba. Timote wuvana kifuani kimboti kuidi minkuikisi yandi buba kuidi mintueni ayi kuidi bakulutu. Bamvana biyeko biphasi banga vana zindongi ayi zitsembolo vayi mu luzolo kuidi batu bobo baba phuila yi zindongi beni. (1 Tim. 4:11-16; 2 Tim. 4:1-5) Timote wuba wufuana mu ba sikididi ti buba ti kisalu kio kansala batu bakadi kuki mona voti bakadi kukiyangalala, Yehova wela kumvana nsendo.​—Lom. 2:6, 7.

12. Mbi bilenda tuma bakulutu baba na mambu mawombo mavanga mu kisalu kiawu? (Tala phe foto.)

¹² Bakulutu phe lumbu kiaki balenda ba na sikididi ti Yehova weta mona ayi weta yangalala kisalu kiawu kimboti kio beta sala. Botula kisalu ki tanina mamemi, ki longa ayi ki samuna, bakulutu bawombo beta buela mioko mu kisalu ki thungulu. Bankaka badi mu mangumba mo meta tala batu bo bam’bela mu zinzo zim’buku voti badi mu zikomite zinguizani ayi minganga (Comité de liaison hospitalier). Bakulutu bo beta sala kisalu ki phila yoyi, beta tadila kimvuka ti yidi khubukulu yi Yehova vayi bika banga khubukulu yo yivangulu kuidi mutu. Yawu yeta kuiza tula ti badukisa biyeko biawu mu muel’awu woso ayi bakala na sikididi ti Nzambi wela kubavana nsendo mu kisalu kioki balembo sadi.​—Kol. 3:23, 24.

13. Bue Yehova keta tadila zingolo zio tueta tula mu kisalu kiandi?

¹³ Beto boso tulendi ko ba bakulutu mu kimvuka. Vayi wumosi mosi mu beto widi na kima kioki kalenda vana Yehova. Nzambi’eto weta yangalala mu thangu tulembo tudi zingolo mu kunsadila. Weta mona makaba mo tueta  vana mu diambu di ndiatusulu yi khubukulu’andi mu nza yimvimba, buba mafioti madi. Wukala phe mu zikhini ziwombo mu thangu keta tumona tulembo nonuna mioko mu vutula mimvutu mu zikhutukunu buba ti kadulu kimona tsoni tukala ayi weta mona zikhini ziwombo mu thangu tueta lemvukila batu bobo beta kutufuemisa. Buba ti kisalu kio weta sadila Yehova, ngeyo weta kimona ti kidi kifioti, ba sikididi ti niandi weti bongila mu mfunu wombo mambu momo wulenda vanga. Weta kuzola mu diambu di kiawu ayi wela kuvana nsendo.​—Luka 21:1-4.

TATAMANA BA PFIKA PFIKA AYI NZAMBI YIMOYO

14. Mu phila mbi tatamana ba pfika pfika ayi Yehova kueta kutusadisila tutatamana ba bakuikama? (Tala phe foto.)

¹⁴ Enati tukikinini ti Yehova widi, yela sie ba ko phasi mu ba bakuikama kuidi niandi. Buawu bubela kuidi Yosefi. Wumanga mu kibakala kioso tula kitsuza. Wuzaba ti Nzambi widi ayi kasi zola ko kunniongisa. (1 Mo. 39:9) Muingi tukikinina ti Yehova widi, tufueti bakanga thangu yi kunsambila ayi longuka Mbembo’andi. Kikundi kieto ayi niandi maki ba kingolo. Beto phe beto ba banga Yosefi mu ba kikundi kingolo ayi Yehova, tulendi ko vanga diambu dio dikunniongisa.​—Zaki 4:8.

15. Dilongi mbi tulenda baka kuidi bana ba Iseli mu mambu momo badengana mu dikanga? (Ebelewo 3:12)

¹⁵ Batu bobo beta zimbakana ti Yehova widi Nzambi yimoyo, balenda fika kuntatukila. Tutadila mambu momo mabuilukulu bana ba Iseli mu thangu baba mu dikanga. Bazaba ti Yehova widi vayi batona memata ti keni Yehova wulenda badukisila ziphuila ziawu. Batona yuvula: “Yehova widi yeto voti nana?” (2 Mo. 17:2, 7) Kuntuala bayiza tombukila Nzambi. Mu kondu finda phaka tufueti manga landakana kifuani kiawu kimbimbi kimanga ba kadulu ki tumamana bila yidi ndubu kuidi beto.​—Tanga Ebelewo 3:12.

16. Mbi bilenda tula minu kieto mu nzomono?

¹⁶ Nza yayi yeta kutukakidila tuba pfika pfika kuidi Yehova. Batu bawombo ka bakikininanga  ko ti Nzambi widi. Khumbu ziwombo batu bobo ka batumukinanga ko mambu mo Nzambi keta kutulomba, beta monika banga mu luzingu lumboti badi. Mu thangu tulembo moni mambu beni momo, minu kieto kilenda ba mu nzomono. Kadiambu ko tueta kikinina ti Nzambi widi, tulenda tona kukiyuvula keni kalenda kutusadisa. Nsoniki wu Minkunga 73 wukiyuvula biuvu mu diambu beni. Wumona batu bobo baba mu thangu’andi bobo beba manganga kuawu tumukina minsiku mi Nzambi balembo tatamana mona mamboti mu luzingu. Yawu yintuma kakiyuvula keni mfunu kuandi yidi mu sadila Nzambi.​—Nku. 73:11-13.

17. Mbi bilenda kutusadisa tutatamana ba pfika pfika ayi Yehova?

¹⁷ Tsuka tsuka mbi bisadisa nsoniki minkunga kabalula mbueno’andi? Wuyindula mu buphinda mambu momo meta builukulu batu bobo beta zimbakana Yehova. (Nku. 73:18, 19, 27) Ayi wutadila phe mamboti momo makala mu sadila Yehova. (Nku. 73:24) Beto phe tulenda yindula mamboti momo Yehova katuvangila. Ayi yindula nginu bue luzingu luaku luyikila enati wusadilanga ko Yehova. Yawu yilenda kutusadisa tutatamana ba bakuikama ayi tutuba phila yoyi yiyiza tubila nsoniki wu minkunga ti: “Vayi kuidi minu didi diambu dimboti mu fikama Nzambi.”​—Nku. 73:28.

18. Bila mbi tulenda tadila bilumbu binkuiza mu sikididi?

¹⁸ Tulenda nunga zinzomono zio tulembo dengana mu bilumbu biabi bitsuka bila “tuidi bisadi bi Nzambi yimoyo ayi yikiedika.” (1 Tes. 1:9) Nzambi’eto widi mutu wukiedika nioni weta sadisa batu bobo beta kunsambila. Wumonisa ti wuba ayi bisadi biandi mu thangu thama ayi buawu phe kadidi mu lumbu kiaki. Fioti fisiedi tueka nduka dengana ziphasi zinneni zio zikuiza salama va mbata ntoto. Tuela sie ba ko beto veka, Yehova phe wela ba yeto. (Yes. 41:10) Beto boso “tuela ba kibakala ayi tuela tuba ti: ‘Yehova niandi weta kutsadisa; ayi ndilendi ko mona tsisi.’”​—Ebe. 13:5, 6.