Muingi tuyangidika Yehova, tufueti ba minu. Vayi Bibila kitubidi ti ‘batu boso bakala ko minu.’ (2 Tes. 3:2) Mu thangu Polo katubila ziphova beni ziozi, wutubila “batu batsita ayi bambimbi” bobo beba kummonisanga phasi. Vayi mambu momo katubila mu diambu di minu, madi makiedika phe mu diambu di batu bankaka. Batu bankaka bakikininanga ko mambu momo mammonisa ti Mvangi widi​—Nzambi. (Lom. 1:20) Bankaka balenda kimona ti badi na mua minu mu thangu beta mona mambu mangitukulu. Vayi minu kiphila yoyi kisi fuana ko mu diambu di yangidika Yehova.

Tufueti kikinina ti Yehova widi ayi weta “vana nsendo” kuidi bobo badi minu kikinda. (Ebe. 11:6) Minu kidi m’butu wu pheve santu’andi. Sambila Yehova kuawu kulenda sadisa mutu kabaka pheve santu. (Luka 11:9, 10, 13) Thangulu yi Phova Nzambi yo yisonimina mu lulendo luandi yidi yimosi mu ziphila zimfunu yo yilenda tula ti mutu kabaka pheve santu’andi. Ayi tulenda yindudila mu buphinda mambu momo tuntanga ayi tomba sadila mambu momo tunlonguka. Pheve santu yi Yehova yilenda vanga diambu mu luzingu lueto ayi yilenda kutusadisa tuba minu kioki ki kunyangidika.