Biuvu bi mintangi
Ziphova ‘Wela kubakeba’ zio zidi mu Minkunga 12:7, zitadidi “batu balebakana” (mu verse 5) voti zitadidi kaka ‘ziphova zi Yehova’ (mu verse 6)?
Disolo dimonisini ti verse beni batu yitadidi.
Mu Minkunga 12:1-4, Tueta tanga ti ‘Minkuikisi mizimbidi va khati tsika batu.’ Buabu tutadila Minkunga 12:5-7, ziverse zio zime totula kiuvu beni.
“‘Bila mu diambu di yamusu ku batu balebakana,
ayi dila ku minsukami,
Buabu ndieka ntelama,’ buvovele Yehova.
‘Mandi bavukisa mu mioko mi batu bobo balembo bavangila mambu mu nko.’
Ziphova zi Yehova zikala zivedila;
Banga palata yoyi bavedisidi ku mbazu, yivedosolo mu tsambuadi di zikhumbu.
Wela kubakeba, O Yehova;
Wela kubatanina mu diambu di ntindu wu batu baba mu thangu yi kayimani.”
Verse 5 yimonisini mambu mo Yehova katubidi mu diambu ditedi batu balebakana. Wela kubavukisa.
Verse 6 yitubidi ti ‘ziphova zi Yehova zikala zivedila,’ ‘banga palata yoyi bavedisidi.’ Bukiedika mawu madi mabanza momo bakristu bo bakiveni beta kikinina.—Nku. 18:30; 119:140.
Buabu tutadila verse yoyi yilandikini, Minkunga 12:7: “Wela kubakeba, O Yehova; wela kubatanina mu diambu di ntindu wu batu baba mu thangu yi kayimani.” Ziphova “kubatanina” voti “kubakeba,” banani zitadidi?
Bo verse 7 yidi kuntuala verse 6 yoyi yitonini mu “ziphova zi Yehova,” batu bankaka balenda banzila ti yawu yinsundula ti Nzambi weta ‘tanina’ ziphova ziandi. Ayi tuzebi ti Nzambi wutanina Bibila mu zingolo ziozi bambeni bedika tula mu kukikandika ayi kukivonda.—Yes. 40:8; 1 Pi. 1:25.
Vayi didi diambu dikiedika ti Yehova weta tanina batu bandi banga phila butubidi verse 5. Yehova weta ayi wulembo tatamana sadisa ayi vukisa batu “balebakana” ayi batu bobo balembo “yamusu.”—Yobi 36:15; Nku. 6:4; 31:1, 2; 54:7; 145:20.
Buabu mu verse 7, ziphova “kubatanina” voti “kubakeba” banani zitadidi?
Mambu mo madi mu verse beni yi Minkunga mamonisini ti ziphova “kubatanina” voti “kubakeba” batu zitadidi.
Minkunga 12:1 yitubidi ‘bisadi bikuikama’ bi Yehova biobi bivunu kuidi batu bambimbi. Mambu momo malandikini mu verse beni, tumueni thubulu yo yimonisini ti Yehova maka fuemina batu bobo beta tuba mayuya mu munu’awu. Kapu beni ki Minkunga kituveni sikididi ti Nzambi maka vanga diambu mu diambu di mamboti ma bisadi biandi bila ziphova ziandi zikala zivedila.
Diawu verse 7 yitubidi ti Yehova wela “kubatanina” ayi “kubakeba,” yawu yinsundula batu bobo balembo monusu phasi kuidi batu bambimbi.
Mbangudulu yi kuma “kubatanina” voti “kubakeba” yilembo monisa masonoko ma massorétique (hébreu). Masonoko ma Septante ma Ngeleki masadidi kuma “kutu” khumbu ziwadi mu verse 7, kio kitadidi minkuikisi mio milebakana ayi mio milembo monusu phasi. Mu manisa, verse 7 yitubidi ti ‘kadika’ nkuikisi wela tanunu “mu diambu di ntindu wu batu baba”, mu diambu di batu bobo beta vanga mambu makheni. (Nku. 12:7, 8) Mu mbangudulu yimosi yi masonoko ma ki Ebelewo mo mabangulu mu mbembo yi ki Armeye, verse 7 yitubidi ti: “Ngeyo, O PFUMU, wela tanina batu basonga, wela kubakeba mvimba mvimba mu diambu di ntindu wumbimbi wu batu baba. Mu ndambusu zioso, batu bambimbi balembo diati mu tomba tengula menga ma bana ba batu.” Mbangudulu beni yoyi yimonisini diaka dimbu kio kimmonisa ti Minkunga 12:7 yisi tadila ko phova yi Nzambi.
Diawu, verse beni yeta vana “Minkuikisi” mi Nzambi vuvu ti wela vanga diambu mu diambu di bawu.
