1. Mambu mbi tulongukidi mu lukutukunu lutsuka mvu wu 2023?

 MU 2023 mu lukutukunu lutsuka mvu, a tubeki ziphisulu zimona zi zikhini mu diambu ditedi luwiluku lueto ayi tubeki zitsangu zi zikhini mu diambu ditedi kisalu kieto ki tsamununu. Tulonguka mu kifuani ti batu bankaka balenda baka diluaku diba va kimosi ayi bisadi bi Yehova buba kumanima ma mbebusulu yi Babiloni dinneni. Mu ngondi yi Novembre 2023, tulonguka diaka ti bakuiza bue lombanga ko kuidi minsamuni bavutula lapolo mu mambu mankaka tueta sala mu kisalu ki tsamununu. Zitsobolo beni ziozi, zilembo tudi kisalu kieto kitsamununu kibika bue ba mfunu ayi kibika bue salama nsualu nsualu denga mu bilumbu bibedi? Nana, buawu ko buididi!

2. Bila mbi kisalu kieto ki tsamununu kifueti salimina nsualu nsualu mu kadika lumbu kimvioka? (Malako 13:10)

² Kadika lumbu kimvioka kisalu kieto ki tsamununu kifueti luta salimina mu nsualu nsualu. Bila mbi? Bila thangu yilembo diati nsualu. Tutadila mambu momo Yesu kabikula mu diambu ditedi kisalu ki tsamununu mu bilumbu bitsuka. (Tanga Malako 13:10.) Mu tadila ziphova zio zidi mu Matayi zio zidi nguizani ayi ziawu, Yesu wutuba ti nsamu wumboti wela samunu mu ntoto woso widi batu tuamina “tsuka” yiza. (Mat. 24:14) Ziphova beni zinsundula, tsukulu yi mambu ma nza yayi yi Satana. Yehova wutula “lumbu ayi thangu” yi mambu momo meka nduka salama. (Mat. 24:36; 25:13; Mav. 1:7) Kadika lumbu kimvioka kilembo tufikika mu thangu beni. (Lom. 13:11) Bo tulembo vingila lumbu beni tufueti tatamana samuna tii tsuka yinkuiza.

3. Mbi bieta kututuma tusamuna?

 ³ Mu thangu tulembo yindudila kisalu kieto ki tsamununu, tufueti tadila kiuvu kiaki kimfunu: Bila mbi tueta samunina nsamu wumboti? Luzolo lueta tuvana phuila yi samuna. Mambu mo tueta vanga mu kisalu ki tsamununu meta monisa luzolo lueto​—mu diambu di nsamu wumboti, mu diambu di batu, ayi dilutidi, mu diambu di Yehova ayi mu diambu di dizina diandi. Tutadila diambu dimosi mosi mu mambu beni.

TUETA SAMUNA BILA TUETA ZOLA NSAMU WUMBOTI

4. Bue tueta bela mu thangu tuwilu tsangu yimboti?

⁴ Wukhidi bambuka moyo mu phila yo wubela mu thangu wuwa tsangu yimboti​—bulendakana mbutukulu yi muana mu khati dikanda voti mu thangu yo wuwa ti mebaka kisalu kio wuba phuila? Mu kondo finda phaka wuba na phuila yi fika kue kambi tsangu beni yimboti kuidi basi dikanda diaku voti kuidi bakundi baku. Buawu phe wubela mu thangu wuwa tsangu yo yilutidi zitsangu zioso​—nsamu wumboti wu Kipfumu ki Nzambi?

5. Bue wubela mu thangu wulonguka kiedika ki Mbembo Nzambi mu Khumbu yitheti? (Tala phe zifoto.)

⁵ Yindula diaka phila yoyi wubela mu thangu wuwa kiedika ki Mbembo Nzambi mu khumbu yitheti. Wuyiza bakula ti Disa diaku di mazulu weta kuzola, tidi ti wuba mu khati dikanda di bisadi biandi ayi veni tsila yimanisa ziphasi ayi wulenda ba vuvu ki bue mona mu nza yimona batu bo weta zola bo bafua​—ayi wela bue mona diaka mambu mankaka mamboti. (Mlk. 10:29, 30; Yow. 5:28, 29; Lom. 8:38, 39; Tso. 21:3, 4) Malongi beni mana makiedika mayangidika. (Luka 24:32) Wuzola buwombo mambu momo wulonguka, ayi wisi koka ko lunda kiedika kimfunu wombo mu diambu di ngeyo veka!​—Dedidikisa Yelemia 20:9.

6. Dilongi mbi beki mu kifuani ki Ernest ayi ki Rose?

⁶ Tutadila kifuani kimosi. Khomba mosi wubakala  widi mu dizina di Ernest b nio wuba kumi di mimvu mu thangu pap’andi kafua. Ernest tubidi ti: “Ndieba kiyuvulanga ti: ‘Ku diyilu kedi? Voti lembolo kuandi bue zinga mvimba mvimba?’ Ndieba zininanga bana bankaka bo baba na ba siawu.” Ernest weba kuendanga thangu ka thangu ku biziami ayi fukama va dibumbi dio bazikila Siandi ayi weba sambilanga ti: “Lemvuka Nzambi, thidi zaba kue kuidi siama.” Nduka nduka 17 ki mimvu kumanima ma lufua lu siandi, Ernest wubaka diluaku di longuka Bibila ayi wukikinina mu kambu memata. Wuyangalala zaba ti bafua basi zaba ko kadi kiasa badi banga batu balekidi tulu tungolo ayi Bibila kiveni tsila yi pfulukulu mu bilumbu binkuiza. (Mpo. 9:5, 10; Mav. 24:15) Tsuka tsuka wubaka mimvutu mu biuvu biobi bieba kuntatisanga mu mimvu miwombo! Ernest wuba mu zikhini mu mambu makiedika mo kalonguka mu Bibila. Nketo’andi Rose niandi phe wuyiza sangana yandi mu ndongokolo’andi yi Bibila ayi wuyiza monisa luzolo mu tsangu yi Kipfumu ki Nzambi. Mu 1978 bayiza baka mbotama. Bayiza ba phuila yi fika samuna mambu mo balonguka kuidi batu ba dikanda diawu, kuidi bakundi bawu ayi kuidi baboso bobo baba phuila yi kubawa. Yawu yitula ti Ernest ayi Rose basadisa viokila 70 ki batu benda kuntuala ayi babaka mbotama.

7. Mbi bieta monika mu thangu luzolo lu malongi makiedika ma Bibila mabeki buangu mu ntim’eto? (Luka 6:45)

⁷ Tulendi ko kanga munu mu thangu luzolo lu malongi makiedika ma Bibila makotidi mu ntim’eto. (Tanga Luka 6:45.) Tueta mona banga balonguki ba Yesu batandu kitheti bo batuba ti: “Bila beto tulendi vonga ko yolukila mambu momo tumona ayi momo tuwa.” (Mav. 4:20) Tueta zola buwombo kiedika ayi tueta zola kukisamuna kuidi batu bawombo enati diluaku didi.

TUETA SAMUNA BILA TUETA ZOLA BATU

8. Mbi bieta kutuvana phuila tusamuna nsamu wumboti kuidi batu bankaka? (Tala ankadre “ Zola batu​—Wubakitula Minlonguki.”) (Tala phe foto.)

⁸ Banga Yehova ayi muan’andi, beto phe tueta zola batu. (Zin. 8:31; Yow. 3:16) Tueta mona kiadi kiwombo batu bo bakambulu “zaba Nzambi” ayi bo bakambulu “vuvu.” (Efe. 2:12) Bamana kikotisa mu mambu ma ziphasi vayi beto tuidi na solisio yo badi phuila​—nsamu wumboti wu Kipfumu ki Nzambi. Luzolo na kiadi bieta kutuvana phuila tutula zingolo mu kubasamunina nsamu wumboti. Tsangu beni yimfunu wombo yilenda wesa mintima miawu mu vuvu, kubasadisa babaka “luzingu lumboti”​—tona thangu yayi ayi kubavana vuvu ki luzingu lukiedika yintia tuba  luzingu lu mvu ka mvu—​mu nza yimona yi Nzambi​—1 Tim. 6:19.

9. Ndubu mbi tueta vana mu diambu ditedi bilumbu binkuiza ayi bila mbi? (Yehezekieli 33:7, 8)

⁹ Luzolo lueto mu diambu di batu lueta kututuma tubalubula ti tsuka yi mambu ma nza yayi yime fikama. (Tanga Yehezekieli 33:7, 8.) Tueta mona batu bobo bavuendi yeto kiadi ayi bakhomba zieto ba dikanda bo kabasadilanga ko Yehova. Bawombo balembo luti kivani mu mambu ma luzingu mu kambu tula thalu mu mambu momo meka nduka salama​—“ziphasi zinneni zio ka zibedi ko tona thonono yi nza tii mu lumbu ki phila yayi ayi ziphasi zi phila yina zilendi buela ba ko.” (Mat. 24:21) Tutidi bue zaba mambu mo mela salama mu thangu yi tsambusulu yi mabundu moso maluvunu mo mela bungu ayi mu thangu mambu moso mambimbi ma nza yayi mela bebusu mu Alimangedoni. (Tso. 16:14, 16; 17:16, 17; 19:11, 19, 20) Tulembo sambila buwombo mu diambu di batu bawombo bawa ndubu yo tukubakamba ayi basangana ayi beto mu tsambudulu yivedila tona thangu yayi. Vayi buabu, batu bobo bakadi wa ndubu beni mu lumbu kiphila yayi, buba phe batu ba dikanda dieto bue bela sundukila?

10. Bila mbi tufueti vanina ndubu nsualu nsualu?

¹⁰ Banga phila tumuenini mu disolo dio diviokidi, lukanu lu Yehova luela ba luvukisa batu bobo bela balula mintima mu thangu bela mona mbebusulu yi Babiloni dinneni. Enati buawu buididi, yimonikini ti thangu yawu yayi yiluta vanina ndubu mu nsualu nsualu. Tadila diambu diadi: Mambu momo tukubakamba thangu yayi, malenda tula ti beba kumabambukila moyo mu thangu beni yina. (Dedikisa Yehezekieli 33:33.) Bulendakana bela yindudila mu ndubu yo bawa kuidi beto ayi yela kubapusa basangana ayi beto mu tsambudulu yivedila tuamina thangu yimana. Banga phila bubela nsungi wunloko ku Filipi nio wuyiza balula ntima mu thangu kamona “ntoto wunikuka ngolo,” bulendakana phe buawu buela bela batu bobo bakadi balula mintima thangu yayi, bela mibalula mu thangu bela mona mbebusulu yi Babiloni dinneni yo yime mana vuadikisa nza yayi.​—Mav. 16:25-34.

TUETA SAMUNA BILA TUETA ZOLA YEHOVA AYI DIZINA DIANDI

11. Phila mbi tueta vanina Yehova nkembo, n’zitusu ayi lulendo? (Tsongolo 4:11) (Tala phe zifoto.)

¹¹ Bila kilutidi mfunu tueta samunina nsamu wumboti kidi ti tueta zola Yehova Nzambi ayi dizina diandi di busantu. Tueta mona kisalu kieto ki tsamununu banga phila yi zitisila Yehova Nzambi’eto yo tueta zola. (Tanga Tsongolo 4:11.) Tueta kikinina mu ntim’eto  woso ti Yehova Nzambi fueni tambula nkembo, n’zitusu, ayi lulendo lu bisadi biandi bikuikama. Tueta kumvana nkembo ayi n’zitusu, mu thangu tueta longa batu bidimbu bio bimmonisa ti “niandi wuvanga bima bioso” ayi ti tuidi mu luzingu bila niandi wutuvana luawu. Tueta kumvana lulendo lueto​—mu thangu—​tueta sadila thangu’eto, zingolo zieto, ayi bima bio tubeki mu diambu di tuluta kukivana mu kisalu ki tsamununu enati diluaku didi. (Mat. 6:33; Luka 13:24; Kol. 3:23) Mu kondo finda phaka tueta yangalala tubila Nzambi yo tueta zola. Tueta mona diaka ti tufueti kamba kaka batu bankaka dizina diandi ayi tsundu yi dizina beni. Bila mbi?

12. Bue tueta santisila dizina di Yehova mu kisalu kieto ki tsamununu?

¹² Luzolo lueto kuidi Yehova, lueta tutuma tusantisa dizina diandi. (Mat. 6:9) Tutidi buela mioko mu vedisa dizina diandi mu phila yoyi Satana kadifuisila tsoni mu luvunu luandi. (1 Mo. 3:1-5; Yobi 2:4; Yow. 8:44) Mu kisalu kieto ki tsamununu, phuila yingolo tuidi yi nungisa dizina di Nzambi’eto mu tuba kiedika mu diambu di dizina beni kuidi ba boso bo batidi kun’wa. Tutidi ti kadika mutu kazaba kadulu kiandi kio kilutidi tola; luzolo, ti phil’andi yi yadila yidi yisonga, ayi yilulama ayi Kipfumu kiandi, kieka nduka manisa mambu moso maphasi ayi maki nata ndembama ayi mamboti mu dikanda di batu. (Nku. 37:10, 11, 29; 1 Yow. 4:8) Mu thangu tulembo nungisa lukumu lu Yehova mu kisalu kieto ki tsamunu, tueta santisa dizina diandi. Tuidi phe mu zikhini, bila tueta vanga mambu mo meta tombana kuidi Bambangi zi Yehova. Mu phila mbi?

13. Bila mbi dididi diambu di lukumu mu tedolo Bambangi zi Yehova? (Yesaya 43:10-12)

¹³ Yehova wutusobula tuba “Bambangi” ziandi.  (Tanga Yesaya 43:10-12.) Mu mimvu mio mime vioka kumanima, nkanda mosi wu kimvuka kintuadisi wutuba ti: “Lukumu lunneni lo lueta tuyangidika luidi lutedolo Bambangi zi Yehova.” c Bila mbi buididi buawu? Tutadila kifuani kimosi. Yindula theti enati bafundidi mu diambu dimosi dimbimbi, mawu ba phuila yisobula mutu nio zebi nio wunta kimbangi ti mambu beni madi mayuya ayi nio widi bumutu bumboti ayi nio fueni tudulu ntima. Bo katusobula tuba Bambangi ziandi, Yehova wutumonisini ti wutuzebi bumboti ayi weta kututudila ntima muingi tuta kimbangi ti niandi kaka Nzambi yi kiedika. Tueta mona ti tuidi batu ba lukumu mu ba Bambangi ziandi mu thangu tueta baka maluaku mazabikisa dizina diandi ayi mu nuanisa mayuya moso mo batu beta tuba, mu diambu di niandi. Beto kubutudila, matu baka lukumu lufuana mu ba Bambangi zi Yehova!—​Nku. 83:18; Lom. 10:13-15.

TUELA TATAMANA SAMUNA TII KU TSUKA

14. Mambu mbi mangitukulu meka nduka salama mu bilumbu bilembo yizi kuntuala?

¹⁴ Tuidi na phuila yiwombo yi mona mambu momo meka nduka salama mu bilumbu binkuiza! Mu lusakumunu lu Yehova, tuidi na vuvu ti batu bawombo maba kikinina kiedika tuamina ziphasi zinneni zitona. Mu buela, tuidi mu zikhini mu thangu tuela mona thangu yo yilutidi phasi—​ziphasi zinneni—​batu batotuka mu nza yi Satana!—​Mav. 13:48.

15-16. Mambu mbi matu tatamana vanga ayi tii thangu mbi?

¹⁵ Tuedi zinga ko mioko mu thangu tulembo vingila bila tuidi na kisalu kisala. Tuidi na diluaku di samuna nsamu wumboti wu Kipfumu ki Nzambi mu nza yimvimba​—kisalu kio kisi be bue vutukulu ko. Ayi mu kondo zinga mioko, tufueti tatamana lubula batu mambu momo meka nduka salama. Batu bafueti zaba ti tsuka yi nza yayi yimbimbi, yilembo yizi nsualu. Diawu, mu thangu tsambusulu yela kuiza, bela zaba ti tsangu yoyi tubasamunina kuidi Yehova Nzambi yiba.​—Yeh. 38:23.

¹⁶ Diawu, nzengolo mbi tufueti baka? Luzolo luawu kutuvana phuila yisamuna​—yi zola batu ayi dilutidi, zola buwombo Yehova Nzambi ayi dizina diandi—​matu tatamana samuna mu phuila yoso ayi mu nsualu nsualu ayi tii Yehova kela tuba niandi veka “Yimeni!”