DISOLO DI NDONGOKOLO 21
NKUNGA 107 Ndakisa ya bolingo ya Nzambe
Bue busobudila mutu nio tidi kuela
“Nani wulenda bakula nketo wufuana? Lutidi luvalu viokila matadi ma kitoko ma korayi.”—ZIN. 31:10.
MAMBU MO MADI MU KHATI DISOLO DIADI
Zitsikudukusu zi Bibila zilembo tubila phila yoyi mutu kalenda sobudila mutu wufuana nio fueti kuelana yandi ayi phila yoyi bakhomba zi kimvuka balenda sadisila batu bo batidi kuela.
1-2. a) Mambu mbi mukristu kafueti keta tadila bumboti mboti mu thangu katidi zola mutu nio kankana kuela? b) “Zola mutu mu diyindu di kunkuela,” mbi yin’zola sundula? (Tala “Tsudukusulu yi ziphova.”)
MAWU yangalala kuela? Kadiambu ko dikuela dinatanga ko thangu zioso zikhini, bakristu bawombo bo bakambu kuela buba mintueni voti bakulutu, phuila yingolo bakala yikuela. Bukiedika, tuamina wutomba kuela, wufueti ba wukubama mu zimbongo, mu kipheve ayi bongisa mayindu maku mu mambu matadidi dikuela. a (1 Ko. 7:36) Enati buawu buididi, buna mawu baka dikuela dimboti.
2 Diawu, dikala ko thangu zioso diambu dikambulu phasi baka mutu wufuana nio lenda kuelana yaku. (Zin. 31:10) Buba mu thangu beki mutu nioni tidi zaba bumboti, dikala ko diambu dikambulu phasi mu tona zolasana. b Mu disolo diadi tueka ntubila mambu mo malenda sadisa bakristu bo bakambu kuela babaka batu bo balenda kuelana yawu ayi batona zolasana. Matu zaba phe phila yo bakhomba zi kimvuka balenda sadisila batu bo batidi kuela.
MBI BILENDA KUSADISA WUBAKA MUTU WUFUANA NIO WUFUETI KUELA
3. Mambu mbi mukristu nio wukambu kuela kafueti tadila mu thangu kalembo tombi mutu nio katidi kuela?
3 Enati tidi kuela, bulutidi mboti wuzaba bikadulu bio wuntomba kuidi mutu nioni tidi kuela tuamina wun’zola. c Enati wukadi butudila, wulenda tula nzimbala mu kue zodi mutu nioni kasi fuana ko kuidi ngeyo. Bukiedika, woso mutu tidi kuela, kafueti sobula mutu nioni wubaka mbotama. (1 Ko. 7:39) Vayi yawu ko yintia tuba ti batu boso bo babaka mbotama buna bafueni kuelu. Wulenda kiyuvula: ‘Zikhanu mbi ndidi mu luzingu? Bikadulu mbi bilutidi mfunu kuidi mutu nio thidi kuela? Mambu mo ndintomba kuidi mutu nio thidi kuela madi mafuana?’
4. Mambu mbi batu bankaka batomba mu zindombolo ziawu?
4 Mu kondo finda phaka, wutula lusambulu mu diambu di wubaka mutu nio tidi kuela enati phuila beni yawu widi. (Flp. 4:6) Zaba kuaku ti Yehova kavananga ko mutu tsila yi mutu nio fueti kuelana yandi. Vayi weta tadila ziphuila ayi mayindu maku ayi kalenda kusadisa wubaka mutu nio tidi kuela. Diawu tatamana kunkamba ziphuila ziaku ayi mayindu maku. (Nku. 62:8) Sambila muingi wuba mvibudulu ayi nduenga. (Zaki 1:5) John, d khomba mosi wubakala wukambu kuela wukala ku Etas-Unis, tubidi mambu mo keta lomba mu minsambu miandi: “Ndikamba Yehova bikadulu bio ndieta tomba kuidi mutu nio thidi kuela. Ndieta sambila muingi ndibaka diluaku didengana mutu nio ndilenda kuela ayi ndieta lomba phe kuidi Yehova ndiba bikadulu bio bifueti tula ti ndiba nnuni mboti.” Tanya, khomba mosi wunketo ku Sri Lanka, tubidi ti: “Mu thangu ndieta tomba mutu nio lenda kuelana yama, ndieta lomba Yehova katsadisa ndiba wukuikama, ndiba na mayindu mamboti, ayi ndiba mu mayangi.” Buba ti wukadi fika baka mutu nioni wulenda kuela, Yehova wuveni tsila yidukisa ziphuila ziaku, kuzola ayi kutudila thalu mu phila yifuana.—Nku. 55:22.
5. Maluaku mbi bakristu bo bakambu kuela badi ma dengana mutu nio weta zola Yehova? (1 Kolinto 15:58) (Tala phe foto.)
5 Bibila kilembo tukindisa tuba na ‘mambu mawombo mavanga mu kisalu ki Pfumu.’ (Tanga 1 Kolinto 15:58.) Ngeyo luta viokisa thangu yiwombo mu kisalu ki Yehova ayi ngeyo viokisa thangu va kimosi na bakhomba ba babakala ayi babaketo ba phila mu phila, wisi m’baka ko kaka diluaku di ba va kimosi na batu bo balenda kukindisa vayi mawu baka phe diluaku didengana batu bankaka bo bakambu kuela bo badi banga ngeyo, balembo tudi zingolo mu sadila Yehova. Ngeyo tula ngolo mu yangidika Yehova, wela ba mu zikhini zikiedika kiedika.
Enati weta luta ba na mambu mawombo mavanga mu kisalu ki Yehova, ayi weta viokisa thangu yiwombo ayi bakhomba ba phila mu phila ba bakristu, wulenda dengana ayi mutu nioni lenda zolasana yaku (Tala paragrafi 5)
6. Mukristu nio wukambu kuela, diambu mbi kafueti bambukila moyo mu thangu kalembo tombi nio lenda kuelana yandi?
6 Keba, thombolo’aku yi mutu nio tidi kuela, yibika ba diambu dilutidi mfunu mu luzingu luaku. (Flp. 1:10) Zikhini zikiedika kiedika zikala ko kaka mu dikuela vayi mu nguizani’aku ayi Yehova. (Mat. 5:3) Thangu yo wididi wukambu kuela, yawu thangu wididi luve luluta sala buwombo mu kisalu ki Nzambi. (1 Ko. 7:32, 33) Sadila thangu’aku bumboti. Jessica, khomba mosi wunketo wukala ku Etas-Unis nio wuyiza kuedila nduka nduka mu 40 ki mimvu tubidi ti: “Ndiluta kivana buwombo mu kisalu ki tsamununu ayi yawu yitsadisa ndiyangalala mu phila yo ndibela kadiambu ko ndiba phuila yikuela.”
BAKA THANGU YITADILA MUTU NIO WULENDA KUELA
7. Bila mbi dididi diambu dinduenga wubaka thangu yitadila mutu tuamina wunkamba ti wuntidi? (Zingana 13:16)
7 Mbi wulenda tula enati mueni mutu mosi nio mueni ti wulenda kunkuela? Mawe lukumuka mu kue nkambi ti ndilenda kukuela? Bibila kitubidi ti mutu wunduenga weti keta baka nzayilu tuamina kavanga diambu. (Tanga Zingana 13:16.) Yidi diambu dinduenga mu keta baka thangu yitadila mutu mu kitsueki tuamina wunkamba ti wuntidi. “Zisantima zilenda kuandi yonzuka nsualu nsualu vayi zilenda kuandi zimbala phe nsualu nsualu,” butubidi Aschwin wukala ku Pays-Bas. “Ngeyo baka thangu yitadila mutu, wukuiza kue n’zodi ko mu landakana zisantima zi mua thangu yikhufi.” Mu buela, ngeyo baka thangu yitadila mutu, thangu zinkaka wulenda mona ti mutu beni kasi fuan’andi ko kuidi ngeyo.
8. Bue mutu wukambu kuela kalenda tadila mutu nioni katidi kuela? (Tala phe foto.)
8 Bue wulenda tadila mutu nioni tidi kuela mu kitsueki? Mu zikhutukunu zi kimvuka ayi mu maluaku mankaka mo lulenda denginina ayi mutu beni, muawu wulenda muena kipheve kiandi, bumutu buandi ayi mavanga mandi. Banani bakundi bandi ayi mambu mbi beta luta tubila? (Luka 6:45) Zikhanu ziandi zidedikini ayi zio ziaku? Wulenda solula ayi bakulutu ba kimvuka kiandi voti ayi bakristu bankaka bo bayonzuka mu kipheve bo ban’zebi bumboti. (Zin. 20:18) Wulenda yuvula biuvu mu diambu ditadidi bumutu buandi ayi bikadulu biandi. (Lut. 2:11) Mu thangu wulembo tadila mutu, kadi kuntula kaba keti keti. Zitisa zisantima ziandi ayi kadi mana tomba zaba mambu moso mantadidi ayi kadi tomba phe kue banga yandi thangu ka thangu.
Tuamina wukamba mutu ti wuntidi, wufueti baka thangu yinkuntala bumboti mboti mu kitsueki (Tala paragrafi 7-8)
9. Tuamina wukamba mutu ti wuntidi, diambu mbi wufueti keta bela sikididi mu niandi?
9 Thangu zikua wufueti keta tadila mutu tuamina wunkamba ti wuntidi? Enati welukumuka kamba mutu beni, kalenda banzila ti wisi keta yindula ko tuamina wubaka nzengolo. (Zin. 29:20) Mu phila yinkaka, kadi viokisila phe ngolo thangu yiwombo bila wulenda monika banga mutu mengi kuandi baka nzengolo nduka nduka enati mutu beni mebakula ti mayindu widi mu niandi. (Mpo. 11:4) Bambuka moyo ti, tuamina wusolula ayi mutu, kadi ba sikididi ti wufueti kaka kunkuela, vayi wufueti ba sikididi ti widi wukubama bumboti mboti mu diambu di dikuela ayi ba sikididi ti mutu beni nio tidi kuela fueni kuidi ngeyo.
10. Mbi wufueti tula enati bakudi mutu mosi wulembo yangalala vayi ngeyo wukadi kuaku kunyangalala?
10 Mbi wufueti tula enati mueni mutu mosi wulembo yangalala? Enati wukadi kuaku kunyangalala, wummonisa mu mavanga maku ti wummengi kuaku. Yidi diambu dimbimbi mu tula kuidi mutu kamona ti banga wuntidi, koso ko buaw’andi ko buididi kuidi ngeyo.—1 Ko. 10:24; Efe. 4:25.
11. Mu zitisi zio zikala ti batu beta sobudila mutu nketo voti bakala nio kafueti kuela, mambu mbi batu bo bakala mu zitsi beni bafueti tula mu mayindu mawu?
11 Mu zitsi zinkaka, bambuta voti batu bayonzuka balenda sobudila mutu nketo voti bakala nio kalenda kuela. Mu zitsi zinkaka, dikanda voti bakundi balenda bakila mutu nketo voti bakala ayi tula ti badengana muingi batala keni bafueni kuawu kuelana. Enati bakembi wusobudila mutu nketo voti bakala, wufueti tadila ziphuila zi bawu buadi. Ngeyo baka mutu nioni lenda fuana kuidi niandi, wufueti fiongunina bumutu buandi, bikadulu biandi, ayi dilutidi kipheve kiandi. Nguizani yingolo ayi Yehova yawu yilutidi mfunu viokila zimbongo, zinzo nkanda voti nzingulu. Kadi zimbakana ti bakala ayi nketo bo basi ko bakuela, bawu veka bafueti baka nzengolo yikuelana voti nana.—Nga. 6:5.
THONONO YI LUZOLO
12. Enati mueni mutu beni fueni kuidi ngeyo, bue wulenda tonina kunkambila diambu beni?
12 Enati yangididi mutu beni, bue wulenda tonina kunkambila? e Wulenda baka zikhubukulu lusoludila va buangu kioki batu balenda kulumuena, voti mu nzila telefoni. Monisa bumboti mboti mayindu maku. (1 Ko. 14:9) Ti bulendakana, wum’bikila thangu niandi phe kayindula mvutu mbi kalenda kuvana. (Zin. 15:28) Enati mutu beni mengi kuandi, wun’zitisa ayi kadi kunkuika mu kingolo.
13. Mbi wulenda tula enati mutu wukembi ti wutidi? (Kolosayi 4:6)
13 Mbi wulenda tula enati mutu wukembi ti wutidi? Bulendakana mutu beni kibakala kamonisini muingi kiza bati, diawu ba zanti ayi luzitu mu thangu wukumvutudila mvutu. (Tanga Kolosayi 4:6.) Enati yintombana kateka kubikila thangu muingi wuyindula keni wulenda kun’zola, wunkambi. Ti bulendakana, fika kumvana mvutu. (Zin. 13:12) Enati wummengi kuaku, wunkambi bumboti mboti ayi mu zanti yoso. Tutala khomba mosi widi mu dizina Hans ku Autriche mambu mbi kavanga mu thangu khomba mosi wunketo katomba kun’zola: “Ndinkamba nzengolo’ama mu diela vayi mu kondo kumviunga. Ndifika kumvana mvutu bila ndisi tia ko kayindula ti tulenda kuelana. Mu diawu, nditula mo ndilenda tula muingi ndibika tuba mambu voti ndivanga diambu dio dilenda tula kayindula ti ndilenda balula mayindu mama.” Vayi enati wulembo yangalala mutu mu diambu di lukuelana, lufueti soludilanga ziphuila zieno ayi mambu mo wumosi mosi mu beno keta tomba mu diambu di lutatamana tii ku dikuela. Mambu mo wumosi mosi mu beno keta tomba mu diambu ditedi dikuela, malenda ba maviakana mu tadila mutu ka mutu phila yo kayonzukila ayi mu tadila mambu mankaka.
BUE BATU BANKAKA BALENDA SADISILA BAKRISTU BO BAKAMBU KUELA?
14. Bue tulenda sadisila bakristu bo bakambu kuela mu ziphova zieto?
14 Bue tulenda sadisila bakristu bo batidi kuela? Wumosi wu ziphila yidi mu kukikenga mu ziphova zio tuntuba. (Efe. 4:29) Tulenda kiyuvula biuvu biabi: ‘Ndieta soka batu bo batidi kuela? Mu thangu ndieta mona khomba wu bakala ayi wu nketo balembo solula, ndieta banzila ti mayindu ma kuelana badi?’ (1 Tim. 5:13) Tufueti keba mu kambu pusa bakristu bo bakambu kuela bayindula ti basi ko bafuana mu bila kioki ka basidi ko bakuela. Hans, nio tuketidi tubilanga, tubidi ti: “Bakhomba bankaka ba babakala beta kundiuvula, ‘Bila mbi ka wukuedidi ko? Bila wume yonzuka.’ Ziphova zi phila yina ziyangidikanga ko batu bo bakambu kuela ayi zieta kubatuma baba phuila yikuela.” Bulutidi mboti mu tomba maluaku mu niemisa bakristu bo bakuedidi ko!—1 Tes. 5:11.
15. a) Mu tadila zitsikudukusu zio zidi mu Loma 15:2, mbi tufueti keta tadila tuamina tusadisa mukristu kabaka nio kalenda kuela? (Tala phe foto.) b) Mambu mbi mamfunu ma video malutidi simba ntim’aku?
15 Buabu ti tumueni ti khomba mosi wubakala ayi wunketo bafueni kuawu kuelana? Bibila kilembo tusudikisa phila yo tufueti tadila zisantima zi batu bankaka. (Tanga Loma 15:2.) Batu bawombo bakambu kuela, batianga ko ti ba basobudila mutu nio balenda kuela, diawu tufueti kinzika mayindu mawu. (2 Tes. 3:11) Bankaka beta yangalala lusadusu beni, vayi tulendi ko kubutudila enati basi kutukamba ko. f (Zin. 3:27) Bakristu bankaka bakambu kuela, batianga ko bathumu basobudila mutu nio balenda kuela mu kinzimbukila. Lydia, ntueni mosi wunketo wukambu kuela wukala ku Alemagne, tubidi ti: “Wulenda tedisa khomba wubakala ayi wunketo bo bakambu kuela mu dingumba di batu bawombo muingi babaka diluaku dimoninina ayi kubabikila thangu basoludila.”
Nkangu wu bakristu wuveni kuidi bakhomba bakambu kuela babaka diluaku di dengana (Tala paragrafi 15)
16. Diambu mbi bakristu bakambu kuela bafueti bambukila moyo?
16 Beto boso—buba bakambu kuela ayi bakuela—tulenda ba mu luzingu lu zikhini ayi lu mayangi! (Nku. 128:1) Diawu enati mayindu ma kuela widi vayi wubeki ko nio wunkuela, tatamana tula mayindu maku mu kisalu ki Yehova. Khomba mosi wunketo wukala ku Macao widi mu dizina di Sin Yi, tubidi ti: “Ngeyo dedikisa thangu yo wela viokisa ayi nnuni’aku voti ayi nketo’aku ku Paladiso, thangu yo wubela mu kambu kuela yawu yilutidi yikhufi. Luta yangalala buwombo thangu beni ayi wuyisadila bumboti.” Vayi mambu mbi meta salama enati beki mutu nioni wulenda kuela ayi tona kifiansaye? Enati widi na mutu nio weta solula yaku muingi lukuelana, mbi wulenda tula muingi lununga tii ku dikuela? Mawu mambu tuela tadila mu disolo dinkuiza.
NKUNGA 137 Basi ya sembo, basi bakristo
a Muingi wuzaba keni widi wukubama mu diambu di kuela, tala disolo mu jw.org dio ditubidi “Fréquenter (partie 1)—Suis-je prêt ?”
b TSUDUKUSULU YI ZIPHOVA: Mu disolo diadi ayi diodi dilandikini ziphova zola mutu mu diyindu di kunkuela (frequentation voti fiançaille) zinsundula thangu yoyi bakala ayi nketo bafueti zabana bumboti mboti muingi batala keni bafueni kuawu kuelana. Mu zitsi zinkaka, bakala ayi nketo bo batidi kuelana beta dengana va kimosi mu diambu di babaka diluaku di zabasana. Kifiansaye kieta tona mu thangu bakala ayi nketo basoludi bumboti mboti ti bazolisini ayi beta tatamana nguizani beni tii bela kuelana voti ti mambu makadi diata bumboti balenda baka nzengolo yi zenga kifiansaye.
c Muingi tusudika bumboti mboti, ziparagrafi zio zilandikini mazi tumonisa bue bakala kafueti sobudila bumboti mboti nketo nio fueni mu niandi. Vayi mambu beni mawu kuandi phe mantombana kuidi bakhomba ba baketo bo bakambu kuela.
d Mazina mankaka balulu ma balulu.
e Mu bibuangu binkaka khomba wu bakala kalenda solusa khomba wunketo mu diambu di batala ti balenda kuelana. Khomba wunketo phe kalenda kuandi yuvula khomba wu bakala keni kalenda kuandi kunkuela. (Luti 3:1-13) Muingi wuluta zaba mambu mankaka, tala disolo “Les jeunes s’interrogent . . . Comment lui dire ce que je ressens pour lui ?” mu Réveillez-vous ! yi 22 Octobre 2004.
f Tala video mu jw.org Ils réussissent à « livrer un dur combat pour la foi » : Ceux qui sont célibataires.
