1 Juão 4:1-21
4 Hagustariwaita, teperuyari panye kuaita espirituita, maa pesaã pemaa ainta kuaita espirituita Deus suiwaraita ainta u timaa, nyãse siya utitikawaita gananiwerawaita aintauwata kua mundu upe.
2 Ipupe pepuderi pekuawa kua espiritu Deus suiwara, Deus suiwara panye kua espiritu umbeuwaa Jesus Kristu uri ipira upe.
3 Timaa Deus suiwara kua espiritu tiwa umbeu Jesus resewara. Aete iespiritu kua Kristu ruanyana kua pesenduwaa sese uri kuri, asui kuiri uikuana kua mundu upe.
4 Setainaita, Deus suiwaraita penye, pemuserana kuaita utitikawaita gananiwerawaita, nyãse kirimbawa piri kua uikuwaa pepia upe isui kua uikuwaa kua mundu upe.
5 Mundu suiwaraita ainta, asui aintaumbeu kua mundu suiwarawaa, asui kuaita mundu upewaraita aintausendu ainta supe.
6 Deus suiwaraita yande. Asui awa ukuawa Deus usendu yande arama, asui awa tiukuawa Deus timaa usendu yande arama. Asui irumu yakuawa kua espiritu supiwa, irumu yuiri yakuawa kua espiritu gananiwerawaa.
Gustarisawa kua Deus
7 Hagustariwaita, puranga yayugustari, nyãse Deus suiwara kua gustarisawa, asui kua ugustariwaa unaseri Deus sui, ukuawa yuiri Deus.
8 Kua tiwa ugustari timaa ukuawa Deus, nyãse gustarisawa kua Deus.
9 Ipupe umuyukuawa yanepiterupi kua gustarisawa Deus suiwara umundu resewara Taira yepenyuwaa kua mundu upe yapaka arama yande irumu.
10 Asui sese yamaa gustarisawa timaa yagustari resewara Deus, maa ugustari resewara yande, ape umundu Taira upurara arama yanepekadu resewara.
11 Hagustariwaita, Deus ugustari rame yande turusu, yarikute yayugustari yuiri.
12 Tire awa umaa Deus. Yayugustari rame Deus uiku yanepia upe, asui ugustarisawa uyukiriari yanepia upe.
13 Sese yapuderi yakuawa yaiku ipia upe, asui uiku yuiri yanepia upe uxari resewara yande arama iEspiritu.
14 Asui yamaawana, yambeuwana yuiri yanepaya Deus umundu Taira kua mundu kiti umukaturu arama mundu puraita.
15 Awa umbeu Jesus resewara Deus raira ae, Deus uiku ipia upe, uiku yuiri Deus ipia upe.
16 Ape yakuawate yaxari yuiri yanepia sese kua gustarisawa Deus umeewaa yande arama. Gustarisawa kua Deus, asui kua uikuwaa gustarisawa rese uiku Deus ipia upe, asui Deus uiku yuiri ipia upe.
17 Asui kua gustarisawa uyukiriari puranga yanerese, suuri arama yamanduari kua anyu aramawaa ara, nyãse yaiku kua mundu upe kuaye uikuwaa yawe.
18 Tiyamaa sikiesawa gustarisawa rese, maa kua gustarisawa purangawaa umburi isui panye sikiesawa. Nyãse umpurarakarisawa kua sikiesawa, asui kua uiku sikiesawa upe timaa puranga uyukiriari gustarisawa rese.
19 Yagustari nyãse uyupiru ugustari yande.
20 Yepe umbeu rame:
—Hagustari Deus; asui puxi umaa sumuara, gananiwera ae, nyãse kua tiwa ugustari kua umaawaa tiupuderi ugustari Deus kua tiwa umaa.
21 Aete kua Deus umbeuwaa yande arama:
—Kua ugustari Deus urikute ugustari sumuara yuiri.
