1 Kurintuwaraita 1:1-31
1 Ixe Paulu, ae yuiri yanemu Susteni. Kuxima usenui ixe kua Deus uxari arama Jesus Kristu umundu ixe.
2 Ainta supe kuaita Deus ingreja puraita Kurintu upewaraita, kuaita ixupe aramawaita aintauiku resewara Jesus Kristu ipia upe, aintairumu kuaita upuranduwaita yaneruixawa Jesus Kristu irumu, aintaruixawa yaneruixawa yuiri.
3 Yanepaya Deus uxari ipurangasawa penye arama uxari timaaresesawa yuiri, irumu kua yaneruixawa Jesus Kristu.
Paulu umee purangawaa aintarese
4 Hamee perese purangawaa seDeus supe yawewarawate, sesewara kua purangawaa Deus uxari penye arama Jesus Kristu resewara.
5 Kristu resewara uxari rikuwaa penye, uxari pepurungita puranga, uxari ukuawasawa purangawaa pepia upe.
6 Ape kua nyenga purangawaa Kristu rese uiku pepia upe.
7 Sesewara periku panye Espiritu uxariwaa pepia upe pesaru pukusawa kua yaneruixawa Jesus Kristu uri.
8 Umukaturu arama penye ate upawa kuri kua ara, tiarama kuri umbeu perese pepekadu pepuamu kuri irumu umaa kua yaneruixawa Jesus Kristu.
9 Deus umunya kuri kuaye umbeuwaa yawe, aete kua usenuiwaa penye pegustari arama Taira, kua yaneruixawa Jesus Kristu.
Uputari yepewasu aintaumanduarisawa
10 Kirimbawa hambeu penye arama penye semuita sera rese kua yaneruixawa Jesus Kristu, hambeu penye arama tiarama pemanduari amu kiti amuita sui, maa yepenyu arama pemanduari, yepenyu arama pepurungita.
11 Nyãse kuaita Klue ruka puraita aintaumbeu ixe arama peresewara peyuyakawa penye perumuaraita irumu.
12 Nyãse yawe aintaunyee yepeyepe pesuiwara:
—Paulu yara ixe, amuita umbeu Apulu yara ixe, amuita umbeu Sefa yara ixe, amuita umbeu Kristu yara ixe.
13 Maitaa siya kua Kristu? Maitaa aintaunupa Paulu uyari kurusa rese peresewara? Maitaa aintaubatizari penye Paulu rera rese?
14 Hamee purangawaa nyãse tihabatizari penye, anyunte Krispu, Gaiu yuiri,
15 Tiarama nẽ awa umbeu habatizari penye serera rese.
16 Habatizari Estefanu ruka puraita yuiri, tihamanduari sã habatizari amu.
17 Nyãse timaa Kristu umundu habatizari arama miraita, maa umundu hambue arama kua nyenga purangawaa. Timaa hambue ainta hakuawasawa irumu tiarama hamutenyuntu kua Kristu umunyawaa yande arama kurusa rese.
Kristu kurusa rese
18 Nyãse kuaita uyusupariwaita aintaumanduari tenyuntu kua yambeuwaa kurusa rese, maa kua nyenga kurusa rese yande arama yande umukaturuwaita Deus kirimbawasawa ae.
19 Nyãse yawe aintaumpinima kuxima: Haxari kuri aintaukuawasawa ukanyemu kuaita ukuawaita, haxari kuri aintaukuawa tenyuntuwara aintaumanduarisawa.
20 Mametaa kua ukuawawaa? Mametaa kua umpinimawaa? Mametaa kua uputariwaa ukuawa kua ara? Maitaa timaa Deus uxari tenyuntuwara kua mundu ukuawasawa?
21 Timaa Deus uxari aintaukuawa ae aintaukuawasawa irumu kuaita mundu upewaraita, maa irumu kua inyenga yambuewaa, yande tiwaita ukuawa, Deus uputari umukaturu kuaita uxariwaita ipia sese.
22 Kuaita judewita aintauputari aintaumaa yamunya milagri, asui greguita uputari ukuawa panye ukuawasawa.
23 Maa yambue sese kua Kristu aintaunupawaa kurusa rese, maa timaa judewita aintaukuawa mayesawataa kua nyenga, asui greguita aintaumanduari tenyuntuwara kua nyenga.
24 Maa kuaita Deus usenuiwaita aintasuiwara kuaita judewita greguita yuiri yambue ainta Kristu rese, Deus kirimbawasawa ae, Deus ukuawasawa ae yuiri.
25 Ape kua Deus akangaiwasawa puranga piri apigawaita ukuawasawa sui. Asui Deus pituasawa kirimbawa piri apigawaita kirimbawasawa sui.
Deus usenuiwaita kuaita uruyariwaita
26 Pemaa maye Deus usenuiwana penye, semuita, timaa usenui siya ukuawaita apigawaita ukuawasawa irumu, timaa yuiri siya kirimbawawaita timaa yuiri siya rikuwaita.
27 Maa Deus usenuiwana tiwaita ukuawa uxari arama aintaumutiĩ arama kuaita ukuawawaita, usenuiwana kuaita pituawaita aintaumutiĩ arama kuaita kirimbawawaita.
28 Deus uparawaka kuaita pirasuawaita, uparawaka kuaita aintaumburiwaa, kuaita tiwaita yamanduariwaa yuiri umukuaira arama kuaita yamanduariwaa.
29 Uparawaka yawewaa tiarama yepe umanduari puranga ae ukuawasawa irumu Deus umaa.
Yariku purangawaa Kristu irumu
30 Maa iyaraita arama penye Kristu Jesus rese, uxari yande arama Kristu ukuawasawa, uxari yande arama ipurangasawa, uxari Deus supe arama yande, uxari Kristu upiripanawaita yande umuyuiri arama yande ixupe arama.
31 Ape kuaye aintaumpinimawaa yawe kuxima: Kua uputari umbeu puranga sesepawa, urikute umbeu puranga sese kua Yaneruixawa.
