1 Kurintuwaraita 10:1-33
10 Semuita, haputari pekuawa aintauiku nuvẽ wirupi yaneramunyaita aintausasawa parana turusuwaa rupi panye.
2 Aintauyubatizari Muize rese nuvẽ upe, parana turusuwaa upe yuiri.
3 Aintaumbau panye kua timbiu Deus uxariwaa.
4 Aintauu panye kua ii Deus uxariwaa, aintauu kua ii uriwaa ita sui Deus uxariwaa uriwaa aintarakakuera, aete Kristu ae kua ita uriwaa aintarakakuera.
5 Maa tisuuri Deus umaa siya aintasuiwara, ape uxari aintauyumburi kampu kiti.
6 Deus uxari yakuawa aintaresewara yawaite yamuasi puxuwerawa aintayawe.
7 Terepurandu idulu irumu aintayawe kuaita yepeyepeita, nyãse yawe aintaumpinima aintarese kuxima: Kuaita miraita aintaupuamu meza ruaki aintaumbau arama aintauu arama yuiri, asui aintaupuamu aintaupurasi.
8 Tiyapuderi yamunya tenyuntu yanepira irumu aintayawe kuaita yepeyepeita ape aintaumanuana ainta vinti tres mili aintasiyasawa kuaita uwariwaita aintairumu yepe ara upe.
9 Tiyapuderi yasaã yaneruixawa aintayawe kuaita yepeyepeita ape aintaukanyemu buya usuu rire ainta.
10 Tiyapuderi yapurungita Deus rese aintayawe kuaita yepeyepe kuxima; aintaupurungita ainta asui kua umukanyemusara uxari aintaukanyemu arama.
11 Deus uxari aintaupurara tiarama aintaumunya mukuĩsawa aintapekadu, asui aintaumpinima aintaresewara papera upe yakuawa arama yande urikuwaita kua purangawaa uriwaa anyu aramawaa ara upe.
12 Ape kua umanduariwaa uiku santa, pexari umaa isui yawaite uwari.
13 Tire aintausaã penye pemunya arama puxuwerawa amu kiti aintasui kuaita apigawaita panye. Puranga Deus umunya penye arama, tikuri uxari aintausaã penye pekirimbawasawa sui, maa aintausaã irumu kuri penye uxari kuri pekuawa peyawawaa isui, ape kuri pepuderi peaguentari.
Yayawawa arama idulu sui
14 Penye hagustariwaita, peyawawaa aintasui aintaumbeu irumu puranga ainta supe kuaita idulu.
15 Hambeu penye kuaye apigawa ukuawawaa yawe, pemaa maye hambeu.
16 Kua kupu uabensuari arama yande kua yabensuariwaa aete yamukame arama yaiku Kristu ruwi rese. Kua pão yampenawaa aete yamukame arama yepewasu yaiku Kristu ipira upe.
17 Siyawaita yande maa yepenyu pão yande, yepenyu Kristu ipira yande, yawesawa kua yauwaa; yepenyu pão panye yande.
18 Pemaa maye aintaumunya kuaita israelitaita, kuaita umbauwaita aintauyukáwaa Deus supe yepewasute ainta aintausapiwaa rendawa rese.
19 Mayesawataa kua hambeuwaa? Maitaa purangawaa kua aintauyukáwaa idulu supe? Maitaa purangawaa kua idulu?
20 Umbaa, anyunte hambeu penye arama:
—Aintaumee purangawaa demuniwita ainta supe timaa Deus supe kuaita tiwaita uruyari. Tihaputari peajudari demuniwita aintairumu.
21 Tipepuderi peu yaneruixawa kupu sui demuniwita kupu sui yuiri. Tipepuderi pepuamu yaneruixawa meza ruaki demuniwita meza ruaki yuiri.
22 Maitaa kuri yaxari Deus umuasi? Maitaa kirimbawa piri yande isui?
Kirimbawa yamunya purangawaa
23 Yapuderi yamunya panye, maa tipanye yamunyawaita umunya puranga yande arama. Yapuderi yamunya panye, maa tipanye yamunyawaita uxari kuri yakuawasawa uyukiriari puranga.
24 Tepesikari pemunya puranga penye aramapawate, maa pesikari pemunya puranga ainta supe amuita.
25 Pepuderi pembau panye kua aintauvenderiwaa merkadu upe, tepepurandu maa suiwarataa ae.
26 Nyãse yaneruixawa yara kua mundu, panye mundu upewaita yuiri.
27 Uputari rame pembau irumu kua tiwa uruyari, peputari rame pemaa ipiri, pepuderi pembau panye uxariwaa penye arama; tepepurandu maa suiwarataa.
28 Maa umbeu rame, penye arama aintauyuká ae idulu supe arama, tepembau ae yawaite kua umbewaa umanduari peruyari idulu.
29 Perumuara resewara tepembau ae. Marantaa amu umanduari umbeu serese Kristu uyurawa resewara ixe yawewaa sui?
30 Hamee rame purangawaa Deus supe hambauwaa rese, marantaa yepe umbeu puxi seresewara sesewara kua hameewaa sese purangawaa?
31 Ape rembau rame reu rame yuiri, remunya irumu maantu, remunya panye Deus supe remee arama purangawaa ixupe aintairumu.
32 Tepexari aintaumanduari puxi perese kuaita judewita, timaa yuiri tiwaita judeu, tiyuiri Deus ingreja puraita.
33 Ape ixe yuiri haputari hamusuuri ainta panye. Tihamunya kuaye haputariwaa yawe, maa hamunya puranga ainta supe panye umukaturu arama ainta panye.
