1 Kurintuwaraita 13:1-13
13 Hapurungita rame ixe aintanyenga rupi panye apigawaita anjuita yuiri, tikuri maa arama ixe arama ainta supe amuita tirame hagustari ainta, nyãse puxi senyenga usika aintaapisa kuara upe kuaye sinu kirimbawawaa yawe, feru yawe yuiri yanupa irumu ae tirame maa hagustari ainta.
2 Hakuawa rame hatitika puranga Deus nyenga, hakuawa rame panye iwasuwaa yakuawa, panye yuiri yamanduarisawa, haxari rame sepia Deus rese kirimbawa hamburi arama kuri kua iwitera, tenyuntuwara maa ixe tirame hagustari amuita.
3 Haxari rame pirasua supe panye semaa, haputari rame maa aintausapi ixe, timaa nungara haganyari tirame hagustari amuita.
4 Kua gustarisawa uxari tiyanepiaiwa yande, uxari yuiri puranga yayumaa, tiuxari yamuasi, timaa uxari yamanduari puranga yanerese, timaa yuiri uxari yamanduari yakuawa piri amuita sui.
5 Kua gustarisawa tiuxari puxi yasuaxara amuita, tiuputari aintaumunya kuaye yaputariwaa yawe, timaa uxari ipiaiwawaa yande, tiuputari yamuruanyana yaneruanyanaita.
6 Kua gustarisawa tiuxari suuriwaa yande puxuwerasawa resewara, maa uxari suuri yanepia aintaumunya rame puranga.
7 Kua gustarisawa uxari yapurara aintairumu; uxari yaruyari panye; uxari yasaru uikupuku; maantu puxuwerawa uri sese uaguentari irumu.
8 Kua gustarisawa tikuri upawa; maa kua nyenga aintautitikawaa upawa kuri; kua amuita nyenga upawa yuiri kuri; ukuawasawa yuiri upawa kuri.
9 Nyãse tire puranga yakuawa, tiyuiri puranga yatitika.
10 Maa mairame kuri uri kua purangawaa, ape kua tiwa puranga upawa kuri.
11 Taina ramere ixe hapurungita kuaye taina yawe, hayusaã kuaye taina yawe, hamanduarisawa kuaye taina yawe, asui tuyuwe rameana ixe haxari sesui taina ukuawasawa.
12 Nyãse kuiri yamaa pitunawasu upe kuaye yamaawaa waruwa upe, maa yamaa kuri suaxara kuayentuana. Kuiri yakuawa kuaira maa yakuawa kuri panye kuaye ukuawa yawe serese.
13 Ape yawewarawate kuri aintauiku kuaita musapiri; uruyarisawa, usarusawa gustarisawa yuiri, maa puranga piri aintasui aete kua gustarisawa.
