1 Kurintuwaraita 14:1-40
14 Pesikari pegustari amuita supiwa, pepurandu Deus uxari penye arama kua Espiritu uxariwaa, pesikari kirimbawa petitika arama inyenga.
2 Nyãse kua upurungitawaa amu nyenga rupi upurungita Deus supe, timaa apigawa supe, nyãse tiawa ukuawa kua nyenga, maa Espiritu uxari kua umbeu kua tiwa yakuawa.
3 Asui kua utitikawaa Deus nyenga umbue apigawaita aintauiku arama santa Deus irumu, aintauxari arama aintapekadu suuri arama kuri aintapia.
4 Kua upurungitawaa amu nyenga rupi uyumbue ae pawantu. Maa kua umbuesara uajudari kuaita ingreja supe aramawaita.
5 Haputari pepurungita amu nyenga rupi, maa kirimbawa piri haputari petitika arama Deus nyenga aintausendu arama panye. Kua utitikawaa Deus nyenga puranga piri isui kua upurungitawaa amu nyenga rupi tirame awa umbeu ingreja supe arama mayesawataa kua umbeuwaa.
6 Kuiri semuita, hayuiri rame pepiri hapurungita rame amu nyenga rupi, maitaa hapuderi hawajudari penye puranga? Maitaa hapuderi hawajudari penye tirame hambeu penye yepe nyenga Deus uxari ixe arama? U yakuawasawa rese, u umbuesawa rese u nyenga iwasuwaa rese.
7 Kuaita tiwaita upaka kuaye flauta yawe arpa yawe yuiri, tirame aintaupeyu puranga ainta maitaa kuri yapuderi yakuawa kua aintaupeyuwaa?
8 Aintaupeyu rame trumbeta pitua usenui arama surara, maitaa aintauyumukaturu aintaumunya arama kera?
9 Yawete yuiri penye, pepurungita rame penye pitua amu nyenga rupi, maitaa kuri aintaupuderi aintaukuawa kua pembeuwaa ainta supe, anyunte pepurungita iwitu upe.
10 Siya kua mundu puraita nyenga, aintaukuawa mayesawataa aintanyenga aintayaweyawe.
11 Maa tirame hakuawa mayesawataa kua aintanyenga apekatuwara yawe umaa ixe kua upurungitawaa, asui apekatuwara yawe hamaa kua upurungitawaa.
12 Yawete yuiri penye kirimbawa pesikari Espiritu uxariwaa penye arama, ape pesikari peajudari kuaita ingreja supe arama kirimbawa Deus ukuawasawa uyukiriari aintapia upe.
13 Ape kua upurungitawaa amu nyenga rupi urikute upurandu Deus irumu ukuawa arama mayesawataa kua umbeuwaa ainta supe.
14 Hapurandu rame Deus irumu amu nyenga rupi hapurandu kuri sepia sui maa tihamanduari sese sepia upe.
15 Asui maitaa kuri hamunya? Hambeu kuri Deus sepia sui, hambeu kuri hamanduarisawa irumu yuiri. Hanyengari sepia sui hamanduarisawa irumu yuiri.
16 Remee rame purangawaa Deus supe amu nyenga rupi, maitaa aintaupuderi aintaumbeu amem neirumu tirame aintaukuawa mayesawataa kua nenyenga.
17 Repuderi remee purangawaa, maa tirepuderi reajudari amuita tirame aintaukuawa mayesawataa kua nenyenga.
18 Hamee purangawaa Deus supe nyãse hakuawa hapurungita amu nyenga rupi turusu piri panye pesui.
19 Maa ingreja upe haputari hambue amuita ape puranga piri hambeu sinku nyenga aintanyenga rupi isui dezi mili amu nyenga rupi tiwa aintaukuawa.
Yambeu arama uyukuawa aintausendu
20 Semuita, tepemanduari taina yawe. Tepeiku puxuwerawa rese kuaye taina yawe, maa pesikari pemanduarisawa puranga kuaye apigawa yawe.
21 Kuxima Muize umpinima ipapera upe: Hapurungita kuri ixe ainta supe kuaita miraita aintayuru sui kuaita apigawaita upurungitawaita amu nyenga rupi, aintayuru sui yuiri kuaita apekatu suiwaraita, maa tikuri aintausendu ixe arama, yawe unyee Yaneruixawa.
22 Ape Deus uxari aintaupurungita amu nyenga rupi umukame arama tiwaita uruyari umaa arama, timaa uruyari umaa; maa kua utitikawaa umunya puranga ainta supe kuaita uruyariwaita supe arama, timaa tiwaita uruyari ainta supe arama.
23 Aintauyumuatiri irumu panye ingreja supe arama aintaupurungita rame amu nyenga rupi panye ainta, asui aintauwike rame kuaita tiwaita ukuawa, tiwaita uruyari yuiri, aintaumanduari tipekuawa ara.
24 Maa petitika rame Deus nyenga puranga muiri penye peyaweyawe, uwike rame kua tiwa uruyari, kua yuiri tiware ukuawa, pexari sasiyara aintaumanduari aintapekadu; asui panye pepurandu ae maitaa uiku;
25 uyumukame panye kua umunyawaa uyumimisawa upe; asuiwana kuri uyurinipia umbeu purangawaa Deus supe, umbeu kuri peirumu Deus supiwa ae.
Yamunya arama kultu purangawaa
26 Maitaa yamunya semuita? Peyumuatiri irumu pexari yepe uyupiru kansão, amu umbue Deus nyenga, amu umbeu itestemunyu ipia sui, amu umbeu ainta amu nyenga rupi, amu umbeu mayesawataa kua umbeuwaa. Pexari aintaumunya panye puranga arama Deus ukuawasawa uyukiriari aintapia upe panye.
27 Aintaumbeu rame amu nyenga rupi, pexari anyunte mukuĩ u musapiri umbeu, maa timaa yepewasu. Asui pexari amu umbeu mayesawataa kua aintaumbeuwaa.
28 Tirame awa ukuawa mayesawataa kua aintaumbeuwaa, pexari ukiririntu uwapika ingreja upe upurungita ixupe arama aepawa ipia sui Deus supe.
29 Pexari mukuĩ u musapiri utitikawaa Deus nyenga rese, pexari amuita usendu puranga aintaumbeu arama sese kua aintaumbeuwaa.
30 Deus uxari rame yepe nyenga ixupe kua uwapikawaa peruaki pexari ukiririntu kua uyupiruwaa upurungita.
31 Pepuderi petitika Deus nyenga peyaweyawe, aintauyumbue arama panye, suuri arama kuri muiri ainta.
32 Asui aintapia kuaita utitikawaita Deus nyenga aintauruyari kuaita utitikawaita Deus nyenga,
33 Timaa Deus uxari aintaumunya puxuwerawa ingreja upe, maa uxari panye purangawaa tiarama maa rese ainta aintauiku ingreja upe panye kuaita umukaturuwaita.
34 Kuaita kunyaita aintaukiririntu aintauwapika ingreja upe, tiaintaupuderi aintaumbeu maa aintaurikute aintauruyari aintanyenga puranga kuaita serakuenawaita kuaye Deus nyenga kuximawara umbeuwaa yawe.
35 Aintauputari rame aintaukuawa kuaita kunyaita pexari aintaupurandu aintamena irumu aintaruka upe, nyãse timaa puranga kunyaita upurungita ingreja upe.
36 Maitaa penye peyupiru Deus nyenga? Maitaa Deus nyenga usikana pepiri amuita sui?
37 Kua umanduari utitikawaa ae Deus nyenga, kua umanduariwaa uriku puranga kua Espiritu, pexari ukuawa yaneruixawa umundu hampinima penye arama kua hampinimawaa.
38 Timaa yasendu ixupe kua tiwa uruyari kua papera.
39 Ape semuita, pesikari kirimbawa petitika kua Deus nyenga. Tepemuserana ainta kuaita aintaupurungitawaita amu nyenga rupi.
40 Maa pemunya puranga panye, pexari aintaupurungita aintayaweyawe.
