1 Kurintuwaraita 7:1-40
7 Kuiri hambeu penye arama sesewara kua peputari pekuawa. Purangate apigawaita tiainta uyuka aintarimiriku arama.
2 Maa pexari apigawaita uyuka aintarimiriku arama aintayaweyawe, pexari kunyaita aintayaweyawe aintauriku aintamena tiarama aintaumunya puxuwerawa aintapira irumu.
3 Imena urikute umunya puranga ixupe kua ximiriku. Yawete yuiri kua ximiriku urikute umunya imena supe puranga.
4 Nyãse imena iyara kua ipira timaa iyara ae umunya arama kuaye uputariwaa yawe, yawete yuiri kua ximiriku iyara kua imena ipira, timaa iyara ae umunya arama kuaye uputariwaa yawe.
5 Teresaisu nemena, teresaisu nerimiriku. Yepewasu rame peputari peiku peyutirika pepurandu arama Deus irumu ape kuri puranga, maa tepeiku uikupuku perumuara sui yawaite Yurupari uganani penye pemunya arama tenyuntu.
6 Yawe haxari pemunya peputari rame, tihamundu pemunya yawe.
7 Haputari aintauiku seyawe panye, maa Deus uxariana ainta supe aintaukuawasawa aintayaweyawe, tiyepewasu uxari ainta supe arama ae.
8 Hambeu ainta supe arama kuaita tiwaita aintauriku ximiriku, viuvuita supe yuiri, purangate aintauiku yepenyu seyawe.
9 Maa tirame aintaupuderi aintauiku timaarese kunyaita sui purangate aintauyuka aintarimiriku, tiarama aintaugustari aintaumaa kuaita kunyaita panye ipuxuwerasawa irumu.
Urikuita aintarimiriku rese
10 Hambeu ainta supe arama kuaita urikuita aintarimiriku, timaa ixe kua hambeuwaa maa yaneruixawa umbeuwaa ainta supe; kuawaa uriku imena tiupuderi uxari imena.
11 Uxari rame imena uiku arama yepenyu timaa uriku imena ae amu irumu, u umukaturu yuiri irumu kua imena. Asui kua uriku ximiriku tiupuderi uxari kua ximiriku.
12 Kuiri timaa yaneruixawa umbeuwaa maa ixe hambeuwaa ainta supe kuaita amuita, tirame uruyari Deus nyenga kua yanemu rimiriku tikuri upuderi uxari isui ae uputari rame uiku irumu kua kunya.
13 Tirame uruyari yanerendira imena tiupuderi uxari ae uputari rame uiku irumu kua apigawa.
14 Nyãse kua imena tiwa uruyari puranga uiku kua ximiriku irumu. Asui kua kunya tiwa uruyari puranga uiku kua imena irumu. Tirame maa yawe puxuwerawaita maa kua aintamembira, maa Deus supe arama ainta.
15 Maa uxari rame sumuara kua tiwa uruyari, pexari uxari ae. Anyunte aintauyurawa yanemu u yanerendira nyãse Deus usenuiwana tiarama maa rese penye.
16 Inde rerikuwaa nemena, maitaa rekuawa remukaturu kuri nemena? Asui inde yuiri rerikuwaa nerimiriku, maitaa rekuawa remukaturu kuri nerimiriku?
17 Anyunte pexari aintauiku aintayaweyawe kuaye Deus uxariwaa yawe, kuaye aintauiku yawe Deus usenui irumu ainta. Yawe hambeu ainta ingreja yaweyawe.
18 Aintausirkunsidari rame yepe apigawa senundere Deus usenui ae tepexari umukanyemu ae. Kua tiwa usirkunsidari senundere Deus usenui ae tepexari uputari aintausirkunsidari ae.
19 Nyãse timaa arama yamunya sirkunsizão, timaa arama tiarama yamunya sirkunsizão, maa puranga yamunya kuaye Deus uputariwaa yawe.
20 Pexari aintauiku kuaye aintauikuwaa yawe Deus usenuiwaa irumu ainta.
21 Maitaa riku kurumire inde Deus usenui irumu inde? Ape teremaa puxi neruixawa, maa repuderi rame resu isui uyurawa rame inde purangasawa rupi.
22 Amu prezu Deus usenuiwaa aete yaneruixawa uyurawawaa, yawete yuiri yepe usenuiwaa tiwa prezu aete Kristu umprezu ae.
23 Kristu upiripana penye sipiwasuwaa irumu ape tepemanduari apigawaita supe aramawaita penye.
24 Ape, semuita, peiku kuaye peikuwaa kuera yawe usenuiwaa irumu muiri penye yawete peiku Deus irumu.
Maitaa yaiku arama
25 Timaa Deus umbeu ixe arama aintarese kuaita kunyamukuita tiwaitare umendari, maa hambeu penye arama hamanduarisawa pepuderi pesendu ixe arama sesewara kua purangasawa yaneruixawa uxariwaa sepia upe.
26 Puxuwerawa kuiri yanerese, ape purangate peikure kuaye peikuwaa yawe kuiri.
27 Maitaa reriku nerimiriku? Teresikari reyuiri isui. Maitaa ximirikuimawaa inde? Teresikari nerimiriku arama.
28 Maa tiremunya pekadu reyuka rame nerimiriku arama, tiyuiri umunya ipekadu arama kunya uriku rame imena. Maa tiaintaupuderi timaarese ainta kua mundu upe kuaita urikuita aintarimiriku kuaita yuiri urikuita aintamena, ape hambeu penye arama tiarama pepurara.
29 Hambeu penye arama semuita, kuayentuana yanerunde kua ara, ape kuiri kuri pexari aintaumanduari ximirikuimawaa yawe kuaita urikuita aintarimiriku.
30 Pexari aintaumanduari uyaxiwimawaa yawe kuaita uyaxiuwaita, pexari aintaumanduari sasiyarawaa yawe kuaita suuriwaita, pexari aintaumanduari tiwaita aintauriku aintamaa yawe kuaita upiripanawaita.
31 Pexari aintaumanduari tiwaita upurakiwaa yawe kuaita upurakiwaita kua mundu upe, nyãse usasawana kuri kua ara.
32 Haputari timaarese peiku. Kua tiwa uriku ximiriku umanduari yaneruixawa yaraita, uputari umusuuri arama yaneruixawa.
33 Maa kua urikuwaa ximiriku umanduari kua mundu yara rese, uputari umusuuri ximiriku,
34 Nyãse mukuĩ umanduarisawa. Asui kua kunya viuva u kunyamuku kua tiuriku imena umanduari yaneruixawa yaraita, uputari ixupe aramawaa ae ipira irumu umanduarisawa irumu yuiri. Maa kua urikuwaa imena umanduari kua mundu yara rese, uputari umusuuri imena.
35 Yawe hanyee penye arama peiku arama puranga, tihaputari hapukuari pemanduarisawa, maa haputari hamunya puranga peajudari arama yaneruixawa panye pepia sui, yawaite maantu umuapatuka penye.
36 Yepe apigawa uriku tayera waimiana ae usasawana sangawa umendari arama, puranga uxari umunya maye uputariwaa. Urikute umendari, tiumunya pekadu umendari rame.
37 Maa kua uikuwaa santa umanduarisawa rese, kua tiwa uputari umanduari kirimbawa, uputari rame ipia sui umukaturu kua tayera imenaimawaa yawe, purangate yawe.
38 Ape umunya puranga kua uxari tayera umendari, maa kua tiwa uxari umendari puranga piri umunya.
39 Kua urikuwaa imena uiku kuri imena irumu upaka ramere ae, maa umanu rame isui upuderi usikari imena arama maye uputariwaa yawe aintasuiwara kuaita Kristu miraita.
40 Maa hamanduari suuri kuri kua viuva uiku rame yepenyu, kua Deus Espiritu uxari hambeu hamanduari yawe.
