1 Kurintuwaraita 9:1-27
9 Maitaa tiserá uyurawa ixe? Maitaa tiserá Kristu umunduwaa ixe? Maitaa tiserá hamaa yaneruixawa Jesus? Maitaa tiserá penye haruriwaita Kristu ipiri?
2 Tirame amu ukuawa umunduwaa ixe, penyete pekuawa nyãse hapuraki pepiterupi ape pepuderi pekuawa yaneruixawa umundu ixe.
3 Yawe hambeu ainta supe kuaita uputariwaita aintaukuawa serese:
4 —Maitaa tipuranga yambau yau yuiri?
5 Maitaa tiyapuderi yarasu yanerimiriku uruyariwaita yaneirumu aintayawe kuaita amuita Kristu umunduwaita, yaneruixawa imuita yuiri, Sefa yuiri?
6 Maitaa anyunte Barnabe ixe yuiri tiyapuderi yapitu yapuraki yaganyari arama?
7 Maitaa tiserá aintauxari ainta supe arama kuaita suraraita maantu aintausu arama kera kiti? Maitaa tiumbau iya kua uyutimasara? Maitaa tiserá uu tapira kambi yukise kua usarusara tapira?
8 Maitaa apigawa nyenga kua hambeuwaa? Maitaa tiserá Deus nyenga kuximawara umbeu kuaye?
9 Kuxima umpinima ipapera upe kua Muize: Terepukuari bui yuru kua upurakiwaa. Maitaa Deus umanduari bui rese?
10 Maitaa tiserá yaneresewara Deus unyee yawe? Ẽẽ, yaneresewara kua aintaumpinima kuxima. Usaru uikupuku kua upurakiwaa kupixawa upe kua upuuwaa usaru uyuka iyara arama.
11 Yayutima rame maa pepiterupi kua yamukaturu arama pemanduarisawa maitaa maa tipuranga yayuka peirumu kua watariwaa yande arama.
12 Pexari amuita supe aintaumbuewaa rikuyara; siya xinga yapuderi yayuka pesui yambuewaa rikuyara; maa yande tiyaputari yayuka yambuewaa rikuyara tiarama yamunya puxi ixupe kua nyenga purangawaa Kristu rese.
13 Maitaa tiserá pekuawa kuaita upurakiwaita templu upe aintauwasemu aintaumbau arama templu upe? Asui kuaita yuiri uyukáwaita nimbawa Deus supe, aintaumbau kua aintauyukáwaa Deus supe?
14 Yawete yuiri kuiri Deus uxari aintauyuka aintaumbau arama irumu kua nyenga purangawaa kuaita umbuewaita kua nyenga purangawaa.
15 Maa tihaputari sikuyara kua hambuewaa, tiyuiri hampinima haganyari arama seyara arama. Nyãse haputari maa hamanu ixe tiarama hapuderi hambeu puranga haiku.
16 Tihapuderi hambeu seresewara puranga hambue resewara kua nyenga purangawaa, nyãse harikute hambue arama ae. Puxuwerawa kuri uri serese tirame hambue kua nyenga purangawaa.
17 Suuri rame hambue kua nyenga Deus kuri upagari ixe arama. Yatima rame hambue ae Deus kuri umundu hambue arama ae.
18 Awataa kuri upagari ixe sikuyara? Nyãse tihaputari aintairumu sikuyara kuaita miraita rikuyara kua hambuewaa, maa haxari aintaukuawa kua nyenga purangawaa sikuyaraimawaa irumu, asui tihapuderi hapurandu aintairumu seyara arama.
19 Timaa apigawaita aintaumprezu ixe maa ixepawate hayuxari ainta supe arama ixe, haganyari arama Yurupari sui muiri hapuderi.
20 Hapurungita irumu ixe aintairumu kuaita judewita, hapurungita aintayawe kuaita judewita haganyari arama kuaita judewita. Timaa haiku Deus nyenga kuximawara rese maa hapurungita aintayawe kuaita uikuwaita Deus nyenga kuximawara rese haganyari arama kuaita uikuwaita Deus nyenga kuximawara rese.
21 Ixe haruyariwate Deus nyenga kuximawara, haiku Kristu nyenga rese, maa hapurungita irumu ainta supe kuaita tiwaita uriku Deus nyenga kuximawara, hapurungita aintayawe haganyari arama kuaita tiwaita uriku Deus nyenga kuximawara.
22 Hapurungita rame ainta supe kuaita pituawaita hapurungita aintayawe kuaita pituawaita haganyari arama pituawaita. Haxari panye miraita umanduari ixe aintarumuara yawe, hawajudari ainta puranga panye hakuawasawa irumu haganyari arama yepeyepe aintasuiwara.
23 Hamunya panye kua hamunyawaa sesewara kua nyenga purangawaa uabensuari arama puranga ixe irumu.
24 Maitaa tipekuawa, aintauputari irumu aintauganyari arama prezenti aintauyana panye, maa yepenyu uganyari kua prezenti; yawete yuiri penye peyana puranga peganyari arama kua prezenti.
25 Panye kuaita uyanawaita aintaumukaturu pruntu aintapira, yawe aintaumunya aintauganyari arama yepe kurua mundu pura, maa yande yaputari yaganyari arama Deus irumu kua kurua tiwa upawa.
26 Ape tihayana yawe kua tiwa ukuawa maa kiti usu. Timaa hamunya yawe kua unupawaa iwitu.
27 Maa haxari sepira upurara, asui hamuserana ae tiarama aintaumuserana ixe kuaita amuita hambue rire.
