1 Tesalunikawaraita 5:1-28
5 Penye semuita, timaa arama hampinima penye arama sangawa kua ara.
2 Nyãse uri kuri rame penyete pekuawa yaneruixawa rangawa kuaye mundawasu uriwaa yawe pituna.
3 Aintaumbeu rame kuri, timaarese peiku puranga, asui kutara kuri umukanyemuwaa usika aintarese, kuaye yepe kunya uriku yawe imembira, asui tikuri maa kiti ueskapari ae isui. Yarikute yasaru uri
4 Maa penye semuita, timaa peiku pitunawasuwaa upe upisika arama penye kua ara tiwa upe maa rese penye, kuaye mundawasu yawe.
5 Nyãse panye penye turi rairaita penye, murutingawaa upe rairaita penye; nyãse timaa pituna yara yande, tiyuiri pitunawasuwaa upewaita yande.
6 Ape timaa ukiriwaita yande, aintayawe kuaita amuita, maa yasaru puranga yakuawana ara yuiri.
7 Nyãse kuaita ukiriwaita aintaukiri pituna rame; asui kuaita ukauwaita aintaukau pituna rame.
8 Ape yande murutingawaa upe yaraita yarikute yakuawa ara, yamundeu yanerese yanekamixa uruyarisawa, gustarisawa yuiri, asui yaxari yaneakanga rese kua kapasete yasaruwaa yamaa umukaturuwaa yande.
9 Nyãse timaa Deus uputari yande ipiaiwasawa runde, maa uputari umukaturu yande irumu kua yaneruixawa Jesus Kristu,
10 Kua umanuwaa yaneresewara yaiku arama kuri irumu u yapaka rame yande, u yakiri rame yuiri.
11 Ape peyumusuuri perumuaraita irumu, asui pexari uyukiriari puranga panye penye kuaye pemunyawaa yawe.
Maitaa yamunya puranga
12 Asui kuiri yapurandu penye yanemuita, perespetari puranga kuaita upurakiwaita pepiterupi, kuaita serakuenawaita yaneruixawa rese, kuaita umbeuwaita penye arama.
13 Puranga pemaa ainta, pegustari resewara ainta, aintamuraki resewara. Peyumusuuri perumuaraita irumu.
14 Yambeu penye arama penye yanemuita, pepurungita aintairumu kuaita tiwaita uruyari puranga, pemusuuri kuaita sasiyarawaita, peajudari kuaita pituawaita, pemuturusu pepia aintairumu muiri ainta.
15 Tepexari amu umunya ixupe arama puxi kua umunyawaa ixupe puxi, pesikari pemunya puranga penye arama panye aintairumu kuaita amuita.
16 Peyumusuuri yawewarawate.
17 Pepurandu Deus irumu, tepekuere.
18 Pemee ixupe arama purangawaa yawewarawate, nyãse yawe Deus uputari peirumu Kristu Jesus rese.
19 Tepemuweu Espiritu.
20 Tepemutenyuntu kua aintautitikawaa.
21 Pesaã pemaa panye maa, asui kua purangawaa pemukaturu penye arama ae.
22 Petirika isui panye kua puxuwerawa.
Kuekatu
23 Asui kua Deus uxariwaa timaarese penye, yaputari uxari ixupe arama panye penye, umukaturu kuri panye pepia, panye pemanduarisawa, panye pepira yuiri, tiarama yuiri periku perese puxuwerawa uri rame kuri kua yaneruixawa Jesus Kristu.
24 Supiwa kua usenuiwaa penye, nyãse umunya kuri kuaye umbeuwaa yawe.
25 Penye yanemuita, pepurandu yanerese Deus irumu.
26 Pesuanti puranga peimuita, pebejari ainta.
27 Yaneruixawa rese hambeu penye arama:
—Pexari arama panye yanemuita uleri kua yampinimawaa.
28 Kuiri yaneruixawa Jesus Kristu purangasawa uiku peirumu panye.
