2 Juão 1:1-13
1 Ixe serakuenawaa kuekatu ixupe kua kunya Deus uparawakawaa, ainta supe kuaita imembiraita yuiri, kuaita hagustariwaita, maa timaa ixenyu hagustari ainta, maa aintayuiri panye kuaita ukuawawaita kua nyenga supiwa;
2 Sesewara kua nyenga supiwa uikuwaa yanepia upe, uiku yuiri kuri yaneirumu yawewarawate.
3 Supiwa upe gustarisawa upe yuiri kuri yanepaya Deus uxari yande arama ipurangasawa, pirasua yuiri umaa yande arama, uxari yuiri timaarese yande, ae yuiri kua Jesus Kristu yanepaya Deus raira.
Yayugustari arama
4 Suuri ixe turusu hawasemu rame yepeyepe kuaita nembiraita aintauiku sese kua nyenga supiwa kuaye yanepaya Deus umbeuwaa yawe yande arama.
5 Maa inde kunya hambeu inde timaa hampinima resewara nyenga pisasuwaa, maa kua nyenga yarikuwaa uyupirungawa suiwara, yayugustari arama.
6 Yawesawa kua gustarisawa, yamunya arama kuaye umbeuwaa yawe, aete kua umbeuwaa pesenduwaa uyupirungawa suiwara peiku arama sese kua gustarisawa.
Maitaa kuaita ugananiwaita
7 Nyãse siya gananiwerawaita aintauwata kua mundu upe, aete kuaita apigawaita umbeuwaita timaa Jesus Kristu uri ipira upe; kua yawewaa gananiwera ae, Kristu ruanyana ae.
8 Pemaa pesui tiarama ukanyemu pesui kua yapurakiwaa resewara, maa periku arama kuri sikuyara panye.
9 Awa umanduari amu kiti, tiyuiri uiku sese kua Kristu nyenga tiuriku Deus, asui kua uikuwaa Kristu nyenga rese urikute yanepaya Deus Taira yuiri.
10 Yepe uri rame pepiri tirame ururi kua nyenga, tepesuanti ae peruka upe, tepemukuema ae.
11 Nyãse kua umukuemawaa ae uajudari ae umunyawaita puxuwerawaita rese.
12 Harikure turusu hampinima arama penye arama, tihaputari hampinima penye arama tinta irumu papera upe, maa hamanduari hasu hamaa pepiri yakuntari arama puranga yayumusuuri arama turusu.
13 Aintaumundu inde arama kuekatu kuaita imembiraita kua neamu, Deus uparawakawaa.
