2 Kurintuwaraita 13:1-14
13 Kuiri musapirisawa hayuiri hamaa pepiri. Mukuĩ u musapiri umbeu rame amu resewara yarikute yasendu ixupe aintaumaa rame umunya ipuxuwerasawa.
2 Kuaita umunyawaita puxuwera kuxima, aintayuiri amuita, kuxima hambeu ainta supe hayuiri rame yuiri tikuri haxari ueskapari ainta. Kuiri yuiri haikure pesui hambeu penye arama kuaye hambeuwaa yawe kuxima.
3 Pesikari pekuawa supiwa upurungita rame Kristu seyuru sui, pepuderi pekuawa arama inyenga kua hambeuwaa nyãse timaa pitua ukuawasawa upuraki pepia upe senyenga irumu maa kirimbawa ae.
4 Aintaunupa uyari kurusa rese pepia ae, maa upakate ae Deus kirimbawasawa irumu. Pituawaita yande Kristu rese, maa peresewara yapakate yande irumu kua Deus kirimbawasawa.
5 Pemaa mayetaa pemanduarisawa yawaite tiperuyari supiwa; pesaã pemaa penyepawate mayetaa pepia. Maitaa tipekuawa Jesus Kristu uiku peiya upe? Maitaa peyawi Kristu rese?
6 Haputari pekuawa arama pepia upe timaa yayawi Kristu rese.
7 Hapurandu Deus irumu tiarama pemunya pepekadu. Timaa yaneresewara yaputari pemunya puranga; puranga arama aintaumaa yande, maa yaputari pemunya puranga pepia sui supiwa, maa aintaumanduari yayawi.
8 Timaa yapuderi yamunya puxi ixupe kua supiwa, maa yamunya ixupe panye purangawaa.
9 Ape suuri yande pitua yande kirimbawa irumu penye. Anyunte yapurandu peirumu peyumukaturu arama puranga.
10 Ape hampinima penye arama haiku ramere pesui, tiarama hamaa irumu kuri pepiri hambeu kuri kirimbawa penye arama pepekadu, kuaye yaneruixawa yawe hambeu hasupiri arama penye timaa hamburi arama penye.
Uputari aintauyumukaturu
11 Semuita, anyu aramawaa hambeu penye arama hasuana pesui peyumukaturu, peyumusuuri, pexari yepewasu pemanduarisawa, timaarese peiku perumuaraita irumu, ape kuri kua Deus uxariwaa peyugustari timaarese yuiri penye uiku kuri peirumu.
12 Pesuanti peanamaita puranga, pebejari ainta.
13 Panye kuaita Deus umukaturuwaita aintaumundu kuekatu penye arama.
Uputari Deus uabensuari ainta
14 Yaputari uiku pepia upe kua ipurangasawa yaneruixawa Jesus Kristu, asui yaputari kua Deus gustarisawa, kua Espiritu Santu yepewasusawa yuiri uiku peirumu panye penye.
