2 Kurintuwaraita 3:1-18
3 Maitaa yambeu yuiri mukuĩsawa yaneresewara puranga? Maitaa yaputari yanemuita aintaumpinima penye arama yaneresewara puranga aintayawe kuaita yepeyepeita, maitaa yaputari aintaumpinima yaneresewara puranga?
2 Penyete pexari aintaukuawa yaneresewara irumu kua purangawaa yampinima pepia upe aintauleri arama ae panye apigawaita.
3 Pexari aintaukuawa perikute Kristu inyenga pepia upe kuaye yaxariwaa yawe. Timaa yampinima tinta irumu pepia upe, maa Deus Espiritu irumu kua upakawaa. Timaa yampinima ae ita rese, maa pepia upe.
4 Kristu resewara yaxariana yanepia Deus rese puranga.
5 Timaa yaxari yanepia yanerese pawantu. Timaa yapuderi yamunya ixupe arama puranga yakuawasawa irumu, maa Deus uxari yande arama ukuawasawa purangawaa.
6 Uxari yakuawa yambue arama inyenga pisasuwaa, aintaumpinima irumu, maa Espiritu irumu yambue inyenga pisasuwaa. Kua aintaumpinimawaa kuxima uxari yamanuwaita yande, maa kua Espiritu uxari upakawaita yande.
7 Kirimbawa Deus umuturi Muize rese umpinima irumu ita rese kua inyenga uxariwaa aintaukuawa aintaukanyemu aintapekadu resewara. Tiaintaupuderi aintaumaa Muize ruwa nyãse kirimbawa umuturi sesewara kua sendiwaa usasawa aintasui.
8 Ape kuri kirimbawa piri yanerese uxari irumu yapuraki irumu kua Espiritu.
9 Umuturi rame aintarese puranga umbeu irumu aintaukanyemu arama ainta, puranga piri kuri umuturi aintarese umukaturu arama ainta ipurangasawa irumu.
10 Kua inyenga kuximawara umuturi aintapia upe kuxima, maa kuiri tiumuturi nyãse puranga piri isui kua nyenga pisasuwaa kuiri.
11 Purangawaa rame kua nyenga usasawa aintasui, puranga piri isui kua nyenga tiwa upawa.
Espiritu uyurawa yande
12 Kuiri yasaru yamaa kua purangawaa Deus umbeuwaa yande arama, ape kirimbawa yambeu kua inyenga.
13 Tiyamunya Muize yawe, uxariwaa yepe veu suwa rese tiarama israelitaita umaa kua purangawaa usasawa isui.
14 Maa santawaa aintaakanga kuaita israelitaita kuximare kuiri yuiri; sesaimawaa aintaumanduarisawa aintauleri irumu Deus inyenga kuximawara, aintaurikure aintaruwa rese kua usikindawa aintasui Deus, nyãse yepenyu Kristu upuderi umburi aintasui ae.
15 Maa kuiri yuiri sesaimawaa aintaumanduarisawa aintauleri irumu kua Muize umpinimawaa.
16 Maa mairame yepe uxari ipia yaneruixawa rese umburi isui kua umuapatukawaa umanduarisawa Deus sui.
17 Yaneruixawate kua Espiritu, asui uyurawa yande uiku resewara yaneruixawa Espiritu yanepia upe.
18 Kuiri muiri yande, timaa yayumimi yaneruwa Deus sui, maa yamaa yaneruixawa umuturi purangawa kuaye yamaa yawe waruwa upe, utrukari yande purangawaa iyawe. Yawe umunya yande arama kua yaneruixawa Espiritu.
