2 Kurintuwaraita 8:1-24
8 Semuita, yaputari pekuawa arama sese kua purangasawa Deus uxari ainta supe kuaita ingreja supe aramawaita Masedunia upe.
2 Nyãse aintaupurara resewara suuri ainta turusu, asui pirasua resewara ainta aintaukuawa aintawajudari turusu amuita.
3 Turusu aintauxari ainta supe kuaye aintaupuderi yawe, hambeu aintaresewara supiwa, aintapia sui aintauxari ainta supe arama puranga aintapawate.
4 Kirimbawasawa rupi aintaupurandu aintawajudari Deus supe aramawaita pirasuawaita, aintaumundu ainta supe aintamaa arama.
5 Tiaintaumunya kuaye yamanduariwaa yawe, maa aintauyupiru aintauyuxari aintapawa yaneruixawa supe, asui yande arama yuiri kuaye Deus uputariwaa yawe.
6 Asui yambeu Titu supe umbawa arama pepiterupi yuiri kua imuraki purangawaa uyupiruwaa kuera.
7 Kuiri puranga pemunya ainta supe panye, pexariana pepia purangawaa Deus rese, pembeu inyenga purangawaa, pekuawa puranga, pesikari pepuraki ixupe, pegustari yande yuiri, ape perikute pemunya yuiri puranga kua muraki purangawaa.
8 Tihambeu peajudari ainta tirame peputari anyunte haputari pexari yakuawa pegustari ainta supiwa.
9 Pekuawate sese kua purangawaa umunya yande arama yaneruixawa Jesus Kristu; rikuwaa ae maa yaneresewara uri uwata yanepiterupi pirasuawaa yawe riku arama kuri penye.
10 Hambeu penye arama yepe nyenga, purangate pemunya panye kua peyupiruwaa pemunya yepe akayu kuxima.
11 Kuiri pembawa pemunya ae kutara kuaye suuriwaa yawe peyupiru pemunya irumu kua perikuwaa.
12 Suuri rame pemee ainta supe aintamaa arama suuri kuri aintausuanti ae, pemee sesewara kua perikuwaa, timaa sesewara kua tiwa periku.
13 Tihaputari aintauriku turusu periku arama kuaira, maa haputari periku pemaa yepewasu.
14 Maa haputari yepewasu periku pemaa, ape pepuderi pexari ainta supe kuaye peputariwaa yawe nyãse kuiri turusu periku pemaa, asui amu viaji kuri aintauxari penye arama yepewasu kuri penye.
15 Yawe aintaumpinima kuxima: Kua uwasemuwaa turusu tiuriku turusu isui kua uputariwaa, asui kua uwasemuwaa kuaira tiwatari ixupe ae.
Titu uajudari Paulu
16 Hamee purangawaa Deus supe, nyãse uxari Titu usaru penye puranga ipia sui seyawe.
17 Nyãse uputari umunya kua yapuranduwaa irumu, asui uputari umaa pepiri ipia sui nyãse kirimbawa uputari uajudari.
18 Yamundu irumu kua yanemu aintaukuawawaa sese panye ingreja yaweyawe, nyãse puranga umbeu kua nyenga purangawaa.
19 Kuaita ingrejaita uparawaka ae usu arama yaneirumu uajudari yande yamunya kua muraki purangawaa, aintaumee arama purangawaa Deus kuaita miraita, aintaumee arama purangawaa Deus supe kuaita miraita, aintaukuawa arama suuri yapuraki.
20 Tiyaputari amu umanduari puxi yanerese sesewara kua prezenti purangawaa yaxariwaa kuri ainta supe.
21 Nyãse yaputari yamunya purangawaa Deus umaa, apigawaita umaa arama yuiri.
22 Ape yamundu aintairumu yanemu, kuxima yamaa maye umunya, ape yakuawa uajudari Deus supiwa, ape kuiri kirimbawa uputari uajudari penye nyãse uxari ipia perese turusu.
23 Asui kua Titu yepewasu seirumu, uajudari ixe hapuraki penye arama; asui kua ingreja puraita aintaumundu kuaita yanemuita Kristu purangasawa rese yuiri.
24 Ape pexari ingreja supe aramawaita aintaukuawa pegustari ainta, pexari aintaukuawa kuaita apigawaita supiwa kua purangawaa yambeuwaa ainta supe sesewara.
