2 Tesalunikawaraita 2:1-17
2 Kuiri yambeu penye arama sese kua yaneruixawa Jesus Kristu uri kuri yayumuatiri arama irumu.
2 Tepexari aintautiari pemanduarisawa; tepexari yuiri aintaumutawa penye espiritu irumu, u aintanyenga irumu, u aintapapera irumu pemanduari yamunduwaa ae, pemanduari usikana yaneruixawa rangawa.
3 Tepexari amu uganani penye, nẽ kuaira; nyãse siya kuri uxari kua aintauruyariwaa senundere sangawa usika, uri yuiri kuri kua apigawa puxuwerawa aete yuiri kua infernu raira.
4 Kua umuruanyanawaa upuamu aintaruaxara panye Deus, panye aintaumanduariwaa aintairumu yuiri, ape usu kuri uwapika Deus templu upe, asui umbeu kuri sesepawate Deus ae.
5 Maitaa tipemanduari hambeuwana penye yawewaa rese, haiku rame kuera peirumu?
6 Asui pekuawate yuiri awa kirimbawasawa umuapatukare uri, anyunte kuri uri sangawa usika rame kuri.
Uri kuri kua puxuwerawa
7 Nyãse kua puxuwerawa upurakiana uyumimisawa kua mundu upe, anyunte usaru aintautirika kua umuapatukarewaa uyumukameana ae.
8 Asui kuri uyumukame kua puxuwerawa, asui yaneruixawa Jesus uyuká kuri ae iwitu irumu usemuwaa iyuru sui, asui umukanyemu kuri ae umaa irumu uri.
9 Asui kua puxuwerawa uri kuri Yurupari ukuawasawa irumu, panye kirimbawasawa, umunya kuri umukame arama aintaumaa tiwaita yamunya, uganani arama ainta.
10 Asui panye gananisawa puxuwerawa irumu kuri uganani kuaita ukanyemuwaita, nyãse timaa aintauputari aintaugustari kua nyenga supiwa umukaturu aramawaa ainta.
11 Ape yawewaa resewara Deus uxari aintauganani ainta arama supiwa kua gananisawa.
12 Tiarama umukaturu ainta panye kuaita tiwaita uruyari kua nyenga supiwa, nyãse suuri aintaumunya aintapuxuwerasawa.
Uputari aintauiku santa
13 Nyãse yarikute yamee purangawaa Deus supe perese yawewarawate, penye yanemuita, yaneruixawa uputariwaita; nyãse kuxima Deus uyupiru uparawaka penye umukaturu arama penye, Espiritu uxari resewara ixupe arama penye peruyari resewara kua supiwa.
14 Nyãse sesewara usenui penye irumu kua nyenga purangawaa yambuewaa, periku arama kuri ipurangasawa kua yaneruixawa Jesus Kristu.
15 Ape penye semuita, peiku santa, peruyari puranga kua nyenga yambuewaa sese penye, yanenyenga irumu, u yampinimawaa irumu yuiri.
16 Kuiri kua yaneruixawa Jesus Kristu, ae yuiri kua yanepaya Deus kua ugustariwaa yande uxari yuiri yande arama yayumusuuri arama ipupe tiwa upawa, asui ipurangasawa irumu uxari yande arama kua yasaruwaa yamaa purangawaa;
17 Umusuuri kuri pepia, uxari santa peiku pemunyawaita purangawaita rese, penyenga purangawaa rese yuiri.
