2 Timuteu 2:1-26
2 Ape inde seraira reyumukirimbawa ipurangasawa rese kua Kristu Jesus.
2 Asui kua resenduwaa seirumu, aintapiterupi siya usenduwaita, rembeu ae ainta supe kuaita apigawaita purangawaita, ukuawaita, aintaumbue arama amuita yuiri.
3 Repurara inde yuiri seirumu kuaye Kristu Jesus surara purangawaa yawe.
4 Nyãse timaa yepe surara uyuka ipia kua mundu yara rese surara rame ae, nyãse anyunte uputari umusuuri kua umunduwaa ae.
5 Yawete yuiri kua uyanawaa tikuri uyuka kua kurua tirame uyana kuaye aintaumbeuwaa yawe.
6 Aete kua uyutimasara upurakiwaa, ae kuri uyupiru uyuka ixupe arama mitima iya.
7 Remanduari sese kua hambeuwaa inde arama, nyãse yaneruixawa kuri uxari rekuawa panye maantu.
8 Remanduari Jesus Kristu rese, kua upuamuwaa manusawa sui, kua Davi rimiariru, kuaye senyenga purangawaa.
9 Hapurara sesewara kua nyenga purangawaa, aintaupukuari ixe kuaye puxuwerawa yawe, maa timaa aintaupukuari kua Deus nyenga.
10 Sesewara haaguentari panye aintaresewara kuaita Deus uparawakawaita, aintauriku arama yuiri kuri kua salvasão Kristu Jesus rese irumu yuiri ipurangasawa tiwa upawa.
11 Supiwa kua nyenga, yamanu rameana irumu, yapaka kuri irumu yuiri.
12 Yaaguentari rame, ape kuri serakuena kuri yande irumu, yayumimi rame sesewara asui ae yuiri kuri uyumimi yaneresewara.
13 Tirame supiwa yande ixupe arama, maa ae kuri supiwa yande arama, nyãse tiupuderi uyumimi sesewarapawate.
Retentuwaita rese
14 Rembeu ainta supe kua nyenga. Rembeu ainta supe netestemunyu Deus usendu, tiarama aintauyumuserana nyenga tenyuntuwara irumu, nyãse timaa uajudari ainta, anyunte umuaiwa kuaita usenduwaita ae.
15 Resikari reyuxari Deus supe arama kuaye upurakiwaa purangawaa yawe, tiwa utiĩ ae, ukuawa umbue puranga kua nyenga supiwa.
16 Teresendu ixupe kua aintaumbeuwaa tenyuntu retentuwaa, anyunte uxari puxuwera piri aintauiku.
17 Asui kua aintanyenga umbau kuaye merewa yawe, aintapiterupi aintate kuaita Imeneu, Filetu yuiri.
18 Asui aintauyusupari ainta isui kua nyenga supiwa, aintaumbeu usasawana kua yapuamu manusawa sui, asui aintaumuaiwa yepeyepe uruyarisawa.
19 Maa santa uiku kua Deus umbeuwaa uyupiru, yawe umbeu yakuawa arama santa ae:
—Yaneruixawa ukuawate kuaita iyaraita. Umbeu yuiri:
—Pexari aintauxari aintapuxuwerasawa panye kuaita umbeuwaita aintauruyari yaneruixawa rera rese.
Yamburi arama puxuwerawa
20 Ape turusu uka upe siya siruita, maa timaa aintapawa kuaita uru suiwaraita, prata suiwaraita yuiri; maa aikue yuiri kuaita mirá suiwaraita, tuyuka suiwaraita yuiri, asui amuita purangawaita siruita, asui amuita tenyuntuwaraita riru aramawaa.
21 Asui sã yepe mayewaa rame uyumukaturu isui panye kua puxuwerawa, ape kuri purangawaa siru aramawaa ae, ikiaimawaa, asui suixawa upuderi upurakari ae, asui suuriana ae umunya panye maa purangawaa.
22 Reyawawa isui kua aintauputariwaa aintaumunya puxi kuaita kurumiwasuita. Resu sakakuera kua purangawaa, uruyarisawa yuiri, gustarisawa yuiri, timaaresesawa yuiri, aintairumu panye kuaita upuranduwaita yaneruixawa irumu aintapia ikiaimawaa irumu.
23 Teresendu ainta supe aintaupurandu rame aintausendu neirumu nyenga tenyuntuwara, nyãse anyunte aintauxari puxi yamanduarisawa.
24 Nyãse kua upurakiwaa yaneruixawa supe timaa upuderi uyakawa, maa timaa ipiaiwa urikute umaa panye ainta; urikute ukuawa umbue; urikute umuturusu ipia;
25 Urikute umbeu ainta timaa ipiaiwasawa irumu kuaita umuruanyanaita ae, usaru arama Deus uxari sasiyara aintaumanduari aintapuxuwerasawa, aintaukuawa arama yuiri puranga kua nyenga supiwa;
26 Aintauyuiri arama aintaumanduari puranga, aintauyurawa arama Yurupari uyusana sui, nyãse umuyusanawaita ainta, aintaumunya arama kuri kuaye uputariwaa yawe.
