2 Pedru 2:1-22
2 Nyãse aintaupuamu kuera miraita piterupi kuaita utitikawaita gananiwerawaita, asui yawete yuiri kuri aintaupuamu pepiterupi kuaita umbuewaita gananiwerawaita, uyumimisawa upe kuri aintaumbue kua nyenga uxariwaa yakanyemu, aintauyumimi yuiri sesewara kua yaneruixawa upiripanawaa ainta, aintauyuganani aintapawa aintaukanyemu arama kutara.
2 Asui siya kuri aintausu aintarakakuera aintaumunya arama kuaye aintauputariwaa yawe, asui aintaresewara kuri aintaumbeu puxi sese kua pee supiwa.
3 Asui aintauputari resewara turusu aintamaa arama aintauganani penye nyenga gananisawa irumu, kuximare kutara tiaintaumukaturu ainta, asui kua uxariwaa aintaukanyemu tiukiri.
4 Nyãse tirame Deus umukaturu kuaita anjuita aintaumunya rame puxi, maa umburi ainta infernu kiti, pitunawasuwaa kiti umbeu arama kuri aintaresewara;
5 Tiyuiri umukaturu kua mundu kuxima, maa umukaturu kua Nue, kua umbeuwaa kua nyenga purangawaa kuaita seti sumuaraita yuiri, uxari rame kuera uyapumi kua mundu teresemuwaa aintairumu kuaita tiwaita umanduari Deus;
6 Tiyuiri Deus umukaturu kuaita tetamaita Suduma, Gumura yuiri, maa uxari aintaukai ate upita sinza ainta, uxari aintaukanyemu panye, asui uxari aintaumaa aintarangawa ainta kuaita tiwaita uputari umanduari Deus;
7 Maa umukaturu rame kuera kua apigawa Lo kua umaawaa purangawaa yawe, kua sasiyarawaa ipia aintaumunya resewara kuaye aintauputariwaa yawe kuaita puxuwerawaita,
8 Nyãse uiku rame kuera aintapiterupi kua apigawa purangawaa, sasiyara umanduarisawa purangawaa muiri ara umaa rame usendu rame yuiri maye aintaumunya panye puxuwerawa.
9 Ape yakuawa yaneruixawa ukuawa umukaturu kuaita umanduariwaita ae puxuwerawa uri rame aintarese, ukuawa yuiri umpurarakari kuaita puxuwerawaita anyu aramawaa ara upe,
10 Kuaita aintaumunyawaa yawe kuaye aintapira uputariwaa yawe aintaumunya kua puxuwerawa, kuaita umbeuwaita puxi panye guvernu rese. Tiaintausikie aintaumunya kuaye aintauputariwaa yawe, tiaintausikie aintaumbeu puxi serakuenawaita rese.
11 Maa kuaita anjuita kirimbawa xinga ainta aintasui, tiaintaumbeu nyenga puxuwerawa aintarese yaneruixawa usendu.
12 Maa ainta kuaye suu yawe tiwaita ukuawa yawe ainta, aintausemu aintaumaa kua mundu aintaupisika ainta aintauyuká arama ainta, aintaumbeu sese kua tiwa aintaukuawa, aintaukanyemu kuri aintairumu kuaye aintaukanyemuwaa yawe.
13 Aintaupurara puxuwerawa resewara kua puxuwerawa aintaumunyawaa. Suuri aintapia nyãse puranga aintauiku aintapuxuwerasawa upe muiri ara. Ikiawaita ainta, puxuwerawaita ainta, aintauyumusuuri aintaumbau rame peirumu.
14 Teresemu aintaresa warixisawa irumu, tiaintakuere aintaumunya aintapekadu arama. Aintauganani aintaumanduarisawa kuaita tiwaita uiku santa. Anyunte aintaukuawa aintapia upe aintaumuasi turusu. Puxuwerawa rairaita ainta.
15 Aintauxari kua pee supiwa, asui aintauyusupari ainta, asui aintausu sapee rupi kua Beur raira kua Balaão, kua ugustariwaa uyuka imaa arama umunya resewara puxi;
16 Asui Deus uxari yepe burru tiwa upurungita umbeu ixupe ipuxuwerasawa apigawa nyenga irumu, asui umpitu umunya puxuwerawa kua utitikawaa.
17 Kuaye ii rukena tikangawaa yawe ainta, kuaye serenu yawe iwitu upeyuwaita. Umukaturu aintarunde kua pitunawasuwaa turusuwaa;
18 Nyãse nyenga tiapuwaa irumu aintaumbeu tiresewara aintaukuawa rese, asui aintauputari aintauganani ipupe kua aintapira uputariwaa umunya kirimbawa, kuaita apigawaita yawaite aintauyawawa aintasui kuaita uikuwaita puxuwerawa rese.
19 Aintaumbeu ainta supe aintauyurawa kuri ainta, maa kua umukanyemusara umprezu pukusawa ainta, nyãse kua uperderiwaa umprezu ae kua umuserawa ae.
20 Nyãse aintauyawawa rireana isui kua umukanyemusara kua mundu upewara aintaukuawa resewara kua yaneruixawa Jesus Kristu kua umukaturuwaa yande, asui aintauyupukuari mukuĩsawa aintarese kua umukanyemuwaa ainta, asui umuserana ainta, asui puxuwera piri aintauiku isui kua aintauikuwaa kuera.
21 Puranga maa tikuera aintaukuawa sese kua pee purangawaa isui aintaukuawa ae, asui aintauyereu isui kua nyenga purangawaa aintaumbeuwaa ainta supe.
22 Aintaumunya kuaye kua nyenga supiwa umbeuwaa yawe: Kua yawara uyereu umbau kua uwenawaa, asui kua tayasu aintaumuyasukawaa uyuiri mukuĩsawa uyenu lama ikiawaa upe.
