Ebrewita 1:1-14
1 Siya viaji Deus upurungita ainta supe kuaita yaneramunyaita, aintayuru sui kuaita utitikawaita.
2 Maa kua anyu aramawaa ara upurungita yande arama Taira rupi, kua uxariwaa ixupe uriku panye maantu, ipupe umunya kuera kua mundu.
3 Umuturi yanerese Deus purangasawa irumu, yepewasute ae Deus irumu, inyenga kirimbawa irumu umukaturu panye kua mundu, iwaka yuiri. Asui umbawa rire umburi panye yanepekadu, usu uwapika ikatusawa sui kua kirimbawawaa iwaka upewaa.
4 Asui uiku puranga piri aintasui kuaita anjuita, nyãse ae puranga piri sera aintarera sui.
Kristu rese anjuita rese yuiri
5 Nyãse tiawa supe aintasuiwara kuaita anjuita Deus umbeu: Seraira inde, uyi ara nepaya ixe. Tiyuiri umbeu: Ipaya kuri ixe, asui seraira kuri ae.
6 Asui umbeu yuiri mukuĩsawa, umundu rame kua Taira aintarundewara kua mundu kiti: Pexari panye Deus anjuita umee ixupe arama purangawaa.
7 Asui umbeu aintarese kuaita ianjuita: Umunya ainta iwitu yawe kuaita ianjuita, asui uxari tata sendiwaa yawe kuaita upurakiwaita ixupe.
8 Maa sese kua Taira umbeu: Inde Deus tiwa upawa kua netrunu. Asui umbeu yuiri: Umundu ainta purangawaa ibatuna irumu, Yaneruixawa Deus umunduwaa upe ae.
9 Regustari panye purangawaa, puxi remaa panye puxuwerawa, ape Deuste kua neDeus uyusena nerese kua azeti umusuuri arama inde, aintasui kuaita nerumuaraita.
10 Asui umbeu yuiri: Inde Yaneruixawa reyupiru kuera remunya kua mundu, asui kua iwaka, remunya ainta neipu irumu.
11 Aintaukanyemu kuri panye, maa inde reiku kuri yawewarawate; kuximawara kuri ainta kuaye rupa kuximawara yawe.
12 Remamana kuri ainta kuaye yamamana yawe rupa; asui retrukari kuri ainta kuaye yatrukari yawe yanerupa; maa inde interuwate kuri inde, maa inde tikuri tuyuwe inde.
13 Nyãse awa supe aintasuiwara kuaita anjuita Deus umbeu: Rewapika sekatusawa upe ate mairame kuri hamburi kuaita neruanyanaita neipi wira kiti.
14 Maitaa timaa espirituita kuaita upurakiwaita panye kuaita anjuita, umunduwaita ainta aintawajudari arama kuaita urikuwaita kuri mundu tiwa upawa?
